পকরণনযৰণ্ণনা

অযং পন পকরণনযেন পাল়িযা অত্থৰণ্ণনা – সা পনাযং অত্থৰণ্ণনা যস্মা দেসনায সমুট্ঠানপ্পযোজনভাজনেসু পিণ্ডত্থেসু চ নিদ্ধারিতেসু সুকরা হোতি সুৰিঞ্ঞেয্যা চ, তস্মা সুত্তদেসনায সমুট্ঠানাদীনি পঠমং নিদ্ধারযিস্সাম. তত্থ সমুট্ঠানং তাৰ ৰুত্তং ‘‘ৰণ্ণাৰণ্ণভণন’’ন্তি. অপিচ নিন্দাপসংসাসু ৰিনেয্যাঘাতানন্দাদিভাৰানাপত্তি, তত্থ চ আদীনৰদস্সনং সমুট্ঠানং. তথা নিন্দাপসংসাসু পটিপজ্জনক্কমস্স, পসংসাৰিসযস্স খুদ্দকাদিৰসেন অনেকৰিধস্স সীলস্স, সব্বঞ্ঞুতঞ্ঞাণস্স সস্সতাদিদিট্ঠিট্ঠানেসু ততুত্তরি চ অপ্পটিহতচারতায, তথাগতস্স চ কত্থচি অপরিযাপন্নতায অনৰবোধো সমুট্ঠানং.

ৰুত্তৰিপরিযাযেন পযোজনং ৰেদিতব্বং. ৰিনেয্যাঘাতানন্দাদিভাৰাপত্তি আদিকঞ্হি ইমং দেসনং পযোজেতীতি. তথা কুহনলপনাদিনানাৰিধমিচ্ছাজীৰৰিদ্ধংসনং, দ্ৰাসট্ঠিদিট্ঠিজালৰিনিৰেঠনং, দিট্ঠিসীসেন পচ্চযাকারৰিভাৰনং, ছফস্সাযতনৰসেন চতুসচ্চকম্মট্ঠাননিদ্দেসো, সব্বদিট্ঠিগতানং অনৰসেসপরিযাদানং, অত্তনো অনুপাদাপরিনিব্বানদীপনঞ্চ পযোজনানি.

ৰণ্ণাৰণ্ণনিমিত্তং অনুরোধৰিরোধৰন্তচিত্তা কুহনাদিৰিৰিধমিচ্ছাজীৰনিরতা সস্সতাদিদিট্ঠিপঙ্কং নিমুগ্গা, সীলক্খন্ধাদীসু অপরিপূরকারিতায অনৰবুদ্ধগুণৰিসেসঞাণা ৰিনেয্যা ইমিস্সা ধম্মদেসনায ভাজনং.

পিণ্ডত্থা পন আঘাতাদীনং অকরণীযতাৰচনেন পটিঞ্ঞানুরূপং সমণসঞ্ঞায নিযোজনং, খন্তিসোরচ্চানুট্ঠানং, ব্রহ্মৰিহারভাৰনানুযোগো, সদ্ধাপঞ্ঞাসমাযোগো, সতিসম্পজঞ্ঞাধিট্ঠানং, পটিসঙ্খানভাৰনাবলসিদ্ধি, পরিযুট্ঠানানুসযপ্পহানং, উভযহিতপটিপত্তি, লোকধম্মেহি অনুপলেপো চ দস্সিতা হোন্তি. তথা পাণাতিপাতাদীহি পটিৰিরতিৰচনেন সীলৰিসুদ্ধি দস্সিতা, তায চ হিরোত্তপ্পসম্পত্তি, মেত্তাকরুণাসমঙ্গিতা, ৰীতিক্কমপ্পহানং, তদঙ্গপহানং, দুচ্চরিতসংকিলেসপ্পহানং, ৰিরতিত্তযসিদ্ধি, পিযমনাপগরুভাৰনীযতানিপ্ফত্তি, লাভসক্কারসিলোকসমুদাগমো, সমথৰিপস্সনানং অধিট্ঠানভাৰো, অকুসলমূলতনুকরণং, কুসলমূলরোপনং, উভযানত্থদূরীকরণং, পরিসাসু ৰিসারদতা, অপ্পমাদৰিহারো,পরেহি দুপ্পধংসিযতা, অৰিপ্পটিসারাদিসমঙ্গিতা চ দস্সিতা হোন্তি.

