৯. সীতিৰগ্গো

১. সীতিভাৰসুত্তৰণ্ণনা

৮৫. নৰমস্স পঠমে সীতিভাৰন্তি নিব্বানং, কিলেসৰূপসমং ৰা. নিগ্গণ্হাতীতি অচ্চারদ্ধৰীরিযতাদীহি উদ্ধতং চিত্তং উদ্ধচ্চপক্খতো রক্খণৰসেন নিগ্গণ্হাতি. পগ্গণ্হাতীতি অতিসিথিলৰীরিযতাদীহি লীনং চিত্তং কোসজ্জপাততো রক্খণৰসেন পগ্গণ্হাতি. সম্পহংসেতীতি সমপ্পৰত্তচিত্তং তথাপৰত্তিযং পঞ্ঞায তোসেতি উত্তেজেতি ৰা. যদা ৰা পঞ্ঞাপযোগমন্দতায উপসমসুখানধিগমেন ৰা নিরস্সাদং চিত্তং ভাৰনায ন পক্খন্দতি, তদা জাতিআদীনি সংৰেগৰত্থূনি পচ্চৰেক্খিত্ৰা সম্পহংসেতি সমুত্তেজেতি. অজ্ঝুপেক্খতীতি যদা পন চিত্তং অলীনং অনুদ্ধতং অনিরস্সাদং আরম্মণে সমপ্পৰত্তং সম্মদেৰ ভাৰনাৰীতিং ওতিণ্ণং হোতি, তদা পগ্গহনিগ্গহসম্পহংসনেসু কিঞ্চি ব্যাপারং অকত্ৰা সমপ্পৰত্তেসু অস্সেসু সারথী ৰিয অজ্ঝুপেক্খতি, উপেক্খকোৰ হোতি. পণীতাধিমুত্তিকোতি পণীতে উত্তমে মগ্গফলে অধিমুত্তো নিন্নপোণপব্ভারো.

সীতিভাৰসুত্তৰণ্ণনা নিট্ঠিতা.

২-১১. আৰরণসুত্তাদিৰণ্ণনা

৮৬-৯৫. দুতিযে অচ্ছন্দিকোতি কত্তুকম্যতাকুসলচ্ছন্দরহিতো. উত্তরকুরুকা মনুস্সা অচ্ছন্দিকট্ঠানং পৰিট্ঠা. দুপ্পঞ্ঞোতি ভৰঙ্গপঞ্ঞায পরিহীনো. ভৰঙ্গপঞ্ঞায পন পরিপুণ্ণাযপি যস্স ভৰঙ্গং লোকুত্তরস্স পচ্চযো ন হোতি, সোপি দুপ্পঞ্ঞো এৰ নাম. অভব্বো নিযামং ওক্কমিতুং কুসলেসু ধম্মেসু সম্মত্তন্তি কুসলেসু ধম্মেসু সম্মত্তনিযামসঙ্খাতং অরিযমগ্গং ওক্কমিতুং অধিগন্তুং অভব্বো. ন কম্মাৰরণতাযাতিআদীসু অভব্বৰিপরিযাযেন অত্থো ৰেদিতব্বো. চতুত্থাদীনি উত্তানত্থানি.

আৰরণসুত্তাদিৰণ্ণনা নিট্ঠিতা.

সীতিৰগ্গৰণ্ণনা নিট্ঠিতা.