কঙ্খাৰিতরণী-অট্ঠকথা

গন্থারম্ভকথা

বুদ্ধং ধম্মঞ্চ সঙ্ঘঞ্চ, ৰিপ্পসন্নেন চেতসা;

ৰন্দিত্ৰা ৰন্দনামান, পূজাসক্কারভাজনং.

থেরৰংসপ্পদীপানং, থিরানং ৰিনযক্কমে;

পুব্বাচরিযসীহানং, নমো কত্ৰা কতঞ্জলী.

পামোক্খং অনৰজ্জানং, ধম্মানং যং মহেসিনা;

মুখং মোক্খপ্পৰেসায, পাতিমোক্খং পকাসিতং.

সূরতেন নিৰাতেন, সুচিসল্লেখৰুত্তিনা;

ৰিনযাচারযুত্তেন, সোণত্থেরেন যাচিতো.

তত্থ সঞ্জাতকঙ্খানং, ভিক্খূনং তস্স ৰণ্ণনং;

কঙ্খাৰিতরণত্থায, পরিপুণ্ণৰিনিচ্ছযং.

মহাৰিহারৰাসীনং, ৰাচনামগ্গনিস্সিতং;

ৰত্তযিস্সামি নামেন, কঙ্খাৰিতরণিং সুভন্তি.