২. এল়কলোমৰগ্গো

১. কোসিযসিক্খাপদৰণ্ণনা

এল়কলোমৰগ্গস্স পঠমে কোসিযমিস্সকন্তি একেনাপি কোসিযংসুনা অন্তমসো তস্স করণট্ঠানে ৰাতৰেগেন নিপাতিতেনাপি মিস্সীকতং. সন্থতন্তি সমে ভূমিভাগে কোসিযংসূনি উপরূপরি সন্থরিত্ৰা কঞ্জিযাদীহি সিঞ্চিত্ৰা কত্তব্বতালক্খণং. কারাপেয্য নিস্সগ্গিযন্তি করণকারাপনপ্পযোগেসু দুক্কটং, পটিলাভেন নিস্সগ্গিযং হোতি. এত্থ চ ‘‘ইদং মে, ভন্তে, কোসিযমিস্সকং সন্থতং কারাপিতং নিস্সগ্গিয’’ন্তি (পারা. ৫৪৪) ইমিনা নযেন নিস্সজ্জনৰিধানং ৰেদিতব্বং, ইমস্সেৰ ৰচনস্স অনুসারেন ইতো পরং সব্বসন্থতং ৰেদিতব্বং. সক্কা হি এত্তাৰতা জানিতুন্তি ন তং ইতো পরং দস্সযিস্সাম.

আল়ৰিযং ছব্বগ্গিযে আরব্ভ কোসিযমিস্সকং সন্থতং কারাপনৰত্থুস্মিং পঞ্ঞত্তং, অসাধারণপঞ্ঞত্তি, অত্তনো অত্থায কারাপনৰসেন সাণত্তিকং, অত্তনা ৰিপ্পকতপঅযোসাপননযেন চতুক্কপাচিত্তিযং, অঞ্ঞস্সত্থায করণকারাপনেসু অঞ্ঞেন কতং পটিলভিত্ৰা পরিভুঞ্জনে চ দুক্কটং. ৰিতানাদিকরণে, উম্মত্তকাদীনঞ্চ অনাপত্তি. কোসিযমিস্সকভাৰো, অত্তনো অত্থায সন্থতস্স করণকারাপনং, পটিলাভো চাতি ইমানেত্থ তীণি অঙ্গানি. সমুট্ঠানাদীনি ধোৰাপনসিক্খাপদে ৰুত্তনযেনেৰাতি.

কোসিযসিক্খাপদৰণ্ণনা নিট্ঠিতা.

২. সুদ্ধকাল়কসিক্খাপদৰণ্ণনা

দুতিযে সুদ্ধকাল়কানন্তি সুদ্ধানং কাল়কানং অঞ্ঞেহি অমিস্সীকতানং. ৰেসালিযং ছব্বগ্গিযে আরব্ভ তাদিসং সন্থতং করণৰত্থুস্মিং পঞ্ঞত্তং, সেসং পঠমসদিসমেৰাতি.

সুদ্ধকাল়কসিক্খাপদৰণ্ণনা নিট্ঠিতা.

৩. দ্ৰেভাগসিক্খাপদৰণ্ণনা

ততিযে দ্ৰে ভাগাতি দ্ৰে কোট্ঠাসা. আদাতব্বাতি গহেতব্বা. গোচরিযানন্তি কপিলৰণ্ণানং. অযং পনেত্থ ৰিনিচ্ছযো – যত্তকেহি কত্তুকামো হোতি, তেসু তুলযিত্ৰা দ্ৰে কোট্ঠাসা কাল়কানং গহেতব্বা, একো ওদাতানং, একো গোচরিযানং. একস্সাপি কাল়কলোমস্স অতিরেকভাৰে নিস্সগ্গিযং হোতি, ঊনকং ৰট্টতি.

সাৰত্থিযং ছব্বগ্গিযে আরব্ভ তাদিসং সন্থতং করণৰত্থুস্মিং পঞ্ঞত্তং, কিরিযাকিরিযং, সেসং পঠমসদিসমেৰাতি. ইমানি পন তীণি নিস্সজ্জিত্ৰা পটিলদ্ধানিপি পরিভুঞ্জিতুং ন ৰট্টন্তি.

দ্ৰেভাগসিক্খাপদৰণ্ণনা নিট্ঠিতা.

