নন্দিযাৰট্টনযৰণ্ণনা

আঘাতাদীনং অকরণৰচনেন তণ্হাৰিজ্জাসঙ্কোচো দস্সিতো হোতি. সতি হি অত্তত্তনিযৰত্থূসু সিনেহে সম্মোসে চ ‘‘অনত্থং মে অচরী’’তিআদিনা (ধ. স. ১২৩৭, ৰিভ. ৯০৯) আঘাতো জাযতীতি, তথা ‘‘পাণাতিপাতা পটিৰিরতো’’তিআদিৰচনেহি, ‘‘পচ্চত্তঞ্ঞেৰ নিব্বুতি ৰিদিতা, অনুপাদাৰিমুত্তো, ছন্নং ফস্সাযতনানং…পে… যথাভূতং পজানাতী’’তিআদীহি ৰচনেহি চ তণ্হাৰিজ্জানং অচ্চন্তপ্পহানং দস্সিতং হোতি. তাসং পন পুব্বন্তকপ্পিকাদিপদেহি ‘‘অজানতং অপস্সত’’ন্তিআদিপদেহি চ সরূপতো দস্সিতানং তণ্হাৰিজ্জানং রূপধম্মা অরূপধম্মা চ অধিট্ঠানং. যথাক্কমং সমথো চ ৰিপস্সনা চ পটিপক্খো. তেসং চেতোৰিমুত্তি পঞ্ঞাৰিমুত্তি চ ফলং. তত্থ তণ্হা, তণ্হাৰিজ্জা ৰা সমুদযসচ্চং, তদধিট্ঠানভূতা রূপারূপধম্মা দুক্খসচ্চং, তেসং অপ্পৰত্তি নিরোধসচ্চং, নিরোধপজাননা সমথৰিপস্সনা মগ্গসচ্চন্তি এৰং চতুসচ্চযোজনা ৰেদিতব্বা. তণ্হাগ্গহণেন চেত্থ মাযাসাঠেয্যমানাতিমানমদপ্পমাদপাপিচ্ছতাপাপমিত্ততাঅহিরিকানোত্তপ্পাদিৰসেন সব্বো অকুসলপক্খো নেতব্বো. তথা অৰিজ্জাগ্গহণেন ৰিপরীতমনসিকারকোধুপনাহমক্খপলাসইস্সামচ্ছরিযসারম্ভদোৰচস্সতা- ভৰদিট্ঠিৰিভৰদিট্ঠাদিৰসেন অকুসলপক্খো নেতব্বো. ৰুত্তৰিপরিযাযেন অমাযাঅসাঠেয্যাদিঅৰিপরীতমনসিকারাদিৰসেন, তথা সমথপক্খিযানং সদ্ধিন্দ্রিযাদীনং, ৰিপস্সনাপক্খিযানঞ্চ অনিচ্চসঞ্ঞাদীনং ৰসেন কুসলপক্খো নেতব্বোতি. অযং নন্দিযাৰট্টস্স নযস্স ভূমি.