‘‘গম্ভীরা’’তিআদিৰচনেহি গম্ভীরধম্মৰিভাৰনং, অলব্ভনেয্যপতিট্ঠতা, কপ্পানং অসঙ্খ্যেয্যেনাপি দুল্লভপাতুভাৰতা, সুখুমেনপি ঞাণেন পচ্চক্খতো পটিৰিজ্ঝিতুং অসক্কুণেয্যতা, ধম্মন্ৰযসঙ্খাতেন অনুমানঞাণেনাপি দুরধিগমনীযতা, পস্সদ্ধসব্বদরথতা, সন্তধম্মৰিভাৰনং, সোভনপরিযোসানতা, অতিত্তিকরভাৰো, পধানভাৰপ্পত্তি, যথাভূতঞাণগোচরতা, সুখুমসভাৰতা, মহাপঞ্ঞাৰিভাৰনা চ দস্সিতা হোন্তি. দিট্ঠিদীপকপদেহি সমাসতো সস্সতুচ্ছেদদিট্ঠিযো পকাসিতাতি ওলীনতাতিধাৰনৰিভাৰনং, উপাযৰিনিবদ্ধনিদ্দেসো, মিচ্ছাভিনিৰেসকিত্তনং, কুম্মগ্গপটিপত্তিযা পকাসনা, ৰিপরিযেসগ্গাহপঞ্ঞাপনং, পরামাসপরিগ্গহো, পুব্বন্তাপরন্তানুদিট্ঠিপতিট্ঠাপনং, ভৰৰিভৰদিট্ঠিৰিভাগো, তণ্হাৰিজ্জাপৰত্তি, অন্তৰানন্তৰাদিট্ঠিনিদ্দেসো, অন্তদ্ৰযাৰতারণং, আসৰোঘযোগকিলেসগন্থসংযোজনূপাদানৰিসেসৰিভজ্জনঞ্চ দস্সিতানি হোন্তি. তথা ‘‘ৰেদনানং সমুদয’’ন্তিআদিৰচনেহি চতুন্নং অরিযসচ্চানং অনুবোধপটিৰেধসিদ্ধি, ৰিক্খম্ভনসমুচ্ছেদপ্পহানং, তণ্হাৰিজ্জাৰিগমো, সদ্ধম্মট্ঠিতিনিমিত্তপরিগ্গহো, আগমাধিগমসম্পত্তি, উভযহিতপটিপত্তি, তিৰিধপঞ্ঞাপরিগ্গহো, সতিসম্পজঞ্ঞানুট্ঠানং, সদ্ধাপঞ্ঞাসমাযোগো, সম্মাৰীরিযসমথানুযোজনং, সমথৰিপস্সনানিপ্ফত্তি চ দস্সিতা হোন্তি.

‘‘অজানতং অপস্সত’’ন্তি অৰিজ্জাসিদ্ধি, ‘‘তণ্হাগতানং পরিতস্সিতৰিপ্ফন্দিতন্তি তণ্হাসিদ্ধি, তদুভযেন চ নীৰরণসংযোজনদ্ৰযসিদ্ধি, অনমতগ্গসংসারৰট্টানুচ্ছেদো, পুব্বন্তাহরণঅপরন্তপটিসন্ধানানি, অতীতপচ্চুপ্পন্নকালৰসেন হেতুৰিভাগো, অৰিজ্জাতণ্হানং অঞ্ঞমঞ্ঞানতিৰত্তনট্ঠেন অঞ্ঞমঞ্ঞূপকারিতা, পঞ্ঞাৰিমুত্তিচেতোৰিমুত্তীনং পটিপক্খনিদ্দেসো চ দস্সিতা হোন্তি. ‘‘তদপি ফস্সপচ্চযা’’তি সস্সতাদিপঞ্ঞাপনস্স পচ্চযাধীনৰুত্তিতাকথনেন ধম্মানং নিচ্চতাপটিসেধো, অনিচ্চতাপতিট্ঠাপনং, পরমত্থতো কারকাদিপটিক্খেপো, এৰংধম্মতাদিনিদ্দেসো, সুঞ্ঞতাপকাসনং, সমত্তনিযামপচ্চযলক্খণৰিভাৰনঞ্চ দস্সিতানি হোন্তি.

‘‘উচ্ছিন্নভৰনেত্তিকো’’তিআদিনা ভগৰতো পহানসম্পত্তি, ৰিজ্জাধিমুত্তি, ৰসীভাৰো, সিক্খত্তযনিপ্ফত্তি, নিব্বানধাতুদ্ৰযৰিভাগো, চতুরধিট্ঠানপরিপূরণং, ভৰযোনিআদীসু অপরিযাপন্নতা চ দস্সিতা হোন্তি. সকলেন পন সুত্তপদেন ইট্ঠানিট্ঠেসু ভগৰতো তাদিভাৰো, তত্থ চ পরেসং পতিট্ঠাপনং, কুসলধম্মানং আদিভূতধম্মদ্ৰযস্স নিদ্দেসো, সিক্খত্তযূপদেসো, অত্তন্তপাদিপুগ্গলচতুক্কসিদ্ধি, কণ্হাকণ্হৰিপাকাদিকম্মচতুক্কৰিভাগো, চতুরপ্পমঞ্ঞাৰিসযনিদ্দেসো, সমুদযাদিপঞ্চকস্স যথাভূতাৰবোধো, ছসারণীযধম্মৰিভাৰনা, দসনাথকরধম্মপতিট্ঠাপন্তি এৰমাদযো নিদ্ধারেতব্বা.