(১৭) ২. আঘাতৰগ্গো

১-৫. পঠমআঘাতপটিৰিনযসুত্তাদিৰণ্ণনা

১৬১-১৬৫. দুতিযস্স পঠমে নত্থি ৰত্তব্বং. দুতিযে আঘাতো পটিৰিনযতি এত্থ, এতেহীতি ৰা আঘাতপটিৰিনযা. তেনাহ ‘‘আঘাতো এতেহি পটিৰিনেতব্বো’’তিআদি.

নন্তকন্তি অনন্তকং, অন্তৰিরহিতং ৰত্থখণ্ডং. যদি হি তস্স অন্তো ভৰেয্য, ‘‘পিলোতিকা’’তি সঙ্খং ন গচ্ছেয্য.

সেৰালেনাতি বীজকণ্ণিককেসরাদিভেদেন সেৰালেন. উদকপপ্পটকেনাতি নীলমণ্ডূকপিট্ঠিৰণ্ণেন উদকপিট্ঠিং ছাদেত্ৰা নিব্বত্তেন উদকপিট্ঠিকেন. ঘম্মেন অনুগতোতি ঘম্মেন ফুট্ঠো অভিভূতো. চিত্তুপ্পাদন্তি পটিঘসম্পযুত্তচিত্তুপ্পাদং.

ৰিসভাগৰেদনুপ্পত্তিযা ককচেনেৰ ইরিযাপথপৰত্তিনিৰারণেন ছিন্দন্তো আবাধতি পীল়েতীতি আবাধো, সো অস্স অত্থীতি আবাধিকো. তংসমুট্ঠানেন দুক্খিতো সঞ্জাতদুক্খো. বাল়্হগিলানোতি অধিমত্তগিলানো. গামন্তনাযকস্সাতি গামন্তসম্পাপকস্স.

পসন্নভাৰেন উদকস্স অচ্ছভাৰো ৰেদিতব্বোতি আহ ‘‘অচ্ছোদকাতি পসন্নোদকা’’তি. সাদুরসতায সাততাতি আহ ‘‘মধুরোদকা’’তি. তনুকমেৰ সলিলং ৰিসেসতো সীতলং, ন বহলাতি আহ ‘‘তনুসীতসলিলা’’তি. সেতকাতি নিক্কদ্দমা. সচিক্খল্লাদিৰসেন হি উদকস্স ৰিৰণ্ণতা. সভাৰতো পন তং সেতৰণ্ণমেৰ. ততিযাদীনি উত্তানত্থানেৰ.

পঠমআঘাতপটিৰিনযসুত্তাদিৰণ্ণনা নিট্ঠিতা.

৬. নিরোধসুত্তৰণ্ণনা

১৬৬. ছট্ঠে অমরিসনত্থেতি অসহনত্থে. অনাগতৰচনং কতন্তি অনাগতসদ্দপ্পযোগো কতো, অত্থো পন ৰত্তমানকালিকোৰ. অক্খরচিন্তকা (পাণিনি. ৩.৩.১৪৫-১৪৬) হি ঈদিসেসু ঠানেসু অনোকপ্পনামরিসনত্থৰসেন অত্থিসদ্দে উপপদে ৰত্তমানকালেপি অনাগতৰচনং করোন্তি.

নিরোধসুত্তৰণ্ণনা নিট্ঠিতা.

৭-৯. চোদনাসুত্তাদিৰণ্ণনা

১৬৭-৯. সত্তমে ৰত্থুসন্দস্সনাতি যস্মিং ৰত্থুস্মিং আপত্তি, তস্স সরূপতো দস্সনং. আপত্তিসন্দস্সনাতি যং আপত্তিং সো আপন্নো, তস্সা দস্সনং. সংৰাসপ্পটিক্খেপোতি উপোসথপ্পৰারণাদিসংৰাসস্স পটিক্খিপনং অকরণং. সামীচিপ্পটিক্খেপোতি অভিৰাদনাদিসামীচিকিরিযায অকরণং. চোদযমানেনাতি চোদেন্তেন. চুদিতকস্স কালোতি চুদিতকস্স চোদেতব্বকালো. পুগ্গলন্তি চোদেতব্বপুগ্গলং. উপপরিক্খিত্ৰাতি ‘‘অযং চুদিতকলক্খণে তিট্ঠতি, ন তিট্ঠতী’’তি ৰীমংসিত্ৰা. অযসং আরোপেতীতি ‘‘ইমে মং অভূতেন অব্ভাচিক্খন্তা অযসং ব্যসনং উপ্পাদেন্তী’’তি ভিক্খূনং অযসং উপ্পাদেতি. অট্ঠমনৰমানি উত্তানত্থানেৰ.

চোদনাসুত্তাদিৰণ্ণনা নিট্ঠিতা.

১০. ভদ্দজিসুত্তৰণ্ণনা

১৭০. দসমে অভিভৰিত্ৰা ঠিতো ইমে সত্তেতি অধিপ্পাযো. যস্মা পন সো ‘‘পাসংসভাৰেন উত্তমভাৰেন চ তে সত্তে অভিভৰিত্ৰা ঠিতো’’তি অত্তানং মঞ্ঞতি, তস্মা ৰুত্তং ‘‘জেট্ঠকো’’তি. অঞ্ঞদত্থু দসোতি দস্সনে অন্তরাযাভাৰৰচনেন ঞেয্যৰিসেসপরিগ্গাহিকভাৰেন চ অনাৰরণদস্সাৰিতং পটিজানাতীতি আহ ‘‘সব্বং পস্সতীতি অধিপ্পাযো’’তি.

ভদ্দজিসুত্তৰণ্ণনা নিট্ঠিতা.

আঘাতৰগ্গৰণ্ণনা নিট্ঠিতা.