১. সরূপসঙ্গহকথা

২. চিত্তং চেতসিকং রূপং, নিব্বানন্তি নিরুত্তরো;

চতুধা দেসযী ধম্মে, চতুসচ্চপ্পকাসনো.

৩. চিত্তমেকূননৰুতিৰিধং তত্থ ৰিভাৰযে;

একনৰুতিৰিধং ৰা, একৰীসসতম্পি ৰা.

৪. দ্ৰেপঞ্ঞাস সরূপেন, ধম্মা চেতসিকা মতা;

চিত্তুপ্পাদৰসা ভিন্না, সম্পযোগানুসারতো.

৫. অট্ঠৰীসৰিধং রূপং, ভূতোপাদাযভেদতো;

দুৰিধং রূপরূপং তু, অট্ঠারসৰিধং ভৰে.

৬. নিব্বানং পন দীপেন্তি, অসঙ্খতমনুত্তরং;

অত্থনামৰসা দ্ৰেধা, পঞ্ঞত্তীতি পৰুচ্চতি.

৭. তেসং দানি পৰক্খামি, ৰিভাগং তু যথাক্কমং;

চতুধা পরমত্থানং, দ্ৰিধা পঞ্ঞত্তিযা কথং.

৮. কুসলাদিৰিভাগেন, তত্থ চিত্তং চতুব্বিধং;

তথা ভূমিৰিভাগেন, কামভূমাদিতো কথং.

৯. সোমনস্সসহগতং, উপেক্খাসহিতং তথা;

ঞাণেন সম্পযুত্তঞ্চ, ৰিপ্পযুত্তন্তি ভেদিতং.

১০. অসঙ্খারং সসঙ্খারমিতি ভিন্নং পুনট্ঠধা;

কামাৰচরকুসলং, কামে সুগতিসাধকং.

১১. তক্কচারপীতিসুখ-চিত্তস্সেকগ্গতাযুতং;

পঠমজ্ঝানকুসলং, পঞ্চঙ্গিকমুদাহটং.

১২. ৰিতক্কহীনং দুতিযং, ঝানং তু চতুরঙ্গিকং;

ৰিচারহীনং ততিযং, ঝানং পন তিৰঙ্গিকং.

১৩. পীতিহীনং চতুত্থঞ্চ, উপেক্খেকগ্গতাযুতং;

পঞ্চমঞ্চ পকাসেন্তি, উভযম্পি দুৰঙ্গিকং.

১৪. এৰং ঝানঙ্গভেদেন, চিত্তং পঞ্চৰিধং ভৰে;

রূপাৰচরকুসলং, রূপভূমিপৰত্তকং.

১৫. আকাসানঞ্চাযতনং, কুসলং পঠমং ভৰে;

ৰিঞ্ঞাণঞ্চাযতনন্তি, দুতিযং ততিযং তথা.

১৬. আকিঞ্চঞ্ঞাযতনং তু, চতুত্থং পন মানসং;

নেৰসঞ্ঞানাসঞ্ঞায-তনঞ্চেতি চতুব্বিধং.

১৭. আরুপ্পকুসলং নাম, উপেক্খেকগ্গতাযুতং;

দুৰঙ্গিকমিদং সব্বং, আরুপ্পভৰসাধকং.

১৮. সোতাপত্তিমগ্গচিত্তং, পঠমানুত্তরং তথা;

সকদাগামি অনাগামি, অরহত্তন্তি সব্বথা.

১৯. চতুধা মগ্গভেদেন, ঝানভেদেন পঞ্চধা;

ৰীসতাপরিযাপন্নকুসলং দ্ৰযমিস্সিতং.

২০. ইত্থং ভূমিৰিভাগেন, কুসলং তু চতুব্বিধং;

একৰীসাপি বাৰীসং, সত্ততিংসৰিধম্পি ৰা.

২১. সোমনস্সসহগতং, উপেক্খাসহিতং তথা;

দিট্ঠিগতসম্পযুত্তং, ৰিপ্পযুত্তন্তি ভেদিতং.

২২. অসঙ্খারং সসঙ্খারমিতি ভিন্নং পুনট্ঠধা;

লোভমূলং পকাসেন্তি, লোভমোহদ্ৰিহেতুকং.

২৩. দোমনস্সসহগতং, পটিঘেন সমাযুতং;

অসঙ্খারং সসঙ্খারমিতি ভিন্নং দ্ৰিধা পন.

