১. কোধপেয্যালং

১৮১. ইতো পরেসু কোধৰগ্গাদীসু উপনন্ধনলক্খণোতি কুজ্ঝনৰসেন ‘‘অক্কোচ্ছি মং অৰধি ম’’ন্তিআদিনা (ধ. প. ৩, ৪) চিত্তপরিযোনন্ধনলক্খণো. পুব্বকালিকং কোধং উপনয্হতি বন্ধতি, কুজ্ঝনাকারং পবন্ধতি ঘটেতি. আঘাতৰত্থুনা চিত্তং বন্ধন্তী ৰিয হোতীতি অপরকালো কোধো উপনাহো. সুট্ঠু কতং কারণং উপকারো সুকতকারণং, তস্স পুব্বকারিতালক্খণস্স গুণস্স মক্খনং উদকপুঞ্ছনিযা ৰিয সরীরানুগতস্স উদকস্স পুঞ্ছনং ৰিনাসনং লক্খণমেতস্সাতি সুকতকরণমক্খনলক্খণো. তথা হি সো পরেসং গুণানং মক্খনট্ঠেন মক্খোতি ৰুচ্চতি. বহুস্সুতেপি পুগ্গলে অজ্ঝোত্থরিংসু, ‘‘ঈদিসস্স চ বহুস্সুতস্স অনিযতা গহিতা, তৰ চ মম চ কো ৰিসেসো’’তিআদিনা নযেন উপ্পজ্জমানো যুগগ্গাহী পলাসোতি আহ ‘‘যুগগ্গাহলক্খণো পলাসো’’তি. তত্থ যুগগ্গাহো নাম সমধুরগ্গাহো, অসমম্পি অত্তনা সমং কত্ৰা গণ্হনং. পলাসতীতি পলাসো, পরেসং গুণে ডংসিত্ৰা দন্তেহি ৰিয ছিন্দিত্ৰা অত্তনো গুণেহি সমে করোতীতি অত্থো.

উসূযনলক্খণাতি পরেসং সক্কারাদীনি খিয্যনলক্খণা. মচ্ছেরস্স ভাৰো মচ্ছরিযং. তঞ্চ আৰাসমচ্ছরিযাদিৰসেন পঞ্চৰিধন্তি আহ ‘‘পঞ্চমচ্ছেরভাৰো মচ্ছরিয’’ন্তি. মচ্ছরাযনলক্খণন্তি অত্তনো সম্পত্তিযা পরেহি সাধারণভাৰে অসহনলক্খণং. কতপ্পটিচ্ছাদনলক্খণাতি কতপাপপ্পটিচ্ছাদনলক্খণা. কেরাটিকভাৰেন উপ্পজ্জমানং সাঠেয্যন্তি আহ ‘‘কেরাটিকলক্খণং সাঠেয্য’’ন্তি. অঞ্ঞথা অত্তনো পৰেদনপুগ্গলো কেরাটিকো নেকতিকৰাণিজোতি ৰদন্তি. কেরাটিকো হি পুগ্গলো আনন্দমচ্ছো ৰিয হোতি.

১৮৭. যথাভতং নিক্খিত্তো এৰং নিরযেতি যথা আভতং কঞ্চি আহরিত্ৰা ঠপিতো, এৰং অত্তনো কম্মুনা নিক্খিত্তো নিরযে ঠপিতোযেৰাতি অত্থো.