৭. গব্ভিনীৰগ্গো

১. গব্ভিনীসিক্খাপদৰণ্ণনা

গব্ভিনিৰগ্গস্স পঠমে ‘‘গব্ভিনী’’তি জানিত্ৰা উপজ্ঝাযায ৰুট্ঠাপেন্তিযা গণপরিযেসনাদীসু চ ঞত্তিকম্মৰাচাদ্ৰযে চ দুক্কটং, কম্মৰাচাপরিযোসানে পাচিত্তিযং.

সাৰত্থিযং সম্বহুলা ভিক্খুনিযো আরব্ভ গব্ভিনিং ৰুট্ঠাপনৰত্থুস্মিং পঞ্ঞত্তং, গব্ভিনিযা ৰেমতিকায অগব্ভিনিযা গব্ভিনিসঞ্ঞায চেৰ ৰেমতিকায চ দুক্কটং. উভোসু অগব্ভিনিসঞ্ঞায, উম্মত্তিকাদীনঞ্চ অনাপত্তি. গব্ভিনিতা, ‘গব্ভিনী’তি জাননং, ৰুট্ঠাপনন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানি, ইদং পন পণ্ণত্তিৰজ্জং, তিচিত্তং, তিৰেদনন্তি.

গব্ভিনীসিক্খাপদৰণ্ণনা নিট্ঠিতা.

২. পাযন্তীসিক্খাপদৰণ্ণনা

দুতিযে পাযন্তিন্তি থঞ্ঞং পাযমানং, যং পাযেতি, তস্স মাতা ৰা, ধাতি ৰা. ইদং ৰত্থুমত্তমেৰেত্থ ৰিসেসো, সেসং পঠমসিক্খাপদসদিসমেৰাতি.

পাযন্তীসিক্খাপদৰণ্ণনা নিট্ঠিতা.

৩. পঠমসিক্খমানসিক্খাপদৰণ্ণনা

ততিযে দ্ৰে ৰস্সানীতি পৰারণাৰসেন দ্ৰে সংৰচ্ছরানি. ছসু ধম্মেসূতি পাণাতিপাতাৰেরমণিআদীসু ৰিকালভোজনাৰেরমণিপরিযোসানেসু ছসু সিক্খাপদেসু. অসিক্খিতসিক্খন্তি পদভাজনে (পাচি. ১০৭৭) ৰুত্তনযেনেৰ অদিন্নসিক্খং ৰা কুপিতসিক্খং ৰা. সিক্খমানং ৰুট্ঠাপেয্যাতি তেসু ছসু ধম্মেসু সিক্খনতো, তে ৰা সিক্খাসঙ্খাতে ধম্মে মাননতো এৰংলদ্ধনামং অনুপসম্পন্নং উপসম্পাদেয্য. পাচিত্তিযন্তি পঠমসিক্খাপদে ৰুত্তনযেনেৰ কম্মৰাচাপরিযোসানে পাচিত্তিযং.

সাৰত্থিযং সম্বহুলা ভিক্খুনিযো আরব্ভ এৰরূপং সিক্খমানং ৰুট্ঠাপনৰত্থুস্মিং পঞ্ঞত্তং, ধম্মকম্মে তিকপাচিত্তিযং, অধম্মকম্মে তিকদুক্কটং. দ্ৰে ৰস্সানি ছসু ধম্মেসু সিক্খিতসিক্খং সিক্খমানং ৰুট্ঠাপেন্তিযা, উম্মত্তিকাদীনঞ্চ অনাপত্তি. ৰুত্তনযেন অসিক্খিতসিক্খতা, ধম্মকম্মতা, কম্মৰাচাপরিযোসানন্তি ইমানেত্থ তীণি অঙ্গানি. সমুট্ঠানাদীনি পঠমে ৰুত্তনযানেৰাতি.

পঠমসিক্খমানসিক্খাপদৰণ্ণনা নিট্ঠিতা.

৪. দুতিযসিক্খমানসিক্খাপদৰণ্ণনা

চতুত্থে সঙ্ঘেন অসম্মতন্তি যস্সা সঙ্ঘেন অন্তমসো উপসম্পদামাল়কেপি পদভাজনে (পাচি. ১০৮৬) ৰুত্তা উপসম্পদাসম্মুতি ন দিন্না হোতি, তং ইমা দ্ৰেপি মহাসিক্খমানা নাম. ইধ সঙ্ঘেন সম্মতং ৰুট্ঠাপেন্তিযা, উম্মত্তিকাদীনঞ্চ অনাপত্তি. সেসং ততিযে ৰুত্তসদিসমেৰ, ইদং পন কিরিযাকিরিযং হোতীতি.

দুতিযসিক্খমানসিক্খাপদৰণ্ণনা নিট্ঠিতা.

