৫. চীৰরসঙ্কমনীযসিক্খাপদৰণ্ণনা

পঞ্চমে চীৰরসঙ্কমনীযন্তি সঙ্কমেতব্বং চীৰরং, অঞ্ঞিস্সা সন্তকং অনাপুচ্ছা গহিতং পুন পটিদাতব্বং পঞ্চন্নং অঞ্ঞতরং চীৰরন্তি অত্থো. ধারেয্যাতি সচে তং নিৰাসেতি ৰা পারুপতি ৰা পাচিত্তিযং.

সাৰত্থিযং অঞ্ঞতরং ভিক্খুনিং আরব্ভ ভিক্খুনিযা চীৰরং আদায অনাপুচ্ছা পারুপনৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং. যা পন তায ৰা দিন্নং, তং ৰা আপুচ্ছা, অচ্ছিন্ননট্ঠচীৰরিকা ৰা হুত্ৰা, ‘‘ইদং মে চীৰরং মহগ্ঘং ঈদিসে চোরভযে ন সক্কা ধারেতু’’ন্তি এৰরূপাসু আপদাসু ৰা ধারেতি, তস্সা, উম্মত্তিকাদীনঞ্চ অনাপত্তি. চীৰরসঙ্কমনীযতা, উপসম্পন্নায সন্তকতা, অনুঞ্ঞাতকারণাভাৰো, ধারণন্তি ইমানেত্থ চত্তারি অঙ্গানি. সমুট্ঠানাদীনি পঠমকথিনসদিসানি, ইদং পন কিরিযাকিরিযন্তি.

চীৰরসঙ্কমনীযসিক্খাপদৰণ্ণনা নিট্ঠিতা.