২. উপ্পত্তানুপ্পত্তিৰারৰণ্ণনা

৯৯১. কামধাতুসম্ভূতানঞ্চাতি ইদ্ধিযা রূপধাতুগতানং কামাৰচরসত্তানঞ্চাতি অত্থো. ঘানাযতনাদীনং অভাৰেনাতি এত্থ যদি তদভাৰেন গন্ধাযতনাদীনি আযতনাদিকিচ্চং ন করোন্তি, অসঞ্ঞসত্তেসু চক্খাযতনস্স অভাৰেন রূপাযতনং আযতনাদিকিচ্চং ন করেয্য. ততো ‘‘অসঞ্ঞসত্তানং দেৰানং উপপত্তিক্খণে দ্ৰাযতনানি পাতুভৰন্তী’’তিআদিৰচনং ন ৰত্তব্বং সিযা. কামাৰচরাদিওকাসা তত্থ উপ্পজ্জমানসত্তানং, তত্থ পরিযাপন্নধম্মানং ৰা অধিট্ঠানভাৰেন ‘‘ধাতূ’’তি ৰুচ্চন্তি, তথা যেসু কামাৰচরাদিসত্তনিকাযেসু কামাৰচরাদিসত্তা উপ্পজ্জন্তি, তেসং সত্তানং উপ্পত্তি এত্থাতি সত্তুপ্পত্তীতি ৰুচ্চমানা তে সত্তনিকাযা চ, ন পনেত্থ অপরিযাপন্নোকাসো অপরিযাপন্নসত্তনিকাযো চ অত্থি, যো ‘‘ধাতূ’’তি ৰুচ্চেয্যাতি ইমমত্থং দস্সেন্তো ‘‘ওকাসৰসেন ৰা সত্তুপ্পত্তিৰসেন ৰা অপরিযাপন্নধাতু নাম নত্থী’’তি আহ. সত্তুপ্পত্তিৰসেনাতি ইমিনা ৰা ওকাসসত্তলোকদ্ৰযং সহ গহেত্ৰা তাদিসায অপরিযাপন্নধাতুযা অভাৰং দস্সেতি, সত্তভাৰেন ৰা উপ্পত্তি সত্তুপ্পত্তি, সত্তাৰাসৰসেন তংতংভৰৰসেন উপ্পজ্জমানা উপাদিন্নকক্খন্ধা তংতংপরিযাপন্নানং সদিসাধিট্ঠানভাৰেন ধাতূতি ৰুচ্চন্তীতি এৰং অপরিযাপন্নধাতু নত্থীতি অত্থো.