৪. ছব্বস্সসিক্খাপদৰণ্ণনা

চতুত্থে ওরেন চে ছন্নং ৰস্সানন্তি ছন্নং ৰস্সানং ওরিমভাগে, অন্তোতি অত্থো. অঞ্ঞত্র ভিক্খুসম্মুতিযাতি যং সঙ্ঘো গিলানস্স ভিক্খুনো সন্থতসম্মুতিং দেতি, তং ঠপেত্ৰা অলদ্ধসম্মুতিকস্স ছব্বস্সব্ভন্তরে অঞ্ঞং সন্থতং করোন্তস্স নিস্সগ্গিযং হোতি.

সাৰত্থিযং সম্বহুলে ভিক্খূ আরব্ভ অনুৰস্সং সন্থতং কারাপনৰত্থুস্মিং পঞ্ঞত্তং, ‘‘অঞ্ঞত্র ভিক্খুসম্মুতিযা’’তি অযমেত্থ অনুপঞ্ঞত্তি, সা যেন লদ্ধা হোতি, তস্স যাৰ রোগো ন ৰূপসম্মতি, ৰূপসন্তো ৰা পুন কুপ্পতি, তাৰ গতগতট্ঠানে অনুৰস্সম্পি কাতুং ৰট্টতি, অঞ্ঞস্সত্থায কারেতুং, কতঞ্চ পটিলভিত্ৰা পরিভুঞ্জিতুম্পি ৰট্টতি, সেসং পঠমসদিসমেৰাতি.

ছব্বস্সসিক্খাপদৰণ্ণনা নিট্ঠিতা.

৫. নিসীদনসিক্খাপদৰণ্ণনা

পঞ্চমে পুরাণসন্থতং নাম যত্থ সকিম্পি নিসিন্নো ৰা হোতি নিপন্নো ৰা. সমন্তাতি একপস্সতো ৰট্টং ৰা চতুরস্সং ৰা ছিন্দিত্ৰা গহিতট্ঠানং যথা ৰিদত্থিমত্তং হোতি, এৰং গহেতব্বং. সন্থরন্তেন পন একদেসে ৰা সন্থরিতব্বং, ৰিজটেত্ৰা ৰা মিস্সকং কত্ৰা সন্থরিতব্বং, এৰং থিরতরং হোতি. অনাদা চেতি সতি পুরাণসন্থতে অগ্গহেত্ৰা. অসতি পন অগ্গহেত্ৰাপি ৰট্টতি, অঞ্ঞস্সত্থায কারেতুং, কতঞ্চ পটিলভিত্ৰা পরিভুঞ্জিতুম্পি ৰট্টতি.

সাৰত্থিযং সম্বহুলে ভিক্খূ আরব্ভ সন্থতৰিস্সজ্জনৰত্থুস্মিং পঞ্ঞত্তং, সেসং ততিযসদিসমেৰাতি.

নিসীদনসিক্খাপদৰণ্ণনা নিট্ঠিতা.

৬. এল়কলোমসিক্খাপদৰণ্ণনা

ছট্ঠে অদ্ধানমগ্গপ্পটিপন্নস্সাতি অদ্ধানসঙ্খাতং দীঘমগ্গং পটিপন্নস্স, সব্বঞ্চেতং ৰত্থুমত্তদীপনমেৰ, যত্থ কত্থচি পন ধম্মেন লভিত্ৰা গণ্হতো দোসো নত্থি. তিযোজনপরমন্তি গহিতট্ঠানতো তিযোজনপ্পমাণং দেসং. সহত্থাতি সহত্থেন, অত্তনা হরিতব্বানীতি অত্থো. অসন্তে হারকেতি অসন্তেযেৰ অঞ্ঞস্মিম্পি হারকে. সচে পন অত্থি, তং গাহেতুং ৰট্টতি. অত্তনা পন অন্তমসো ৰাতাবাধপ্পটিকারত্থং সুত্তকেন অবন্ধিত্ৰা কণ্ণচ্ছিদ্দে পক্খিত্তানিপি আদায তিযোজনং একং পাদং অতিক্কামেন্তস্স দুক্কটং, দুতিযপাদাতিক্কমে নিস্সগ্গিযং পাচিত্তিযং.

