ভিক্খুনীপাতিমোক্খপাল়ি

পুব্বকরণং-৪

সম্মজ্জনী পদীপো চ, উদকং আসনেন চ;

উপোসথস্স এতানি, ‘‘পুব্বকরণ’’ন্তি ৰুচ্চতি.

পুব্বকিচ্চং-৫

ছন্দ, পারিসুদ্ধি, উতুক্খানং, ভিক্খুনিগণনা চ ওৰাদো;

উপোসথস্স এতানি, ‘‘পুব্বকিচ্চ’’ন্তি ৰুচ্চতি.

পত্তকল্লঅঙ্গা-৪

উপোসথো, যাৰতিকা চ ভিক্খুনী কম্মপ্পত্তা;

সভাগাপত্তিযো চ ন ৰিজ্জন্তি;

ৰজ্জনীযা চ পুগ্গলা তস্মিং ন হোন্তি, ‘‘পত্তকল্ল’’ন্তি ৰুচ্চতি.

পুব্বকরণপুব্বকিচ্চানি সমাপেত্ৰা দেসিতাপত্তিকস্স সমগ্গস্স ভিক্খুনিসঙ্ঘস্স অনুমতিযা পাতিমোক্খং উদ্দিসিতুং আরাধনং করোম.

নিদানুদ্দেসো

সুণাতু মে অয্যে সঙ্ঘো, অজ্জুপোসথো পন্নরসো, যদি সঙ্ঘস্স পত্তকল্লং, সঙ্ঘো উপোসথং করেয্য, পাতিমোক্খং উদ্দিসেয্য.

কিং সঙ্ঘস্স পুব্বকিচ্চং? পারিসুদ্ধিং অয্যাযো আরোচেথ, পাতিমোক্খং উদ্দিসিস্সামি, তং সব্বাৰ সন্তা সাধুকং সুণোম মনসি করোম. যস্সা সিযা আপত্তি, সা আৰিকরেয্য, অসন্তিযা আপত্তিযা তুণ্হী ভৰিতব্বং, তুণ্হীভাৰেন খো পনায্যাযো, ‘‘পরিসুদ্ধা’’তি ৰেদিস্সামি. যথা খো পন পচ্চেকপুট্ঠস্সা ৰেয্যাকরণং হোতি, এৰমেৰং এৰরূপায পরিসায যাৰততিযং অনুসাৰিতং হোতি. যা পন ভিক্খুনী যাৰততিযং অনুসাৰিযমানে সরমানা সন্তিং আপত্তিং নাৰিকরেয্য, সম্পজানমুসাৰাদস্সা হোতি. সম্পজানমুসাৰাদো খো পনায্যাযো, অন্তরাযিকো ধম্মো ৰুত্তো ভগৰতা, তস্মা সরমানায ভিক্খুনিযা আপন্নায ৰিসুদ্ধাপেক্খায সন্তী আপত্তি আৰিকাতব্বা, আৰিকতা হিস্সা ফাসু হোতি.

উদ্দিট্ঠং খো, অয্যাযো, নিদানং. তত্থায্যাযো পুচ্ছামি, কচ্চিত্থ পরিসুদ্ধা, দুতিযম্পি পুচ্ছামি, কচ্চিত্থ পরিসুদ্ধা, ততিযম্পি পুচ্ছামি, কচ্চিত্থ পরিসুদ্ধা, পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

নিদানং নিট্ঠিতং.

পারাজিকুদ্দেসো

তত্রিমে অট্ঠ পারাজিকা ধম্মা উদ্দেসং আগচ্ছন্তি.

মেথুনধম্মসিক্খাপদং

১. যা পন ভিক্খুনী ছন্দসো মেথুনং ধম্মং পটিসেৰেয্য, অন্তমসো তিরচ্ছানগতেনপি, পারাজিকা হোতি অসংৰাসা.

অদিন্নাদানসিক্খাপদং

২. যা পন ভিক্খুনী গামা ৰা অরঞ্ঞা ৰা অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুং ৰা বন্ধেয্যুং ৰা পব্বাজেয্যুং ৰা চোরাসি বালাসি মূল়্হাসি থেনাসীতি, তথারূপং ভিক্খুনী অদিন্নং আদিযমানা অযম্পি পারাজিকা হোতি অসংৰাসা.

মনুস্সৰিগ্গহসিক্খাপদং

৩. যা পন ভিক্খুনী সঞ্চিচ্চ মনুস্সৰিগ্গহং জীৰিতা ৰোরোপেয্য, সত্থহারকং ৰাস্স পরিযেসেয্য, মরণৰণ্ণং ৰা সংৰণ্ণেয্য, মরণায ৰা সমাদপেয্য ‘‘অম্ভো পুরিস, কিং তুয্হিমিনা পাপকেন দুজ্জীৰিতেন, মতং তে জীৰিতা সেয্যো’’তি, ইতি চিত্তমনা চিত্তসঙ্কপ্পা অনেকপরিযাযেন মরণৰণ্ণং ৰা সংৰণ্ণেয্য, মরণায ৰা সমাদপেয্য, অযম্পি পারাজিকা হোতি অসংৰাসা.

