সেখিযকণ্ডো

১. পরিমণ্ডলসিক্খাপদৰণ্ণনা

সেখিযেসু পঠমে পরিমণ্ডলন্তি সমন্ততো মণ্ডলং. সিক্খা করণীযাতি ‘‘এৰং নিৰাসেস্সামী’’তি আরামেপি অন্তরঘরেপি সব্বত্থ সিক্খা কাতব্বা, এত্থ চ যস্মা ৰত্তক্খন্ধকে ৰুত্তৰত্তানিপি সিক্খিতব্বত্তা সেখিযানেৰ হোন্তি, তস্মা পারাজিকাদীসু ৰিয পরিচ্ছেদো ন কতো. চারিত্তৰিনযদস্সনত্থঞ্চ ‘‘যো পন ভিক্খু ওলম্বেন্তো নিৰাসেয্য, দুক্কট’’ন্তি এৰং আপত্তিনামেন অৰত্ৰা ‘‘সিক্খা করণীযা’’তি এৰং সব্বসিক্খাপদেসু পাল়ি আরোপিতা, পদভাজনে (পাচি. ৫৭৬) পন ‘‘আপত্তি দুক্কটস্সা’’তি ৰুত্তত্তা সব্বত্থ অনাদরিযকরণে দুক্কটং ৰেদিতব্বং.

ইদানি পরিমণ্ডলন্তি এত্থ নাভিমণ্ডলং পটিচ্ছাদেত্ৰা জাণুমণ্ডলস্স হেট্ঠা জঙ্ঘট্ঠিকতো পট্ঠায অট্ঠঙ্গুলমত্তং নিৰাসনং ওতারেত্ৰা নিৰাসেন্তেন পরিমণ্ডলং নিৰত্থং নাম হোতি, এৰং অনিৰাসেত্ৰা অনাদরিযেন পুরতো ৰা পচ্ছতো ৰা ওলম্বেত্ৰা নিৰাসেন্তস্স দুক্কটং. ন কেৰলঞ্চ তস্সেৰ, যে চঞ্ঞে ‘‘তেন খো পন সমযেন ছব্বগ্গিযা গিহিনিৰত্থং নিৰাসেন্তি, হত্থিসোণ্ডকং মচ্ছৰালকং চতুক্কণ্ণকং তালৰণ্টকং সতৰলিকং নিৰাসেন্তি, সংৰল্লিযং নিৰাসেন্তী’’তি খন্ধকে (চূল়ৰ. ২৮০) নিৰাসনদোসা ৰুত্তা, তথা নিৰাসেন্তস্সপি দুক্কটমেৰ.

তত্থ হত্থিসোণ্ডকং নাম নাভিমূলতো হত্থিসোণ্ডসণ্ঠানং ওলম্বকং কত্ৰা নিৰত্থং চোল়িকইত্থীনং নিৰাসনং ৰিয. মচ্ছৰালকং নাম একতোদসন্তং একতো পাসন্তং ওলম্বেত্ৰা নিৰত্থং. চতুক্কণ্ণকং নাম উপরি দ্ৰে, হেট্ঠতো দ্ৰেতি এৰং চত্তারো কণ্ণে দস্সেত্ৰা নিৰত্থং. তালৰণ্টকং নাম তালৰণ্টাকারেন সাটকং ওলম্বেত্ৰা নিৰত্থং. সতৰলিকং নাম দীঘসাটকং অনেকক্খত্তুং ওভুজিত্ৰা ওৰট্টিকং করোন্তেন নিৰত্থং, ৰামদক্খিণপস্সেসু ৰা নিরন্তরং ৰলিযো দস্সেত্ৰা নিৰত্থং. সচে পন জাণুতো পট্ঠায একা ৰা দ্ৰে ৰা ৰলিযো পঞ্ঞাযন্তি, ৰট্টতি. সংৰল্লিযন্তি মল্লকম্মকারাদীহি ৰিয কচ্ছং বন্ধিত্ৰা নিৰত্থং. এৰং নিৰাসেতুং গিলানস্সাপি মগ্গপ্পটিপন্নস্সাপি ন ৰট্টতি. যম্পি মগ্গং গচ্ছন্তা একং ৰা দ্ৰে ৰা কণ্ণে উক্খিপিত্ৰা অন্তরৰাসকস্স উপরি লগ্গন্তি, অন্তো ৰা একং কাসাৰং তথা নিৰাসেত্ৰা বহি অপরং নিৰাসেন্তি, সব্বং ন ৰট্টতি.

গিলানো পন অন্তোকাসাৰস্স ওৰট্টিকং দস্সেত্ৰা অপরং উপরি নিৰাসেতুং লভতি, অগিলানেন দ্ৰে নিৰাসেন্তেন সগুণং কত্ৰা নিৰাসেতব্বানি. ইতি ইমং খন্ধকে পটিক্খিত্তঞ্চ ওলম্বকঞ্চ সব্বং ৰিৰজ্জেত্ৰা ৰুত্তলক্খণসম্পন্নং নিব্বিকারং পরিমণ্ডলং নিৰাসেতব্বং, তথা অনিৰাসেত্ৰা যংকিঞ্চি ৰিকারং করোন্তস্স দুক্কটং.

‘‘নিদানং পুগ্গলং ৰত্থু’’ন্তিআদিকে (কঙ্খা. অট্ঠ. পঠমপারাজিকৰণ্ণনা ) পন ৰিনিচ্ছযে সুরুসুরুকারকং কোসম্বিযং পঞ্ঞত্তং, সামিসেন হত্থেন পানীযথালকসসিত্থকপত্তধোৰনপটিসংযুত্তদ্ৰযং ভগ্গেসু সম্বহুলে ভিক্খূ আরব্ভ, সেসানি সব্বানেৰ সাৰত্থিযং ছব্বগ্গিযে আরব্ভ ওলম্বেত্ৰা নিৰাসনাদিৰত্থুস্মিং পঞ্ঞত্তানি. সূপোদনৰিঞ্ঞত্তিযং ধম্মদেসনাদীসু চ গিলানৰসেন একা অনুপঞ্ঞত্তি, সব্বানি সাধারণপঞ্ঞত্তিযো, অনাণত্তিকানি, সব্বেসু দুক্কটমেৰ, অঞ্ঞো আপত্তিভেদো নত্থি, ৰিপত্তিৰিচারণা ৰুত্তাযেৰ, সমুট্ঠানাদীনি সব্বেসং অৰসানে দস্সযিস্সাম. অনাপত্তিমত্তং পন অঙ্গঞ্চ সব্বত্থ ৰত্তব্বং, তযিদং ৰুচ্চতি. ইমস্মিং তাৰ সিক্খাপদে অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকাদীনঞ্চ অনাপত্তি.

