পরিৰত্তহারৰণ্ণনা

আঘাতাদীনং অকরণং খন্তিসোরচ্চানি অনুব্রূহেত্ৰা পটিসঙ্খানভাৰনাবলসিদ্ধিযা উভযহিতপটিপত্তিং আৰহতি. আঘাতাদযো পন পৰত্তিযমানা দুব্বণ্ণতং দুক্খসেয্যং ভোগহানিং অকিত্তিং পরেহি দুরুপসঙ্কমনতঞ্চ নিপ্ফাদেন্তা নিরযাদীসু মহাদুক্খং আৰহন্তি. পাণাতিপাতাদীহি পটিৰিরতি অৰিপ্পটিসারাদিকল্যাণং পরম্পরং আৰহতি. পাণাতিপাতাদি পন ৰিপ্পটিসারাদিঅকল্যাণং পরম্পরং, গম্ভীরতাদিৰিসেসযুত্তং ঞাণং ৰিনেয্যানং যথারহং ৰিজ্জাভিঞ্ঞাদিগুণৰিসেসং আৰহতি সব্বঞেয্যং যথাসভাৰাৰবোধতো. তথা গম্ভীরতাদিৰিসেসরহিতং পন ঞাণং ঞেয্যেসু সাৰরণতো যথাৰুত্তগুণৰিসেসং নাৰহতি. সব্বাপি চেতা দিট্ঠিযো যথারহং সস্সতুচ্ছেদভাৰতো অন্তদ্ৰযভূতা সক্কাযতীরং নাতিৰত্তন্তি অনিয্যানিকসভাৰত্তা. নিয্যানিকসভাৰত্তা পন সম্মাদিট্ঠি সপরিক্খারা মজ্ঝিমপটিপদাভূতা অতিক্কম্ম সক্কাযতীরং পারং আগচ্ছতি. ৰেদনানং সমুদযাদিযথাভূতৰেদনং অনুপাদাৰিমুত্তিং আৰহতি মগ্গভাৰতো. ৰেদনানং সমুদযাদিঅসম্পটিৰেধো সংসারচারকাৰরোধং আৰহতি সঙ্খারানং পচ্চযভাৰতো. ৰেদযিতসভাৰপটিচ্ছাদকো সম্মোহো তদভিনন্দনং আৰহতি. যথাভূতাৰবোধো পন তত্থ নিব্বেদং ৰিরাগঞ্চ আৰহতি. মিচ্ছাভিনিৰেসে অযোনিসোমনসিকারসহিতা তণ্হা অনেকৰিহিতং দিট্ঠিজালং পসারেতি. যথাৰুত্ততণ্হাসমুচ্ছেদো পঠমমগ্গো তং দিট্ঠিজালং সঙ্কোচেতি. সস্সতৰাদাদিপঞ্ঞাপনস্স ফস্সো পচ্চযো হোতি অসতি ফস্সে তদভাৰতো. দিট্ঠিবন্ধনবন্ধানং ফস্সাযতনাদীনং অনিরোধেন ফস্সাদিঅনিরোধো সংসারদুক্খস্স অনিৰত্তিযেৰ, যাথাৰতো ফস্সাযতনাদিপরিঞ্ঞা সব্বদিট্ঠিদস্সনানি অতিৰত্ততি, ফস্সাযতনাদিঅপরিঞ্ঞা তংদিট্ঠিগহনং নাতিৰত্ততি, ভৰনেত্তিসমুচ্ছেদো আযতিং অত্তভাৰস্স অনিব্বত্তিযা সংৰত্ততি, অসমুচ্ছিন্নায ভৰনেত্তিযা অনাগতে ভৰপ্পবন্ধো পরিৰত্ততিযেৰাতি অযং পরিৰত্তো হারো.