৪. ৰীথিপরিকম্মকথা

১২৬. পঠমাৰজ্জনং পঞ্চ-দসন্নং পরতো ভৰে;

দুতিযাৰজ্জনং হোতি, একৰীসতিতো পরং.

১২৭. একম্হা পঞ্চৰিঞ্ঞাণং, পঞ্চম্হা সম্পটিচ্ছনং;

সুখসন্তীরণং হোতি, পঞ্চৰীসতিতো পরং.

১২৮. সত্ততিংসতিতো হোতি, উপেক্খাতীরণদ্ৰযং;

ৰোট্ঠব্বনসরূপানং, দ্ৰিন্নং কামজৰা পরং.

১২৯. মগ্গাভিঞ্ঞা পরং দ্ৰিন্নং, তিণ্ণন্নং লোকিযপ্পনা;

ফলা চতুন্নং পঞ্চন্নং, উপরিট্ঠফলদ্ৰযং.

১৩০. ভৰন্তি চত্তালীসম্হা, সুখপাকা দ্ৰিহেতুকা;

তথেকচত্তালীসম্হা, উপেক্খায সমাযুতা.

১৩১. হোন্তি সত্ততিতো কামে, সুখপাকা তিহেতুকা;

দ্ৰাসত্ততিম্হা জাযন্তি, উপেক্খাসহিতা পন.

১৩২. একূনসট্ঠিতো রূপ-পাকা পাকা অরূপিনো;

কমাট্ঠচত্তালীসম্হা, তথেকদ্ৰিতিহীনতো.

১৩৩. পুব্বসঙ্গহমিচ্চেৰং, ৰিগণেত্ৰা ৰিচক্খণো;

পরসঙ্গহসঙ্খ্যাদিং, ৰিভাৰেয্য ৰিসারদো.

১৩৪. পঞ্চদ্ৰারাৰজ্জনতো, দস চিত্তানি দীপযে;

সেসাৰজ্জনতো পঞ্চচত্তালীসন্তি ভাসিতং.

১৩৫. পঞ্চৰিঞ্ঞাণতো পাপৰিপাকা সম্পটিচ্ছনা;

পরমেকং দ্ৰযং পুঞ্ঞৰিপাকা সম্পটিচ্ছনা.

১৩৬. সন্তীরণা দ্ৰিহেতুম্হা, পাকা দ্ৰাদস জাযরে;

তিহেতুকামপাকম্হা, একৰীসতি লব্ভরে.

১৩৭. রূপাৰচরপাকম্হা, পরমেকূনৰীসতি;

নৰট্ঠারূপপাকম্হা, সত্ত ছাপি যথাক্কমং.

১৩৮. পটিঘম্হা তু সত্তেৰ, সিতম্হা তেরসেরিতা;

পাপপুঞ্ঞদ্ৰিহেতুম্হা, একৰীসতি ভাৰযে.

১৩৯. দ্ৰিহেতুকামক্রিযতো, অট্ঠারস উপেক্খকা;

সত্তরস সুখোপেতা, ৰিভাৰেয্য ৰিচক্খণো.

১৪০. কামপুঞ্ঞতিহেতুম্হা, তেত্তিংসেৰ উপেক্খকা;

তেপঞ্ঞাস সুখোপেতা, ভৰন্তীতি পকাসিতং.

১৪১. তিহেতুকামক্রিযতো, চতুৰীসতিপেক্খকা;

সুখিতম্হা তু দীপেয্য, পঞ্চৰীসতি পণ্ডিতো.

১৪২. দসরূপজৰম্হেকা-দসদ্ৰাদস তেরস;

যথাক্কমং পঞ্চদস, আরুপ্পা পরিদীপযে.

১৪৩. ফলম্হা চুদ্দসেৰাহু, মগ্গম্হা তু সকং ফলং;

পরং সঙ্গহমিচ্চেৰং, ৰিগণেয্য ৰিসারদো.

