পাটিদেসনীযকণ্ডো

১. পঠমপাটিদেসনীযসিক্খাপদৰণ্ণনা

পাটিদেসনীযেসু পঠমে অন্তরঘরং পৰিট্ঠাযাতি ৰচনতো সচে তস্সা অন্তরারামাদীসু ঠত্ৰাপি দদমানায হত্থতো সযং রথিযাব্যূহসিঙ্ঘাটকঘরানং অঞ্ঞতরস্মিং ঠিতোপি গণ্হাতি, দোসো নত্থি. তস্সা পন রথিযাদীসু ঠত্ৰা দদমানায, রথিযাদীসু ৰা, অন্তরারামাদীসু ৰা ঠত্ৰাপি যংকিঞ্চি আমিসং অজ্ঝোহরণত্থায গণ্হতো পটিগ্গহণে দুক্কটং, অজ্ঝোহারে অজ্ঝোহারে পাটিদেসনীযং. তস্স দেসেতব্বাকারো গারয্হং আৰুসোতিআদিনা নযেন সিক্খাপদে দস্সিতোযেৰ.

সাৰত্থিযং অঞ্ঞতরং ভিক্খুং আরব্ভ অঞ্ঞাতিকায ভিক্খুনিযা অন্তরঘরং পৰিট্ঠায হত্থতো আমিসং পটিগ্গহণৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, যথা চেতং, তথা সেসানিপি, তিকপাটিদেসনীযং, যামকালিকাদীসু পটিগ্গহণেপি অজ্ঝোহরণেপি দুক্কটং, একতোউপসম্পন্নায যাৰকালিকেপি তথেৰ, ঞাতিকায অঞ্ঞাতিকসঞ্ঞিৰেমতিকানম্পি এসেৰ নযো. ঞাতিকসঞ্ঞিনো পন, ঞাতিকায ৰা দাপেন্তিযা, উপনিক্খিপিত্ৰা ৰা দদমানায, যা চ অন্তরারামভিক্খুনুপস্সযতিত্থিযসেয্যপটিক্কমনেসু ঠত্ৰা গামতো বহি নীহরিত্ৰা, যামকালিকাদীনি ৰা ‘‘সতি পচ্চযে পরিভুঞ্জা’’তি দেতি, তস্স, সিক্খমানসামণেরীনঞ্চ হত্থতো গহেত্ৰা পরিভুঞ্জন্তস্স, উম্মত্তকাদীনঞ্চ অনাপত্তি. পরিপুণ্ণূপসম্পন্নতা, অঞ্ঞাতিকতা, অন্তরঘরে ঠিতায হত্থতো সহত্থা পটিগ্গহণং, যাৰকালিকতা, অজ্ঝোহরণন্তি ইমানেত্থ পঞ্চ অঙ্গানি. সমুট্ঠানাদীনি এল়কলোমসদিসানীতি.

পঠমপাটিদেসনীযসিক্খাপদৰণ্ণনা নিট্ঠিতা.

২. দুতিযপাটিদেসনীযসিক্খাপদৰণ্ণনা

দুতিযে ইধ সূপন্তিআদি ৰোসাসনাকারদস্সনং. অপসক্ক তাৰ ভগিনীতিআদি অপসাদেতব্বাকারদস্সনং. তত্রাযং ৰিনিচ্ছযো – একেনাপি ভিক্খুনা অনপসাদিতে অজ্ঝোহরণত্থায আমিসং গণ্হন্তানং পটিগ্গহণে দুক্কটং, অজ্ঝোহারে অজ্ঝোহারে পাটিদেসনীযন্তি.