তত্থ অসঞ্চিচ্চাতি ‘‘অপরিমণ্ডলং নিৰাসেস্সামী’’তি এৰং অসঞ্চিচ্চ, অথ খো ‘‘পরিমণ্ডলংযেৰ নিৰাসেস্সামী’’তি ৰিরজ্ঝিত্ৰা অপরিমণ্ডলং নিৰাসেন্তস্স অনাপত্তি. অস্সতিযাতি অঞ্ঞাৰিহিতস্সাপি তথা নিৰাসেন্তস্স অনাপত্তি. অজানন্তস্সাতি পরিমণ্ডলং নিৰাসেতুং অজানন্তস্স অনাপত্তি, অপিচ নিৰাসনৰত্তং উগ্গহেতব্বং. যো পন সুক্খজঙ্ঘো ৰা হোতি মহাপিণ্ডিকমংসো ৰা, তস্স সারুপ্পত্থায অট্ঠঙ্গুলাধিকম্পি ওতারেত্ৰা নিৰাসেতুং ৰট্টতি. গিলানস্সাতি যস্স জঙ্ঘায ৰা পাদে ৰা ৰণো হোতি, তস্স উক্খিপিত্ৰা ৰা ওতারেত্ৰা ৰা নিৰাসেতুং ৰট্টতি. আপদাসূতি ৰাল়া ৰা চোরা ৰা অনুবন্ধন্তি, এৰরূপাসু আপদাসু অনাপত্তি. উম্মত্তকাদযো ৰুত্তনযা এৰ. অনাদরিযং, অনাপত্তিকারণাভাৰো, অপরিমণ্ডলনিৰাসনন্তি ইমানেত্থ তীণি অঙ্গানি. যথা চেত্থ, এৰং সব্বত্থ পুরিমানি দ্ৰে তত্থ তত্থ ৰুত্তপ্পটিপক্খকরণঞ্চাতি তীণিযেৰ হোন্তি, তস্মা ইতো পরং তানিপি অৰত্ৰা অনাপত্তিমত্তমেৰ ৰক্খামাতি.

২. দুতিযপরিমণ্ডলসিক্খাপদৰণ্ণনা

দুতিযে ‘‘ন, ভিক্খৰে, গিহিপারুতং পারুপিতব্ব’’ন্তি (চূল়ৰ. ২৮০) এৰং পটিক্খিত্তং গিহিপারুতং অপারুপিত্ৰা উভো কণ্ণে সমং কত্ৰা পারুপনং পরিমণ্ডলপারুপনং নাম, তত্থ যংকিঞ্চি সেতপটপারুতং পরিব্বাজকপারুতং একসাটকপারুতং সুরাসোণ্ডপারুতং অন্তেপুরিকপারুতং মহাজেট্ঠপারুতং কুটিপ্পৰেসকপারুতং ব্রাহ্মণপারুতং পাল়িকারকপারুতন্তি এৰমাদি পরিমণ্ডললক্খণতো অঞ্ঞথা পারুতং, সব্বমেতং গিহিপারুতং নাম. তস্মা যথা সেতপটা অড্ঢপালকনিগণ্ঠা পারুপন্তি, যথা চ একচ্চে পরিব্বাজকা উরং ৰিৰরিত্ৰা দ্ৰীসু অংসকূটেসু পাৰুরণং ঠপেন্তি, যথা চ একসাটকা মনুস্সা নিৰত্থসাটকস্স একেন অন্তেন পিট্ঠিং পারুপিত্ৰা উভো কণ্ণে উভোসু অংসকূটেসু ঠপেন্তি, যথা চ সুরাসোণ্ডাদযো সাটকেন গীৰং পরিক্খিপিত্ৰা উভো অন্তে উরে ৰা ওলম্বেন্তি, পিট্ঠিযং ৰা খিপন্তি, যথা চ অন্তেপুরিকাযো অক্খিতারকমত্তং দস্সেত্ৰা ওগুণ্ঠিতং পারুপন্তি, যথা চ মহাজেট্ঠা দীঘসাটকং নিৰাসেত্ৰা তস্সেৰ একেনন্তেন সকলসরীরং পারুপন্তি, যথা চ কস্সকা খেত্তকুটিং পৰিসন্তা সাটকং পলিৰেঠেত্ৰা উপকচ্ছকে পক্খিপিত্ৰা তস্সেৰ একেনন্তেন সরীরং পারুপন্তি, যথা চ ব্রাহ্মণা উভিন্নং উপকচ্ছকানং অন্তরে সাটকং পৰেসেত্ৰা অংসকূটেসু পক্খিপন্তি, যথা চ পাল়িকারকো ভিক্খু একংসপারুপনেন পারুতং ৰামবাহুং ৰিৰরিত্ৰা চীৰরং অংসকূটে আরোপেতি, এৰং অপারুপিত্ৰা সব্বেপি এতে, অঞ্ঞে চ এৰরূপে পারুপনদোসে ৰজ্জেত্ৰা নিব্বিকারং পরিমণ্ডলং পারুপিতব্বং. তথা অপারুপিত্ৰা আরামে ৰা অন্তরঘরে ৰা অনাদরেন যংকিঞ্চি ৰিকারং করোন্তস্স দুক্কটং, অনাপত্তি পুরিমসদিসাযেৰ, যথা চেত্থ, এৰং সব্বত্থ. যত্থ পন ৰিসেসো ভৰিস্সতি, তত্থ ৰক্খামাতি.

৩-৪. সুপ্পটিচ্ছন্নসিক্খাপদৰণ্ণনা

ততিযে সুপ্পটিচ্ছন্নোতি সুট্ঠু পটিচ্ছন্নো, গণ্ঠিকং পটিমুঞ্চিত্ৰা অনুৰাতন্তেন গীৰং পটিচ্ছাদেত্ৰা উভো কণ্ণে সমং কত্ৰা পটিসঙ্ঘরিত্ৰা যাৰ মণিবন্ধং পটিচ্ছাদেত্ৰা অন্তরঘরে গমিস্সামীতি অত্থো, তথা অকত্ৰা পন জাণুং ৰা উরং ৰা ৰিৰরিত্ৰা গচ্ছন্তস্স দুক্কটং.

চতুত্থে গলৰাটকতো পট্ঠায সীসং, মণিবন্ধতো পট্ঠায হত্থে, পিণ্ডিকমংসতো পট্ঠায পাদে ৰিৰরিত্ৰা সেসং ছাদেত্ৰা নিসিন্নো সুপ্পটিচ্ছন্নো নাম হোতি, এত্থ পন ৰাসূপগতস্স অনাপত্তি.

৫-৬. সুসংৰুতসিক্খাপদৰণ্ণনা

পঞ্চমে সুসংৰুতোতি হত্থং ৰা পাদং ৰা অকীল়াপেন্তো সুৰিনীতোতি অত্থো. ছট্ঠেপি এসেৰ নযো.

৭-৮. ওক্খিত্তচক্খুসিক্খাপদৰণ্ণনা

সত্তমে ওক্খিত্তচক্খূতি হেট্ঠা খিত্তচক্খু হুত্ৰা পুরতো যুগমত্তং ভূমিভাগং পেক্খমানো, একস্মিং পন ঠানে ঠত্ৰা হত্থিঅস্সাদিপরিস্সযাভাৰং ওলোকেতুং ৰট্টতি. অট্ঠমেপি এসেৰ নযো.

৯-১০. উক্খিত্তকসিক্খাপদৰণ্ণনা

নৰমে উক্খিত্তকাযাতি উক্খেপেন, ইত্থম্ভূতলক্খণে করণৰচনং, একতো ৰা উভতো ৰা উক্খিত্তচীৰরো হুত্ৰাতি অত্থো, অন্তো ইন্দখীলতো পট্ঠায এৰং ন গন্তব্বং.

