৬. পুঞ্ঞকিরিযৰত্থুসুত্তৰণ্ণনা

৩৬. ছট্ঠে পুজ্জভৰফলং নিব্বত্তেন্তি, অত্তনো সন্তানং পুনন্তীতি ৰা পুঞ্ঞানি চ তানি হেতুপচ্চযেহি কত্তব্বতো কিরিযা চাতি পুঞ্ঞকিরিযা, তাযেৰ চ তেসং তেসং পিযমনাপতাদিআনিসংসানং ৰত্থুভাৰতো পুঞ্ঞকিরিযৰত্থূনি.

অনুচ্ছিন্নভৰমূলস্স অনুগ্গহৰসেন, পূজাৰসেন ৰা অত্তনো দেয্যধম্মস্স পরস্স পরিচ্চাগচেতনা দীযতি এতেনাতি দানং, দানমেৰ দানমযং. পদপূরণমত্তং ময-সদ্দো. চীৰরাদীসু চতূসু পচ্চযেসু (দী. নি. অট্ঠ. ৩.৩০৫), অন্নাদীসু ৰা দসসু দানৰত্থূসু, রূপাদীসু ৰা ছসু আরম্মণেসু তং তং দেন্তস্স তেসং উপ্পাদনতো পট্ঠায পুব্বভাগে পরিচ্চাগকালে পচ্ছা সোমনস্সচিত্তেন অনুস্সরণে চাতি তীসু কালেসু পৰত্তচেতনা দানমযং পুঞ্ঞকিরিযৰত্থু নাম.

নিচ্চসীলউপোসথসীলাদিৰসেন পঞ্চ অট্ঠ দস ৰা সীলানি সমাদিযন্তস্স ‘‘সীলপূরণত্থং পব্বজিস্সামী’’তি ৰিহারং গচ্ছন্তস্স পব্বজন্তস্স, মনোরথং মত্থকং পাপেত্ৰা ‘‘পব্বজিতো ৰতম্হি সাধু সুট্ঠূ’’তি আৰজ্জেন্তস্স, সদ্ধায পাতিমোক্খং পরিপূরেন্তস্স, পঞ্ঞায চীৰরাদিকে পচ্চযে পচ্চৰেক্খন্তস্স, সতিযা আপাথগতেসু রূপাদীসু চক্খুদ্ৰারাদীনি সংৰরন্তস্স, ৰীরিযেন আজীৰং সোধেন্তস্স চ পৰত্তচেতনা সীলতি, সীলেতীতি ৰা সীলমযং পুঞ্ঞকিরিযৰত্থু নাম.

পটিসম্ভিদাযং (পটি. ম. ১.৪৮) ৰুত্তেন ৰিপস্সনামগ্গেন চক্খুং অনিচ্চতো দুক্খতো অনত্ততো ৰিপস্সন্তস্স, সোতং…পে… ঘানং…পে… জিৰ্হং…পে… কাযং…পে… রূপে…পে… ধম্মে…পে… চক্খুৰিঞ্ঞাণং…পে… মনোৰিঞ্ঞাণং…পে… চক্খুসম্ফস্সং …পে… মনোসম্ফস্সং…পে… চক্খুসম্ফস্সজং ৰেদনং…পে… মনোসম্ফস্সজং ৰেদনং…পে… জরামরণং অনিচ্চতো দুক্খতো অনত্ততো ৰিপস্সন্তস্স যা চেতনা, যা চ পথৰীকসিণাদীসু সব্বাসু অট্ঠত্তিংসায আরম্মণেসু পৰত্তা ঝানচেতনা, যা চ অনৰজ্জেসু কম্মাযতনসিপ্পাযতনৰিজ্জাট্ঠানেসু পরিচযমনসিকারাদিৰসেন পৰত্তা চেতনা, সব্বা সা ভাৰেতি এতাযাতি ভাৰনামযং ৰুত্তনযেন পুঞ্ঞকিরিযৰত্থু চাতি ভাৰনামযং পুঞ্ঞকিরিযৰত্থু.

একমেকঞ্চেত্থ যথারহং পুব্বভাগতো পট্ঠায করোন্তস্স কাযকম্মং হোতি. তদত্থং ৰাচং নিচ্ছারেন্তস্স ৰচীকম্মং. কাযঙ্গং ৰাচঙ্গঞ্চ অচোপেত্ৰা মনসা চিন্তযন্তস্স মনোকম্মং. অন্নাদীনি দেন্তস্স চাপি ‘‘অন্নদানাদীনি দেমী’’তি ৰা, দানপারমিং আৰজ্জেত্ৰা ৰা দানকালে দানমযং পুঞ্ঞকিরিযৰত্থু হোতি. যথা হি কেৰলং ‘‘অন্নদানাদীনি দেমী’’তি দানকালে দানমযং পুঞ্ঞকিরিযৰত্থু হোতি, এৰং ‘‘ইদং দানমযং সম্মাসম্বোধিযা পচ্চযো হোতূ’’তি দানপারমিং আৰজ্জেত্ৰা দানকালেপি দানসীসেনেৰ পৰত্তিতত্তা. ৰত্তসীসে ঠত্ৰা দদন্তো ‘‘এতং দানং নাম ময্হং কুলৰংসহেতু পৰেণিচারিত্ত’’ন্তি চারিত্তসীসেন ৰা দেন্তো চারিত্তসীলত্তা সীলমযং. খযতো ৰযতো সম্মসনং পট্ঠপেত্ৰা দদতো ভাৰনামযং পুঞ্ঞকিরিযৰত্থু হোতি. যথা হি দেয্যধম্মপরিচ্চাগৰসেন ৰত্তমানাপি দানচেতনা ৰত্তসীসে ঠত্ৰা দদতো সীলমযং পুঞ্ঞকিরিযৰত্থু হোতি পুব্বাভিসঙ্খারস্স অপরভাগে চেতনায চ তথাপৰত্তত্তা.

পুঞ্ঞকিরিযৰত্থুসুত্তৰণ্ণনা নিট্ঠিতা.