রাজগহে ছব্বগ্গিযে আরব্ভ ভিক্খুনিযা ৰোসাসন্তিযা ননিৰারণৰত্থুস্মিং পঞ্ঞত্তং, তিকপাটিদেসনীযং, একতোউপসম্পন্নায ৰোসাসন্তিযা ননিৰারেন্তস্স দুক্কটং, তথা অনুপসম্পন্নায উপসম্পন্নসঞ্ঞিনো ৰেমতিকস্স চ. অনুপসম্পন্নসঞ্ঞিনো, পন যো চ অত্তনো ৰা ভত্তং দাপেন্তিযা, অঞ্ঞেসং ৰা ভত্তং দেন্তিযা, যং ৰা ন দিন্নং, তং দাপেন্তিযা, যত্থ ৰা ন দিন্নং, তত্থ, সব্বেসং ৰা সমকং দাপেন্তিযা, সিক্খমানায ৰা সামণেরিযা ৰা ৰোসাসন্তিযা পটিগ্গহেত্ৰা ভুঞ্জতি, তস্স, পঞ্চ ভোজনানি ঠপেত্ৰা সব্বত্থ, উম্মত্তকাদীনঞ্চ অনাপত্তি. পরিপুণ্ণূপসম্পন্নতা, পঞ্চভোজনতা, অন্তরঘরে অনুঞ্ঞাতপকারতো অঞ্ঞথা ৰোসাসনা, অনিৰারণা, অজ্ঝোহরণন্তি ইমানেত্থ পঞ্চ অঙ্গানি. সমুট্ঠানাদীনি কথিনসদিসানীতি.

দুতিযপাটিদেসনীযসিক্খাপদৰণ্ণনা নিট্ঠিতা.

৩. ততিযপাটিদেসনীযসিক্খাপদৰণ্ণনা

ততিযে সেক্খসম্মতানীতি লদ্ধসেক্খসম্মুতিকানি. পুব্বে অনিমন্তিতোতি ঘরূপচারোক্কমনতো পঠমতরং উপচারং অনোক্কমন্তেযেৰ পুব্বে অনিমন্তিতো. অগিলানো নাম যো সক্কোতি পিণ্ডায চরিতুং. পাটিদেসনীযন্তি ঘরূপচারং ওক্কমিত্ৰা আমিসং গণ্হন্তস্স পটিগ্গহণে তাৰ দুক্কটং, তং গহেত্ৰা যত্থকত্থচি ভুঞ্জন্তস্স অজ্ঝোহারে অজ্ঝোহারে পাটিদেসনীযন্তি.

সাৰত্থিযং সম্বহুলে ভিক্খূ আরব্ভ ন মত্তং জানিত্ৰা পটিগ্গহণৰত্থুস্মিং পঞ্ঞত্তং, ‘‘পুব্বে অনিমন্তিতো, অগিলানো’’তি ইমা পনেত্থ দ্ৰে অনুপঞ্ঞত্তিযো, তিকপাটিদেসনীযং, যামকালিকাদীসু পটিগ্গহণেপি অজ্ঝোহারেপি দুক্কটং, তথা অসেক্খসম্মতে সেক্খসম্মতসঞ্ঞিনো ৰেমতিকস্স চ. অসেক্খসম্মতসঞ্ঞিনো, পন যো চ পুব্বে নিমন্তিতো ৰা গিলানো ৰা অঞ্ঞস্স ৰা তেসং ঘরে পঞ্ঞত্তং ভিক্খং গণ্হাতি, যস্স চ ঘরতো নীহরিত্ৰা, আসনসালাদীসু ৰা ভিক্খুং অদিস্ৰা পঠমংযেৰ নীহরিত্ৰা, দ্ৰারমূলে ৰা ঠপিতং দেন্তি, তস্স তং ভুঞ্জন্তস্স, নিচ্চভত্তকে, সলাকভত্তে, পক্খিকে, উপোসথিকে, পাটিপদিকে, যামকালিকাদিং ‘‘সতি পচ্চযে পরিভুঞ্জা’’তি দিন্নং পরিভুঞ্জন্তস্স, উম্মত্তকাদীনঞ্চ অনাপত্তি. সেক্খসম্মততা, পুব্বে অনিমন্তিততা, অগিলানতা, ঘরূপচারোক্কমনং, ঠপেত্ৰা নিচ্চভত্তকাদীনি অঞ্ঞং আমিসং গহেত্ৰা ভুঞ্জনন্তি ইমানেত্থ পঞ্চ অঙ্গানি. সমুট্ঠানাদীনি এল়কলোমসদিসানীতি.