দসমে নিসিন্নকালে ধমকরণং নীহরন্তেনাপি চীৰরং অনুক্খিপিত্ৰাৰ নীহরিতব্বং, ৰাসূপগতস্স পন অনাপত্তি.

১১-১২. উজ্জগ্ঘিকসিক্খাপদৰণ্ণনা

একাদসমে উজ্জগ্ঘিকাযাতি মহাহসিতং হসন্তোতি অত্থো. ইধাপি হি ইত্থম্ভূতলক্খণেযেৰ করণৰচনং.

দ্ৰাদসমেপি এসেৰ নযো. উভযত্থ হসনীযস্মিং ৰত্থুস্মিং মিহিতমত্তং করোন্তস্স অনাপত্তি.

১৩-১৪. উচ্চসদ্দসিক্খাপদৰণ্ণনা

তেরসমে অপ্পসদ্দোতি ন উচ্চাসদ্দমহাসদ্দো হুত্ৰা. চুদ্দসমেপি এসেৰ নযো. অযং পনেত্থ অপ্পসদ্দতাপরিচ্ছেদো – সচে দ্ৰাদসহত্থে গেহে আদিম্হি সঙ্ঘত্থেরো, মজ্ঝে দুতিযত্থেরো, অন্তে ততিযত্থেরোতি এৰং নিসিন্নেসু যং সঙ্ঘত্থেরো দুতিযত্থেরেন সদ্ধিং মন্তেতি, দুতিযত্থেরো চ তস্স সদ্দং সুণাতি, কথঞ্চ ৰৰত্থপেতি. ততিযত্থেরো পন সদ্দমেৰ সুণাতি, কথং ন ৰৰত্থপেতি, এত্তাৰতা অপ্পসদ্দো হোতি. সচে পন ততিযত্থেরো কথঞ্চ ৰৰত্থপেতি, মহাসদ্দো নাম হোতি.

১৫…পে…২০. কাযপ্পচালকাদিসিক্খাপদৰণ্ণনা

ইতো পরেসু ছসু কাযপ্পচালকন্তি কাযং চালেত্ৰা চালেত্ৰা, এস নযো সব্বত্থ. তস্মা কাযাদীনি পগ্গহেত্ৰা নিচ্চলানি উজুকানি ঠপেত্ৰা গন্তব্বঞ্চেৰ নিসীদিতব্বঞ্চ, নিসীদনপ্পটিসংযুত্তেসু তীসু ৰাসূপগতস্স অনাপত্তি.

২১-২২. খম্ভকতসিক্খাপদৰণ্ণনা

একৰীসদ্ৰাৰীসেসু খম্ভকতোতি কটিযং হত্থং ঠপেত্ৰা কতখম্ভো.

২৩-২৪. ওগুণ্ঠিতসিক্খাপদৰণ্ণনা

তেৰীসচতুৰীসেসু ওগুণ্ঠিতোতি সসীসং পারুতো.

২৫. উক্কুটিকসিক্খাপদৰণ্ণনা

পঞ্চৰীসে উক্কুটিকা ৰুচ্চতি পণ্হিযো উক্খিপিত্ৰা অগ্গপাদেহেৰ, অগ্গপাদে ৰা উক্খিপিত্ৰা পণ্হীহিযেৰ ভূমিযং ফুসন্তস্স গমনং, করণৰচনং পনেত্থ ৰুত্তলক্খণমেৰ.

২৬. পল্লত্থিকসিক্খাপদৰণ্ণনা

ছব্বীসে ন পল্লত্থিকাযাতি হত্থপল্লত্থিকায ৰা দুস্সপল্লত্থিকায ৰা ন নিসীদিতব্বং. অনাদরেন নিসীদন্তস্স দুক্কটং, ৰাসূপগতস্স পন ইধাপি পুরিমেসু চ দ্ৰাৰীসচতুৰীসেসু অনাপত্তি.

ছব্বীসতিসারুপ্পসিক্খাপদৰণ্ণনা নিট্ঠিতা.

২৭. সক্কচ্চপটিগ্গহণসিক্খাপদৰণ্ণনা

ভোজনপ্পটিসংযুত্তেসু পঠমে সক্কচ্চন্তি সতিং উপট্ঠাপেত্ৰা.

২৮. পত্তসঞ্ঞীপটিগ্গহণসিক্খাপদৰণ্ণনা

দুতিযে পত্তে সঞ্ঞা পত্তসঞ্ঞা, সা অস্স অত্থীতি পত্তসঞ্ঞী, অত্তনো ভাজনে উপনিবদ্ধসঞ্ঞী হুত্ৰাতি অত্থো.

২৯. সমসূপকপটিগ্গহণসিক্খাপদৰণ্ণনা

ততিযে সমসূপকো নাম যত্থ মুগ্গমাসেহি ৰা কুলত্থাদীহি ৰা কতো হত্থহারিযো সূপো ভত্তস্স চতুত্থভাগপ্পমাণো হোতি, ততো হি অধিকং গণ্হন্তস্স দুক্কটং. ঠপেত্ৰা পন সূপং অৰসেসা সব্বাপি সূপেয্যব্যঞ্জনৰিকতি রসরসো নাম হোতি, তস্মিং রসরসে, ঞাতকানং ৰা পৰারিতানং ৰা অঞ্ঞস্সত্থায ৰা অত্তনো ধনেন ৰা ইধ অনাপত্তি.

৩০…পে…৩২. সমতিত্তিকসিক্খাপদৰণ্ণনা

চতুত্থে সমতিত্তিকন্তি সমপুণ্ণং সমভরিতং অধিট্ঠানুপগপত্তস্স অন্তোমুখৰট্টিলেখং অনতিক্কমিত্ৰা রচিতং. পিণ্ডপাতন্তি যংকিঞ্চি যাৰকালিকং. অনধিট্ঠানুপগে পন যাৰকালিকং যামকালিকাদীনি চ যত্থকত্থচি থূপীকতানিপি ৰট্টন্তি, যং পন দ্ৰীসু পত্তেসু গহেত্ৰা একং পূরেত্ৰা ৰিহারং হরতি, যং ৰা পক্খিপিযমানং পূৰউচ্ছুক্খণ্ডফলাফলাদি হেট্ঠা ওরোহতি, তক্কোলৰটংসকাদযো ৰা উপরি ঠপেত্ৰা দিয্যন্তি, যঞ্চ পণ্ণে ৰা থালকে ৰা পক্খিপিত্ৰা পত্তমত্থকে ঠপিতং হোতি, ন তং থূপীকতং নাম, তস্মা তং সব্বং ৰট্টতি. ইধ পন গিলানস্সাপি অনাপত্তি নত্থি, তস্মা তেনপি সমতিত্তিকোযেৰ গহেতব্বো. সব্বত্থ পন পটিগ্গহেতুমেৰ ন ৰট্টতি, পটিগ্গহিতং পন সুপ্পটিগ্গহিতং পরিভুঞ্জিতুং ৰট্টতি. পঞ্চমছট্ঠানি ৰুত্তনযানেৰ.