উত্তরিমনুস্সধম্মসিক্খাপদং

৪. যা পন ভিক্খুনী অনভিজানং উত্তরিমনুস্সধম্মং অত্তুপনাযিকং অলমরিযঞাণদস্সনং সমুদাচরেয্য ‘‘ইতি জানামি, ইতি পস্সামী’’তি, ততো অপরেন সমযেন সমনুগ্গাহীযমানা ৰা অসমনুগ্গাহীযমানা ৰা আপন্না ৰিসুদ্ধাপেক্খা এৰং ৰদেয্য ‘‘অজানমেৰং, অয্যে, অৰচং জানামি, অপস্সং পস্সামি, তুচ্ছং মুসা ৰিলপি’’ন্তি, অঞ্ঞত্র অধিমানা, অযম্পি পারাজিকা হোতি অসংৰাসা.

উব্ভজাণুমণ্ডলিকাসিক্খাপদং

৫. যা পন ভিক্খুনী অৰস্সুতা অৰস্সুতস্স পুরিসপুগ্গলস্স, অধক্খকং উব্ভজাণুমণ্ডলং আমসনং ৰা পরামসনং ৰা গহণং ৰা ছুপনং ৰা পটিপীল়নং ৰা সাদিযেয্য, অযম্পি পারাজিকা হোতি অসংৰাসা উব্ভজাণুমণ্ডলিকা.

ৰজ্জপ্পটিচ্ছাদিকাসিক্খাপদং

৬. যা পন ভিক্খুনী জানং পারাজিকং ধম্মং অজ্ঝাপন্নং ভিক্খুনিং নেৰত্তনা পটিচোদেয্য, ন গণস্স আরোচেয্য, যদা চ সা ঠিতা ৰা অস্স চুতা ৰা নাসিতা ৰা অৰস্সটা ৰা, সা পচ্ছা এৰং ৰদেয্য ‘‘পুব্বেৰাহং, অয্যে, অঞ্ঞাসিং এতং ভিক্খুনিং ‘এৰরূপা চ এৰরূপা চ সা ভগিনী’তি, নো চ খো অত্তনা পটিচোদেস্সং, ন গণস্স আরোচেস্স’’ন্তি, অযম্পি পারাজিকা হোতি অসংৰাসা ৰজ্জপ্পটিচ্ছাদিকা.

উক্খিত্তানুৰত্তিকাসিক্খাপদং

৭. যা পন ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৰিনযেন সত্থুসাসনেন অনাদরং অপ্পটিকারং অকতসহাযং তমনুৰত্তেয্য, সা ভিক্খুনী ভিক্খুনীহি এৰমস্স ৰচনীযা ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো, ধম্মেন ৰিনযেন সত্থুসাসনেন অনাদরো অপ্পটিকারো অকতসহাযো, মায্যে, এতং ভিক্খুং অনুৰত্তী’’তি, এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযং চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি পারাজিকা হোতি অসংৰাসা উক্খিত্তানুৰত্তিকা.

অট্ঠৰত্থুকাসিক্খাপদং

৮. যা পন ভিক্খুনী অৰস্সুতা অৰস্সুতস্স পুরিসপুগ্গলস্স হত্থগ্গহণং ৰা সাদিযেয্য, সঙ্ঘাটিকণ্ণগ্গহণং ৰা সাদিযেয্য, সন্তিট্ঠেয্য ৰা, সল্লপেয্য ৰা, সঙ্কেতং ৰা গচ্ছেয্য, পুরিসস্স ৰা অব্ভাগমনং সাদিযেয্য, ছন্নং ৰা অনুপৰিসেয্য, কাযং ৰা তদত্থায উপসংহরেয্য এতস্স অসদ্ধম্মস্স পটিসেৰনত্থায, অযম্পি পারাজিকা হোতি অসংৰাসা অট্ঠৰত্থুকা.

উদ্দিট্ঠা খো, অয্যাযো, অট্ঠ পারাজিকা ধম্মা. যেসং ভিক্খুনী অঞ্ঞতরং ৰা অঞ্ঞতরং ৰা আপজ্জিত্ৰা ন লভতি ভিক্খুনীহি সদ্ধিং সংৰাসং যথা পুরে, তথা পচ্ছা, পারাজিকা হোতি অসংৰাসা. তত্থায্যাযো, পুচ্ছামি, কচ্চিত্থ পরিসুদ্ধা, দুতিযম্পি পুচ্ছামি, কচ্চিত্থ পরিসুদ্ধা, ততিযম্পি পুচ্ছামি, কচ্চিত্থ পরিসুদ্ধা, পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

পারাজিকং নিট্ঠিতং.

সঙ্ঘাদিসেসুদ্দেসো

ইমে খো পনায্যাযো সত্তরস সঙ্ঘাদিসেসা

ধম্মা উদ্দেসং আগচ্ছন্তি.

