৬. মহাগোৰিন্দসুত্তৰণ্ণনা

২৯৩. পঞ্চকুণ্ডলিকোতি ৰিস্সট্ঠপঞ্চৰেণিকো. চতুমগ্গট্ঠানেসূতি চতুন্নং মগ্গানং ৰিনিৰিজ্ঝিত্ৰা গতট্ঠানেসু. তত্থ হি কতা সালাদযো চতূহি দিসাহি আগতমনুস্সানং উপভোগক্খমা হোন্তি. ‘‘এৰরূপানী’’তি ইমিনা রুক্খমূলসোধনাদীনি চেৰ যথাসত্তি অন্নদানাদীনি চ পুঞ্ঞানি সঙ্গণ্হাতি. ‘‘সুৰণ্ণক্খন্ধসদিসো অত্তভাৰো ইট্ঠো কন্তো মনাপো অহোসী’’তি পাঠো. সকটসহস্সমত্তন্তি ৰাহসহস্সমত্তং, ৰাহো পন ৰীসতি খারী, খারী সোল়সদোণমত্তা, দোণং সোল়স নাল়িযো ৰেদিতব্বা. কুম্ভং দসম্বণানি. ‘‘সহস্সনাল়িযো’’তি কেচি. রত্তসুৰণ্ণকণ্ণিকন্তি রত্তসুৰণ্ণমযং ৰটংসকং.

যস্মা মজ্ঝিমযামে এৰ দেৰতা সত্থারং উপসঙ্কমিতুং অৰসরং লভন্তি, তস্মা ‘‘এককোট্ঠাসং অতীতাযা’’তি ৰুত্তং. অতিক্কন্তৰণ্ণোতি অতিৰিয কমনীযরূপো, কেৰলকপ্পন্তি ৰা মনং ঊনং অৰসেসং, ঈসকং অসমত্তন্তি অত্থো ভগৰতো হি সমীপট্ঠানং মুঞ্চিত্ৰা সব্বো গিজ্ঝকূটৰিহারো তেন ওভাসিতো. তেনাহ ‘‘চন্দিমা ৰিযা’’তিআদি.

দেৰসভাৰণ্ণনা

২৯৪. রতনমত্তকণ্ণিকরুক্খনিস্সন্দেনাতি রতনপ্পমাণরুক্খমযকূটদানপুঞ্ঞনিস্সন্দেন, তস্স ৰা পুঞ্ঞস্স নিস্সন্দফলভাৰেন. নিব্বত্তসভাযন্তি সমুট্ঠিতউপট্ঠানসালাযং. মণিমযাতি পদুমরাগাদিমণিমযা. আণিযোতি থম্ভতুলাসঙ্ঘাটকাদীসু ৰাল়রূপাদিসঙ্ঘাটনকআণিযো.

গন্ধব্বরাজাতি গন্ধব্বকাযিকানং দেৰতানং রাজা. যে তাৰতিংসানং আসন্নৰাসিনো চাতুমহারাজিকা দেৰা, তে পুরতো করোন্তো ‘‘দ্ৰীসু দেৰলোকেসু দেৰতা পুরতো কত্ৰা নিসিন্নো’’তি ৰুত্তো. সেসেসুপি তীসু ঠানেসু এসেৰ নযো.

নাগরাজাতি নাগানং অধিপতি, ন পন সযং নাগজাতিকো.

আসতি নিসীদতি এত্থাতি আসনং, নিসজ্জট্ঠানন্তি আহ ‘‘নিসীদিতুং ওকাসো’’তি. ‘‘এত্থা’’তি পদং নিপাতমত্তং, এত্থাতি ৰা এতস্মিং পাঠে. অত্থুদ্ধারনযেন ৰত্তব্বং পুব্বে ৰুত্তং চতুব্বিধমেৰ. তাৰতিংসা, একচ্চে চ চাতুমহারাজিকা যথালদ্ধায সম্পত্তিযা থাৰরভাৰায, আযতিং সোধনায চ পঞ্চ সীলানি রক্খন্তি, তে তস্স ৰিসোধনত্থং পৰারণাসঙ্গহং করোন্তি. তেন ৰুত্তং ‘‘মহাপৰারণাযা’’তিআদি.

ৰস্সসহস্সন্তি মনুস্সগণনায ৰস্সসহস্সং.

পন্নপলাসোতি পতিতপত্তো. খারকজাতোতি জাতখুদ্দকমকুল়ো. যে হি নীলপত্তকা অতিৰিয খুদ্দকা মকুল়া, তে ‘‘খারকা’’তি ৰুচ্চন্তি. জালকজাতোতি তেহিযেৰ খুদ্দকমকুল়েহি জাতজালকো সব্বসো জালো ৰিয জাতো. কেচি পন ‘‘জালকজাতোতি একজালো ৰিয জাতো’’তি অত্থং ৰদন্তি. পারিছত্তকো কির খারকগ্গহণকালে সব্বত্থকমেৰ পল্লৰিকো হোতি, তে চস্স পল্লৰা পভস্সরপৰাল়ৰণ্ণসমুজ্জলা হোন্তি, তেন সো সব্বসো সমুজ্জলন্তো তিট্ঠতি. কুটুমলকজাতোতি সঞ্জাতমহামকুল়ো. কোরকজাতোতি সঞ্জাতসূচিভেদো সম্পতি ৰিকসমানাৰত্থো. সব্বপালিফুল্লোতি সব্বসো ফুল্লিতৰিকসিতো.

কন্তনকৰাতোতি দেৰানং পুঞ্ঞকম্মপচ্চযা পুপ্ফানং ছিন্দনকৰাতো. কন্ততীতি ছিন্দতি. সম্পটিচ্ছনকৰাতোতি ছিন্নানং ছিন্নানং পুপ্ফানং সম্পটিগ্গণ্হনকৰাতো. নচ্চন্তোতি নানাৰিধভত্তিং সন্নিৰেসৰসেন নচ্চনং করোন্তো. অঞ্ঞতরদেৰতানন্তি নামগোত্তৰসেন অপ্পঞ্ঞাতদেৰতানং.

রেণুৰট্টীতি রেণুসঙ্ঘাতো. কণ্ণিকং আহচ্চাতি সুধম্মায কূটং আহন্ত্ৰা.

