পরিতস্সিতৰিপ্ফন্দিতৰারৰণ্ণনা

১০৫-১১৭. মরিযাদৰিভাগদস্সনত্থন্তি সস্সতাদিদিট্ঠিদস্সনস্স সম্মাদস্সনেন সঙ্করাভাৰৰিভাৰনত্থং. তদপি ৰেদযিতন্তি সম্বন্ধো. অজানতং অপস্সতন্তি ‘‘সস্সতো অত্তা চ লোকো চা’’তি ‘‘ইদং দিট্ঠিট্ঠানং এৰংগহিকং এৰংপরামট্ঠং এৰংগহিতং হোতি এৰংঅভিসম্পরায’’ন্তি যথাভূতং অজানন্তানং অপস্সন্তানং. তথা যস্মিং ৰেদযিতে অৰীততণ্হতায এৰং দিট্ঠিগতং উপাদিযন্তি, তং ৰেদযিতং সমুদযাদিতো যথাভূতং অজানন্তানং অপস্সন্তানং, এতেন অনাৰরণঞাণসমন্তচক্খূহি যথা তথাগতানং যথাভূতমেত্থ ঞাণদস্সনং, ন এৰং দিট্ঠিগতিকানং, অথ খো তণ্হাদিট্ঠিপরামাসোযেৰাতি দস্সেতি. তেনেৰ চাযং দেসনা মরিযাদৰিভাগদস্সনত্থা জাতা. অট্ঠকথাযং পন ‘‘যথাভূতং ধম্মানং সভাৰং অজানন্তানং অপস্সন্তান’’ন্তি অৰিসেসেন ৰুত্তং. ন হি সঙ্খতধম্মসভাৰং অজাননমত্তেন মিচ্ছা অভিনিৰিসন্তীতি. সামঞ্ঞজোতনা ৰিসেসে অৰতিট্ঠতীতি অযং ৰিসেসযোজনা কতা. ৰেদযিতন্তি ‘‘সস্সতো অত্তা চ লোকো চা’’তি দিট্ঠিপঞ্ঞাপনৰসেন পৰত্তং দিট্ঠিযা অনুভূতং অনুভৰনং. তণ্হাগতানন্তি তণ্হায গতানং উপগতানং, পৰত্তানং ৰা. তঞ্চ খো পনেতন্তি চ যথাৰুত্তং ৰেদযিতং পচ্চামসতি. তঞ্হি ৰট্টামিসভূতং দিট্ঠিতণ্হাসল্লানুৰিদ্ধতায সউব্বিলত্তা চঞ্চলং, ন মগ্গফলসুখং ৰিয একরূপেন অৰতিট্ঠতীতি. তেনেৰাহ ‘‘পরিতস্সিতেনা’’তিআদি.

অথ ৰা এৰং ৰিসেসকারণতো দ্ৰাসট্ঠি দিট্ঠিগতানি ৰিভজিত্ৰা ইদানি অৰিসেসকারণতো তানি দস্সেতুং ‘‘তত্র ভিক্খৰে’’তিআদিকা দেসনা আরদ্ধা. সব্বেসঞ্হি দিট্ঠিগতিকানং ৰেদনা অৰিজ্জা তণ্হা চ অৰিসিট্ঠকারন্তি. তত্থ তদপীতি ‘‘সস্সতং অত্তানঞ্চ লোকঞ্চ পঞ্ঞপেন্তি’’তি এত্থ যদেতং ‘‘সস্সতো অত্তা চ লোকো চা’’তি পঞ্ঞাপনং, তদপি. সুখাদিভেদং তিৰিধৰেদযিতং যথাক্কমং দুক্খসল্লানিচ্চতো, অৰিসেসেন সমুদযত্থঙ্গমস্সাদাদীনৰনিস্সরণতো ৰা যথাভূতং অজানন্তানং অপস্সন্তানং, ততো এৰ চ সুখাদিপত্থনাসম্ভৰতো তণ্হায উপগতত্তা তণ্হাগতানং তণ্হাপরিতস্সিতেন দিট্ঠিৰিপ্ফন্দিতমেৰ দিট্ঠিচলনমেৰ, ‘‘অসতি অত্তনি কো ৰেদনং অনুভৰতী’’তি কাযৰচীদ্ৰারেসু দিট্ঠিযা চোপনপ্পত্তিমত্তমেৰ ৰা, ন পন দিট্ঠিযা পঞ্ঞাপেতব্বো সস্সতো কোচি ধম্মো অত্থীতি অত্থো. একচ্চসস্সতৰাদাদীসুপি এসেৰ নযো.