৫-৬. অপ্পমাদসুত্তাদিৰণ্ণনা

১৫-১৬. পঞ্চমে কারাপকঅপ্পমাদো নাম ‘‘ইমে অকুসলা ধম্মা পহাতব্বা, ইমে কুসলা ধম্মা উপসম্পাদেতব্বা’’তি তংতংপরিৰজ্জেতব্বৰজ্জনসম্পাদেতব্বসম্পাদনৰসেন পৰত্তো অপ্পমাদো. এসাতি অপ্পমাদো. লোকিযোৰ ন লোকুত্তরো. অযঞ্চাতি চ এসাতি চ অপ্পমাদমেৰ ৰদতি. তেসন্তি চাতুভূমকধম্মানং. পটিলাভকত্তেনাতি পটিলাভাপনকত্তেন.

জঙ্গলানন্তি জঙ্গলচারীনং. জঙ্গল-সদ্দো চেত্থ খরভাৰসামঞ্ঞেন পথৰীপরিযাযো, ন অনুপট্ঠানৰিদূরদেসৰাচী. তেনাহ ‘‘পথৰীতলচারীন’’ন্তি. পদানং ৰুচ্চমানত্তা ‘‘সপাদকপাণান’’ন্তি ৰিসেসেত্ৰা ৰুত্তং. সমোধানন্তি অন্তোগধভাৰং. তেনাহ ‘‘ওধানং পক্খেপ’’ন্তি. ‘‘উপক্খেপ’’ন্তিপি পঠন্তি, উপনেত্ৰা পক্খিপিতব্বন্তি অত্থো. ৰস্সিকায পুপ্ফং ৰস্সিকং যথা ‘‘আমলকিযা ফলং আমলক’’ন্তি. মহাতলস্মিন্তি উপরিপাসাদে. ছট্ঠং উত্তানমেৰ.

অপ্পমাদসুত্তাদিৰণ্ণনা নিট্ঠিতা.