ততিযো পরিচ্ছেদো

৩. ৰীথিসঙ্গহকথা

৮৫. চক্খুসোতঘানজিৰ্হা-কাযাযতন পঞ্চধা;

পসাদা হদযঞ্চেতি, ছ ৰত্থূনি ৰিনিদ্দিসে.

৮৬. চক্খুসোতঘানজিৰ্হা-কাযদ্ৰারা চ পঞ্চধা;

মনোদ্ৰারং ভৰঙ্গন্তি, ছ দ্ৰারা চিত্তৰীথিযা.

৮৭. রূপসদ্দগন্ধরস-ফোট্ঠব্বা পঞ্চ গোচরা;

ধম্মারম্মণপঞ্ঞত্তি, ছ দ্ৰারারম্মণক্কমা.

৮৮. নিমিত্তগতিকম্মানি, কম্মমেৰাথ গোচরা;

পটিসন্ধিভৰঙ্গানং, চুতিযা চ যথারহং.

৮৯. মরণাসন্নসত্তস্স, যথোপট্ঠিতগোচরং;

ছদ্ৰারেসু তমারব্ভ, পটিসন্ধি ভৰন্তরে.

৯০. একচিত্তক্খণা হোতি, যাৰজীৰং ততো পরং;

ভৰঙ্গং পরিযোসানে, চুতি চেকক্খণা ভৰে.

৯১. দুহেতাহেতুচুতিযা, কামাৰচরসন্ধিযো;

তিহেতুকামচুতিযা, সব্বাপি পটিসন্ধিযো.

৯২. রূপাৰচরচুতিযা, সহেতুপটিসন্ধিযো;

আরুপ্পতোপরি কামে, তত্থ ৰাপি তিহেতুকা.

৯৩. পটিসন্ধি ভৰঙ্গঞ্চ, একমেৰেকজাতিযং;

চুতি চারম্মণঞ্চস্স, এৰমেৰ যথারহং.

৯৪. রূপাদারম্মণে চক্খু-প্পসাদাদিম্হি ঘট্টিতে;

মজ্ঝে ভৰঙ্গং ছিন্দিত্ৰা, ৰীথি নাম পৰত্ততি.

৯৫. আৰজ্জপঞ্চৰিঞ্ঞাণসম্পটিচ্ছনতীরণা;

ৰোট্ঠব্বকামজৰনতদারম্মণনামকা.

৯৬. সত্তেৰ ঠানসঙ্খেপা, পঞ্চদ্ৰারিকমানসা;

চতুপঞ্ঞাস সব্বেপি, ৰিত্থারেন সরূপতো.

৯৭. আৰজ্জসব্বজৰনতদারম্মণনামকা;

সত্তসট্ঠি সরূপেন, মনোদ্ৰারিকমানসা.

৯৮. ইট্ঠে আরম্মণে হোন্তি, পুঞ্ঞপাকানি সব্বথা;

অনিট্ঠে পাপপাকানি, নিযমোযং পকাসিতো.

৯৯. তত্থাপি অতিইট্ঠম্হি, তদারম্মণতীরণং;

সোমনস্সযুতং ইট্ঠমজ্ঝত্তম্হি উপেক্খিতং.

১০০. গোচরেতিপরিত্তম্হি, অতিঅপ্পাযুকে পন;

ভৰঙ্গমেৰ চলতি, মোঘৰারোতি সো কতো.

১০১. ৰোট্ঠব্বনং পরিত্তম্হি, দ্ৰত্তিক্খত্তুং পৰত্ততি;

ততো ভৰঙ্গপাতোৰ, সোপি মোঘোতি ৰুচ্চতি.

১০২. জৰনঞ্চ মহন্তম্হি, জৰিত্ৰান ততো পরং;

ন সম্ভোতি তদালম্বং, সোপি মোঘোতি ৰুচ্চতি.

১০৩. গোচরেতিমহন্তম্হি, অতিদীঘাযুকে পন;

সম্ভোতি চ তদালম্বং, সম্পুণ্ণোতি পৰুচ্চতি.

১০৪. গোচরেতিমহন্তম্হি, তদারম্মণসম্ভৰো;

পঞ্চদ্ৰারে মনোদ্ৰারে, ৰিভূতে পন গোচরে.

১০৫. কামাৰচরসত্তানং, কামাৰচরগোচরে;

পরিত্তজৰনেস্ৰেৰ, তদারম্মণমুদ্দিসে.