উস্সযৰাদিকাসিক্খাপদং

১. যা পন ভিক্খুনী উস্সযৰাদিকা ৰিহরেয্য গহপতিনা ৰা গহপতিপুত্তেন ৰা দাসেন ৰা কম্মকারেন ৰা অন্তমসো সমণপরিব্বাজকেনাপি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

চোরীৰুট্ঠাপিকাসিক্খাপদং

২. যা পন ভিক্খুনী জানং চোরিং ৰজ্ঝং ৰিদিতং অনপলোকেত্ৰা রাজানং ৰা সঙ্ঘং ৰা গণং ৰা পূগং ৰা সেণিং ৰা, অঞ্ঞত্র কপ্পা ৰুট্ঠাপেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

একগামন্তরগমনসিক্খাপদং

৩. যা পন ভিক্খুনী একা ৰা গামন্তরং গচ্ছেয্য, একা ৰা নদীপারং গচ্ছেয্য, একা ৰা রত্তিং ৰিপ্পৰসেয্য, একা ৰা গণম্হা ওহিযেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

উক্খিত্তকওসারণসিক্খাপদং

৪. যা পন ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং, অনঞ্ঞায গণস্স ছন্দং ওসারেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

ভোজনপটিগ্গহণপঠমসিক্খাপদং

৫. যা পন ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো খাদনীযং ৰা, ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

ভোজনপটিগ্গহণদুতিযসিক্খাপদং

৬. যা পন ভিক্খুনী এৰং ৰদেয্য ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা, ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা, তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

সঞ্চরিত্তসিক্খাপদং

৭. যা পন ভিক্খুনী সঞ্চরিত্তং সমাপজ্জেয্য ইত্থিযা ৰা পুরিসমতিং, পুরিসস্স ৰা ইত্থিমতিং, জাযত্তনে ৰা জারত্তনে ৰা অন্তমসো তঙ্খণিকাযপি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

দুট্ঠদোসসিক্খাপদং

৮. যা পন ভিক্খুনী ভিক্খুনিং দুট্ঠা দোসা অপ্পতীতা অমূলকেন পারাজিকেন ধম্মেন অনুদ্ধংসেয্য ‘‘অপ্পেৰ নাম নং ইমম্হা ব্রহ্মচরিযা চাৰেয্য’’ন্তি, ততো অপরেন সমযেন সমনুগ্গাহীযমানা ৰা অস মনুগ্গাহীযমানা ৰা অমূলকঞ্চেৰ তং অধিকরণং হোতি, ভিক্খুনী চ দোসং পতিট্ঠাতি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

অঞ্ঞভাগিযসিক্খাপদং

৯. যা পন ভিক্খুনী ভিক্খুনিং দুট্ঠা দোসা অপ্পতীতা অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেয্য ‘‘অপ্পেৰ নাম নং ইমম্হা ব্রহ্মচরিযা চাৰেয্য’’ন্তি, ততো অপরেন সমযেন সমনুগ্গাহীযমানা ৰা অসমনুগ্গাহীযমানা ৰা অঞ্ঞভাগিযঞ্চেৰ তং অধিকরণং হোতি. কোচিদেসো লেসমত্তো উপাদিন্নো, ভিক্খুনী চ দোসং পতিট্ঠাতি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেসং.

সিক্খংপচ্চাচিক্খণসিক্খাপদং

১০. যা পন ভিক্খুনী কুপিতা অনত্তমনা এৰং ৰদেয্য ‘‘বুদ্ধং পচ্চাচিক্খামি ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামি, কিন্নুমাৰ সমণিযো যা সমণিযো সক্যধীতরো, সন্তঞ্ঞাপি সমণিযো লজ্জিনিযো কুক্কুচ্চিকা সিক্খাকামা, তাসাহং সন্তিকে ব্রহ্মচরিযং চরিস্সামী’’তি. সা ভিক্খুনী ভিক্খুনীহি এৰমস্স ৰচনীযা ‘‘মায্যে কুপিতা অনত্তমনা এৰং অৰচ ‘বুদ্ধং পচ্চাচিক্খামি, ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামি, কিন্নুমাৰ সমণিযো যা সমণিযো সক্যধীতরো, সন্তঞ্ঞাপি সমণিযো লজ্জিনিযো কুক্কুচ্চিকা সিক্খাকামা, তাসাহং সন্তিকে ব্রহ্মচরিযং চরিস্সামী’তি, অভিরমায্যে, স্ৰাক্খাতো ধম্মো, চর ব্রহ্মচরিযং সম্মা দুক্খস্স অন্তকিরিযাযা’’তি, এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

অধিকরণকুপিতসিক্খাপদং

১১. যা পন ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেয্য ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি, সা ভিক্খুনী ভিক্খুনীহি এৰমস্স ৰচনীযা ‘‘মায্যে, কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ ‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’তি, অয্যা খো ছন্দাপি গচ্ছেয্য, দোসাপি গচ্ছেয্য, মোহাপি গচ্ছেয্য, ভযাপি গচ্ছেয্যা’’তি. এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

পাপসমাচারপঠমসিক্খাপদং

১২. ভিক্খুনিযো পনেৰ সংসট্ঠা ৰিহরন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, তা ভিক্খুনিযো ভিক্খুনীহি এৰমস্সু ৰচনীযা ‘‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, ৰিৰিচ্চথায্যে, ৰিৰেকঞ্ঞেৰ ভগিনীনং সঙ্ঘো ৰণ্ণেতী’’তি, এৰঞ্চ তা ভিক্খুনিযো ভিক্খুনীহি ৰুচ্চমানা তথেৰ পগ্গণ্হেয্যুং, তা ভিক্খুনিযো ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্যুং, ইচ্চেতং কুসলং, নো চে পটিনিস্সজ্জেয্যুং, ইমাপি ভিক্খুনিযো যাৰততিযকং ধম্মং আপন্না নিস্সারণীযং সঙ্ঘাদিসেসং.