৩৩-৩৪. সপদানসিক্খাপদৰণ্ণনা

সত্তমে সপদানন্তি তত্থ তত্থ ওধিং অকত্ৰা অনুপটিপাটিযা. যো পন অঞ্ঞেসং ৰা দেন্তো, অঞ্ঞভাজনে ৰা আকিরন্তো ততো ততো ওমসতি, তস্স, উত্তরিভঙ্গঞ্চ উপ্পটিপাটিযা গণ্হন্তস্সাপি ইধ অনাপত্তি. অট্ঠমং ৰুত্তনযমেৰ.

৩৫. থূপকতসিক্খাপদৰণ্ণনা

নৰমে থূপকতোতি মত্থকতো ৰেমজ্ঝতোতি অত্থো. যো পন পরিত্তকে সেসে একতো সঙ্কড্ঢিত্ৰা ওমদ্দিত্ৰা ভুঞ্জতি, তস্সাপি অনাপত্তি.

৩৬. ওদনপ্পটিচ্ছাদনসিক্খাপদৰণ্ণনা

দসমে যস্স ভত্তসামিকা মাঘাতসমযাদীসু ব্যঞ্জনং পটিচ্ছাদেত্ৰা দেন্তি, যো চ ন ভিয্যোকম্যতায পটিচ্ছাদেতি, তেসং অনাপত্তি, গিলানস্স পন অনাগতত্তা আপত্তিযেৰ.

৩৭. সূপোদনৰিঞ্ঞত্তিসিক্খাপদৰণ্ণনা

একাদসমে ঞাতকানং ৰা পৰারিতানং ৰা অঞ্ঞস্সত্থায অত্তনো ধনেনাতি ইদং অনাপত্তিযং অধিকং.

৩৮. উজ্ঝানসঞ্ঞীসিক্খাপদৰণ্ণনা

দ্ৰাদসমে উজ্ঝানে সঞ্ঞা উজ্ঝানসঞ্ঞা, সা অস্স অত্থীতি উজ্ঝানসঞ্ঞী. ইধাপি গিলানো ন মুচ্চতি, ‘‘দস্সামী’’তি ৰা, ‘‘দাপেস্সামী’’তি ৰা ওলোকেন্তস্স পন, ন উজ্ঝানসঞ্ঞিস্স চ অনাপত্তি.

৩৯. কবল়সিক্খাপদৰণ্ণনা

তেরসমে নাতিমহন্তন্তি মযূরণ্ডং অতিমহন্তং, কুক্কুটণ্ডং অতিখুদ্দকং, তেসং ৰেমজ্ঝপ্পমাণং. মূলখাদনীযাদিভেদে পন সব্বখজ্জকে ফলাফলে চ অনাপত্তি.

৪০. আলোপসিক্খাপদৰণ্ণনা

চুদ্দসমে পরিমণ্ডলন্তি অদীঘং. ইধ পন খজ্জকফলাফলেহি সদ্ধিং উত্তরিভঙ্গেপি অনাপত্তি.

৪১-৪২. অনাহটসিক্খাপদৰণ্ণনা

পন্নরসমে অনাহটেতি অনাহরিতে, মুখদ্ৰারং অসম্পত্তেতি অত্থো. সোল়সমে সব্বহত্থন্তি সকলং হত্থং.

৪৩. সকবল়সিক্খাপদৰণ্ণনা

সত্তরসমে সকবল়েনাতি এত্থ যত্তকেন ৰচনং অপরিপুণ্ণং হোতি, তত্তকে সতি কথেন্তস্স আপত্তি. যো পন ধম্মং কথেন্তো হরিটকাদীনি মুখে পক্খিপিত্ৰা কথেতি, যত্তকেন ৰচনং অপরিপুণ্ণং ন হোতি, তত্তকে মুখম্হি সতি ৰট্টতি.

৪৪. পিণ্ডুক্খেপকসিক্খাপদৰণ্ণনা

অট্ঠারসমে পিণ্ডুক্খেপকন্তি পিণ্ডং উক্খিপিত্ৰা উক্খিপিত্ৰা, ইধাপি খজ্জকফলাফলেসু অনাপত্তি.

৪৫. কবল়াৰচ্ছেদকসিক্খাপদৰণ্ণনা

একূনৰীসতিমে কবল়াৰচ্ছেদকন্তি কবল়ং অৰচ্ছিন্দিত্ৰা অৰচ্ছিন্দিত্ৰা, ইধ খজ্জকফলাফলেহি সদ্ধিং উত্তরিভঙ্গেপি অনাপত্তি.

৪৬. অৰগণ্ডকারকসিক্খাপদৰণ্ণনা

ৰীসতিমে অৰগণ্ডকারকন্তি মক্কটো ৰিয গণ্ডে কত্ৰা কত্ৰা, ইধ ফলাফলমত্তকে অনাপত্তি.

৪৭. হত্থনিদ্ধুনকসিক্খাপদৰণ্ণনা

একৰীসতিমে হত্থনিদ্ধুনকন্তি হত্থং নিদ্ধুনিত্ৰা নিদ্ধুনিত্ৰা, অনাপত্তিযং পনেত্থ ‘‘কচৰরং ছড্ডেন্তো হত্থং নিদ্ধুনাতী’’তি (পাচি. ৬২৩) ইদং অধিকং.

৪৮. সিত্থাৰকারকসিক্খাপদৰণ্ণনা

দ্ৰাৰীসতিমে সিত্থাৰকারকন্তি সিত্থানি অৰকিরিত্ৰা অৰকিরিত্ৰা, ইধাপি ‘‘কচৰরং ছড্ডেন্তো সিত্থং ছড্ডযতী’’তি (পাচি. ৬২৩) ইদং অনাপত্তিযং অধিকং.

৪৯. জিৰ্হানিচ্ছারকসিক্খাপদৰণ্ণনা

তেৰীসতিমে জিৰ্হানিচ্ছারকন্তি জিৰ্হং নিচ্ছারেত্ৰা নিচ্ছারেত্ৰা.

৫০-৫১. চপুচপুকারকসিক্খাপদৰণ্ণনা

চতুৰীসতিমে চপুচপুকারকন্তি চপু চপূতি এৰং সদ্দং কত্ৰা কত্ৰা. পঞ্চৰীসতিমেপি এসেৰ নযো.

৫২…পে…৫৪. হত্থনিল্লেহকাদিসিক্খাপদৰণ্ণনা

ছব্বীসতিমে হত্থনিল্লেহকন্তি হত্থং নিল্লেহিত্ৰা নিল্লেহিত্ৰা. ভুঞ্জন্তেন হি অঙ্গুলিমত্তম্পি নিল্লেহিতুং ন ৰট্টতি. ঘনযাগুফাণিতপাযাসাদিকে পন অঙ্গুলীহি গহেত্ৰা অঙ্গুলিযো মুখে পৰেসেত্ৰা ভুঞ্জিতুং ৰট্টতি, সত্তৰীসতিমঅট্ঠৰীসতিমেসুপি এসেৰ নযো. তস্মা একঙ্গুলিযাপি পত্তো ন নিল্লেহিতব্বো, একওট্ঠোপি চ জিৰ্হায ন নিল্লেহিতব্বো, ওট্ঠমংসেহি এৰ পন গহেত্ৰা অন্তো পৰেসেতুং ৰট্টতি.