১০৬. নাতিতিক্খে নাতিসীঘে, নাতিতেজুস্সদে জৰে;

সমমন্দপ্পৰত্তম্হি, তদারম্মণমিচ্ছিতং.

১০৭. সুখোপেতং তদালম্বং, উপেক্খাক্রিযতো পরং;

ন হোতুপেক্খাসহিতং, সুখিতক্রিযতো তথা.

১০৮. ন হোতি দোমনস্সম্হা, সোমনস্সিকমানসং;

তদারম্মণমঞ্ঞঞ্চ, ভৰঙ্গং চুতি ৰা তথা.

১০৯. রজ্জনাদিৰসেনেত্থ, জৰনাকুসলং ভৰে;

কুসলং পন সম্ভোতি, সদ্ধাপঞ্ঞাদিসম্ভৰে.

১১০. তদেৰ ৰীতরাগানং, ক্রিযা নাম পৰুচ্চতি;

অৰিপাকতমাপন্নং, ৰট্টমূলপরিক্খযা.

১১১. অপ্পনাজৰনং সেসং, মহগ্গতমনুত্তরং;

ছব্বীসতি যথাযোগং, অপ্পনাৰীথিযং ভৰে.

১১২. পরিকম্মং করোন্তস্স, কসিণাদিকগোচরে;

সুসমাহিতচিত্তস্স, উপচারসমাধিনা.

১১৩. পরিকম্মোপচারানুলোমগোত্রভুতো পরং;

পঞ্চমং ৰা চতুত্থং ৰা, জৰনং হোতি অপ্পনা.

১১৪. পুথুজ্জনান সেক্খানং, কামপুঞ্ঞতিহেতুতো;

তিহেতুকামক্রিযতো, ৰীতরাগানমপ্পনা.

১১৫. তত্রাপি সুখিতজৰং, সুখিতদ্ৰযতো পরং;

উপেক্খিতম্হা সম্ভোতি, উপেক্খেকগ্গতাযুতং.

১১৬. পঞ্চ ৰারে ছ ৰা সত্ত, পরিত্তজৰনং ভৰে;

সকিং দ্ৰে ৰা তদালম্বং, সকিমাৰজ্জনাদযো.

১১৭. অপ্পনাজৰনঞ্চেকং, পঠমুপ্পত্তিযং পন;

ততো পরং ৰসীভূতং, অহোরত্তং পৰত্ততি.

১১৮. সকিং দ্ৰে ৰা নিরোধস্স, সমাপত্তিক্খণে পন;

চতুত্থারুপ্পজৰনং, ততো চিত্তং নিরুজ্ঝতি.

১১৯. নিরোধা ৰুট্ঠহন্তস্স, উপরিট্ঠফলদ্ৰযং;

পঞ্চাভিঞ্ঞা তথা মগ্গা, একচিত্তক্খণা মতা.

১২০. ফলমেকদ্ৰযং তথা, তিস্সো ৰা মগ্গৰীথিযং;

সমাপত্তিক্খণে তম্পি, অহোরত্তং পৰত্ততি.

১২১. পঞ্চদ্ৰারে ন লব্ভন্তি, লোকুত্তরমহগ্গতা;

ৰীথিমুত্তমনোধাতু, পঞ্চ চিত্তানি অন্তিমে.

১২২. পরিত্তানেৰ সব্বানি, পঞ্চদ্ৰারেসু সম্ভৰা;

মনোদ্ৰারম্হি ৰোট্ঠব্ব-তদালম্বজৰা সিযুং.

১২৩. ঘানজিৰ্হাকাযৰীথি, তদারম্মণমেৰ চ;

রূপে নত্থি তথারূপে, চক্খুসোতাপি ৰীথিযো.

১২৪. সব্বাপি ৰীথিযো কামে,

রূপে তিস্সো পকাসিতা;

একা ৰীথি পনারূপে,

নত্থাসঞ্ঞীসু কাচিপি.

১২৫. সত্তাপি ৰীথিচিত্তানি, কামে রূপে ছ সম্ভৰা;

অরূপে দ্ৰে মনোদ্ৰারা-ৰজ্জনং জৰনন্তি চাতি.

ইতি চিত্তৰিভাগে ৰীথিসঙ্গহকথা নিট্ঠিতা.

ততিযো পরিচ্ছেদো.