পাপসমাচারদুতিযসিক্খাপদং

১৩. যা পন ভিক্খুনী এৰং ৰদেয্য ‘‘সংসট্ঠাৰ, অয্যে, তুম্হে ৰিহরথ, মা তুম্হে নানা ৰিহরিত্থ, সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, তা সঙ্ঘো ন কিঞ্চি আহ তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, ৰিৰিচ্চথায্যে, ৰিৰেকঞ্ঞেৰ ভগিনীনং সঙ্ঘো ৰণ্ণেতী’’’তি, সা ভিক্খুনী ভিক্খুনীহি এৰমস্স ৰচনীযা ‘‘মায্যে, এৰং অৰচ, সংসট্ঠাৰ অয্যে তুম্হে ৰিহরথ, মা তুম্হে নানা ৰিহরিত্থ, সন্তি সঙ্ঘে অঞ্ঞাপি ভিক্খুনিযো এৰাচারা এৰংসদ্দা এৰংসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, তা সঙ্ঘো ন কিঞ্চি আহ, তুম্হঞ্ঞেৰ সঙ্ঘো উঞ্ঞায পরিভৰেন অক্খন্তিযা ৰেভস্সিযা দুব্বল্যা এৰমাহ – ‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা, ৰিৰিচ্চথায্যে, ৰিৰেকঞ্ঞেৰ ভগিনীনং সঙ্ঘো ৰণ্ণেতী’’’তি, এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

সঙ্ঘভেদকসিক্খাপদং

১৪. যা পন ভিক্খুনী সমগ্গস্স সঙ্ঘস্স ভেদায পরক্কমেয্য, ভেদনসংৰত্তনিকং ৰা অধিকরণং সমাদায পগ্গয্হ তিট্ঠেয্য, সা ভিক্খুনী ভিক্খুনীহি এৰমস্স ৰচনীযা ‘‘মায্যা, সমগ্গস্স সঙ্ঘস্স ভেদায পরক্কমি, ভেদনসংৰত্তনিকং ৰা অধিকরণং সমাদায পগ্গয্হ অট্ঠাসি, সমেতায্যা, সঙ্ঘেন, সমগ্গো হি সঙ্ঘো সম্মোদমানো অৰিৰদমানো একুদ্দেসো ফাসু ৰিহরতী’’তি. এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

ভেদানুৰত্তকসিক্খাপদং

১৫. তস্সাযেৰ খো পন ভিক্খুনিযা ভিক্খুনিযো হোন্তি অনুৰত্তিকা ৰগ্গৰাদিকা একা ৰা দ্ৰে ৰা তিস্সো ৰা, তা এৰং ৰদেয্যুং ‘‘মায্যাযো, এতং ভিক্খুনিং কিঞ্চি অৰচুত্থ ধম্মৰাদিনী চেসা ভিক্খুনী, ৰিনযৰাদিনী চেসা ভিক্খুনী, অম্হাকঞ্চেসা ভিক্খুনী ছন্দঞ্চ রুচিঞ্চ আদায ৰোহরতি, জানাতি, নো ভাসতি, অম্হাকম্পেতং খমতী’’তি, তা ভিক্খুনিযো ভিক্খুনীহি এৰমস্সু ৰচনীযা ‘‘মায্যাযো, এৰং অৰচুত্থ, ন চেসা ভিক্খুনী ধম্মৰাদিনী, ন চেসা ভিক্খুনী ৰিনযৰাদিনী, মায্যানম্পি সঙ্ঘভেদো রুচ্চিত্থ, সমেতায্যানং সঙ্ঘেন, সমগ্গো হি সঙ্ঘো সম্মোদমানো অৰিৰদমানো একুদ্দেসো ফাসু ৰিহরতী’’তি, এৰঞ্চ তা ভিক্খুনিযো ভিক্খুনীহি ৰুচ্চমানা তথেৰ পগ্গণ্হেয্যুং, তা ভিক্খুনিযো ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্যুং. ইচ্চেতং কুসলং. নো চে পটিনিস্সজ্জেয্যুং, ইমাপি ভিক্খুনিযো যাৰততিযকং ধম্মং আপন্না নিস্সারণীযং সঙ্ঘাদিসেসং.

দুব্বচসিক্খাপদং

১৬. ভিক্খুনী পনেৰ দুব্বচজাতিকা হোতি উদ্দেসপরিযাপন্নেসু সিক্খাপদেসু ভিক্খুনীহি সহধম্মিকং ৰুচ্চমানা অত্তানং অৰচনীযং করোতি ‘‘মা মং অয্যাযো কিঞ্চি অৰচুত্থ কল্যাণং ৰা পাপকং ৰা, অহম্পায্যাযো, ন কিঞ্চি ৰক্খামি কল্যাণং ৰা পাপকং ৰা, ৰিরমথায্যাযো, মম ৰচনাযা’’তি, সা ভিক্খুনী ভিক্খুনীহি এৰমস্স ৰচনীযা ‘‘মায্যা, অত্তানং অৰচনীযং অকাসি, ৰচনীযমেৰ, অয্যা, অত্তানং করোতু, অয্যাপি ভিক্খুনিযো ৰদতু সহধম্মেন, ভিক্খুনিযোপি অয্যং ৰক্খন্তি সহধম্মেন, এৰং সংৰদ্ধা হি তস্স ভগৰতো পরিসা যদিদং অঞ্ঞমঞ্ঞৰচনেন অঞ্ঞমঞ্ঞৰুট্ঠাপনেনা’’তি. এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