ততিযপাটিদেসনীযসিক্খাপদৰণ্ণনা নিট্ঠিতা.

৪. চতুত্থপাটিদেসনীযসিক্খাপদৰণ্ণনা

চতুত্থে যানি খো পন তানি আরঞ্ঞকানীতিআদি চীৰরৰিপ্পৰাসসিক্খাপদে ৰুত্তনযেনেৰ ৰেদিতব্বং. পুব্বে অপ্পটিসংৰিদিতন্তি এত্থ যং ইত্থিযা ৰা পুরিসেন ৰা গহট্ঠেন ৰা পব্বজিতেন ৰা আরামং ৰা আরামূপচারং ৰা পৰিসিত্ৰা ‘‘ইত্থন্নামস্স, ভন্তে, কুলস্স খাদনীযং ৰা ভোজনীযং ৰা আহরিযিস্সতী’’তি (পাচি. ৫৭৩) আরোচিতং, তং পচ্ছা যথাআরোচিতমেৰ ৰা আহরিযতু, তস্স পরিৰারং কত্ৰা অঞ্ঞং ৰা তেন সদ্ধিং বহুকম্পি, ‘‘ইত্থন্নামং কুলং পটিসংৰিদিতং কত্ৰা খাদনীযং ৰা ভোজনীযং ৰা গহেত্ৰা গচ্ছতী’’তি সুত্ৰা অঞ্ঞানি ৰা কুলানি তেহি সদ্ধিং আহরন্তু, তং সব্বং পটিসংৰিদিতং নাম. যং পন এৰং অনারোচিতং অনাহটঞ্চ, তং অপ্পটিসংৰিদিতং নাম. অগিলানো নাম যো সক্কোতি পিণ্ডায গন্তুং. পাটিদেসনীযন্তি এৰরূপং অন্তমসো আরামমজ্ঝেন গচ্ছন্তেহি অদ্ধিকেহি দিন্নম্পি আরামে ৰা আরামূপচারে ৰা পটিগ্গহেত্ৰা অজ্ঝোহরন্তস্স পটিগ্গহণে দুক্কটং, অজ্ঝোহারে অজ্ঝোহারে পাটিদেসনীযন্তি.

সক্কেসু সম্বহুলে ভিক্খূ আরব্ভ আরামে চোরে পটিৰসন্তে অনারোচনৰত্থুস্মিং পঞ্ঞত্তং, ‘‘অগিলানো’’তি অযমেত্থ একা অনুপঞ্ঞত্তি, তিকপাটিদেসনীযং, যামকালিকাদীসু আহারত্থায পটিগ্গহণেপি অজ্ঝোহারেপি দুক্কটমেৰ, তথা পটিসংৰিদিতে অপ্পটিসংৰিদিতসঞ্ঞিনো ৰেমতিকস্স চ, পটিসংৰিদিতসঞ্ঞিনো, পন গিলানস্স, যো চ পটিসংৰিদিতং কত্ৰা আহটং ৰা গিলানাৰসেসকং ৰা বহারামে ৰা পটিগ্গহিতং, তত্থজাতকমেৰ ৰা মূলফলাদিং, যামকালিকাদীসু ৰা যংকিঞ্চি ‘‘সতি পচ্চযে পরিভুঞ্জা’’তি লদ্ধং পরিভুঞ্জন্তস্স, উম্মত্তকাদীনঞ্চ অনাপত্তি. যথাৰুত্তআরঞ্ঞকসেনাসনতা, যাৰকালিকস্স অতত্থজাতকতা, অগিলানতা, অগিলানাৰসেসকতা, অপ্পটিসংৰিদিততা, অজ্ঝারামে পটিগ্গহণং, অজ্ঝোহরণন্তি ইমানেত্থ সত্ত অঙ্গানি. সমুট্ঠানাদীনি কথিনসদিসানেৰ, ইদং পন কিরিযাকিরিযন্তি.

চতুত্থপাটিদেসনীযসিক্খাপদৰণ্ণনা নিট্ঠিতা.

কঙ্খাৰিতরণিযা পাতিমোক্খৰণ্ণনায

পাটিদেসনীযৰণ্ণনা নিট্ঠিতা.