৯. অন্ধসুত্তৰণ্ণনা

২৯. নৰমে অন্ধোতিআদীসু পাল়িপদেসু পঠমো দিট্ঠধম্মিকভোগসংহরণপঞ্ঞাচক্খুনো চ সম্পরাযিকত্থসাধনপঞ্ঞাচক্খুনো চ অভাৰা ‘‘অন্ধো’’তি ৰুচ্চতি দুতিযোপি, ততিযো পন দ্ৰিন্নম্পি ভাৰা ‘‘দ্ৰিচক্খূ’’তি ৰুচ্চতি. পঞ্ঞাচক্খূতি আযকোসল্লভূতা পঞ্ঞাচক্খু. তেনাহ ‘‘ফাতিং করেয্যা’’তি. অধমুত্তমেতি অধমে চেৰ উত্তমে চ. পটিপক্খৰসেনাতি পটিপক্খস্স অত্থিতাৰসেন. সুক্কসপ্পটিভাগাতি সুক্কধম্মেহি পহাযকেহি সপ্পটিভাগাতি জানেয্য. কণ্হসপ্পটিভাগাতি কণ্হধম্মেহি পহাতব্বেহি সপ্পটিভাগাতি জানেয্য.

তথাজাতিকাতি যাদিসেহি সপুত্তদারপরিজনসঞাতিমিত্তবন্ধৰগ্গং অত্তানং সুখেতি পীণেতি, তাদিসা ভোগাপি ন সন্তি. পুঞ্ঞানি চ ন করোতীতি সমণব্রাহ্মণকপণদ্ধিকযাচকানং সন্তপ্পনৰসেন পুঞ্ঞানি ন করোতি. উভযত্থাতি উভযস্মিং লোকে, উভযস্মিং ৰা অত্থেতি ৰিগ্গহোতি দস্সেন্তো ‘‘ইধলোকে’’তিআদিমাহ. উভযেনাতি ৰুত্তমত্থং যোজেত্ৰা দস্সেতুং ‘‘কথ’’ন্তিআদি ৰুত্তং. যস্মিং ঠানেতি যস্মিংযেৰ ঠানে. ন সোচতীতি সোকহেতূনং তত্থ অভাৰতো ন সোচতি.

অন্ধসুত্তৰণ্ণনা নিট্ঠিতা.