কুলদূসকসিক্খাপদং

১৭. ভিক্খুনী পনেৰ অঞ্ঞতরং গামং ৰা নিগমং ৰা উপনিস্সায ৰিহরতি কুলদূসিকা পাপসমাচারা, তস্সা খো পাপকা সমাচারা দিস্সন্তি চেৰ সুয্যন্তি চ, কুলানি চ তায দুট্ঠানি দিস্সন্তি চেৰ সুয্যন্তি চ, সা ভিক্খুনী ভিক্খুনীহি এৰমস্স ৰচনীযা ‘‘অয্যা, খো কুলদূসিকা পাপসমাচারা, অয্যায খো পাপকা সমাচারা দিস্সন্তি চেৰ সুয্যন্তি চ, কুলানি চায্যায, দুট্ঠানি দিস্সন্তি চেৰ সুয্যন্তি চ, পক্কমতায্যা ইমম্হা আৰাসা, অলং তে ইধ ৰাসেনা’’তি. এৰঞ্চ সা ভিক্খুনী ভিক্খুনীহি ৰুচ্চমানা তা ভিক্খুনিযো এৰং ৰদেয্য ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো, তাদিসিকায আপত্তিযা একচ্চং পব্বাজেন্তি একচ্চং ন পব্বাজেন্তী’’তি, সা ভিক্খুনী ভিক্খুনীহি এৰমস্স ৰচনীযা ‘‘মায্যা, এৰং অৰচ, ন চ ভিক্খুনিযো ছন্দগামিনিযো, ন চ ভিক্খুনিযো দোসগামিনিযো, ন চ ভিক্খুনিযো মোহগামিনিযো, ন চ ভিক্খুনিযো ভযগামিনিযো, অয্যা খো কুলদূসিকা পাপসমাচারা, অয্যায খো পাপকা সমাচারা দিস্সন্তি চেৰ সুয্যন্তি চ, কুলানি চায্যায দুট্ঠানি দিস্সন্তি চেৰ সুয্যন্তি চ, পক্কমতায্যা, ইমম্হা আৰাসা অলং তে ইধ ৰাসেনা’’তি. এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায, যাৰততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেসং.

উদ্দিট্ঠা খো অয্যাযো সত্তরস সঙ্ঘাদিসেসা ধম্মা নৰ পঠমাপত্তিকা, অট্ঠ যাৰততিযকা,

যেসং ভিক্খুনী অঞ্ঞতরং ৰা অঞ্ঞতরং ৰা আপজ্জতি, তায ভিক্খুনিযা উভতোসঙ্ঘে পক্খমানত্তং চরিতব্বং. চিণ্ণমানত্তা ভিক্খুনী যত্থ সিযা ৰীসতিগণো ভিক্খুনিসঙ্ঘো, তত্থ সা ভিক্খুনী অব্ভেতব্বা. একাযপি চে ঊনো ৰীসতিগণো ভিক্খুনিসঙ্ঘো তং ভিক্খুনিং অব্ভেয্য, সা চ ভিক্খুনী অনব্ভিতা, তা চ ভিক্খুনিযো গারয্হা, অযং তত্থ সামীচি. তত্থায্যাযো পুচ্ছামি, কচ্চিত্থ পরিসুদ্ধা, দুতিযম্পি, পুচ্ছামি, কচ্চিত্থ পরিসুদ্ধা, ততিযম্পি পুচ্ছামি, কচ্চিত্থ পরিসুদ্ধা, পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

সঙ্ঘাদিসেসো নিট্ঠিতো.

নিস্সগ্গিয পাচিত্তিযা

ইমে খো পনায্যাযো তিংস নিস্সগ্গিযা পাচিত্তিযা

ধম্মা উদ্দেসং আগচ্ছন্তি.

পত্তসন্নিচযসিক্খাপদং

১. যা পন ভিক্খুনী পত্তসন্নিচযং করেয্য, নিস্সগ্গিযং পাচিত্তিযং.

অকালচীৰরভাজনসিক্খাপদং

২. যা পন ভিক্খুনী অকালচীৰরং ‘‘কালচীৰর’’ন্তি অধিট্ঠহিত্ৰা ভাজাপেয্য, নিস্সগ্গিযং পাচিত্তিযং.

চীৰরপরিৰত্তনসিক্খাপদং

৩. যা পন ভিক্খুনী ভিক্খুনিযা সদ্ধিং চীৰরং পরিৰত্তেত্ৰা সা পচ্ছা এৰং ৰদেয্য ‘‘হন্দায্যে, তুয্হং চীৰরং, আহর মেতং চীৰরং, যং তুয্হং তুয্হমেৰেতং, যং ময্হং ময্হমেৰেতং, আহর মেতং চীৰরং, সকং পচ্চাহরা’’তি অচ্ছিন্দেয্য ৰা অচ্ছিন্দাপেয্য ৰা, নিস্সগ্গিযং পাচিত্তিযং.

অঞ্ঞৰিঞ্ঞাপনসিক্খাপদং

৪. যা পন ভিক্খুনী অঞ্ঞং ৰিঞ্ঞাপেত্ৰা অঞ্ঞং ৰিঞ্ঞাপেয্য, নিস্সগ্গিযং পাচিত্তিযং.

অঞ্ঞচেতাপন সিক্খাপদং

৫. যা পন ভিক্খুনী অঞ্ঞং চেতাপেত্ৰা অঞ্ঞং চেতাপেয্য, নিস্সগ্গিযং পাচিত্তিযং.

