১. সপ্পিৰিঞ্ঞাপনসিক্খাপদৰণ্ণনা

পাটিদেসনীযেসু পঠমে সপ্পিন্তি পুব্বে ৰুত্তৰিনিচ্ছযং পাল়িআগতং (পাচি. ১২৩০) গোসপ্পিআদিমেৰ. ৰিঞ্ঞাপেত্ৰা ভুঞ্জেয্যাতি এত্থ ‘‘ৰিঞ্ঞত্তিযা পটিলদ্ধং ভুঞ্জিস্সামী’’তি গহণে দুক্কটং, গহিতস্স অজ্ঝোহারে অজ্ঝোহারে পাটিদেসনীযং.

সাৰত্থিযং ছব্বগ্গিযা ভিক্খুনিযো আরব্ভ সপ্পিং ৰিঞ্ঞাপেত্ৰা ভুঞ্জনৰত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, তিকপাটিদেসনীযং, গিলানায দ্ৰিকদুক্কটং. যা পন গিলানা গিলানসঞ্ঞা, গিলানকালে ৰা ৰিঞ্ঞাপেত্ৰা পচ্ছা অগিলানা হুত্ৰা ভুঞ্জতি, গিলানায ৰা সেসকং, ঞাতকপ্পৰারিতট্ঠানতো ৰা ৰিঞ্ঞত্তং, অঞ্ঞস্স ৰা অত্থায, অত্তনো ৰা ধনেন গহিতং ভুঞ্জতি, তস্সা, উম্মত্তিকাদীনঞ্চ অনাপত্তি. ৰুত্তলক্খণসপ্পিতা, অনুঞ্ঞাতকারণাভাৰো, ৰিঞ্ঞত্তি, অজ্ঝোহারোতি ইমানেত্থ চত্তারি অঙ্গানি. সমুট্ঠানাদীনি অদ্ধানসদিসানীতি.

সপ্পিৰিঞ্ঞাপনসিক্খাপদৰণ্ণনা নিট্ঠিতা.