৫৫. সামিসসিক্খাপদৰণ্ণনা

একূনতিংসতিমে ন সামিসেনাতি এতং পটিকূলৰসেন পটিক্খিত্তং, তস্মা সঙ্ঘিকম্পি পুগ্গলিকম্পি গিহিসন্তকম্পি অত্তনো সন্তকম্পি সঙ্খোপি সরাৰকম্পি থালকম্পি ন গহেতব্বমেৰ, গণ্হন্তস্স দুক্কটং. সচে পন হত্থস্স একদেসো আমিসমক্খিতো ন হোতি, তেন পদেসেন গহেতুং ৰট্টতি, ইধ ‘‘ধোৰিস্সামীতি ৰা, ধোৰাপেস্সামীতি ৰা পটিগ্গণ্হাতী’’তি (পাচি. ৬৩১) ইদং অনাপত্তিযং অধিকং.

৫৬. সসিত্থকসিক্খাপদৰণ্ণনা

তিংসতিমে ‘‘উদ্ধরিত্ৰা ৰা ভিন্দিত্ৰা ৰা পটিগ্গহে ৰা নীহরিত্ৰা ৰা ছড্ডেতী’’তি ইদং অনাপত্তিযং অধিকং. তত্থ উদ্ধরিত্ৰা ৰাতি সিত্থানি উদকতো উদ্ধরিত্ৰা, একস্মিং ঠানে রাসিং কত্ৰা উদকং ছড্ডেতি. ভিন্দিত্ৰা ৰাতি সিত্থানি ভিন্দিত্ৰা উদকগতিকানি কত্ৰা ছড্ডেতি. পটিগ্গহে ৰাতি পটিগ্গহেন পটিচ্ছন্তানং পটিগ্গহে ছড্ডেতি. নীহরিত্ৰাতি বহি নীহরিত্ৰা ছড্ডেতি, এৰং ছড্ডেন্তস্স অনাপত্তি.

তিংসভোজনপ্পটিসংযুত্তসিক্খাপদৰণ্ণনা নিট্ঠিতা.

৫৭. ছত্তপাণিসিক্খাপদৰণ্ণনা

ধম্মদেসনাপটিসংযুত্তেসু পঠমে যংকিঞ্চি ছত্তং পাণিম্হি অস্সাতি ছত্তপাণি. সো তং ছত্তং যত্থকত্থচি সরীরাৰযৰে ঠপেত্ৰাপি যাৰ হত্থেন ন মুঞ্চতি, তাৰস্স ধম্মং দেসেতুং ন ৰট্টতি. সচে পনস্স অঞ্ঞো ছত্তং ধারেতি, পস্সে ৰা ঠিতং হোতি, হত্থতো অপগতমত্তে ছত্তপাণি নাম ন হোতি, তস্স দেসেতুং ৰট্টতি. ধম্মপরিচ্ছেদো চেত্থ পদসোধম্মে ৰুত্তনযেনেৰ ৰেদিতব্বো.

৫৮-৫৯. দণ্ডপাণিসিক্খাপদৰণ্ণনা

দুতিযে দণ্ডো নাম মজ্ঝিমস্স পুরিসস্স চতুহত্থপ্পমাণো, দণ্ডপাণিভাৰো পনস্স ছত্তপাণিম্হি ৰুত্তনযেনেৰ ৰেদিতব্বো. ততিযেপি এসেৰ নযো. অসিং সন্নহিত্ৰা ঠিতোপি হি সত্থপাণিসঙ্খ্যং ন গচ্ছতি.

৬০. আৰুধপাণিসিক্খাপদৰণ্ণনা

চতুত্থে সব্বাপি ধনুৰিকতি সদ্ধিং সরৰিকতিযা আৰুধন্তি ৰেদিতব্বা, তস্মা সদ্ধিং ৰা সরেন ধনুং গহেত্ৰা, সুদ্ধধনুং ৰা সুদ্ধসরং ৰা সজিযধনুং ৰা নিজ্জিযধনুং ৰা গহেত্ৰা ঠিতস্স ৰা নিসিন্নস্স ৰা ধম্মং দেসেতুং ন ৰট্টতি. সচে পনস্স ধনু খন্ধেপি পটিমুক্কং হোতি, যাৰ ন গণ্হাতি, তাৰ ৰট্টতি.

৬১-৬২. পাদুকসিক্খাপদৰণ্ণনা

পঞ্চমে পাদুকারুল়্হস্সাতি ছত্তদণ্ডকে অঙ্গুলন্তরিকং অপ্পৰেসেত্ৰা কেৰলং অক্কন্তস্স ৰা, পৰেসেত্ৰা ঠানৰসেন পটিমুক্কস্স ৰা. ছট্ঠেপি এসেৰ নযো. ইধ পন য্ৰাযং পণ্হিকবন্ধং ওমুঞ্চিত্ৰা ঠানৰসেন ‘‘ওমুক্কো’’তি ৰুচ্চতি, তস্সাপি ন ৰট্টতি.

৬৩. যানসিক্খাপদৰণ্ণনা

সত্তমে সচেপি দ্ৰীহি জনেহি হত্থসঙ্ঘাটেন গহিতো, সাটকে ৰা ঠপেত্ৰা ৰংসেন ৰয্হতি, অযুত্তে ৰা ৰয্হাদিকে যানে ৰিসঙ্খরিত্ৰা ৰা ঠপিতে চক্কমত্তেপি নিসিন্নো হোতি, যানগতোত্ৰেৰ সঙ্খং গচ্ছতি. সচে পন দ্ৰেপি একযানে নিসিন্না হোন্তি, ৰট্টতি. ৰিসুং নিসিন্নেসুপি উচ্চে যানে নিসিন্নেন নীচে নিসিন্নস্স দেসেতুং ৰট্টতি, সমপ্পমাণেপি ৰট্টতি, তথা পুরিমে নিসিন্নেন পচ্ছিমে নিসিন্নস্স. পচ্ছিমে পন উচ্চতরেপি নিসিন্নেন দেসেতুং ন ৰট্টতি.

৬৪. সযনসিক্খাপদৰণ্ণনা

অট্ঠমে সযনগতস্সাতি অন্তমসো কটসারকেপি পকতিভূমিযম্পি নিপন্নস্স উচ্চেপি মঞ্চে ৰা পীঠে ৰা ভূমিপ্পদেসে ৰা ঠিতেন নিসিন্নেন ৰা দেসেতুং ন ৰট্টতি. সযনগতেন পন সযনগতস্স উচ্চতরে ৰা সমপ্পমাণে ৰা নিপন্নেন দেসেতুং ৰট্টতি. নিপন্নেন পন ঠিতস্স ৰা নিসিন্নস্স ৰা নিপন্নস্স ৰা, নিসিন্নেন চ ঠিতস্স ৰা নিসিন্নস্স ৰা, ঠিতেন ঠিতস্সেৰ ৰট্টতি.