অট্ঠ দিৰসেতি পঞ্চমিযা সদ্ধিং পক্খে চত্তারো দিৰসে সন্ধায ৰুত্তং. যথাৰুত্তেসু অট্ঠসু দিৰসেসু ধম্মস্সৰনং নিবদ্ধং তদা পৰত্ততীতি ততো অঞ্ঞদা কারিতং সন্ধাযাহ ‘‘অকালধম্মস্সৰনং কারিত’’ন্তি. চেতিযে ছত্তস্স হেট্ঠা কাতব্বৰেদিকা ছত্তৰেদিকা. চেতিযং পরিক্খিপিত্ৰা পদক্খিণকরণট্ঠানং অন্তোকত্ৰা কাতব্বৰেদিকা পুটৰেদিকা. চেতিযস্স কুচ্ছিং পরিক্খিপিত্ৰা তং সম্বন্ধমেৰ কত্ৰা কাতব্বৰেদিকা কুচ্ছিৰেদিকা. সীহরূপপাদকং আসনং সীহাসনং. উভোসু পস্সেসু সীহরূপযুত্তং সোপানং সীহসোপানং.

অত্তমনা হোন্তি অনিযামনকভাৰতো. তেনেৰাহ ‘‘মহাপুঞ্ঞে পুরক্খত্ৰা’’তিআদি. পৰারণাসঙ্গহত্থায সন্নিপতিতাতি ৰেদিতব্বা ‘‘তদহুপোসথে পন্নরসে পৰারণায পুণ্ণায পুণ্ণমায রত্তিযা’’তি (দী. নি. ২.২৯৪) ৰচনতো.

২৯৫. নৰহি কারণেহীতি ‘‘ইতিপি সো ভগৰা অরহ’’ন্তিআদিনা (দী. নি. ১.১৫৭, ২৫৫) ৰুত্তেহি অরহত্তাদীহি নৰহি বুদ্ধানুভাৰদীপনেহি কারণেহি. ধম্মস্স চাতি এত্থ চ-সদ্দো অৰুত্তসমুচ্চযত্থোতি তেন সম্পিণ্ডিতমত্থং দস্সেন্তো ‘‘উজুপ্পটিপন্নতাদিভেদং সঙ্ঘস্স চ সুপ্পটিপত্তি’’ন্তি আহ.

অট্ঠযথাভুচ্চৰণ্ণনা

২৯৬. যথা অনন্তমেৰ আনঞ্চং, ভিসক্কমেৰ ভেসজ্জং, এৰং যথাভূতা এৰ যথাভুচ্চাতি পাল়িযং ৰুত্তন্তি আহ ‘‘যথাভুচ্চেতি যথাভূতে’’তি. ৰণ্ণেতব্বতো কিত্তেতব্বতো ৰণ্ণা, গুণা. কথং পটিপন্নোতি হেতুঅৰত্থাযং, ফলঅৰত্থাযং, সত্তানং উপকারা ৰত্থাযন্তি তীসুপি অৰত্থাসু লোকনাথস্স বহুজনহিতায পটিপত্তিযা কথেতুকম্যতাপুচ্ছা. তথা হি নং আদিতো পট্ঠায যাৰ পরিযোসানা সঙ্খেপেনেৰ দস্সেন্তো ‘‘দীপঙ্করপাদমূলে’’তিআদিমাহ. তত্থ অভিনীহরমানোতি অভিনীহারং করোন্তো. যং পনেত্থ মহাভিনীহারে, পারমীসু চ ৰত্তব্বং, তং ব্রহ্মজালটীকাযং (দী. নি. টী. ১.৭) ৰুত্তং এৰাতি তত্থ ৰুত্তনযেনেৰ ৰেদিতব্বং.

‘‘খন্তিৰাদিতাপসকালে’’তিআদি (জা. ১.খন্তীৰাদীজাতক) হেতুঅৰত্থাযমেৰ অনঞ্ঞসাধারণায সুদুক্করায বহুজনহিতায পটিপত্তিযা ৰিভাৰনং. যথাধিপ্পেতং হিতসুখং যায কিরিযায ৰিনা ন ইজ্ঝতি, সাপি তদত্থা এৰাতি দস্সেতুং ‘‘তুসিতপুরে যাৰতাযুকং তিট্ঠন্তোপী’’তিআদি ৰুত্তং.

ধম্মচক্কপ্পৰত্তনাদি (সং. নি. ৫.১০৮১; মহাৰ. ১৩; পটি. ম. ৩.৩০) পন নিব্বত্তিতা বহুজনহিতায পটিপত্তি. আযুসঙ্খারোস্সজ্জনম্পি ‘‘এত্তকং কালং তিট্ঠামী’’তি পৰত্তিযা বহুজনহিতায পটিপত্তি. অনুপাদিসেসায নিব্বানধাতুযা পরিনিব্বানৰসেন বহুজনহিতায পটিপত্তি. তেনাহ ‘‘যাৰস্সা’’তিআদি. সেসপদানীতি ‘‘বহুজনসুখাযা’’তিআদীনি পদানি. পচ্ছিমন্তি ‘‘অত্থায হিতায সুখাযা’’তি পদত্তযং. পুরিমস্সাতি ততো পুরিমস্স পদত্তযস্স. অত্থোতি অত্থনিদ্দেসো.

যদিপি অতীতেনঙ্গেন সমন্নাগতা সত্থারো অহেসুং, তেপি পন বুদ্ধা এৰাতি অত্থতো অম্হাকং সত্থা অনঞ্ঞোতি আহ ‘‘অতীতেপি বুদ্ধতো অঞ্ঞং ন সমনুপস্সামা’’তি. যথা চ অতীতে, এৰং অনাগতে চাতি অযমত্থো নযতো লব্ভতীতি কত্ৰা ৰুত্তং ‘‘অনাগতেপি ন সমনুপস্সামা’’তি. সক্কো পন দেৰরাজা তমত্থং অত্থাপন্নমেৰ কত্ৰা ‘‘ন পনেতরহি’’ ইচ্চেৰাহ. কিং সক্কো কথেতীতি ৰিচারেত্ৰাতি ‘‘নেৰ অতীতংসে সমনুপস্সমা’তি ৰদন্তো সক্কো কিং কথেতী’’তি ৰিচারণং সমুট্ঠপেত্ৰা. যস্মা অতীতে বুদ্ধা অহেসুং, অনাগতে ভৰিস্সন্তীতি নাযমত্থো সক্কেন দেৰরাজেন পরিঞ্ঞাতো, তে পন বুদ্ধসামঞ্ঞেন অম্হাকং ভগৰতা সদ্ধিং গহেত্ৰা এতরহি অঞ্ঞস্স সব্বেন সব্বং অভাৰতো তথা ৰুত্তন্তি দস্সেতুং ‘‘এতরহী’’তিআদি ৰুত্তং. স্ৰাক্খাতাদীনীতি স্ৰাক্খাতপদাদীনি. কুসলাদীনীতি ‘‘ইদং কুসল’’ন্তিআদীনি পদানি.