সাৰত্থিযং অঞ্ঞতরং ভিক্খুং আরব্ভ তিযোজনাতিক্কমনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, তিকপাচিত্তিযং, ঊনকতিযোজনে অতিরেকসঞ্ঞিনো ৰেমতিকস্স ৰা দুক্কটং. তিযোজনং হরণপচ্চাহরণে, ৰাসাধিপ্পাযেন গন্ত্ৰা ততো পরং হরণে, অচ্ছিন্নং ৰা নিস্সট্ঠং ৰা পটিলভিত্ৰা হরণে, অঞ্ঞং হরাপনে, অন্তমসো সুত্তকেনপি বদ্ধকতভণ্ডহরণে, উম্মত্তকাদীনঞ্চ অনাপত্তি. এল়কলোমানং অকতভণ্ডতা, পঠমপ্পটিলাভো, অত্তনা আদায ৰা অঞ্ঞস্স অজানন্তস্স যানে পক্খিপিত্ৰা ৰা তিযোজনাতিক্কমনং, আহরণপচ্চাহরণং, অৰাসাধিপ্পাযতাতি ইমানেত্থ পঞ্চ অঙ্গানি. এল়কলোমসমুট্ঠানং, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

এল়কলোমসিক্খাপদৰণ্ণনা নিট্ঠিতা.

৭. এল়কলোমধোৰাপনসিক্খাপদৰণ্ণনা

সত্তমে সক্কেসু ছব্বগ্গিযে আরব্ভ এল়কলোমধোৰাপনৰত্থুস্মিং পঞ্ঞত্তং. তত্থ পুরাণচীৰরধোৰাপনে ৰুত্তনযেনেৰ সব্বোপি ৰিনিচ্ছযো ৰেদিতব্বো.

এল়কলোমধোৰাপনসিক্খাপদৰণ্ণনা নিট্ঠিতা.

৮. জাতরূপসিক্খাপদৰণ্ণনা

অট্ঠমে জাতরূপরজতন্তি সুৰণ্ণঞ্চেৰ রূপিযঞ্চ, অপিচ কহাপণো লোহমাসকদারুমাসকজতুমাসকাদযোপি যে ৰোহারং গচ্ছন্তি, সব্বে তে ইধ রজতন্ত্ৰেৰ ৰুত্তা. উগ্গণ্হেয্য ৰাতি অত্তনো অত্থায দিয্যমানং ৰা যত্থকত্থচি ঠিতং ৰা নিপ্পরিগ্গহিতং দিস্ৰা সযং গণ্হেয্য ৰা. উগ্গণ্হাপেয্য ৰাতি তদেৰ অঞ্ঞেন গাহাপেয্য ৰা. উপনিক্খিত্তং ৰা সাদিযেয্যাতি ‘‘ইদং অয্যস্স হোতূ’’তি এৰং সম্মুখা ৰা, ‘‘অসুকস্মিং নাম ঠানে মম হিরঞ্ঞসুৰণ্ণং, তং তুয্হং হোতূ’’তি এৰং পরম্মুখা ঠিতং ৰা কেৰলং ৰাচায ৰা হত্থমুদ্দায ৰা ‘‘তুয্হ’’ন্তি ৰত্ৰা পরিচ্চত্তং যো কাযৰাচাহি অপ্পটিক্খিপিত্ৰা চিত্তেন অধিৰাসেয্য, অযং ‘‘সাদিযেয্যা’’তি ৰুচ্চতি. সচে পন চিত্তেন সাদিযতি, গণ্হিতুকামো হোতি, কাযেন ৰা ৰাচায ৰা ‘‘নযিদং কপ্পতী’’তি পটিক্খিপতি, কাযৰাচাহি অপ্পটিক্খিপিত্ৰা সুদ্ধচিত্তো হুত্ৰা ‘‘নযিদং অম্হাকং কপ্পতী’’তি ন সাদিযতি, ৰট্টতি. নিস্সগ্গিযন্তি উগ্গহণাদীসু যংকিঞ্চি করোন্তস্স অঘনবদ্ধেসু ৰত্থূসু ৰত্থুগণনায নিস্সগ্গিযং পাচিত্তিযং. তং নিস্সজ্জন্তেন ‘‘অহং, ভন্তে, রূপিযং পটিগ্গহেসিং, ইদং মে, ভন্তে, নিস্সগ্গিযং, ইমাহং সঙ্ঘস্স নিস্সজ্জামী’’তি (পারা. ৫৮৪) এৰং সঙ্ঘমজ্ঝেযেৰ নিস্সজ্জিতব্বং. সচে তত্থ কোচি গহট্ঠো আগচ্ছতি, ‘‘ইদং জানাহী’’তি ৰত্তব্বো. ‘‘ইমিনা কিং আহরিয্যতূ’’তি ভণন্তে পন ‘‘ইদং নামা’’তি অৰত্ৰা ‘‘সপ্পিআদীনি ভিক্খূনং কপ্পন্তী’’তি এৰং কপ্পিযং আচিক্খিতব্বং. সচে সো আহরতি, রূপিযপ্পটিগ্গাহকং ঠপেত্ৰা সব্বেহি ভাজেত্ৰা পরিভুঞ্জিতব্বং. রূপিযপ্পটিগ্গাহকস্স পন যং তপ্পচ্চযা উপ্পন্নং, তং অঞ্ঞেন লভিত্ৰা দিয্যমানম্পি অন্তমসো ততো নিব্বত্তরুক্খচ্ছাযাপি পরিভুঞ্জিতুং ন ৰট্টতি. সচে পন সো কিঞ্চি আহরিতুং ন ইচ্ছতি, ‘‘ইমং ছট্টেহী’’তি ৰত্তব্বো. সচে যত্থ কত্থচি নিক্খিপতি, গহেত্ৰা ৰা গচ্ছতি, ন ৰারেতব্বো. নো চে ছট্টেতি, পঞ্চঙ্গসমন্নাগতো ভিক্খু রূপিযছট্টকো সম্মন্নিতব্বো. তেন অনিমিত্তং কত্ৰাৰ গূথং ৰিয ছট্টেতব্বং. সচে নিমিত্তং করোতি, দুক্কটং আপজ্জতি.

