১-৫. সঞ্ঞাসুত্তাদিৰণ্ণনা

৬১-৬৫. দুতিযস্স পঠমে ‘‘মহপ্ফলা মহানিসংসা’’তি উভযম্পেতং অত্থতো একং, ব্যঞ্জনমেৰ নানন্তি আহ ‘‘মহপ্ফলা’’তিআদি. ‘‘পঞ্চিমে গহপতযো আনিসংসা’’তিআদীসু (উদা. ৭৬) আনিসংস-সদ্দো ফলপরিযাযোপি হোতি. মহতো লোকুত্তরস্স সুখস্স পচ্চযা হোন্তীতি মহানিসংসা. অমতোগধাতি অমতব্ভন্তরা অমতং অনুপ্পৰিট্ঠা নিব্বানদিট্ঠত্তা, ততো পরং ন গচ্ছন্তি. তেন ৰুত্তং ‘‘অমতপরিযোসানা’’তি. অমতং পরিযোসানং অৰসানং এতাসন্তি অমতপরিযোসানা. মরণসঞ্ঞাতি মরণানুপস্সনাঞাণেন সঞ্ঞা. আহারে পটিকূলসঞ্ঞাতি আহারং গমনাদিৰসেন পটিকূলতো পরিগ্গণ্হন্তস্স উপ্পন্নসঞ্ঞা. উক্কণ্ঠিতস্সাতি নিব্বিন্দন্তস্স কত্থচিপি অসজ্জন্তস্স. দুতিযাদীনি উত্তানত্থানেৰ.

সঞ্ঞাসুত্তাদিৰণ্ণনা নিট্ঠিতা.