গঙ্গাযমুনানং অসমাগমট্ঠানে উদকং ভিন্নৰণ্ণং হোন্তম্পি সমাগমট্ঠানে অভিন্নৰণ্ণং এৰাতি আহ ‘‘ৰণ্ণেনপি সংসন্দতি সমেতী’’তি. তত্থ কির গঙ্গোদকসদিসমেৰ যমুনোদকং. যথা নিব্বানং কেনচি কিলেসেন অনুপক্কিলিট্ঠতায পরিসুদ্ধং, এৰং নিব্বানগামিনিপটিপদাপি কেনচি কিলেসেন অনুপক্কিলিট্ঠতায পরিসুদ্ধাৰ ইচ্ছিতব্বা. তেনাহ ‘‘ন হী’’তিআদি. যেন পরিসুদ্ধত্থেন নিব্বানস্স, নিব্বানগামিনিযা পটিপদায চ আকাসূপমতা, সো কেনচি অনুপলেপো, অনুপক্কিলেসো চাতি আহ ‘‘আকাসম্পি অলগ্গং পরিসুদ্ধ’’ন্তি. ইদানি তমত্থং নিদস্সনেন ৰিভূতং কত্ৰা দস্সেতুং ‘‘চন্দিমসূরিযান’’ন্তিআদি ৰুত্তং. সংসন্দতি যুজ্জতি পটিপজ্জিতব্বতাপটিপজ্জনেহি অঞ্ঞমঞ্ঞানুচ্ছৰিকতায.

পটিপদায ঠিতানন্তি পটিপদং মগ্গপটিপত্তিং পটিপজ্জমানানং. ৰুসিতৰতন্তি ব্রহ্মচরিযৰাসং ৰুসিতৰন্তানং এতেসং. লদ্ধসহাযোতি এতাসং পটিপদানং ৰসেন লদ্ধসহাযো. তত্থ তত্থ সাৰকেহি সত্থু কাতব্বকিচ্চে. ইদং পন ‘‘অদুতিযো’’তিআদি সুত্তন্তরে আগতৰচনং অঞ্ঞেহি অসদিসট্ঠেন ৰুত্তং, ন যথাৰুত্তসহাযাভাৰতো. অপনুজ্জাতি অপনীয ৰিৰজ্জেত্ৰা. ‘‘অপনুজ্জা’’তি চ অন্তোগধাৰধারণং ইদং ৰচনং একন্তিকত্তা তস্স অপনোদস্সাতি ৰুত্তং ‘‘অপনুজ্জেৰা’’তি.

লব্ভতীতি লাভো, সো পন উক্কংসগতিৰিজাননেন সাতিসযো, ৰিপুলো এৰ চ ইধাধিপ্পেতোতি আহ ‘‘মহালাভো উপ্পন্নো’’তি. উস্সন্নপুঞ্ঞনিস্সন্দসমুপ্পন্নোতি যথাৰুত্তকালং সম্ভতসুৰিপুলউল়ারতরপুঞ্ঞাভিসন্দতো নিব্বত্তো.‘‘ইমে নিব্বত্তা, ইতো পরং ময্হং ওকাসো নত্থী’’তি উস্সাহজাতো ৰিয উপরূপরি ৰড্ঢমানো উদপাদি. সব্বদিসাসু হি যমকমহামেঘো উট্ঠহিত্ৰা মহামেঘং ৰিয সব্বপারমিযো ‘‘একস্মিং অত্তভাৰে ৰিপাকং দস্সামা’’তি সম্পিণ্ডিতা ৰিয ভগৰতো ইদং লাভসক্কারসিলোকং নিব্বত্তযিংসু, ততো অন্নপানৰত্থযানমালাগন্ধৰিলেপনাদিহত্থা খত্তিযব্রাহ্মণাদযো উপগন্ত্ৰা ‘‘কহং বুদ্ধো, কহং ভগৰা, কহং দেৰদেৰো, কহং নরাসভো, কহং পুরিসসীহো’’তি ভগৰন্তং পরিযেসন্তি, সকটসতেহিপি পচ্চযে আহরিত্ৰা ওকাসং অলভমানা সমন্তা গাৰুতপ্পমাণম্পি সকটধুরেন সকটধুরং আহচ্চ তিট্ঠন্তি চেৰ অনুবন্ধন্তি চ অন্ধকৰিন্দব্রাহ্মণাদযো ৰিয. সব্বং খন্ধকে, তেসু তেসু চ সুত্তেসু আগতনযেন ৰেদিতব্বং. তেনাহ ‘‘লাভসক্কারো মহোঘো ৰিযা’’তিআদি.

পটিপাটিভত্তন্তি বহূসু ‘‘দানং দস্সামা’’তি আহটপটিপাটিকায উট্ঠিতেসু অনুপটিপাটিযা দাতব্ব ভত্তং.

মত্থকং পত্তো অনঞ্ঞসাধারণত্তা তস্স দানস্স. উপাযং আচিক্খি নাগরানং অসক্কুণেয্যরূপেন দানং দাপেতুং. সালকল্যাণিরুক্খা রাজপরিগ্গহা অঞ্ঞেহি অসাধারণা, তস্মা তেসং পদরেহি মণ্ডপো কারিতো, হত্থিনো চ রাজভণ্ডভূতা নাগরেহি ন সক্কা লদ্ধুন্তি তেহি ছত্তং ধারাপিতং, তথা খত্তিযধীতাহি ৰেয্যাৰচ্চং কারিতং. ‘‘পঞ্চ আসনসতানী’’তি ইদং সালকল্যাণিমণ্ডপে পঞ্ঞত্তে সন্ধায ৰুত্তং, ততো বহি পন বহূনি পঞ্ঞত্তানি অহেসুং. চতুজ্জাতিযগন্ধং পিসতি বুদ্ধপ্পমুখস্স সঙ্ঘস্স পূজনত্থঞ্চেৰ পত্তস্স উব্বটনত্থঞ্চ. উদকন্তি পত্তধোৰনউদকং. অনগ্ঘানি অহেসুং অনগ্ঘরতনাভিসঙ্খতত্তা.