পঠমসঙ্ঘিকচেতাপনসিক্খাপদং

৬. যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন অঞ্ঞং চেতাপেয্য, নিস্সগ্গিযং পাচিত্তিযং.

দুতিযসঙ্ঘিকচেতাপনসিক্খাপদং

৭. যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পঠমগণিকচেতাপনসিক্খাপদং

৮. যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন অঞ্ঞং চেতাপেয্য, নিস্সগ্গিযং পাচিত্তিযং.

দুতিযগণিকচেতাপনসিক্খাপদং

৯. যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পুগ্গলিকচেতাপনসিক্খাপদং

১০. যা পন ভিক্খুনী অঞ্ঞদত্থিকেন পরিক্খারেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পত্তৰগ্গো পঠমো.

গরুপাৰুরণসিক্খাপদং

১১. গরুপাৰুরণং পন ভিক্খুনিযা চেতাপেন্তিযা চতুক্কংসপরমং চেতাপেতব্বং. ততো চে উত্তরি চেতাপেয্য, নিস্সগ্গিযং পাচিত্তিযং.

লহুপাৰুরণসিক্খাপদং

১২. লহুপাৰুরণং পন ভিক্খুনিযা চেতাপেন্তিযা অড্ঢতেয্যকংসপরমং চেতাপেতব্বং. ততো চে উত্তরি চেতাপেয্য, নিস্সগ্গিযং পাচিত্তিযং.

কথিনসিক্খাপদং

১৩. নিট্ঠিতচীৰরস্মিং ভিক্খুনিযা উব্ভতস্মিং কথিনে দসাহপরমং অতিরেকচীৰরং ধারেতব্বং. তং অতিক্কামেন্তিযা, নিস্সগ্গিযং পাচিত্তিযং.

উদোসিতসিক্খাপদং

১৪. নিট্ঠিতচীৰরস্মিং ভিক্খুনিযা উব্ভতস্মিং কথিনে একরত্তম্পি চে ভিক্খুনী তিচীৰরেন ৰিপ্পৰসেয্য, অঞ্ঞত্র ভিক্খুনিসম্মুতিযা নিস্সগ্গিযং পাচিত্তিযং.

অকালচীৰরসিক্খাপদং

১৫. নিট্ঠিতচীৰরস্মিং ভিক্খুনিযা উব্ভতস্মিং কথিনে ভিক্খুনিযা পনেৰ অকালচীৰরং উপ্পজ্জেয্য, আকঙ্খমানায ভিক্খুনিযা পটিগ্গহেতব্বং, পটিগ্গহেত্ৰা খিপ্পমেৰ কারেতব্বং, নো চস্স পারিপূরি, মাসপরমং তায ভিক্খুনিযা তং চীৰরং নিক্খিপিতব্বং ঊনস্স পারিপূরিযা সতিযা পচ্চাসায. ততো চে উত্তরি নিক্খিপেয্য সতিযাপি পচ্চাসায, নিস্সগ্গিযং পাচিত্তিযং.

অঞ্ঞাতকৰিঞ্ঞত্তিসিক্খাপদং

১৬. যা পন ভিক্খুনী অঞ্ঞাতকং গহপতিং ৰা গহপতানিং ৰা চীৰরং ৰিঞ্ঞাপেয্য অঞ্ঞত্র সমযা, নিস্সগ্গিযং পাচিত্তিযং. তত্থাযং সমযো অচ্ছিন্নচীৰরা ৰা হোতি ভিক্খুনী, নট্ঠচীৰরা ৰা, অযং তত্থ সমযো.

ততুত্তরিসিক্খাপদং

১৭. তঞ্চে অঞ্ঞাতকো গহপতি ৰা গহপতানী ৰা বহূহি চীৰরেহি অভিহট্ঠুং পৰারেয্য, সন্তরুত্তরপরমং তায ভিক্খুনিযা ততো চীৰরং সাদিতব্বং. ততো চে উত্তরি সাদিযেয্য, নিস্সগ্গিযং পাচিত্তিযং.

পঠমউপক্খটসিক্খাপদং

১৮. ভিক্খুনিং পনেৰ উদ্দিস্স অঞ্ঞাতকস্স গহপতিস্স ৰা গহপতানিযা ৰা চীৰরচেতাপন্নং উপক্খটং হোতি ‘‘ইমিনা চীৰরচেতাপন্নেন চীৰরং চেতাপেত্ৰা ইত্থন্নামং ভিক্খুনিং চীৰরেন অচ্ছাদেস্সামী’’তি. তত্র চেসা ভিক্খুনী পুব্বে অপ্পৰারিতা উপসঙ্কমিত্ৰা চীৰরে ৰিকপ্পং আপজ্জেয্য ‘‘সাধু ৰত, মং আযস্মা ইমিনা চীৰরচেতাপন্নেন এৰরূপং ৰা এৰরূপং ৰা চীৰরং চেতাপেত্ৰা অচ্ছাদেহী’’তি কল্যাণকম্যতং উপাদায, নিস্সগ্গিযং পাচিত্তিযং.