রাজগহে উপনন্দং আরব্ভ রূপিযপ্পটিগ্গহণৰত্থুস্মিং পঞ্ঞত্তং, সাধারণপঞ্ঞত্তি, সাণত্তিকং, তিকপাচিত্তিযং, অরূপিযে রূপিযসঞ্ঞিনো ৰেমতিকস্স ৰা, সঙ্ঘচেতিযাদীনং অত্থায গণ্হন্তস্স, মুত্তামণিআদিপ্পটিগ্গহণে চ দুক্কটং. রতনসিক্খাপদনযেন নিক্খিপন্তস্স, উম্মত্তকাদীনঞ্চ অনাপত্তি. জাতরূপরজতভাৰো, অত্তুদ্দেসিকতা, গহণাদীসু অঞ্ঞতরভাৰোতি ইমানেত্থ তীণি অঙ্গানি. সমুট্ঠানাদীসু সিযা কিরিযং গহণেন আপজ্জনতো, সিযা অকিরিযং পটিক্খেপস্স অকরণতো, সেসং সঞ্চরিত্তে ৰুত্তনযমেৰাতি.

জাতরূপসিক্খাপদৰণ্ণনা নিট্ঠিতা.

৯. রূপিযসংৰোহারসিক্খাপদৰণ্ণনা

নৰমে নানপ্পকারকন্তি কতাদিৰসেন অনেকৰিধং. রূপিযসংৰোহারন্তি জাতরূপরজতপরিৰত্তনং. পুরিমসিক্খাপদেন হি নিস্সগ্গিযৰত্থুদুক্কটৰত্থূনং পটিগ্গহণং ৰারিতং, ইমিনা পরিৰত্তনং. তস্মা দুক্কটৰত্থুনা দুক্কটৰত্থুকপ্পিযৰত্থূনি, কপ্পিযৰত্থুনা চ দুক্কটৰত্থুং পরিৰত্তেন্তস্স দুক্কটং. নিস্সগ্গিযৰত্থুনা পন নিস্সগ্গিযৰত্থুং ৰা দুক্কটৰত্থুং ৰা কপ্পিযৰত্থুং ৰা, দুক্কটৰত্থুকপ্পিযৰত্থূহি চ নিস্সগ্গিযৰত্থুং পরিৰত্তেন্তস্স নিস্সগ্গিযং হোতি, তং পুরিমনযানুসারেনেৰ সঙ্ঘমজ্ঝে নিস্সজ্জিতব্বং, নিস্সট্ঠৰত্থুস্মিঞ্চ তত্থ ৰুত্তনযেনেৰ পটিপজ্জিতব্বং.