সত্তধা মুদ্ধা ফলিস্সতি অনাদরকারণাদিনা. কাল়ং ওলোকেস্সামীতি কাল়ং এৰং অনুপেক্খিস্সামি, তস্স উপ্পজ্জনকং অনত্থং পরিহরিস্সামীতি অত্থো.

কদরিযাতি থদ্ধমচ্ছরিনো পুঞ্ঞকম্মৰিমুখা. দেৰলোকং ন ৰজন্তি পুঞ্ঞস্স অকতত্তা, মচ্ছরিভাৰেন চ পাপস্স পসুতত্তা. বালাতি দুচ্চিন্তিতচিন্তনাদিনা বাললক্খণযুত্তা. নপ্পসংসন্তি দানং পসংসিতুম্পি ন ৰিসহন্তি. ধীরোতি ধীতিসম্পন্নো উল়ারপঞ্ঞো পরেহি কতং দানং অনুমোদমানোপি, তেনেৰ দানানুমোদনেনেৰ. সুখী পরত্থাতি পরলোকে কাযিকচেতসিকসুখসমঙ্গী হোতি.

ৰররোজো নাম তস্মিং কালে একো খত্তিযো, তস্স ৰররোজস্স. অনৰজ্জ…পে… ফলেয্য অভূতৰাদিভাৰতোতি অধিপ্পাযো. অতিরেকপদসহস্সেন তিংসাধিকেন অড্ঢতেয্যগাথাসতেন ৰণ্ণমেৰ কথেসি রূপপ্পসন্নতায চ.

যাৰ মঞ্ঞে খত্তিযাতি এত্থ যাৰাতি অৰধিপরিচ্ছেদৰচনং, অঞ্ঞেতি নিপাতমত্তং, যাৰ খত্তিযা খত্তিযে অৰধিং কত্ৰা সব্বে দেৰমনুস্সাতি অধিপ্পাযো. তেনাহ ‘‘খত্তিযা ব্রাহ্মণা’’তিআদি. মদপমত্তোতি লাভসক্কারসিলোকমদেন পমত্তো চেৰ তদন্ৰযেন পমাদেন পমত্তো চ হুত্ৰা.

তদন্ৰযমেৰাতি তদনুগতমেৰ. ৰাচা…পে… সমেতীতি ৰচীকম্মকাযকম্মানি অঞ্ঞমঞ্ঞং অৰিরুদ্ধানি, অঞ্ঞদত্থু সংসন্দন্তি. অজা এৰ মিগাতি অজামিগা, তে অজামিগে.

তিণ্ণৰিচিকিচ্ছো সব্বসো অতিক্কন্তৰিচিকিচ্ছাকন্তারো. ননু চ সব্বেপি সোতাপন্না তিণ্ণৰিচিকিচ্ছা, ৰিগতকথংকথা চ? সচ্চমেতং, ইদং পন ন তাদিসং তিণ্ণৰিচিকিচ্ছতং সন্ধায ৰুত্তং, অথ খো সব্বস্মিং ঞেয্যধম্মে সব্বাকারাৰবোধসঙ্খাতসন্নিট্ঠানৰসেন সব্বসো নিরাকতং সন্ধাযাতি দস্সেন্তো ‘‘যথা হী’’তি আদিমাহ. উস্সন্নুস্সন্নত্তাতি পরোপরভাৰতো, অযঞ্চ অত্থো ভগৰতো অনেকধাতুনানাধাতুঞাণবলেনপি ইজ্ঝতি. সব্বত্থ ৰিগতকথংকথো সব্বদস্সাৰিভাৰতো. সব্বেসং পরমত্থধম্মানং সচ্চাভিসমযৰসেন পটিৰিদ্ধত্তা ৰুত্তং ‘‘ৰোহারৰসেনা’’তি ৰা নামগোত্তাদিৰসেনাতি অত্থো.

পরিযোসিতসঙ্কপ্পোতি সব্বসো নিট্ঠিতমনোরথো. ননু চ অরিযমগ্গেন পরিযোসিতসঙ্কপ্পতা নাম সোল়সকিচ্চসিদ্ধিযা কতকরণীযভাৰেন, ন সব্বঞেয্যধম্মাৰবোধেনাতি চোদনং সন্ধাযাহ ‘‘পুব্বে অননুস্সুতেসূ’’তিআদি. সাৰকানং সাৰকপারমিঞাণং ৰিয, হি পচ্চেকবুদ্ধানং পচ্চেকবোধিঞাণং ৰিয চ সম্মাসম্বুদ্ধানং সব্বঞ্ঞুতঞ্ঞাণং চতুসচ্চাভিসম্বোধপুব্বকমেৰাতি. অননুস্সুতেসূতি ন অনুস্সুতেসু. সামন্তি সযমেৰ. পদদ্ৰযেনাপি পরতো ঘোসেন ৰিনাতি দস্সেতি. তত্থাতি নিমিত্তত্থে ভুম্মং, সচ্চাভিসম্বোধনিমিত্তন্তি অত্থো. সচ্চাভিসম্বোধো চ অগ্গমগ্গৰসেনাতি দট্ঠব্বং. বলেসু চ ৰসীভাৰন্তি দসন্নং বলঞাণানং যথারুচি পৰত্তি. জাতত্তা জাতাতি সম্মাসম্বুদ্ধে ৰদতি.

২৯৭. তত্থ তত্থ রাজধানিআদিকে নিবদ্ধৰাসং ৰসন্তো. তীসু মণ্ডলেসু যথাকালং চারিকং চরন্তো.

২৯৮. অস্সাতি ফলস্স. তন্তি কারণং. দ্ৰিন্নম্পি একতো উপ্পত্তিযা কারণং নত্থি, পগেৰ তিণ্ণং, চতুন্নং ৰাতি. ‘‘এত্থ চা’’তিআদি ‘‘একিস্সা লোকধাতুযা’’তি ৰুত্তলোকধাতুযা পমাণপরিচ্ছেদদস্সনত্থং আরদ্ধং.