৬৫. পল্লত্থিকসিক্খাপদৰণ্ণনা

নৰমে হত্থপল্লত্থিকাদীসু যায কাযচি নিসিন্নস্স দেসেতুং ন ৰট্টতি.

৬৬. ৰেঠিতসিক্খাপদৰণ্ণনা

দসমে ৰেঠিতসীসস্সাতি দুস্সৰেঠেন ৰা মোল়িআদীহি ৰা যথা কেসন্তো ন দিস্সতি, এৰং ৰেঠিতসীসস্স, তেনেৰস্স অনাপত্তিযং ‘‘কেসন্তং ৰিৰরাপেত্ৰা দেসেতী’’তি (পাচি. ৬৪৩) ৰুত্তং.

৬৭. ওগুণ্ঠিতসিক্খাপদৰণ্ণনা

একাদসমে ওগুণ্ঠিতসীসস্সাতি সসীসং পারুতস্স, অনাপত্তিযং পনেত্থ ‘‘সীসং ৰিৰরাপেত্ৰা দেসেতী’’তি (পাচি. ৬৪৪) অধিকং.

৬৮. ছমাসিক্খাপদৰণ্ণনা

দ্ৰাদসমে ছমাযং নিসীদিত্ৰাতি ভূমিযং নিসীদিত্ৰা. আসনেতি অন্তমসো ৰত্থম্পি তিণানিপি সন্থরিত্ৰা নিসিন্নস্স.

৬৯. নীচাসনসিক্খাপদৰণ্ণনা

তেরসমে উচ্চে আসনেতি অন্তমসো ভূমিপ্পদেসেপি উন্নতপ্পদেসে নিসিন্নস্স.

৭০. ঠিতসিক্খাপদৰণ্ণনা

চুদ্দসমে ন ঠিতো নিসিন্নস্সাতি সচে থেরস্স উপট্ঠানং গন্ত্ৰা ঠিতং দহরং আসনে নিসিন্নো মহাথেরো পঞ্হং পুচ্ছতি, ন কথেতব্বং. গারৰেন পন থেরং ‘‘উট্ঠহিত্ৰা পুচ্ছা’’তি ৰত্তুং ন সক্কা, তস্মা ‘‘পস্সে ঠিতস্স ভিক্খুনো কথেস্সামী’’তি কথেতুং ৰট্টতি.

৭১. পচ্ছতোগমনসিক্খাপদৰণ্ণনা

পন্নরসমে সচে পুরতো গচ্ছন্তো পঞ্হং পুচ্ছতি, তস্স তং অকথেত্ৰা ‘‘পচ্ছিমস্স ভিক্খুনো কথেস্সামী’’তি কথেতব্বং. সদ্ধিং উগ্গহিতধম্মং পন সজ্ঝাযিতুং, সমধুরেন ৰা গচ্ছন্তস্স কথেতুং ৰট্টতি.

৭২. উপ্পথেনগমনসিক্খাপদৰণ্ণনা

সোল়সমে ন উপ্পথেনাতি এত্থ সচে দ্ৰেপি সকটমগ্গস্মিং একেকচক্কপথেন ৰা উপ্পথেন ৰা সমধুরং গচ্ছন্তি, ৰট্টতি.

৭৩. ঠিতোউচ্চারসিক্খাপদৰণ্ণনা

সত্তরসমে ‘‘অসঞ্চিচ্চা’’তি অনাপত্তিযং সচে পটিচ্ছন্নট্ঠানং গচ্ছন্তস্স সহসা উচ্চারো ৰা পস্সাৰো ৰা নিক্খমতি, অসঞ্চিচ্চ কতো নাম হোতি.

৭৪. হরিতেউচ্চারসিক্খাপদৰণ্ণনা

অট্ঠারসমে যম্পি জীৰমানরুক্খস্স মূলং পথৰিযং দিস্সমানং গচ্ছতি, সাখা ৰা ভূমিলগ্গা গচ্ছতি, সব্বং হরিতসঙ্খাতমেৰ. খন্ধে নিসীদিত্ৰা পন অপ্পহরিতট্ঠানে পাতেতুং ৰট্টতি. সচে অপ্পহরিতট্ঠানং ওলোকেন্তস্সেৰ সহসা নিক্খমতি, গিলানট্ঠানে ঠিতো হোতি, ‘‘অপ্পহরিতে কতো হরিতং ওত্থরতী’’তি (পাচি. ৬৫২) ইদমেত্থ অনাপত্তিযং অধিকং. তত্থ সচেপি অপ্পহরিতং অলভন্তেন তিণণ্ডুপকং ৰা পললণ্ডুপকং ৰা ঠপেত্ৰা কতো পচ্ছা হরিতং ওত্থরতি, ৰট্টতিযেৰ. খেল়েন চেত্থ সিঙ্ঘাণিকাপি সঙ্গহিতা.

৭৫. উদকেউচ্চারসিক্খাপদৰণ্ণনা

একূনৰীসতিমে ন উদকেতি এতং পরিভোগউদকমেৰ সন্ধায ৰুত্তং, ৰচ্চকুটিসমুদ্দাদিউদকেসু পন অপরিভোগেসু অনাপত্তি. দেৰে ৰস্সন্তে সমন্ততো উদকোঘে জাতে অনুদকট্ঠানং অলভন্তেন উদকে কাতুং ৰট্টতি, ইধাপি ‘‘থলে কতো উদকং ওত্থরতী’’তি (পাচি. ৬৫৪) ইদং অনাপত্তিযং অধিকং, সেসং সব্বসিক্খাপদেসু উত্তানমেৰ.

সমুট্ঠানাদিদীপনত্থায পনেত্থ ইদং পকিণ্ণকং – উজ্জগ্ঘিকউচ্চাসদ্দপ্পটিসংযুত্তানি চত্তারি, সকবল়েন মুখেন ব্যাহরণং একং, ছমানীচাসননিসিন্নঠিতপচ্ছতোগমনউপ্পথগমনপ্পটিসংযুত্তানি পঞ্চাতি ইমানি দস সিক্খাপদানি সমনুভাসনসমুট্ঠানানি, একেকমেত্থ কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনং. সূপোদনৰিঞ্ঞত্তিসিক্খাপদং থেয্যসত্থসমুট্ঠানং, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনং. ছত্তপাণিদণ্ডপাণিসত্থপাণিআৰুধপাণিপাদুকাউপাহনযানসযনপল্লত্থিকৰেঠিতওগুণ্ঠিতনামকানি একাদস ধম্মদেসনাসমুট্ঠানানি, কিরিযাকিরিযানি, সঞ্ঞাৰিমোক্খানি, সচিত্তকানি, লোকৰজ্জানি, ৰচীকম্মানি, অকুসলচিত্তানি, দুক্খৰেদনানি. সেসানি তেপণ্ণাস পঠমপারাজিকসমউট্ঠানাদিভেদানীতি.

একূনৰীসতিধম্মদেসনাপটিসংযুত্তসিক্খাপদৰণ্ণনা নিট্ঠিতা.

কঙ্খাৰিতরণিযা পাতিমোক্খৰণ্ণনায

সেখিযৰণ্ণনা নিট্ঠিতা.

