২. ৰিত্থারসুত্তৰণ্ণনা

২৩৩. দুতিযে সব্যাবজ্ঝন্তি ৰা সদুক্খং, অত্তনা উপ্পাদেতব্বেন দুক্খেন সদুক্খন্তি অত্থো, দুক্খসংৰত্তনিকন্তি ৰুত্তং হোতি. কাযসঙ্খারাদীসু কাযদ্ৰারে গহণাদিৰসেন চোপনপ্পত্তা দ্ৰাদস অকুসলচেতনা অব্যাবজ্ঝকাযসঙ্খারো নাম. ৰচীদ্ৰারে হনুসংচোপনৰসেন ৰচীভেদপ্পৰত্তিকা তাযেৰ দ্ৰাদস ৰচীসঙ্খারো নাম. উভযচোপনং অপ্পত্ৰা রহো চিন্তেন্তস্স মনোদ্ৰারে পৰত্তা মনোসঙ্খারো নাম. ইতি তীসুপি দ্ৰারেসু কাযদুচ্চরিতাদিভেদা অকুসলা চেতনাৰ সঙ্খারাতি ৰেদিতব্বা. অভিসঙ্খরোতীতি আযূহতি, তং পন আযূহনং পচ্চযসমৰাযসিদ্ধিতো সঙ্কড্ঢিত্ৰা পিণ্ডনং ৰিয হোতি. সদুক্খং লোকন্তি অপাযলোকমাহ. ৰিপাকফস্সাতি ফস্সসীসেন তত্থ ৰিপাকপ্পৰত্তমাহ. ৰেমানিকপেতাতি ইদং বাহুল্লতো ৰুত্তং, ইতরেসম্পি ৰিনিপাতিকানং কালেন সুখং, কালেন দুক্খং হোতি. তস্স পহানাযাতি তস্স যথাৰুত্তস্স কম্মস্স অনুপ্পত্তিধম্মতাপাদনায. যা চেতনাতি যা অপচযগামিনিচেতনা. তেনেৰাহ ‘‘ৰিৰট্টগামিনী মগ্গচেতনা ৰেদিতব্বা’’তি.

ৰিত্থারসুত্তৰণ্ণনা নিট্ঠিতা.