১০. বোজ্ঝঙ্গৰিভঙ্গো

১. সুত্তন্তভাজনীযং

পঠমনযৰণ্ণনা

৪৬৬. পতিট্ঠানাযূহনা ওঘতরণসুত্তৰণ্ণনাযং (সং. নি. অট্ঠ. ১.১.১) –

‘‘কিলেসৰসেন পতিট্ঠানং, অভিসঙ্খারৰসেন আযূহনা. তথা তণ্হাদিট্ঠীহি পতিট্ঠানং, অৰসেসকিলেসাভিসঙ্খারেহি আযূহনা. তণ্হাৰসেন পতিট্ঠানং, দিট্ঠিৰসেন আযূহনা. সস্সতদিট্ঠিযা পতিট্ঠানং, উচ্ছেদদিট্ঠিযা আযূহনা. লীনৰসেন পতিট্ঠানং, উদ্ধচ্চৰসেন আযূহনা. কামসুখানুযোগৰসেন পতিট্ঠানং, অত্তকিলমথানুযোগৰসেন আযূহনা. সব্বাকুসলাভিসঙ্খারৰসেন পতিট্ঠানং, সব্বলোকিযকুসলাভিসঙ্খারৰসেন আযূহনা’’তি –

ৰুত্তেসু পকারেসু ইধ অৰুত্তানং ৰসেন ৰেদিতব্বা.

সম্মপ্পৰত্তে ধম্মে পটিসঞ্চিক্খতি, উপপত্তিতো ইক্খতি, তদাকারো হুত্ৰা পৰত্ততীতি পটিসঙ্খানলক্খণো উপেক্খাসম্বোজ্ঝঙ্গো. এৰঞ্চ কত্ৰা ‘‘পটিসঙ্খা সন্তিট্ঠনা গহণে মজ্ঝত্ততা’’তি উপেক্খাকিচ্চাধিমত্ততায সঙ্খারুপেক্খা ৰুত্তা. অনুক্কমনিক্খেপে পযোজনং পুরিমস্স পুরিমস্স পচ্ছিমপচ্ছিমকারণভাৰো.

৪৬৭. বলৰতী এৰ সতি সতিসম্বোজ্ঝঙ্গোতি কত্ৰা বলৰভাৰদীপনত্থং পঞ্ঞা গহিতা, ন যস্স কস্সচি সম্পধারণসতি, কুসলুপ্পত্তিকারণস্স পন সরণং সতীতি দস্সেন্তো ‘‘ৰত্তং ৰা’’তিআদিমাহ. ৰত্তসীসে ঠত্ৰাতি ‘‘অহো ৰত মে ধম্মং সুণেয্যুং, সুত্ৰা চ ধম্মং পসীদেয্যুং, পসন্না চ মে পসন্নাকারং করেয্যু’’ন্তি এৰংচিত্তো অহুত্ৰা ‘‘স্ৰাক্খাতো ভগৰতা ধম্মো…পে… ৰিঞ্ঞূহি, অহো ৰত মে ধম্মং সুণেয্যুং, সুত্ৰা চ ধম্মং আজানেয্যুং, আজানিত্ৰা চ পন তথত্থায পটিপজ্জেয্যু’’ন্তি ধম্মসুধম্মতং পটিচ্চ কারুঞ্ঞং অনুদ্দযং অনুকম্পং উপাদায মহাকস্সপত্থেরেন ৰিয ভাসিতন্তি অত্থো. ৰিমুত্তাযতনসীসেতি ‘‘ন হেৰ খো সত্থা, অপিচ খো যথাসুতং যথাপরিযত্তং ধম্মং ৰিত্থারেন পরেসং দেসেস্সামী’’তি এৰং ৰিমুত্তিকারণপধানভাৰে ঠত্ৰা. চিরকতৰত্তাদিৰসেন তংসমুট্ঠাপকো অরূপকোট্ঠাসো ৰুত্তো, ভাৰত্থত্তা এৰ ৰা কতভাসিত-সদ্দা কিরিযাভূতস্স অরূপকোট্ঠাসস্স ৰাচকাতি কত্ৰা আহ ‘‘কাযৰিঞ্ঞত্তিং…পে… কোট্ঠাস’’ন্তি.

বোজ্ঝঙ্গসমুট্ঠাপকতা পুরিমানং ছন্নং অত্তনো অত্তনো অনন্তরিকস্স, পরেসং সব্বেসং ৰা তংতংপরিযাযেন সমুট্ঠাপনৰসেন যোজেতব্বা. কামলোকৰট্টামিসাতি তণ্হা তদারম্মণা খন্ধাতি ৰদন্তি, পঞ্চকামগুণিকো চ রাগো তদারম্মণঞ্চ কামামিসং, ‘‘সস্সতো অত্তা চ লোকো চা’’তিআদিনা লোকগ্গহণৰসেন পৰত্তো সস্সতুচ্ছেদসহগতো রাগো তদারম্মণঞ্চ লোকামিসং, লোকধম্মা ৰা, ৰট্টস্সাদৰসেন উপ্পন্নো সংসারজনকো রাগো তদারম্মণঞ্চ ৰট্টামিসং. মগ্গস্স পুব্বভাগত্তা পুব্বভাগা.

পঠমনযৰণ্ণনা নিট্ঠিতা.