অধিকরণসমথৰণ্ণনা

অধিকরণসমথেসু সত্তাতি তেসং গণনপরিচ্ছেদো. অধিকরণানি সমেন্তি ৰূপসমেন্তীতি অধিকরণসমথা. উদ্দেসং আগচ্ছন্তীতি আপত্তাধিকরণসঙ্খাতাসু চ অৰসেসাধিকরণত্তযপচ্চযাসু চ আপত্তীসু পরিসুদ্ধভাৰং পুচ্ছনত্থং উদ্দিসিতব্বতং আগচ্ছন্তি. উপ্পন্নুপ্পন্নানন্তি উপ্পন্নানং উপ্পন্নানং. অধিকরণানন্তি ৰিৰাদাধিকরণং অনুৰাদাধিকরণং আপত্তাধিকরণং কিচ্চাধিকরণন্তি ইমেসং চতুন্নং. সমথায ৰূপসমাযাতি সমনত্থঞ্চেৰ ৰূপসমনত্থঞ্চ সম্মুখাৰিনযো দাতব্বো…পে… তিণৰত্থারকোতি ইমে সত্ত সমথা দাতব্বা. তত্রাযং ৰিনিচ্ছযো – অধিকরণেসু তাৰ ‘‘ধম্মো’’তি ৰা, ‘‘অধম্মো’’তি ৰা অট্ঠারসহি ৰত্থূহি ৰিৰদন্তানং ভিক্খূনং যো ৰিৰাদো, ইদং ৰিৰাদাধিকরণং নাম. সীলৰিপত্তিযা ৰা আচারদিট্ঠিআজীৰৰিপত্তিযা ৰা অনুৰদন্তানং যো অনুৰাদো উপৰদনা চেৰ চোদনা চ, ইদং অনুৰাদাধিকরণং নাম. মাতিকায আগতা পঞ্চ, ৰিভঙ্গে দ্ৰেতি সত্তপি আপত্তিক্খন্ধা আপত্তাধিকরণং, নাম. যং সঙ্ঘস্স অপলোকনাদীনং চতুন্নং কম্মানং করণং, ইদং কিচ্চাধিকরণং নাম.

তত্থ ৰিৰাদাধিকরণং (চূল়ৰ. ২২৮) দ্ৰীহি সমথেহি সম্মতি সম্মুখাৰিনযেন চ যেভুয্যসিকায চ, সম্মুখাৰিনযেনেৰ সম্মমানং যস্মিং ৰিহারে উপ্পন্নং, তস্মিংযেৰ ৰা, অঞ্ঞত্থ ৰূপসমেতুং গচ্ছন্তানং অন্তরামগ্গে ৰা, যত্থ গন্ত্ৰা সঙ্ঘস্স নিয্যাতিতং, তত্থ সঙ্ঘেন ৰা ৰূপসমেতুং অসক্কোন্তে তত্থেৰ উব্বাহিকায সম্মতপুগ্গলেহি ৰা ৰিনিচ্ছিতং সম্মতি, এৰং সম্মমানে চ পন তস্মিং যা সঙ্ঘসম্মুখতা ধম্মসম্মুখতা ৰিনযসম্মুখতা পুগ্গলসম্মুখতা অযং সম্মুখাৰিনযো নাম. তত্থ চ কারকসঙ্ঘস্স সঙ্ঘসামগ্গিৰসেন সম্মুখীভাৰো সঙ্ঘসম্মুখতা, সমেতব্বস্স ৰত্থুনো ভূততা ধম্মসম্মুখতা, যথা তং সমেতব্বং, তথেৰস্স সমনং ৰিনযসম্মুখতা, যো চ ৰিৰদতি, যেন চ ৰিৰদতি, তেসং উভিন্নং অত্থপচ্চত্থিকানং সম্মুখীভাৰো পুগ্গলসম্মুখতা. উব্বাহিকায ৰূপসমনে পনেত্থ সঙ্ঘসম্মুখতা পরিহাযতি, এৰং তাৰ সম্মুখাৰিনযেনেৰ সম্মতি.

সচে পনেৰম্পি ন সম্মতি, অথ নং উব্বাহিকায সম্মতা ভিক্খূ ‘‘ন মযং সক্কোম ৰূপসমেতু’’ন্তি সঙ্ঘস্সেৰ নিয্যাতেন্তি, ততো সঙ্ঘো পঞ্চঙ্গসমন্নাগতং ভিক্খুং সলাকগ্গাহাপকং সম্মন্নিত্ৰা তেন গুল়্হকৰিৰট্টকসকণ্ণজপ্পকেসু তীসু সলাকগ্গাহেসু অঞ্ঞতরৰসেন সলাকং গাহেত্ৰা সন্নিপতিতপরিসায ধম্মৰাদীনং যেভুয্যতায যথা তে ধম্মৰাদিনো ৰদন্তি, এৰং ৰূপসন্তং অধিকরণং সম্মুখাৰিনযেন চ যেভুয্যসিকায চ ৰূপসন্তং হোতি. তত্থ সম্মুখাৰিনযো ৰুত্তনযো এৰ, যং পন যেভুয্যসিককম্মস্স করণং. অযং যেভুয্যসিকা নাম, এৰং ৰিৰাদাধিকরণং দ্ৰীহি সমথেহি সম্মতি.

অনুৰাদাধিকরণং (চূল়ৰ. ২৩৬) চতূহি সমথেহি সম্মতি সম্মুখাৰিনযেন চ সতিৰিনযেন চ অমূল়্হৰিনযেন চ তস্সপাপিযসিকায চ. সম্মুখাৰিনযেনেৰ সম্মমানং যো চ অনুৰদতি, যঞ্চ অনুৰদতি, তেসং ৰচনং সুত্ৰা সচে কাচি আপত্তি নত্থি, উভো খমাপেত্ৰা, সচে অত্থি, ‘‘অযং নামেত্থ আপত্তী’’তি এৰং ৰিনিচ্ছিতং ৰূপসম্মতি, তত্থ সম্মুখাৰিনযলক্খণং ৰুত্তনযমেৰ. যদা পন খীণাসৰস্স ভিক্খুনো অমূলিকায সীলৰিপত্তিযা অনুদ্ধংসিতস্স সতিৰিনযং যাচমানস্স সঙ্ঘো ঞত্তিচতুত্থেন কম্মেন সতিৰিনযং দেতি, তদা সম্মুখাৰিনযেন চ সতিৰিনযেন চ ৰূপসন্তং হোতি, দিন্নে পন সতিৰিনযে পুন তস্মিং পুগ্গলে কস্সচি অনুৰাদো ন রুহতি. যদা উম্মত্তকো ভিক্খু উম্মাদৰসেন গতে অস্সামণকে অজ্ঝাচারে ‘‘সরতাযস্মা এৰরূপিং আপত্তি’’ন্তি ভিক্খূহি চোদিযমানো ‘‘উম্মত্তকেন মে, আৰুসো, এতং কতং, নাহং তং সরামী’’তি ভণন্তোপি ভিক্খূহি চোদিযমানোৰ পুন অচোদনত্থায অমূল়্হৰিনযং যাচতি, সঙ্ঘো চস্স ঞত্তিচতুত্থেন কম্মেন অমূল়্হৰিনযং দেতি. তদা সম্মুখাৰিনযেন চ অমূল়্হৰিনযেন চ ৰূপসন্তং হোতি, দিন্নে পন অমূল়্হৰিনযে পুন তস্মিং পুগ্গলে কস্সচি তপ্পচ্চযা অনুৰাদো ন রুহতি.