যাৰতাতি যত্তকেন ঠানেন. পরিহরন্তীতি সিনেরুং পরিক্খিপন্তা পরিৰত্তন্তি. দিসাতি দিসাসু, ভুম্মত্থে এতং পচ্চত্তৰচনং. ভন্তি দিব্বন্তি. ৰিরোচনাতি ওভাসন্তা, ৰিরোচনা ৰা সোভমানা চন্দিমসূরিযা ভন্তি, ততো এৰ দিসা চ ভন্তি.তাৰ সহস্সধাতি তত্তকো সহস্সলোকো.

এত্তকন্তি ইমং চক্কৰাল়ং মজ্ঝে কত্ৰা ইমিনাৰ সদ্ধিং চক্কৰাল়ং দসসহস্সং. যং পনেত্থ ৰত্তব্বং, তং মহাপদানৰণ্ণনাযং ৰুত্তমেৰ. ন পঞ্ঞাযতীতি তীসু পিটকেসু অনাগতত্তা.

সনঙ্কুমারকথাৰণ্ণনা

৩০০. ৰণ্ণেনাতি রূপসম্পত্তিযা. সুৰিঞ্ঞেয্যত্তা তং অনামসিত্ৰা যসসদ্দস্সেৰ অত্থমাহ. অলঙ্কারপরিৰারেনাতি অলঙ্কারেন চ পরিৰারেন চ. পুঞ্ঞসিরিযাতি পুঞ্ঞিদ্ধিযা.

৩০১. সম্পসাদনেতি সম্পসাদজননে. সংপুব্বো খা-সদ্দো জাননত্থো ‘‘সঙ্খাযেতং পটিসেৰতী’’তিআদীসু (ম. নি. ২.১৬৮) ৰিযাতি আহ ‘‘জানিত্ৰা মোদামা’’তি.

গোৰিন্দব্রাহ্মণৰত্থুৰণ্ণনা

৩০৪. যাৰ দীঘরত্তন্তি যাৰ পরিমাণতো, অপরিমিতকালপরিদীপনমেতন্তি আহ ‘‘এত্তকন্তি…পে… অতিচিররত্ত’’ন্তি. মহাপঞ্ঞোৰ সো ভগৰাতি তেন ব্রহ্মুনা অনুমতিপুচ্ছাৰসেন দেৰানং ৰুত্তন্তি দস্সেন্তো ‘‘মহাপঞ্ঞোৰ সো ভগৰা. নোতি কথং তুম্হে মঞ্ঞথা’’তি আহ. সযমেৰেতং পঞ্হং ব্যাকাতুকামো ‘‘ভূতপুব্বং ভো’’তি আদিং আহাতি সম্বন্ধো. এৰং পন ব্যাকরোন্তেন অত্থতো অযম্পি অত্থো ৰুত্তো নাম হোতীতি দস্সেন্তো ‘‘অনচ্ছরিযমেত’’ন্তি আদিমাহ. তিণ্ণং মারানন্তি কিলেসাভিসঙ্খারদেৰপুত্তমারানং. ‘‘অনচ্ছরিযমেত’’ন্তি ৰুত্তমেৰত্থং নিগমনৰসেন ‘‘কিমেত্থ অচ্ছরিয’’ন্তি পুনপি ৰুত্তং.

রঞ্ঞো দিট্ঠধম্মিকসম্পরাযিকঅত্থানং পুরো ধানতো পুরে পুরে সংৰিধানতো পুরোহিতোতি আহ ‘‘সব্বকিচ্চানিঅনুসাসনপুরোহিতো’’তি. গোৰিন্দিযাভিসেকেনাতি গোৰিন্দস্স ঠানে ঠপনাভিসেকেন. তং কির তস্স ব্রাহ্মণস্স কুলপরম্পরাগতং ঠানন্তরং. জোতিতত্তাতি আৰুধানং জোতিতত্তা. পালনসমত্থতাযাতি রঞ্ঞো, অপরিমিতস্স চ সত্তকাযস্স অনত্থতো পরিপালনসমত্থতায.

সম্মা ৰোস্সজ্জিত্ৰাতি সুট্ঠু তস্সেৰাগারৰভাৰেন ৰিস্সজ্জিত্ৰা নিয্যাতেত্ৰা. তং তমত্থং কিচ্চং পস্সতীতি অত্থদসো.

৩০৫. ভৰনং ৰড্ঢনং ভৰো, ভৰতি এতেনাতি ৰা ভৰো, ৰড্ঢিকারণং সন্ধিৰসেন ম-কারাগমো, ও-কারস্স চ অ-কারাদেসং কত্ৰা ‘‘ভৰমত্থূ’’তি ৰুত্তং. ভৰন্তং জোতিপালন্তি পন সামিঅত্থে উপযোগৰচনন্তি আহ ‘‘ভোতো’’তি. মা পচ্চব্যাহাসীতি মা পটিক্খিপীতি অত্থো. সো পন পটিক্খেপো পটিৰচনং হোতীতি আহ ‘‘মা পটিব্যাহাসী’’তি. অভিসম্ভোসীতি কম্মন্তানং সংৰিধানে সমত্থো হোতীতি আহ ‘‘সংৰিদহিত্ৰা’’তি. ভৰাভৰং, পঞ্ঞঞ্চ ৰিন্দি পটিলভীতি গোৰিন্দো, মহন্তো গোৰিন্দো মহাগোৰিন্দো. ‘‘গো’’তি হি পঞ্ঞাযেতং অধিৰচনং গচ্ছতি অত্থে বুজ্ঝতীতি.

রজ্জসংৰিভজনৰণ্ণনা

৩০৬. একপিতিকা ৰেমাতুকা কনিট্ঠভাতরো. অযং অভিসিত্তোতি অযং রেণু রাজকুমারো পিতু অচ্চযেন রজ্জে অভিসিত্তো. রাজকারকাতি রাজপুত্তং রজ্জে পতিট্ঠাপেতারো.

৩০৭. মদেন্তীতি মদনীযাতি কত্তুসাধনতং দস্সেন্তো ‘‘মদকরা’’তি আহ. মদকরণং পন পমাদস্স ৰিসেসকারণন্তি ৰুত্তং ‘‘পমাদকরা’’তি.

৩০৮. রেণুস্স রজ্জসমীপে দসগাৰুতমত্তৰিত্থতানি হুত্ৰা অপরভাগে তিযোজনসতং ৰিত্থতত্তা সব্বানি ছ রজ্জানি সকটমুখানি পট্ঠপেসি. ৰিতানসদিসং চতুরস্সভাৰতো.