সাৰত্থিযং ছব্বগ্গিযে আরব্ভ রূপিযসংৰোহারৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, যং অত্তনো ধনেন পরিৰত্তেতি, তস্স ৰা ধনস্স ৰা রূপিযভাৰো চেৰ, পরিৰত্তনঞ্চাতি ইমানেত্থ দ্ৰে অঙ্গানি. কিরিযং, সেসং অনন্তরসিক্খাপদে ৰুত্তনযমেৰাতি.

রূপিযসংৰোহারসিক্খাপদৰণ্ণনা নিট্ঠিতা.

১০. কযৰিক্কযসিক্খাপদৰণ্ণনা

দসমে নানপ্পকারকন্তি চীৰরাদীনং কপ্পিযভণ্ডানং ৰসেন অনেকৰিধং. কযৰিক্কযন্তি কযঞ্চেৰ ৰিক্কযঞ্চ. ‘‘ইমিনা ইমং দেহি, ইমং আহর, পরিৰত্তেহি, চেতাপেহী’’তি ইমিনা হি নযেন পরস্স কপ্পিযভণ্ডং গণ্হন্তো কযং সমাপজ্জতি, অত্তনো কপ্পিযভণ্ডং দেন্তো ৰিক্কযং সমাপজ্জতি. তস্মা ঠপেত্ৰা পঞ্চ সহধম্মিকে যং এৰং অত্তনো কপ্পিযভণ্ডং দত্ৰা মাতু সন্তকম্পি কপ্পিযভণ্ডং গণ্হাতি, তং নিস্সগ্গিযং হোতি. ৰুত্তলক্খণৰসেন সঙ্ঘগণপুগ্গলেসু যস্স কস্সচি নিস্সজ্জিতব্বং, ‘‘ইমং ভুঞ্জিত্ৰা ৰা গহেত্ৰা ৰা ইদং নাম আহর ৰা করোহি ৰা’’তি রজনাদিং আহরাপেত্ৰা ৰা ধমকরণাদিপরিক্খারং ভূমিসোধনাদিঞ্চ নৰকম্মং কারেত্ৰা ৰা সন্তং ৰত্থু নিস্সজ্জিতব্বং, অসন্তে পাচিত্তিযং দেসেতব্বমেৰ.

সাৰত্থিযং উপনন্দং আরব্ভ কযৰিক্কযৰত্থুস্মিং পঞ্ঞত্তং, ‘‘ইদং কিং অগ্ঘতী’’তি এৰং অগ্ঘং পুচ্ছন্তস্স, যস্স হত্থতো ভণ্ডং গণ্হিতুকামো হোতি, তং ঠপেত্ৰা অঞ্ঞং অন্তমসো তস্সেৰ পুত্তভাতুকম্পি কপ্পিযকারকং কত্ৰা ‘‘ইমিনা ইদং নাম গহেত্ৰা দেহী’’তি আচিক্খন্তস্স, ‘‘ইদং অম্হাকং অত্থি, অম্হাকঞ্চ ইমিনা চ ইমিনা চ অত্থো’’তি এৰং ৰত্ৰা অত্তনো ধনেন লদ্ধং গণ্হন্তস্স, সহধম্মিকেহি সদ্ধিং কযৰিক্কযং করোন্তস্স, উম্মত্তকাদীনঞ্চ অনাপত্তি. যং অত্তনো ধনেন পরিৰত্তেতি, যেন চ পরিৰত্তেতি, তেসং কপ্পিযৰত্থুতা, অসহধম্মিকতা, কযৰিক্কযাপজ্জনঞ্চাতি ইমানেত্থ তীণি অঙ্গানি. সেসং রূপিযসংৰোহারে ৰুত্তনযমেৰাতি.

কযৰিক্কযসিক্খাপদৰণ্ণনা নিট্ঠিতা.

এল়কলোমৰগ্গো দুতিযো.