ওতরণহারৰণ্ণনা

আঘাতগ্গহণেন সঙ্খারক্খন্ধসঙ্গহো, তথা অনভিরদ্ধিগহণেন. অপ্পচ্চযগ্গহণেন ৰেদনাক্খন্ধসঙ্গহোতি ইদং খন্ধমুখেন ওতরণং. তথা আঘাতাদিগ্গহণেন ধম্মাযতনং ধম্মধাতু দুক্খসচ্চং সমুদযসচ্চং ৰা গহিতন্তি ইদং আযতনমুখেন ধাতুমুখেন সচ্চমুখেন চ ওতরণং. তথা আঘাতাদীনং সহজাতা অৰিজ্জা হেতুসহজাতঅঞ্ঞমঞ্ঞনিস্সযসম্পযুত্তঅত্থিঅৰিগতপচ্চযেহি পচ্চযো হোতি, অসহজাতা পন অনন্তরসমনন্তরঅনন্তরূপনিস্সযনত্থিৰিগতাসেৰনপচ্চযেহি পচ্চযো হোতি, অনন্তরা উপনিস্সযৰসেনেৰ পচ্চযো হোতি. তণ্হাউপাদানাদীনং, ফস্সাদীনম্পি তেসং সহজাতানং অসহজাতানঞ্চ যথারহং পচ্চযভাৰো ৰত্তব্বো. কোচি পনেত্থ অধিপতিৰসেন, কোচি কম্মৰসেন, কোচি আহারৰসেন, কোচি ইন্দ্রিযৰসেন, কোচি ঝানৰসেন, কোচি মগ্গৰসেনপি পচ্চযো হোতীতি. অযম্পি ৰিসেসো ৰেদিতব্বোতি ইদং পটিচ্চসমুপ্পাদমুখেন ওতরণং. আনন্দাদীনম্পি ইমিনাৰ নযেন খন্ধাদিমুখেন ওতরণং ৰিভাৰেতব্বং.

তথা সীলং পাণাতিপাতাদীহি ৰিরতিচেতনা, অব্যাপাদাদিচেতসিকধম্মা চ, পাণাতিপাতাদযো চেতনাৰ, তেসং তদুপকারকধম্মানঞ্চ লজ্জাদযাদীনং সঙ্খারক্খন্ধধম্মাযতনাদিসঙ্গহো, পুরিমনযেনেৰ খন্ধাদিমুখেন চ ওতরণং ৰিভাৰেতব্বং. এস নযো ঞাণদিট্ঠিৰেদনাঅৰিজ্জাতণ্হাদিগ্গহণেসু. নিস্সরণঅনুপাদাৰিমুত্তিগহণেসু অসঙ্খতধাতুৰসেনপি ধাতুমুখেন ওতরণং ৰিভাৰেতব্বং. তথা ‘‘ৰেদনানং…পে… অনুপাদাৰিমুত্তো’’তি এতেন ভগৰতো সীলাদযো পঞ্চ ধম্মক্খন্ধা, সতিপট্ঠানাদযো চ বোধিপক্খিযধম্মা পকাসিতা হোন্তীতি তং মুখেনপি ওতরণং ৰেদিতব্বং. ‘‘তদপি ফস্সপচ্চযা’’তি দিট্ঠিপঞ্ঞাপনস্স পচ্চযাধীনৰুত্তিতাদীপনেন অনিচ্চতামুখেন ওতরণং, তথা এৰংধম্মতায পটিচ্চসমুপ্পাদমুখেন ওতরণং, অনিচ্চস্স দুক্খানত্তভাৰতো অপ্পণিহিতমুখেন সুঞ্ঞতামুখেন চ ওতরণং. সেসপদেসুপি এসেৰ নযোতি অযং ওতরণো হারো.