৩১০. সহাতি গাথায পদপরিপূরণত্থং ৰুত্তং. তস্স অত্থং দস্সেন্তো ‘‘তেনেৰ সহা’’তি আহ. সহাতি ৰা অৰিনাভাৰত্থে নিপাতো, সো সহ আসুং সত্ত ভারধাতি যোজেতব্বো, তেন তে দেসন্তরে ৰসন্তা ৰিচিত্তেন সহভাৰিনো অৰিনাভাৰিনোতি দীপেতি. রজ্জভারং ধারেন্তি অত্তনি আরোপেন্তি ৰহন্তীতি ভারধা.

পঠমভাণৰারৰণ্ণনা নিট্ঠিতা.

কিত্তিসদ্দঅব্ভুগ্গমনৰণ্ণনা

৩১১. অনুপুরোহিতে ঠপেসীতি অনুপুরোহিতে কত্ৰা ঠপেসি, অনুপুরোহিতে ৰা ঠানে ঠপেসি. তিসৰনং করোন্তে সন্ধায ‘‘দিৰসস্স তিক্খত্তু’’ন্তি ৰুত্তং. দ্ৰীসু সন্ধীসু সৰনং করোন্তে সন্ধায ‘‘সাযং, পাতো ৰা’’তি ৰুত্তং. ততো পট্ঠাযাতি ৰতচরিযং মত্থকং পাপেত্ৰা ন্হাতকালতো পভুতি.

৩১২. অভিউগ্গচ্ছীতি উট্ঠহি উদপাদি. অচিন্তেত্ৰাতি ‘‘কথং খো অহং ব্রহ্মুনা সদ্ধিং মন্তেয্য’’ন্তি অচিন্তেত্ৰা এৰং চিত্তম্পি অনুপ্পাদেত্ৰা. তেন সমাগমনস্সেৰ অভাৰতো অমন্তেত্ৰা. তং দিস্ৰাতি তং করুণাব্রহ্মৰিহারভাৰনং ব্রহ্মদস্সনূপাযং দিস্ৰা ঞাণচক্খুনা.

৩১৩. এৰন্তি এৰং রঞ্ঞো আরোচেত্ৰা পটিসল্লানং উপগতে. সব্বত্থাতি সব্বেসু ছন্নং খত্তিযানং, সত্তন্নং ব্রাহ্মণমহাসালানং, সত্তন্নং নাটকসতানং, চত্তারীসায চ ভরিযানং আপুচ্ছনৰারেসু.

৩১৬. সাদিসিযোতি জাতিযা সাদিসিযোতি আহ ‘‘সমৰণ্ণা সমজাতিকা’’তি.

৩১৭. সন্থাগারন্তি ঝানমনসিকারেন বহি ৰিসটৰিতক্কৰূপসমনেন চিত্তস্স সন্থম্ভনং অগারং, ঝানসালন্তি অত্থো. গহিতাৰাতি ভাৰনানুযোগেন মহাসত্তেন অত্তনো চিত্তসন্তানে উপ্পাদনৰসেন গহিতা এৰ. নত্থি ঝানেনেৰ ৰিক্খম্ভিতত্তা. ৰিসেসতো হিস্স করুণায ভাৰিতত্তা অনভিরতি উক্কণ্ঠনা নত্থি, মেত্তায ভাৰিতত্তা ভযপরিতস্সনা নত্থি. উক্কণ্ঠনাতি পন ব্রহ্মদস্সনে উস্সুক্কং, পরিতস্সনাতি তদভিপত্থনাতি আহ ‘‘ব্রহ্মুনো পনা’’তিআদি.

ব্রহ্মুনাসাকচ্ছাৰণ্ণনা

৩১৮. চিত্তুত্রাসোতি চিত্তস্স উত্রাসনমত্তং. কথন্তি সত্তনিকাযনিৰাসট্ঠাননামগোত্তাদীনং ৰসেন কেন পকারেন. তেনাহ ‘‘কি’’ন্তিআদি.

সোতি যে তে পনকনসনন্তবন্ধসতনসনঙ্কুমারকালনামকা লোকে পাকটা পঞ্ঞাতা ব্রহ্মানো, তেসু সনঙ্কুমারো নামাহন্তি দস্সেতি.

অগ্ঘন্তি গরুট্ঠানিযানং দাতব্বংআহারং. মধুসাকন্তি মধুরাহারং, যং কিঞ্চি অতিথিনো দাতব্বং আহারং উপচারৰসেন এৰং ৰদতি. তেনাহ ‘‘মধুসাকং পনা’’তিআদি. পুচ্ছামাতি নিমন্তনৰসেন পুচ্ছাম.

৩১৯. মহাসত্তো চত্তারো ব্রহ্মৰিহারে ভাৰেত্ৰা ঠিতোপি তেসু ‘‘ব্রহ্মসহব্যতায মগ্গো’’তি অনিব্বেমতিকতায ‘‘কঙ্খী’’তি অৰোচ. কেচি পন ‘‘তপোকম্মেন পরিক্খীণসরীরতায, ব্রহ্মসমাগমেন ভযাদিসমুপ্পত্তিযা চ পটিলদ্ধমত্তেহি ব্রহ্মৰিহারেহি পরিহীনো অহোসি, তস্মা অৰিক্খম্ভিতৰিচিকিচ্ছতায ‘কঙ্খী’তি অৰোচা’’তি ৰদন্তি. পরস্স ৰেদিযা ৰিদিতা পরৰেদিযা, তে পন তস্স পাকটা ৰিভূতাতি আহ ‘‘পরস্স পাকটেসু পরৰেদিযেসূ’’তি. তত্থ কারণমাহ ‘‘পরেন সযং অভিসঙ্খতত্তা’’তি. মমাতি কম্মং মমংকারো, মমত্তন্তি আহ ‘‘ইদং মম…পে… তণ্হ’’ন্তি. ‘‘মম’’ন্তি করোতি এতেনাতি হি মমংকারো, তথাপৰত্তা তণ্হা. মনুজেসূতি নিদ্ধারণে ভুম্মং, ন ৰিসযেতি আহ ‘‘মনুজেসু যো কোচী’’তি. ‘‘একোদিভূতো’’তি পদস্স ভাৰত্থং তাৰ দস্সেন্তো ‘‘একীভূতো’’তি ৰত্ৰা পুন তং ৰিৰরন্তো ‘‘একো তিট্ঠন্তো একো নিসীদন্তো’’তি আহ. তাদিসোতি একো হুত্ৰা পৰত্তনকো. ভূতোতি জাতো. ঝানে অধিমুত্তি নাম তস্মিং নিব্বত্তিতে, অনিব্বত্তিতে কুতো অধিমুত্তীতি আহ ‘‘ঝানং নিব্বত্তেত্ৰাতি অত্থো’’তি. ৰিস্সগন্ধো নাম কোধাদিকিলেসপরিভাৰনাতি তেসং ৰিক্খম্ভনেন ৰিস্সগন্ধৰিরহিতো. এতেসু ধম্মেসূতি পব্বজ্জানং ৰিৰেকৰাসকরুণাব্রহ্মৰিহারাদিধম্মেসু.

