১৩. অপ্পমঞ্ঞাৰিভঙ্গো

১. সুত্তন্তভাজনীযৰণ্ণনা

৬৪২. সব্বধীতি দিসাদেসোধিনা অনোধিসোফরণং ৰুত্তং, সব্বত্ততায সব্বাৰন্তন্তি সত্তোধিনা. তেনাহ ‘‘অনোধিসো দস্সনত্থ’’ন্তি. তথা-সদ্দো ইতি-সদ্দো ৰা ন ৰুত্তোতি ‘‘মেত্তাসহগতেন চেতসা’’তি এতস্স অনুৰত্তকং তং দ্ৰযং তস্স ফরণন্তরাদিট্ঠানং অট্ঠানন্তি কত্ৰা ন ৰুত্তং, পুন ‘‘মেত্তাসহগতেন চেতসা’’তি ৰুত্তন্তি অত্থো.

৬৪৩. হিরোত্তপ্পানুপালিতা মেত্তা ন পরিহাযতি আসন্নসপত্তস্স রাগস্স সিনেহস্স চ ৰিপত্তিযা অনুপ্পত্তিতোতি অধিপ্পাযো.

৬৪৫. অধিমুঞ্চিত্ৰাতি সুট্ঠু পসারেত্ৰাতি অত্থো. তং দস্সেন্তো ‘‘অধিকভাৰেনা’’তিআদিমাহ, বলৰতা ৰা অধিমোক্খেন অধিমুচ্চিত্ৰা.

৬৪৮. হেট্ঠা ৰুত্তোযেৰাতি ‘‘সব্বেন সব্বং সব্বথা সব্ব’’ন্তি এতেসং ‘‘সব্বেন সিক্খাসমাদানেন সব্বং সিক্খং, সব্বেন সিক্খিতব্বাকারেন সব্বং সিক্খ’’ন্তি চ ঝানৰিভঙ্গে (ৰিভ. অট্ঠ. ৫১৬) অত্থো ৰুত্তো. ইধ পন সব্বেন অৰধিনা অত্তসমতায সব্বসত্তযুত্ততায চ সব্বং লোকং, সব্বাৰধিদিসাদিফরণাকারেহি সব্বং লোকন্তি চ অত্থো যুজ্জতি.

৬৫০. পচ্চত্থিকৰিঘাতৰসেনাতি মেত্তাদীনং আসন্নদূরপচ্চত্থিকানং রাগব্যাপাদাদীনং ৰিঘাতৰসেন. যং অপ্পমাণং, সো অৰেরোতি সো অৰেরভাৰোতি অযং ৰা তস্স অত্থোতি.

৬৫৩. নিরযাদি গতি, চণ্ডালাদি কুলং, অন্নাদীনং অলাভিতা ভোগো. আদি-সদ্দেন দুব্বণ্ণতাদি গহিতং.

সুত্তন্তভাজনীযৰণ্ণনা নিট্ঠিতা.

৩. পঞ্হপুচ্ছকৰণ্ণনা

৬৯৯. ইমস্মিং পন…পে… কথিতাতি ইমিনা ইমস্মিং ৰিভঙ্গে কথিতানং লোকিযভাৰমেৰ দস্সেন্তো খন্ধৰিভঙ্গাদীহি ৰিসেসেতীতি ন অঞ্ঞত্থ লোকুত্তরানং অপ্পমঞ্ঞানং কথিততা অনুঞ্ঞাতা হোতি.

পঞ্হপুচ্ছকৰণ্ণনা নিট্ঠিতা.

অপ্পমঞ্ঞাৰিভঙ্গৰণ্ণনা নিট্ঠিতা.