২৪. দোসমূলং পকাসেন্তি, দোসমোহদ্ৰিহেতুকং;

ৰিচিকিচ্ছাসহগতং, উদ্ধচ্চসহিতন্তি চ.

২৫. উপেক্খাৰেদনাযুত্তং, মোমূহং দুৰিধং পন;

মোহমূলং পকাসেন্তি, মোহেনেৰেকহেতুকং.

২৬. দ্ৰাদসাকুসলা নাম, চতুরাপাযসাধকা;

এতে সুগতিযঞ্চাপি, ৰিপত্তিফলদাযকা.

২৭. চক্খুসোতঘানজিৰ্হা-কাযৰিঞ্ঞাণনামকা;

পঞ্চৰিঞ্ঞাণযুগল়া, যুগল়ং সম্পটিচ্ছনং.

২৮. সন্তীরণদ্ৰযঞ্চেৰ, উপেক্খাসহিতং তথা;

পুঞ্ঞাপুঞ্ঞৰসেনেৰ, ৰিপাকা দুৰিধা ঠিতা.

২৯. উপেক্খাসহিতা তত্থ, মানসা দ্ৰাদসেরিতা;

কাযৰিঞ্ঞাণযুগল়ং, সুখদুক্খযুতং কমা.

৩০. সোমনস্সসহগতং, যং সন্তীরণমানসং;

তং পুঞ্ঞপাকমেৰাহু, পাপপাকং ন ৰিজ্জতি.

৩১. পঞ্চদ্ৰারমনোদ্ৰার-ৰসেন দুৰিধং পন;

উপেক্খাৰেদনাযুত্তং, ক্রিযাৰজ্জননামকং.

৩২. সোমনস্সসহগতং, হসিতুপ্পাদমানসং;

ক্রিযাজৰনমিচ্চেৰং, তিৰিধাহেতুকক্রিযা.

৩৩. অট্ঠেৰ পুঞ্ঞপাকানি, পাপপাকানি সত্তধা;

ক্রিযচিত্তানি তীণীতি, অট্ঠারস অহেতুকা.

৩৪. সপুঞ্ঞেহি সমানা চ, মহাপাকমহাক্রিযা;

মহগ্গতক্রিযা পাকা, ফলচিত্তানি চ কমা.

৩৫. ইত্থমেকূননৰুতি-ৰিধং চিত্তং ভৰে তথা;

একনৰুতিৰিধং ৰা, একৰীসসতম্পি ৰা.

৩৬. তক্কচারপীতিসুখচিত্তস্সেকগ্গতাযুতং;

সোতাপত্তিমগ্গচিত্তং, পঠমজ্ঝানিকং মতং.

৩৭. দুতিযং তক্কতো হীনং, ততিযং তু ৰিচারতো;

চতুত্থং পীতিতো হীনং, উপেক্খেকগ্গতাযুতং.

৩৮. পঞ্চমন্তি চ পঞ্চেতে, পঠমানুত্তরা মতা;

দিট্ঠিকঙ্খাসীলব্বতপরামাসপ্পহাযিনো.

৩৯. তথেৰ সকদাগামিমগ্গচিত্তঞ্চ পঞ্চধা;

রাগদোসমোহত্তযতনুত্তকরমীরিতং.

৪০. কামদোসসমুগ্ঘাতকরং নিরৰসেসতো;

ততিযানুত্তরঞ্চাপি, কুসলং পঞ্চধা তথা.

৪১. রূপরাগারূপরাগমানুদ্ধচ্চাপি চাপরা;

অৰিজ্জা চেতি পঞ্চুদ্ধংভাগিযানমসেসতো.

৪২. সংযোজনানং সেসানং, সমুগ্ঘাতকরং পরং;

চতুত্থানুত্তরং মগ্গচিত্তং পঞ্চৰিধন্তি চ.

৪৩. চত্তারি পঞ্চকানেৰ, মগ্গেসু চ ফলেসু চ;

সেসানি চেকাসীতীতি, একৰীসসতং ভৰে.

৪৪. লোকুত্তরানং অট্ঠন্নং, ইচ্চেৰং পঞ্চধা পুন;

ঝানঙ্গমগ্গবোজ্ঝঙ্গ-ৰিভাগায যথারহং.

৪৫. পাদকজ্ঝানমামট্ঠঝানং অজ্ঝাসযো তথা;

ৰুট্ঠানগামিনী চেৰ, নিযামেতি ৰিপস্সনাতি.

ইতি চিত্তৰিভাগে সরূপসঙ্গহকথা নিট্ঠিতা.

পঠমো পরিচ্ছেদো.