দুতিযনযৰণ্ণনা

৪৬৮-৪৬৯. অভিঞ্ঞেয্যা ধম্মা নাম ‘‘সব্বে সত্তা আহারট্ঠিতিকা, দ্ৰে ধাতুযো, তিস্সো ধাতুযো, চত্তারি অরিযসচ্চানি, পঞ্চ ৰিমুত্তাযতনানি, ছ অনুত্তরিযানি, সত্ত নিদ্দসৰত্থূনি, অট্ঠাভিভাযতনানি, নৰানুপুব্বৰিহারা, দস নিজ্জরৰত্থূনী’’তি এৰংপভেদা ধম্মা, ‘‘সব্বং, ভিক্খৰে, অভিঞ্ঞেয্য’’ন্তি (সং. নি. ৪.৪৬) দস্সিতা খন্ধাদযো চ. ৰানন্তি ৰিনন্ধনং ভৰাদীনং, গমনং ৰা পিযরূপসাতরূপেসু.

চঙ্কমং অধিট্ঠহন্তস্স উপ্পন্নৰীরিযং ৰিপস্সনাসহগতন্তি ৰেদিতব্বং. এত্তকেনাতি ‘‘লোকিযলোকুত্তরমিস্সকা কথিতা’’তি এত্তাৰতা. লোকিযন্তি ৰদন্তো ন কিলমতীতি কাযৰিঞ্ঞত্তিসমুট্ঠাপকস্স লোকিযত্তা অচোদনীযোতি অত্থো. অলব্ভ…পে… পটিক্খিত্তাতি রূপাৰচরে অলব্ভমানকং পীতিসম্বোজ্ঝঙ্গং উপাদায লব্ভমানাপি অৰিতক্কঅৰিচারা পীতি পটিক্খিত্তা, ‘‘পীতিসম্বোজ্ঝঙ্গো’’তি ন ৰুত্তোতি অত্থো. কামাৰচরে ৰা অলব্ভমানকং অৰিতক্কঅৰিচারং পীতিং উপাদায লব্ভমানকাৰ পীতিবোজ্ঝঙ্গভূতা পটিক্খিত্তা, অৰিতক্কঅৰিচারো পীতিসম্বোজ্ঝঙ্গো ন ৰুত্তোতি অত্থো.

অজ্ঝত্তৰিমোক্খন্তি অজ্ঝত্তধম্মে অভিনিৰিসিত্ৰা ততো ৰুট্ঠিতমগ্গো ‘‘অজ্ঝত্তৰিমোক্খো’’তি ইধ ৰুত্তোতি অধিপ্পাযো. ন ৰারেতব্বোতি ৰিপস্সনাপাদকেসু কসিণাদিঝানেসু সতিআদীনং নিব্বেধভাগিযত্তা ন পটিক্খিপিতব্বোতি অত্থো. অনুদ্ধরন্তা পন ৰিপস্সনা ৰিয বোধিযা মগ্গস্স আসন্নকারণং ঝানং ন হোতি, ন চ তথা একন্তিকং কারণং, ন চ ৰিপস্সনাকিচ্চস্স ৰিয ঝানকিচ্চস্স নিট্ঠানং মগ্গোতি কত্ৰা ন উদ্ধরন্তি. তত্থ কসিণজ্ঝানগ্গহণেন তদাযত্তানি আরুপ্পানিপি গহিতানীতি দট্ঠব্বানি. অসুভজ্ঝানানং অৰচনং অৰিতক্কাৰিচারস্স অধিপ্পেতত্তা.

দুতিযনযৰণ্ণনা নিট্ঠিতা.

ততিযনযৰণ্ণনা

৪৭০-৪৭১. তদঙ্গসমুচ্ছেদনিস্সরণৰিৰেকনিস্সিততং ৰত্ৰা পটিপ্পস্সদ্ধিৰিৰেকনিস্সিতত্তস্স অৰচনং ‘‘সতিসম্বোজ্ঝঙ্গং ভাৰেতী’’তিআদিনা (সং. নি. ৫.১৮২; ৰিভ. ৪৭১) ইধ ভাৰেতব্বানং বোজ্ঝঙ্গানং ৰুত্তত্তা. ভাৰিতবোজ্ঝঙ্গস্স হি সচ্ছিকাতব্বা ফলবোজ্ঝঙ্গা অভিধম্মভাজনীযে ৰুত্তাতি. ৰোস্সগ্গ-সদ্দো পরিচ্চাগত্থো পক্খন্দনত্থো চাতি ৰোস্সগ্গস্স দুৰিধতা ৰুত্তা. যথাৰুত্তেনাতি তদঙ্গসমুচ্ছেদপ্পকারেন তন্নিন্নভাৰারম্মণকরণপ্পকারেন চ. পরিণামেন্তং ৰিপস্সনাক্খণে, পরিণতং মগ্গক্খণে.

ততিযনযৰণ্ণনা নিট্ঠিতা.

সুত্তন্তভাজনীযৰণ্ণনা নিট্ঠিতা.

২. অভিধম্মভাজনীযৰণ্ণনা

৪৭২. উপেক্খনৰসেনাতি সভাৰনিদ্দেসতং দস্সেতি, হাপনৰড্ঢনেসু ব্যাপারং অকত্ৰা উপপত্তিতো ইক্খনৰসেনাতি অত্থো. লোকিযউপেক্খনায অধিকা উপেক্খনা অজ্ঝুপেক্খনাতি অযমত্থো ইধ লোকুত্তরা এৰ অধিপ্পেতাতি যুত্তোতি.

অভিধম্মভাজনীযৰণ্ণনা নিট্ঠিতা.

বোজ্ঝঙ্গৰিভঙ্গৰণ্ণনা নিট্ঠিতা.