৩২০. অৰিদ্ৰাতি ন ৰিদিতৰা. আৰরিতাতি কুসলানং উত্তরিমনুস্সধম্মানং উপ্পত্তিনিৰারণেন আৰরিতা. পূতিকাতি ব্যাপন্নচিত্ততাদিনা পূতিভূতা. কিলেসৰসেন দুগ্গন্ধং ৰিস্সগন্ধং ৰাযতি. নিরযাদিঅপাযেসু নিব্বত্তনসীলতায আপাযিকাতি আহ ‘‘অপাযূপগা’’তি. চোরাদীহি উপদ্দুতস্স পৰিসিতুকামস্স পাকারকৰাটপরিখাদীহি ৰিয নগরং কোধাদীহি নিৰুতো পিহিতো ব্রহ্মলোকো অস্সাতি নিৰুতব্রহ্মলোকো. পুচ্ছতি ‘‘কেনাৰটা’’তি ৰদন্তো.

মুসাৰাদোৰ মোসৰজ্জং যথা ভিসক্কমেৰ ভেসজ্জং. কুজ্ঝনং দুস্সনং. দিট্ঠাদীসু অদিট্ঠাদিৰাদিতাৰসেন পরেসং ৰিসংৰাদনং পরৰিসংৰাদনং. সদিসং পতিরূপং দস্সেত্ৰা পলোভনং সদিসং দস্সেত্ৰা ৰঞ্চনং. মিত্তানং ৰিহিংসনং মেত্তিভেদো মিত্তদুব্ভনং. দল়্হমচ্ছরিতা থদ্ধমচ্ছরিযং. অত্তনি ৰিজ্জমানং নিহীনতং, সদিসতং ৰা অতিক্কমিত্ৰা মঞ্ঞনং. পরেসং সম্পত্তিযা অসহনং খীযনং. অত্তসম্পত্তিযা নিগূহনৰসেন, পরেহি সাধারণভাৰাসহনৰসেন চ ৰিৰিধা ইচ্ছা রুচি এতস্সাতি ৰিৰিচ্ছা. কদরিযতায মুদুকং মচ্ছরিযং. যত্থ কত্থচীতি সকসন্তকে, পরসন্তকে, হীনাতিকে চাতি যত্থ কত্থচি আরম্মণে. লুব্ভনং আরম্মণস্স গহণং অভিগিজ্ঝনং. মজ্জনং সেয্যাদিৰসেন মদনং সম্পগ্গহো. মুয্হনং আরম্মণস্স অনৰবোধো. এতেসূতি এতেসু যথাৰুত্তেসু কোধাদীসু সত্তসন্তানস্স কিলিস্সনতো ৰিবাধনতো, উপতাপনতো চ কিলেসসঞ্ঞিতেসু পাপধম্মেসু. যুত্তা পযুত্তা সম্পযুত্তা অৰিরহিতা.

এত্থ চাযং ব্রহ্মা মহাসত্তেন আমগন্ধে সুপুট্ঠো অত্তনো যথাউপট্ঠিতে পাপধম্মে চুদ্দসহি পদেহি ৰিভজিত্ৰা কথেসি, তে পন তাদিসং পৰত্তিৰিসেসং উপাদায ৰুত্তাপি কেচি পুন ৰুত্তা, আমগন্ধসুত্তে (সু. নি. ২৪২) পন ৰুত্তাপি কেচি ইধ সব্বসো ন ৰুত্তা, এৰং সন্তেপি লক্খণহারনযেন, তদেকট্ঠতায ৰা তেসং পেত্থ সঙ্গহো দট্ঠব্বো. তেনাহ ‘‘ইদং পন সুত্ত’’ন্তিআদি. তত্থ আমগন্ধসুত্তেন দীপেত্ৰাতি ইধ সরূপতো অৰুত্তে আমগন্ধেপি ৰুত্তেহি একলক্খণতাদিনা আমগন্ধসুত্তেন পকাসেত্ৰা কথেতব্বং তত্থ নেসং সরূপতো কথিতত্তা. আমগন্ধসুত্তম্পি ইমিনা দীপেতব্বং ইধ ৰুত্তানম্পি কেসঞ্চি আমগন্ধানং তত্থ অৰুত্তভাৰতো. যস্মা আমগন্ধসুত্তে ৰুত্তাপি আমগন্ধা অত্থতো ইধ সঙ্গহং সমোসরণং গচ্ছন্তি, তস্মা ইধ ৰুত্তে পরিহরণৰসেন দস্সেন্তেন যস্মা চেত্থ কেচি অভিধম্মনযেন অকিলেসসভাৰাপি সত্তসন্তানস্স ৰিবাধনট্ঠেন ‘‘কিলেসা’’তি ৰত্তব্বতং অরহন্তি, তস্মা ‘‘চুদ্দসসু কিলেসেসূ’’তি ৰুত্তং.

নিম্মাদং মিলাপনং খেপনন্তি আহ ‘‘নিম্মাদেতব্বা পহাতব্বা’’তি. বুদ্ধতন্তীতি বুদ্ধভাৰীনং পৰেণী, বুদ্ধভাৰিনোপি ‘‘বুদ্ধা’’তি ৰুচ্চন্তি যথা ‘‘অগমা রাজগহং বুদ্ধো’’তি. মহাপুরিসস্স দল়্হীকম্মং কত্ৰাতি মহাপুরিসস্স ‘‘পব্বজিস্সামহ’’ন্তি পৰত্তচিত্তুপ্পাদস্স দল়্হীকম্মং কত্ৰা.

রেণুরাজআমন্তনাৰণ্ণনা

৩২১. মম মনং হরিত্ৰাতি মম চিত্তং অপনেত্ৰা তস্স ৰসেন অৰত্তিত্ৰা.