১৪৪. পুব্বাপরসমোধান-মিতি ঞত্ৰা ততো পরং;

ৰত্থুৰীথিসমোধানং, যথাসম্ভৰমুদ্দিসে.

১৪৫. পঞ্চ ৰত্থূনি নিস্সায, কমতো পঞ্চমানসা;

তেত্তিংস পন নিস্সায, হদযং মানসা সিযুং.

১৪৬. কামপাকমনোধাতু-হসিতুপ্পাদমানসা;

দোসমূলানি মগ্গো চ, রূপজ্ঝানাৰ সব্বথা.

১৪৭. দসাৰসেসাপুঞ্ঞানি, কামপুঞ্ঞমহাক্রিযা;

ৰোট্ঠব্বারূপজৰনং, সত্ত লোকুত্তরানি চ.

১৪৮. দ্ৰেচত্তালীস চিত্তানি, পঞ্চৰোকারভূমিযং;

নিস্সায হদযং হোন্তি, অরূপে নিস্সযং ৰিনা.

১৪৯. আরুপ্পপাকা চত্তারো, অনিস্সাযেতি সব্বথা;

ৰিত্থারেনট্ঠধা ভিন্নং, সঙ্খেপা তিৰিধং ভৰে.

১৫০. তেচত্তালীস নিস্সায, অনিস্সায চতুব্বিধং;

নিস্সিতানিস্সিতা সেসা, দ্ৰেচত্তালীস মানসা.

১৫১. পঞ্চ চিত্তপ্পনা হোন্তি, কমেনেকেকৰীথিযং;

মনোধাতুত্তিকং নাম, পঞ্চদ্ৰারিকমীরিতং.

১৫২. সুখতীরণৰোট্ঠব্ব-পরিত্তজৰনা পন;

একতিংসাপি জাযন্তে, ছসু ৰীথীসু সম্ভৰা.

১৫৩. মহাপাকা পনট্ঠাপি, উপেক্খাতীরণদ্ৰযং;

ছসু দ্ৰারেসু জাযন্তি, দস মুত্তা চ ৰীথিযা.

১৫৪. চুতিসন্ধিভৰঙ্গানং, ৰসা পাকা মহগ্গতা;

নৰ ৰীথিৰিমুত্তাতি, দসধা ৰীথিসঙ্গহো.

১৫৫. একদ্ৰারিকচিত্তানি, পঞ্চছদ্ৰারিকা তথা;

ছদ্ৰারিকৰিমুত্তা চ, ৰিমুত্তাতি চ সব্বথা.

১৫৬. ছত্তিংস তযেকতিংস, দস চেৰ নৰেতি চ;

ঞত্ৰা ৰীথিসমোধানং, গোচরঞ্চ সমুদ্দিসে.

১৫৭. কমতো পঞ্চৰিঞ্ঞাণা, লোকুত্তরমহগ্গতা;

অভিঞ্ঞাৰজ্জিতা সব্বা, পঞ্চতালীস মানসা.

১৫৮. যথাসম্ভৰতো হোন্তি, রূপাদেকেকগোচরা;

পঞ্চগোচরমীরেন্তি, মনোধাতুত্তিকং পন.

১৫৯. সন্তীরণমহাপাকা, পরিত্তজৰনানি চ;

ৰোট্ঠব্বনমভিঞ্ঞা চ, তেচত্তালীস সম্ভৰা.

১৬০. ছারম্মণেসু হোন্তীতি, অট্ঠধা তিৰিধা পুন;

একারম্মণচিত্তানি, পঞ্চছারম্মণানি চ.

১৬১. সঙ্খেপা মানসা পঞ্চ-চত্তালীস তযো তথা;

তেচত্তালীস চেৰেতি, সত্তধাপি সিযুং কথং.

১৬২. কামপাকমনোধাতু-হসিতুপ্পাদমানসা;

পঞ্চৰীস যথাযোগং, পরিত্তারম্মণা মতা.