৫. পঠমগিহিগতসিক্খাপদৰণ্ণনা

পঞ্চমে গিহিগতন্তি পুরিসন্তরগতং, ইধাপি ইদং ৰত্থুমত্তমেৰ ৰিসেসো. ঊনদ্ৰাদসৰস্সঞ্চ পরিপুণ্ণসঞ্ঞায ৰুট্ঠাপেন্তিযা কিঞ্চাপি অনাপত্তি, সা পন অনুপসম্পন্নাৰ হোতি. সেসং পঠমসিক্খাপদসদিসমেৰাতি.

পঠমগিহিগতসিক্খাপদৰণ্ণনা নিট্ঠিতা.

৬-৭. দুতিযততিযগিহিগতসিক্খাপদৰণ্ণনা

ছট্ঠে সব্বং ততিযে ৰুত্তনযেন. সত্তমেপি সব্বং চতুত্থে ৰুত্তনযেনেৰ ৰেদিতব্বন্তি.

দুতিযততিযগিহিগতসিক্খাপদৰণ্ণনা নিট্ঠিতা.

৮. পঠমসহজীৰিনিসিক্খাপদৰণ্ণনা

অট্ঠমে সহজীৰিনিন্তি সদ্ধিৰিহারিনিং. নেৰ অনুগ্গণ্হেয্যাতি সযং উদ্দেসাদীহি নানুগ্গণ্হেয্য. ন অনুগ্গণ্হাপেয্যাতি ‘‘ইমিস্সা, অয্যে, উদ্দেসাদীনি দেহী’’তি এৰং ন অঞ্ঞায অনুগ্গণ্হাপেয্য. পাচিত্তিযন্তি ধুরে নিক্খিত্তমত্তে পাচিত্তিযং.

সাৰত্থিযং থুল্লনন্দং আরব্ভ এৰরূপে ৰত্থুস্মিং পঞ্ঞত্তং, সেসমেত্থ তুৰট্টৰগ্গে দুক্খিতসহজীৰিনিসিক্খাপদে ৰুত্তসদিসমেৰাতি.

পঠমসহজীৰিনিসিক্খাপদৰণ্ণনা নিট্ঠিতা.

৯. নানুবন্ধনসিক্খাপদৰণ্ণনা

নৰমে ৰুট্ঠাপিতং পৰত্তিনিন্তি ৰুট্ঠাপিতং পৰত্তিনিং যায উপসম্পাদিতা, তং উপজ্ঝাযিনিন্তি অত্থো. নানুবন্ধেয্যাতি চুণ্ণেন মত্তিকায দন্তকট্ঠেন মুখোদকেনাতি এৰং তেন তেন করণীযেন ন উপট্ঠহেয্য. পাচিত্তিযন্তি নানুবন্ধিস্সন্তি ধুরে নিক্খিত্তমত্তে পাচিত্তিযং.

সাৰত্থিযং সম্বহুলা ভিক্খুনিযো আরব্ভ নানুবন্ধনৰত্থুস্মিং পঞ্ঞত্তং. বালং পন অলজ্জিনিং ৰা অননুবন্ধন্তিযা, গিলানায, আপদাসু, উম্মত্তিকাদীনঞ্চ অনাপত্তি. ৰুট্ঠাপিতপ্পৰত্তিনিতা, দ্ৰে ৰস্সানি অননুবন্ধনে ধুরনিক্খেপো, অনুঞ্ঞাতকারণাভাৰোতি ইমানেত্থ তীণি অঙ্গানি. সমুট্ঠানাদীনি পঠমপারাজিকসদিসানি, ইদং পন অকিরিযং, দুক্খৰেদনন্তি.

নানুবন্ধনসিক্খাপদৰণ্ণনা নিট্ঠিতা.

১০. দুতিযসহজীৰিনিসিক্খাপদৰণ্ণনা

দসমে নেৰ ৰূপকাসেয্যাতি ন গহেত্ৰা গচ্ছেয্য. ন ৰূপকাসাপেয্যাতি ‘‘ইমং, অয্যে, গহেত্ৰা গচ্ছাহী’’তি অঞ্ঞং ন আণাপেয্য. পাচিত্তিযন্তি ধুরে নিক্খিত্তমত্তে পাচিত্তিযং.

সাৰত্থিযং থুল্লনন্দং আরব্ভ সহজীৰিনিযা অৰূপকাসনৰত্থুস্মিং পঞ্ঞত্তং. সতি পন অন্তরাযে, পরিযেসিত্ৰা দুতিযিকং অলভন্তিযা, গিলানায, আপদাসু, উম্মত্তিকাদীনঞ্চ অনাপত্তি. সহজীৰিনিতা, ৰূপকাসৰূপকাসাপনে ধুরনিক্খেপো, অনুঞ্ঞাতকারণাভাৰোতি ইমানেত্থ তীণি অঙ্গানি. সমুট্ঠানাদীনি সমনুভাসনসদিসানীতি.

দুতিযসহজীৰিনিসিক্খাপদৰণ্ণনা নিট্ঠিতা.

গব্ভিনীৰগ্গো সত্তমো.