যদা পন পারাজিকেন ৰা পারাজিকসামন্তেন ৰা চোদিযমানস্স অঞ্ঞেনঞ্ঞং পটিচরতো পাপুস্সন্নতায পাপিযস্স পুগ্গলস্স ‘‘সচাযং অচ্ছিন্নমূলো ভৰিস্সতি, সম্মা ৰত্তিত্ৰা ওসারণং লভিস্সতি, সচে ছিন্নমূলো, সযমেৰস্স নাসনা ভৰিস্সতী’’তি মঞ্ঞমানো সঙ্ঘো ঞত্তিচতুত্থেন কম্মেন তস্সপাপিযসিকং কম্মং করোতি, তদা সম্মুখাৰিনযেন চ তস্সপাপিযসিকায চ ৰূপসন্তং হোতি, এৰং অনুৰাদাধিকরণং চতূহি সমথেহি সম্মতি.

আপত্তাধিকরণং (চূল়ৰ. ২৩৯) তীহি সমথেহি সম্মতি সম্মুখাৰিনযেন চ পটিঞ্ঞাতকরণেন চ তিণৰত্থারকেন চ. তস্স সম্মুখাৰিনযেনেৰ ৰূপসমো নত্থি, যদা পন একস্স ৰা ভিক্খুনো, নিস্সগ্গিযৰণ্ণনাযং ৰুত্তনযেন সঙ্ঘগণমজ্ঝেসু ৰা ভিক্খু লহুকং আপত্তিং দেসেতি, তদা আপত্তাধিকরণং সম্মুখাৰিনযেন চ পটিঞ্ঞাতকরণেন চ ৰূপসম্মতি. তত্থ সম্মুখাৰিনযে তাৰ যো চ দেসেতি, যস্স চ দেসেতি, তেসং সম্মুখীভাৰো পুগ্গলসম্মুখতা, সেসং ৰুত্তনযমেৰ. পুগ্গলস্স চ গণস্স চ দেসনাকালে সঙ্ঘসম্মুখতা পরিহাযতি.

যা পনেত্থ ‘‘অহং, ভন্তে, ইত্থন্নামং আপত্তিং আপন্নো’’তি চ, ‘‘পস্সসী’’তি, ‘‘আম পস্সামী’’তি চ পটিঞ্ঞা, তায ‘‘আযতিং সংৰরেয্যাসী’’তি করণং পটিঞ্ঞাতকরণং নাম. সঙ্ঘাদিসেসে পরিৰাসাদিযাচনা পটিঞ্ঞা, পরিৰাসাদীনং দানং পটিঞ্ঞাতকরণং নাম. দ্ৰেপক্খজাতা পন ভণ্ডনকারকা ভিক্খূ বহুং অস্সামণকং অজ্ঝাচারং চরিত্ৰা পুন লজ্জিধম্মে উপ্পন্নে ‘‘সচে মযং ইমাহি আপত্তীহি অঞ্ঞমঞ্ঞং করিস্সাম, সিযাপি তং অধিকরণং কক্খল়ত্থায ৰাল়ত্থায সংৰত্তেয্যা’’তি অঞ্ঞমঞ্ঞং আপত্তিযা কারাপনে দোসং দিস্ৰা যদা তিণৰত্থারককম্মং করোন্তি, তদা আপত্তাধিকরণং সম্মুখাৰিনযেন চ তিণৰত্থারকেন চ সম্মতি. তত্র হি যত্তকা হত্থপাসূপগতা ‘‘ন মেতং খমতী’’তি এৰং দিট্ঠাৰিকম্মং অকত্ৰা নিদ্দম্পি ওক্কমন্তা হোন্তি, সব্বেসং ঠপেত্ৰা থুল্লৰজ্জঞ্চ গিহিপ্পটিসংযুত্তঞ্চ সব্বাপত্তিযো ৰুট্ঠহন্তি, এৰং আপত্তাধিকরণং তীহি সমথেহি সম্মতি.

কিচ্চাধিকরণং (চূল়ৰ. ২৪২) একেন সমথেন সম্মতি সম্মুখাৰিনযেনেৰ. ইতি ইমানি চত্তারি অধিকরণানি যথানুরূপং ইমেহি সত্তহি সমথেহি সম্মন্তি, তেন ৰুত্তং ‘‘উপ্পন্নুপ্পন্নানং অধিকরণানং সমথায ৰূপসমায সম্মুখাৰিনযো দাতব্বো…পে… তিণৰত্থারকো’’তি. অযমেত্থ ৰিনিচ্ছযনযো, ৰিত্থারো পন সমথক্খন্ধকে আগতোযেৰ, ৰিনিচ্ছযোপিস্স সমন্তপাসাদিকাযং ৰুত্তো.

তত্থাযস্মন্তে পুচ্ছামি, কচ্চিত্থ পরিসুদ্ধাতি তেসু সত্তসু অধিকরণসমথেসু কচ্চিত্থ পরিসুদ্ধা, নত্থি ৰো কিঞ্চি সমথেহি ৰূপসমেতব্বন্তি পুচ্ছামি, এতেন সব্বাপত্তীহি পরিসুদ্ধভাৰো পুচ্ছিতো হোতি.

উদ্দিট্ঠং খো আযস্মন্তো নিদানন্তিআদি নিগমনৰচনং. তত্থ এত্তকন্তি এত্তকং সিক্খাপদং. সুত্তাগতন্তি সুত্তে পাতিমোক্খে আগতং. সুত্তপরিযাপন্নন্তি তত্থেৰ অন্তোগধং. অন্ৰদ্ধমাসং উদ্দেসং আগচ্ছতীতি অদ্ধমাসে অদ্ধমাসে উপোসথৰসেন উদ্দিসিতব্বতং আগচ্ছতি. সমগ্গেহীতি কাযসামগ্গিৰসেন সমগ্গেহি. সম্মোদমানেহীতি চিত্তসামগ্গিৰসেন একজ্ঝাসযতায সুট্ঠু মোদমানেহি. অৰিৰদমানেহীতি অট্ঠারসসু ৰিৰাদৰত্থূসু অঞ্ঞতরৰসেনাপি অৰিৰদমানেহি. সিক্খিতব্বন্তি তং তং সিক্খাপদং অৰীতিক্কমন্তেহি অধিসীলসিক্খা সম্পাদেতব্বা. অন্তরন্তরা পন যং ন ৰুত্তং, তং সব্বং পুরিমে পুরিমে সিক্খাপদে ৰুত্তত্তা চেৰ উত্তানত্থত্তা চাতি.

অধিকরণসমথৰণ্ণনা নিট্ঠিতা.

কঙ্খাৰিতরণিযা পাতিমোক্খৰণ্ণনায

ভিক্খুপাতিমোক্খৰণ্ণনা নিট্ঠিতা.

নমো তস্স ভগৰতো অরহতো সম্মসম্বুদ্ধস্স