দুতিযউপক্খটসিক্খাপদং

১৯. ভিক্খুনিং পনেৰ উদ্দিস্স উভিন্নং অঞ্ঞাতকানং গহপতীনং ৰা গহপতানীনং ৰা পচ্চেকচীৰরচেতাপন্নানি উপক্খটানি হোন্তি ‘‘ইমেহি মযং পচ্চেকচীৰরচেতাপন্নেহি পচ্চেকচীৰরানি চেতাপেত্ৰা ইত্থন্নামং ভিক্খুনিং চীৰরেহি অচ্ছাদেস্সামা’’তি. তত্র চেসা ভিক্খূনী পুব্বে অপ্পৰারিতা উপসঙ্কমিত্ৰা চীৰরে ৰিকপ্পং আপজ্জেয্য ‘‘সাধু ৰত মং আযস্মন্তো ইমেহি পচ্চেকচীৰরচেতাপন্নেহি এৰরূপং ৰা এৰরূপং ৰা চীৰরং চেতাপেত্ৰা অচ্ছাদেথ উভোৰ সন্তা একেনা’’তি কল্যাণকম্যতং উপাদায, নিস্সগ্গিযং পাচিত্তিযং.

রাজসিক্খাপদং

২০. ভিক্খুনিং পনেৰ উদ্দিস্স রাজা ৰা রাজভোগ্গো ৰা ব্রাহ্মণো ৰা গহপতিকো ৰা দূতেন চীৰরচেতাপন্নং পহিণেয্য ‘‘ইমিনা চীৰরচেতাপন্নেন চীৰরং চেতাপেত্ৰা ইত্থন্নামং ভিক্খুনিং চীৰরেন অচ্ছাদেহী’’তি. সো চে দূতো তং ভিক্খুনিং উপসঙ্কমিত্ৰা এৰং ৰদেয্য ‘‘ইদং খো, অয্যে, অয্যং উদ্দিস্স চীৰরচেতাপন্নং আভতং, পটিগ্গণ্হাতায্যা চীৰরচেতাপন্ন’’ন্তি. তায ভিক্খুনিযা সো দূতো এৰমস্স ৰচনীযো ‘‘ন খো মযং, আৰুসো, চীৰরচেতাপন্নং পটিগ্গণ্হাম, চীৰরঞ্চ খো মযং পটিগ্গণ্হাম কালেন কপ্পিয’’ন্তি. সো চে দূতো তং ভিক্খুনিং এৰং ৰদেয্য ‘‘অত্থি পনায্যায, কোচি ৰেয্যাৰচ্চকরো’’তি, চীৰরত্থিকায, ভিক্খৰে, ভিক্খুনিযা ৰেয্যাৰচ্চকরো নিদ্দিসিতব্বো আরামিকো ৰা উপাসকো ৰা ‘‘এসো খো, আৰুসো, ভিক্খুনীনং ৰেয্যাৰচ্চকরো’’তি. সো চে দূতো তং ৰেয্যাৰচ্চকরং সঞ্ঞাপেত্ৰা তং ভিক্খুনিং উপসঙ্কমিত্ৰা এৰং ৰদেয্য ‘‘যং খো, অয্যে, অয্যা ৰেয্যাৰচ্চকরং নিদ্দিসি, সঞ্ঞত্তো সো মযা, উপসঙ্কমতায্যা কালেন, চীৰরেন তং অচ্ছাদেস্সতী’’তি. চীৰরত্থিকায, ভিক্খৰে, ভিক্খুনিযা ৰেয্যাৰচ্চকরো উপসঙ্কমিত্ৰা দ্ৰত্তিক্খত্তুং চোদেতব্বো সারেতব্বো ‘‘অত্থো মে, আৰুসো, চীৰরেনা’’তি, দ্ৰত্তিক্খত্তুং চোদযমানা সারযমানা তং চীৰরং অভিনিপ্ফাদেয্য, ইচ্চেতং কুসলং, নো চে অভিনিপ্ফাদেয্য, চতুক্খত্তুং পঞ্চক্খত্তুং ছক্খত্তুপরমং তুণ্হীভূতায উদ্দিস্স ঠাতব্বং, চতুক্খত্তুং পঞ্চক্খত্তুং ছক্খত্তুপরমং তুণ্হীভূতা উদ্দিস্স তিট্ঠমানা তং চীৰরং অভিনিপ্ফাদেয্য, ইচ্চেতং কুসলং. ততো চে উত্তরি ৰাযমমানা তং চীৰরং অভিনিপ্ফাদেয্য, নিস্সগ্গিযং পাচিত্তিযং. নো চে অভিনিপ্ফাদেয্য, যতস্সা চীৰরচেতাপন্নং আভতং, তত্থ সামং ৰা গন্তব্বং, দূতো ৰা পাহেতব্বো ‘‘যং খো তুম্হে আযস্মন্তো ভিক্খুনিং উদ্দিস্স চীৰরচেতাপন্নং পহিণিত্থ, ন তং তস্সা ভিক্খুনিযা কিঞ্চি অত্থং অনুভোতি, যুঞ্জন্তাযস্মন্তো সকং, মা ৰো সকং ৰিনস্সা’’তি, অযং তত্থ সামীচি.

চীৰরৰগ্গো দুতিযো.

রূপিযসিক্খাপদং

২১. যা পন ভিক্খুনী জাতরূপরজতং উগ্গণ্হেয্য ৰা উগ্গণ্হাপেয্য ৰা উপনিক্খিত্তং ৰা সাদিযেয্য, নিস্সগ্গিযং পাচিত্তিযং.

রূপিযসংৰোহারসিক্খাপদং

২২. যা পন ভিক্খুনী নানপ্পকারকং রূপিযসংৰোহারং সমাপজ্জেয্য, নিস্সগ্গিযং পাচিত্তিযং.