১৬৩. কসিণুগ্ঘাটিমাকাসং, পঠমারুপ্পমানসং;

তস্সেৰ নত্থিভাৰং তু, ততিযারুপ্পকং তথা.

১৬৪. আলম্বিত্ৰা পৰত্তন্তি, আরুপ্পা কমতো ততো;

দুতিযঞ্চ চতুত্থঞ্চ, ছ মহগ্গতগোচরা.

১৬৫. অপ্পমাণসমঞ্ঞা তে, নিব্বানে পন গোচরে;

অট্ঠ লোকুত্তরা ধম্মা, নিযমেন ৰৰত্থিতা.

১৬৬. কসিণাসুভকোট্ঠাসে,

আনাপানে চ যোগিনো;

পটিভাগনিমিত্তম্হি,

অপ্পমঞ্ঞানুযুঞ্জতো.

১৬৭. সত্তপণ্ণত্তিযঞ্চেৰ, রূপজ্ঝানং পৰত্ততি;

যথাৰুত্তনিমিত্তম্হি, সেসমারুপ্পকন্তি চ.

১৬৮. অভিঞ্ঞাৰজ্জিতা একৰীস মহগ্গতা সব্বা;

সব্বে পণ্ণত্তিসঙ্খাতে, নৰত্তব্বে পৰত্তরে.

১৬৯. জাযন্তাকুসলা ঞাণৰিপ্পযুত্তজৰা তথা;

অপ্পমাণং ৰিনা ৰীস, পরিত্তাদীসু তীসুপি.

১৭০. তিহেতুকামপুঞ্ঞানি, পুঞ্ঞাভিঞ্ঞা চ পঞ্চিমে;

চতূসুপি পৰত্তন্তি, অরহত্তদ্ৰযং ৰিনা.

১৭১. ক্রিযাভিঞ্ঞা চ ৰোট্ঠব্বং, ক্রিযাকামে তিহেতুকা;

ছ সব্বত্থাপি হোন্তীতি, সত্তধা মানসা ঠিতা.

১৭২. একতিচ্চতুকোট্ঠাসগোচরা তিৰিধা পন;

সমসট্ঠি তথা ৰীস, কমেনেকাদসেতি চ.

১৭৩. পঞ্চদ্ৰারেসু পঞ্চাপি, পচ্চুপ্পন্নাৰ গোচরা;

তেকালিকা নৰত্তব্বা, মনোদ্ৰারে যথারহং.

১৭৪. অজ্ঝত্তা চ বহিদ্ধা চ, পঞ্চদ্ৰারেসু গোচরা;

মনোদ্ৰারে নৰত্তব্বো, নত্থিভাৰোপি লব্ভতি.

১৭৫. পঞ্চদ্ৰারেসু পঞ্চন্ন-মেকমেকো চ গোচরো;

ছাপি আরম্মণা হোন্তি, মনোদ্ৰারম্হি সব্বথা.

১৭৬. পঞ্চদ্ৰারেসু গহিতং, তদঞ্ঞম্পি চ গোচরং;

মনোদ্ৰারে ৰৰত্থানং, গচ্ছতীতি হি দেসিতং.

১৭৭. অতীতা ৰত্তমানা চ, সম্ভৰা কামসন্ধিযা;

ছদ্ৰারগহিতা হোন্তি, তিৰিধা তেপি গোচরা.

১৭৮. কম্মনিমিত্তমেৰেকং, মনোদ্ৰারে উপট্ঠিতং;

নৰত্তব্বমতীতঞ্চ, ধম্মারম্মণসঙ্গহং.

১৭৯. আলম্বিত্ৰা যথাযোগং, পটিসন্ধিমহগ্গতা;

অন্তে চুতি ভৰে মজ্ঝে, ভৰঙ্গম্পি পৰত্ততীতি.

ইতি চিত্তৰিভাগে ৰীথিপরিকম্মকথা নিট্ঠিতা.

চতুত্থো পরিচ্ছেদো.