সীহৰিক্কীল়িতনযৰৰণ্ণনা

আঘাতানন্দনাদীনং অকরণৰচনেন সতিসিদ্ধি. সতিযা হি সাৰজ্জানৰজ্জে, তত্থ চ আদীনৰানিসংসে সল্লক্খেত্ৰা সাৰজ্জং পহায অনৰজ্জং সমাদায ৰত্ততীতি. তথা মিচ্ছাজীৰা পটিৰিরতিৰচনেন ৰীরিযসিদ্ধি. ৰীরিযেন হি কামব্যাপাদৰিহিংসাৰিতক্কে ৰিনোদেতি, ৰীরিযসাধনঞ্চ আজীৰপারিসুদ্ধিসীলন্তি. পাণাতিপাতাদীহি পটিৰিরতিৰচনেন সতিসিদ্ধি. সতিযা হি সাৰজ্জানৰজ্জে, তত্থ চ আদীনৰানিসংসে সল্লক্খেত্ৰা সাৰজ্জং পহায অনৰজ্জং সমাদায ৰত্ততি. তথা হি সা ‘‘ৰিসযাভিমুখভাৰপচ্চুপট্ঠানা’’তি চ ৰুচ্চতি. ‘‘তযিদং ভিক্খৰে তথাগতো পজানাতী’’তিআদিনা সমাধিপঞ্ঞাসিদ্ধি. পঞ্ঞায হি যথাভূতাৰবোধো, সমাহিতো চ যথাভূতং পজানাতীতি. তথা ‘‘নিচ্চো ধুৰো’’তিআদিনা অনিচ্চে ‘‘নিচ্চ’’ন্তি ৰিপল্লাসো, ‘‘অরোগো পরং মরণা, একন্তসুখী অত্তা দিট্ঠধম্মনিব্বানপ্পত্তো’’তি চ এৰমাদীহি অসুখে ‘‘সুখ’’ন্তি ৰিপল্লাসো, ‘‘পঞ্চহি কামগুণেহি সমপ্পিতো’’তিআদিনা অসুভে ‘‘সুভ’’ন্তি ৰিপল্লাসো, সব্বেহেৰ চ দিট্ঠিদীপকপদেহি অনত্তনি ‘‘অত্তা’’তি ৰিপল্লাসোতি এৰমেত্থ চত্তারো ৰিপল্লাসা সিদ্ধা হোন্তি, তেসং পটিপক্খতো চত্তারি সতিপট্ঠানানি সিদ্ধানেৰ হোন্তি. তত্থ চতূহি ইন্দ্রিযেহি চত্তারো পুগ্গলা নিদ্দিসিতব্বা.

কথং? দুৰিধো হি তণ্হাচরিতো মুদিন্দ্রিযো চ তিক্খিন্দ্রিযো চাতি, তথা দিট্ঠিচরিতো. তেসু পঠমো অসুভে ‘‘সুভ’’ন্তি ৰিপল্লত্তদিট্ঠি সতিবলেন যথাভূতং কাযসভাৰং সল্লক্খেত্ৰা সম্মত্তনিযামং ওক্কমতি. দুতিযো অসুখে ‘‘সুখ’’ন্তি ৰিপল্লত্তদিট্ঠি ‘‘উপ্পন্নং কামৰিতক্কং নাধিৰাসেতী’’তিআদিনা (ম. নি. ১.২৬; অ. নি. ৪.১৪; ৬.৫৮) ৰুত্তেন ৰীরিযসংৰরসঙ্খাতেন ৰীরিযবলেন তং ৰিপল্লাসং ৰিধমতি. ততিযো অনিচ্চে ‘‘নিচ্চ’’ন্তি অযাথাৰগাহী সমথবলেন সমাহিতভাৰতো সঙ্খারানং খণিকভাৰং যথাভূতং পটিৰিজ্ঝতি. চতুত্থো সন্ততিসমূহকিচ্চারম্মণঘনৰিচিত্তত্তা ফস্সাদিধম্মপুঞ্জমত্তে অনত্তনি ‘‘অত্তা’’তি মিচ্ছাভিনিৰেসী চতুকোটিকসুঞ্ঞতামনসিকারেন তং মিচ্ছাভিনিৰেসং ৰিদ্ধংসেতি. চতূহি চেত্থ ৰিপল্লাসেহি চতুরাসৰোঘযোগকাযগন্থঅগতিতণ্হুপ্পাদুপাদানসত্তৰিঞ্ঞাণট্ঠিতিঅপরিঞ্ঞাদিৰসেন সব্বো অকুসলপক্খো নেতব্বো. তথা চতূহি সতিপট্ঠানেহি চতুব্বিধঝানৰিহারাধিট্ঠানসুখভাগিযধম্মঅপ্পমঞ্ঞাসম্মপ্পধানইদ্ধিপাদাদিৰসেন সব্বো ৰোদানপক্খো নেতব্বোতি অযং সীহৰিক্কীল়িতস্স নযস্স ভূমি. ইধাপি সুভসঞ্ঞাসুখসঞ্ঞাহি, চতূহিপি ৰা ৰিপল্লাসেহি সমুদযসচ্চং, তেসং অধিট্ঠানারম্মণভূতা পঞ্চুপাদানক্খন্ধা দুক্খসচ্চন্তিআদিনা সচ্চযোজনা ৰেদিতব্বা.