কযৰিক্কযসিক্খাপদং

২৩. যা পন ভিক্খুনী নানপ্পকারকং কযৰিক্কযং সমাপজ্জেয্য, নিস্সগ্গিযং পাচিত্তিযং.

ঊনপঞ্চবন্ধনসিক্খাপদং

২৪. যা পন ভিক্খুনী ঊনপঞ্চবন্ধনেন পত্তেন অঞ্ঞং নৰং পত্তং চেতাপেয্য, নিস্সগ্গিযং পাচিত্তিযং. তায ভিক্খুনিযা সো পত্তো ভিক্খুনিপরিসায নিস্সজ্জিতব্বো, যো চ তস্সা ভিক্খুনিপরিসায পত্তপরিযন্তো, সো তস্সা ভিক্খুনিযা পদাতব্বো ‘‘অযং তে ভিক্খুনি পত্তো যাৰভেদনায ধারেতব্বো’’তি, অযং তত্থ সামীচি.

ভেসজ্জসিক্খাপদং

২৫. যানি খো পন তানি গিলানানং ভিক্খুনীনং পটিসাযনীযানি ভেসজ্জানি, সেয্যথিদং – সপ্পি নৰনীতং তেলং মধু ফাণিতং, তানি পটিগ্গহেত্ৰা সত্তাহপরমং সন্নিধিকারকং পরিভুঞ্জিতব্বানি. তং অতিক্কামেন্তিযা, নিস্সগ্গিযং পাচিত্তিযং.

চীৰরঅচ্ছিন্দনসিক্খাপদং

২৬. যা পন ভিক্খুনী ভিক্খুনিযা সামং চীৰরং দত্ৰা কুপিতা অনত্তমনা অচ্ছিন্দেয্য ৰা অচ্ছিন্দাপেয্য ৰা, নিস্সগ্গিযং পাচিত্তিযং.

সুত্তৰিঞ্ঞত্তিসিক্খাপদং

২৭. যা পন ভিক্খুনী সামং সুত্তং ৰিঞ্ঞাপেত্ৰা তন্তৰাযেহি চীৰরং ৰাযাপেয্য, নিস্সগ্গিযং পাচিত্তিযং.

মহাপেসকারসিক্খাপদং

২৮. ভিক্খুনিং পনেৰ উদ্দিস্স অঞ্ঞাতকো গহপতি ৰা গহপতানী ৰা তন্তৰাযেহি চীৰরং ৰাযাপেয্য, তত্র চেসা ভিক্খুনী পুব্বে অপ্পৰারিতা তন্তৰাযে উপসঙ্কমিত্ৰা চীৰরে ৰিকপ্পং আপজ্জেয্য ‘‘ইদং খো আৰুসো চীৰরং মং উদ্দিস্স ৰিয্যতি, আযতঞ্চ করোথ, ৰিত্থতঞ্চ অপ্পিতঞ্চ সুৰীতঞ্চ সুপ্পৰাযিতঞ্চ সুৰিলেখিতঞ্চ সুৰিতচ্ছিতঞ্চ করোথ, অপ্পেৰ নাম মযম্পি আযস্মন্তানং কিঞ্চিমত্তং অনুপদজ্জেয্যামা’’তি, এৰঞ্চ সা ভিক্খুনী ৰত্ৰা কিঞ্চিমত্তং অনুপদজ্জেয্য অন্তমসো পিণ্ডপাতমত্তম্পি, নিস্সগ্গিযং পাচিত্তিযং.

অচ্চেকচীৰরসিক্খাপদং

২৯. দসাহানাগতং কত্তিকতেমাসিকপুণ্ণমং ভিক্খুনিযা পনেৰ অচ্চেকচীৰরং উপ্পজ্জেয্য, অচ্চেকং মঞ্ঞমানায ভিক্খুনিযা পটিগ্গহেতব্বং, পটিগ্গহেত্ৰা যাৰ চীৰরকালসমযং নিক্খিপিতব্বং. ততো চে উত্তরি নিক্খিপেয্য, নিস্সগ্গিযং পাচিত্তিযং.

পরিণতসিক্খাপদং

৩০. যা পন ভিক্খুনী জানং সঙ্ঘিকং লাভং পরিণতং অত্তনো পরিণামেয্য, নিস্সগ্গিযং পাচিত্তিযং.

পত্তৰগ্গো ততিযো.

উদ্দিট্ঠা খো, অয্যাযো, তিংস নিস্সগ্গিযা পাচিত্তিযা ধম্মা. তত্থায্যাযো, পুচ্ছামি, কচ্চিত্থ পরিসুদ্ধা, দুতিযম্পি পুচ্ছামি, কচ্চিত্থ পরিসুদ্ধা, ততিযম্পি পুচ্ছামি, কচ্চিত্থ পরিসুদ্ধা, পরিসুদ্ধেত্থায্যাযো, তস্মা তুণ্হী, এৰমেতং ধারযামীতি.

নিস্সগ্গিযপাচিত্তিযা নিট্ঠিতা.

সুদ্ধপাচিত্তিযা

ইমে খো পনায্যাযো, ছসট্ঠিসতা পাচিত্তিযা

ধম্মা উদ্দেসং আগচ্ছন্তি.

লসুণসিক্খাপদং

১. যা পন ভিক্খুনী লসুণং খাদেয্য পাচিত্তিযং.