একীভাৰং উপগন্ত্ৰা ৰুত্থস্সাতি কাযৰিৰেকপরিব্রূহনেন একীভাৰং উপগন্ত্ৰা তপোকম্মৰসেন ৰুত্থস্স. কুসপত্তেহি পরিত্থতোতি বরিহিসেহি ৰেদিযা সমন্ততো সন্থরিতো. অকাচোতি ৰণো ৰণসদিসখণ্ডিচ্চৰিরহিতো. তেনাহ ‘‘অকক্কসো’’তি.

ছখত্তিযআমন্তনাৰণ্ণনা

৩২২. সিক্খেয্যামাতি সিক্খাপেয্যাম, সিক্খাপনঞ্চেত্থ অত্থিভাৰাপাদনন্তি আহ ‘‘উপলাপেয্যামা’’তি.

৩২৩. যস্স ৰীরিযারম্ভস্স, খন্তিবলস্স চ অভাৰেন পব্বজিতানং সমণধম্মো পরিপুণ্ণো, পরিসুদ্ধো চ ন হোতি, তেসু ৰীরিযারম্ভখন্তিবলেসু তে তে নিযোজেতুং ‘‘আরম্ভৰ্হো’’তিআদি ৰুত্তং.

করুণাঝানমগ্গোতি করুণাঝানসঙ্খাতো মগ্গো. উজুমগ্গোতি ব্রহ্মলোকগমনে উজুভূতো মগ্গো. অনুত্তরোতি সেট্ঠো ব্রহ্মৰিহারসভাৰতো. তেনাহ ‘‘উত্তমমগ্গো নামা’’তি. সব্ভি রক্খিতো সাধূহি যথা পরিহানি ন হোতি, এৰং পটিপক্খদূরীকরণেন রক্খিতো গোপিতো. ‘‘সদ্ধম্মো সব্ভি ৰক্খিতো’’তি কেচি পঠন্তি, তেসং সপরহিতসাধনেন সাধূহি বুদ্ধাদীহি কথিতো পৰেদিতোতি অত্থো.

তঙ্খণৰিদ্ধংসনধম্মন্তি যস্মিং খণে ৰিরোধিধম্মসমাযোগো, তস্মিংযেৰ খণে ৰিনস্সনসভাৰং, যো ৰা সো গমনস্সাদানং দেৰপুত্তানং হেট্ঠুপরিযেন পটিমুখং ধাৰন্তানং সিরসি, পাদে চ বদ্ধখুরধারাসমাগমনতোপি সীঘতরতায অতিইত্তরো পৰত্তিক্খণো, তেনেৰ ৰিনস্সনসভাৰং. তস্স জীৰিতস্স. গতিন্তি নিট্ঠং. মন্তাযন্তি মন্তেয্যন্তি ৰুত্তং হোতীতি আহ ‘‘মন্তেতব্ব’’ন্তি. করণত্থে ৰা ভুম্মন্তি ‘‘মন্তায’’ন্তি ইদং ভুম্মং করণত্থে দট্ঠব্বং যথা ‘‘ঞাতায’’ন্তি. সব্বপলিবোধেতি সব্বেপি কুসলকিরিযায ৰিবন্ধে উপরোধে.

ব্রাহ্মণমহাসালাদীনং আমন্তনাৰণ্ণনা

৩২৪. অপ্পেসক্খাতি অপ্পানুভাৰাতি আহ ‘‘পব্বজিতকালতো পট্ঠাযা’’তিআদি.

চক্কৰত্তি রাজা ৰিয সম্ভাৰিতো.

মহাগোৰিন্দপব্বজ্জাৰণ্ণনা

৩২৮. সমাপত্তীনং আজাননং নাম অত্তপচ্চক্খতা, সচ্ছিকিরিযাতি আহ ‘‘ন সক্খিংসু নিব্বত্তেতু’’ন্তি.

৩২৯. ইমিনাতি ‘‘সরামহ’’ন্তি ইমিনা পদেন. ‘‘সরামহ’’ন্তি হি ৰদন্তেন ভগৰতো মহাব্রহ্মুনা কথিতং ‘‘তথেৰ ত’’ন্তি ভগৰতা পটিঞ্ঞাতমেৰ জাতন্তি. ন ৰট্টে নিব্বিন্দনত্থায চতুসচ্চকম্মট্ঠানকথায অভাৰতো. অসতি পন ৰট্টে নিব্বিদায ৰিরাগানং অসম্ভৰো এৰাতি আহ ‘‘ন ৰিরাগাযা’’তিআদি. একন্তমেৰ ৰট্টে নিব্বিন্দনত্থায অনেকাকারৰোকারৰট্টে আদীনৰৰিভাৰনতো.

‘‘নিব্বিদাযা’’তি ইমিনা পদেন ৰিপস্সনা ৰুত্তা. এস নযো সেসেসুপি. ৰৰত্থানকথাতি ৰিপস্সনামগ্গনিব্বানানং তংতংপদেহি ৰৰত্থপেত্ৰা কথা. অযমেত্থ নিপ্পরিযাযকথাতি আহ ‘‘পরিযাযেন পনা’’তিআদি.

৩৩০. পরিপূরেতুন্তি ভাৰনাপারিপূরিৰসেন পরিপুণ্ণে কাতুং, নিব্বত্তেতুন্তি অত্থো. ব্রহ্মচরিযচিণ্ণকুলপুত্তানন্তি চিণ্ণমগ্গব্রহ্মচরিযানং কুলপুত্তানন্তি উক্কট্ঠনিদ্দেসেন অরহত্তনিকূটেন দেসনং নিট্ঠপেসি.

অভিনন্দনং নাম সম্পটিচ্ছনং ‘‘অভিনন্দন্তি আগত’’ন্তিআদীসু ৰিয, তঞ্চেত্থ অত্থতো চিত্তস্স অত্তমনতাতি আহ ‘‘চিত্তেন সম্পটিচ্ছন্তো অভিনন্দিত্ৰা’’তি. ‘‘সাধু সাধূ’’তি ৰাচায সম্পহংসনা অনুমোদনাতি আহ ‘‘ৰাচায সম্পহংসমানো অনুমোদিত্ৰা’’তি.

মহাগোৰিন্দসুত্তৰণ্ণনায লীনত্থপ্পকাসনা.