৫. ফাসুৰিহারসুত্তৰণ্ণনা

১০৫. পঞ্চমে মেত্তা এতস্স অত্থীতি মেত্তং, তংসমুট্ঠানং কাযকম্মং মেত্তং কাযকম্মং. এস নযো সেসদ্ৰযেপি. আৰীতি পকাসনং. পকাসভাৰো চেত্থ যং উদ্দিস্স তং কাযকম্মং করীযতি, তস্স সম্মুখভাৰতোতি আহ ‘‘সম্মুখা’’তি. রহোতি অপ্পকাসং. অপ্পকাসতা চ যং উদ্দিস্স তং কাযকম্মং করীযতি, তস্স অপচ্চক্খভাৰতোতি আহ ‘‘পরম্মুখা’’তি. ইমানি মেত্তকাযকম্মাদীনি ভিক্খূনং ৰসেন আগতানি তেসং সেট্ঠপরিসভাৰতো, গিহীসুপি লব্ভন্তিযেৰ. ভিক্খূনঞ্হি মেত্তচিত্তেন আভিসমাচারিকপূরণং মেত্তং কাযকম্মং নাম. গিহীনং চেতিযৰন্দনত্থায বোধিৰন্দনত্থায সঙ্ঘনিমন্তনত্থায গমনং গামং পিণ্ডায পৰিট্ঠে ভিক্খূ দিস্ৰা পচ্চুগ্গমনং পত্তপ্পটিগ্গহণং আসনপঞ্ঞাপনং অনুগমনন্তি এৰমাদিকং মেত্তং কাযকম্মং নাম. ভিক্খূনং মেত্তচিত্তেন আচারপঞ্ঞত্তিসিক্খাপনং কম্মট্ঠানকথনং ধম্মদেসনা তেপিটকম্পি বুদ্ধৰচনং মেত্তং ৰচীকম্মং নাম. গিহীনং ‘‘চেতিযৰন্দনায গচ্ছাম, বোধিৰন্দনায গচ্ছাম, ধম্মস্সৰনং করিস্সাম, দীপমালং পুপ্ফপূজং করিস্সাম, তীণি সুচরিতানি সমাদায ৰত্তিস্সাম, সলাকভত্তাদীনি দস্সাম, ৰস্সাৰাসিকং দস্সাম, অজ্জ সঙ্ঘস্স চত্তারো পচ্চযে দস্সাম, সঙ্ঘং নিমন্তেত্ৰা খাদনীযাদীনি সংৰিদহথ, আসনানি পঞ্ঞপেথ, পানীযং উপট্ঠপেথ, সঙ্ঘং পচ্চুগ্গন্ত্ৰা আনেথ, পঞ্ঞত্তাসনে নিসীদাপেথ, ছন্দজাতা উস্সাহজাতা ৰেয্যাৰচ্চং করোথা’’তিআদিকথনকালে মেত্তং ৰচীকম্মং নাম. ভিক্খূনং পাতোৰ উট্ঠায সরীরপ্পটিজগ্গনং কত্ৰা চেতিযঙ্গণং গন্ত্ৰা ৰত্তাদীনি কত্ৰা ৰিৰিত্তসেনাসনে নিসীদিত্ৰা ‘‘ইমস্মিং ৰিহারে ভিক্খূ সুখী হোন্তু অৰেরা অব্যাপজ্জা’’তি চিন্তনং মেত্তং মনোকম্মং নাম, গিহীনং ‘‘অয্যা সুখী হোন্তু অৰেরা অব্যাপজ্জা’’তি চিন্তনং মেত্তং মনোকম্মং নাম.

তত্থ নৰকানং চীৰরকম্মাদীসু সহাযভাৰগমনং সম্মুখা কাযকম্মং নাম, থেরানং পন পাদধোৰনসিঞ্চনবীজনদানাদিভেদম্পি সব্বং সামীচিকম্মং সম্মুখা কাযকম্মং নাম, উভযেহিপি দুন্নিক্খিত্তানং দারুভণ্ডাদীনং তেসু অৰঞ্ঞং অকত্ৰা অত্তনা দুন্নিক্খিত্তানং ৰিয পটিসামনং পরম্মুখা মেত্তং কাযকম্মং নাম. ‘‘দেৰত্থেরো তিস্সত্থেরো’’তি ৰুত্তং এৰং পগ্গয্হৰচনং সম্মুখা মেত্তং ৰচীকম্মং নাম, ৰিহারে অসন্তং পন পটিপুচ্ছন্তস্স ‘‘কুহিং অম্হাকং দেৰত্থেরো, কুহিং অম্হাকং তিস্সত্থেরো, কদা নু খো আগমিস্সতী’’তি এৰং পিযৰচনং পরম্মুখা মেত্তং ৰচীকম্মং নাম. মেত্তাসিনেহসিনিদ্ধানি পন নযনানি উম্মীলেত্ৰা পসন্নেন মুখেন ওলোকনং সম্মুখা মেত্তং মনোকম্মং নাম, ‘‘দেৰত্থেরো তিস্সত্থেরো অরোগো হোতু অব্যাপজ্জো’’তি সমন্নাহরণং পরম্মুখা মেত্তং মনোকম্মং নাম. কামঞ্চেত্থ মেত্তাসিনেহসিনিদ্ধানং নযনানং উম্মীলনং, পসন্নেন মুখেন ওলোকনঞ্চ মেত্তং কাযকম্মমেৰ. যস্স পন চিত্তস্স ৰসেন নযনানং মেত্তাসিনেহসিনিদ্ধতা, মুখস্স চ পসন্নতা, তং সন্ধায ৰুত্তং ‘‘মেত্তং মনোকম্মং নামা’’তি. সমাধিসংৰত্তনপ্পযোজনানি সমাধিসংৰত্তনিকানি.

সমানসীলতং গতোতি তেসু তেসু দিসাভাগেসু ৰিহরন্তেহি ভিক্খূহি সদ্ধিং সমানসীলতং গতো. যাযন্তি যা অযং ময্হঞ্চেৰ তুম্হাকঞ্চ পচ্চক্খভূতা. দিট্ঠীতি সম্মাদিট্ঠি. অরিযাতি নিদ্দোসা. নিয্যাতীতি ৰট্টদুক্খতো নিস্সরতি নিগ্গচ্ছতি. সযং নিয্যন্তীযেৰ হি তংসমঙ্গিপুগ্গলং ৰট্টদুক্খতো নিয্যাপেতীতি ৰুচ্চতি. যা সত্থু অনুসিট্ঠি, তং করোতীতি তক্করো, তস্স, যথানুসিট্ঠং পটিপজ্জকস্সাতি অত্থো. দুক্খক্খযাযাতি সব্বদুক্খক্খযত্থং. দিট্ঠিসামঞ্ঞগতোতি সমানদিট্ঠিভাৰং উপগতো.

ফাসুৰিহারসুত্তৰণ্ণনা নিট্ঠিতা.