(২১) ১. সপ্পুরিসৰগ্গো

১-১০. সিক্খাপদসুত্তাদিৰণ্ণনা

২০১-২১০. পঞ্চমস্স পঠমে অসপ্পুরিসোতি লামকপুরিসো. পাণং অতিপাতেতীতি পাণাতিপাতী. অদিন্নং আদিযতীতি অদিন্নাদাযী. কামেসু মিচ্ছা চরতীতি কামেসুমিচ্ছাচারী. মুসা ৰদতীতি মুসাৰাদী. সুরামেরযমজ্জপমাদে তিট্ঠতীতি সুরামেরযমজ্জপমাদট্ঠাযী. পাণাতিপাতে সমাদপেতীতি যথা পাণং অতিপাতেতি, তথা নং তত্থ গহণং গণ্হাপেতি. সেসেসুপি এসেৰ নযো. অযং ৰুচ্চতীতি অযং এৰরূপো পুগ্গলো যস্মা সযংকতেন চ দুস্সীল্যেন সমন্নাগতো, যঞ্চ সমাদপিতেন কতং, ততো উপড্ঢস্স দাযাদো, তস্মা ‘‘অসপ্পুরিসেন অসপ্পুরিসতরো’’তি ৰুচ্চতি. সপ্পুরিসোতি উত্তমপুরিসো. সপ্পুরিসেন সপ্পুরিসতরোতি অত্তনা চ কতেন সুসীল্যেন সমন্নাগতত্তা যঞ্চ সমাদপিতো করোতি, ততো উপড্ঢস্স দাযাদত্তা উত্তমপুরিসেন উত্তমপুরিসতরো. এত্থ চ পরেন কতং দুস্সীল্যং সুসীল্যং ৰা আণত্তিযা অত্তনা চ ৰচিপ্পযোগেন কতন্তি আণাপনৰসেন পসুতপাপস্স পুঞ্ঞস্স ৰা দাযাদো ‘‘ততো উপড্ঢস্স দাযাদো’’তি ৰুত্তো. দুতিযাদীনি উত্তানত্থানেৰ.

সিক্খাপদসুত্তাদিৰণ্ণনা নিট্ঠিতা.

সপ্পুরিসৰগ্গৰণ্ণনা নিট্ঠিতা.

২১১-২২০. দুতিযো পরিসাৰগ্গো উত্তানত্থোযেৰ.