৪. নিব্বানৰিভাগো

২৩. মূলৰিসুদ্ধিকথা

৮৯৫. ইত্থং চিত্তং চেতসিকং, রূপঞ্চেৰাতি সঙ্খতা;

ৰুত্তা অসঙ্খতং দানি, নিব্বানন্তি পৰুচ্চতি.

৮৯৬. সীলৰিসুদ্ধি আদিম্হি, ততো চিত্তৰিসুদ্ধি চ;

দিট্ঠিৰিসুদ্ধিনামা চ, কঙ্খাৰিতরণাপি চ.

৮৯৭. ততো পরং মগ্গামগ্গ-ঞাণদস্সননামিকা;

তথা পটিপদাঞাণ-দস্সনা ঞাণদস্সনং.

৮৯৮. ইচ্চানুক্কমতো ৰুত্তা, সত্ত হোন্তি ৰিসুদ্ধিযো;

সত্তমানুত্তরা তত্থ, পুব্বভাগা ছ লোকিযা.

৮৯৯. সংৰরো পাতিমোক্খো চ, তথেৰিন্দ্রিযসংৰরো;

আজীৰপারিসুদ্ধি চ, সীলং পচ্চযনিস্সিতং.

৯০০. ইতি সীলৰিসুদ্ধীতি, সুদ্ধমেতং পৰুচ্চতি;

চতুপারিসুদ্ধিসীলং, ধুতঙ্গপরিৰারিতং.

৯০১. কসিণানি দসাসুভা, দসানুস্সতিযো পন;

অপ্পমঞ্ঞা চ সঞ্ঞা চ, ৰৰত্থারুপ্পকাতি চ.

৯০২. সমথক্কম্মট্ঠানানি, তালীসট্ঠকথানযে;

পাল়িযং তু ৰিভত্তানি, অট্ঠতিংসাতি ৰণ্ণিতং.

৯০৩. পথৰাপো চ তেজো চ,

ৰাযো নীলঞ্চ পীতকং;

লোহিতোদাতমাকাসং,

আলোককসিণন্তি চ.

৯০৪. কসিণানি দসেতানি, ৰুত্তানট্ঠকথানযে;

অট্ঠেৰ পাল়িযং হিত্ৰা, অন্তে তু কসিণদ্ৰযং.

৯০৫. উদ্ধুমাতং ৰিনীলঞ্চ, ৰিপুব্বকং ৰিখাযিতং;

ৰিচ্ছিদ্দকঞ্চ ৰিক্খিত্তং, হতৰিক্খিত্তলোহিতং.

৯০৬. পুল়ৰকং অট্ঠিকঞ্চেতি, অসুভা দস দেসিতা;

রূপকাযৰিভাগায, দসকাযৰিপত্তিযা.

৯০৭. বুদ্ধে ধম্মে চ সঙ্ঘে চ, সীলে চাগে চ অত্তনা;

দেৰতোপসমাযঞ্চ, সত্তানুস্সতিযো কমা.

৯০৮. মরণস্সতি নামেকা, তথা কাযগতাসতি;

আনাপানস্সতিচ্চেৰং, দসানুস্সতিযো মতা.

৯০৯. মেত্তা করুণা মুদিতা, উপেক্খাতি চতুব্বিধা;

ৰুত্তা ব্রহ্মৰিহারা চ, অপ্পমঞ্ঞাতি তাদিনা.

৯১০. একাহারে পটিক্কূল-সঞ্ঞা নামেকমেৰ তু;

চতুধাতুৰৰত্থানং, চতুধাতুপরিগ্গহো.

৯১১. আকাসানঞ্চাযতনং, ৰিঞ্ঞাণঞ্চমথাপরং;

আকিঞ্চঞ্ঞং তথা নেৰ-সঞ্ঞানাসঞ্ঞনামকং.

৯১২. ইচ্চানুক্কমতো ৰুত্তা, অরূপজ্ঝানিকা পন;

অরূপকম্মট্ঠানানি, চত্তারোপি পকিত্তিতা.

৯১৩. কসিণাসুভকোট্ঠাসে, আনাপানে চ সব্বথা;

দিস্ৰা সুত্ৰা ফুসিত্ৰা ৰা, পরিকম্মং তু কুব্বতো.

৯১৪. উগ্গহো নাম সম্ভোতি, নিমিত্তং তত্থ যুঞ্জতো;

পটিভাগো তমারব্ভ, তত্থ ৰত্ততি অপ্পনা.

৯১৫. সাধু সত্তা সুখী হোন্তু, দুক্খা মুচ্চন্তু পাণিনো;

অহো সত্তা সুখপ্পত্তা, হোন্তু যদিচ্ছকাতি চ.

৯১৬. উদ্দিস্স ৰা অনোদিস্স, যুঞ্জতো সত্তগোচরে;

অপ্পমঞ্ঞা পনপ্পেন্তি, অনুপুব্বেন ৰত্তিকা.

৯১৭. কসিণুগ্ঘাটিমাকাসে, পঠমারুপ্পমানসে;

তস্সেৰ নত্থিভাৰে চ, ততিযারুপ্পকেতি চ.

৯১৮. যুঞ্জন্তস্স পনেতেসু, গোচরেসু চতূসুপি;

অপ্পেন্তি অনুপুব্বেন, আরুপ্পাপি চতুব্বিধা.

৯১৯. আনাপানঞ্চ কসিণং, পঞ্চকজ্ঝানিকং তহিং;

পঠমজ্ঝানিকা ৰুত্তা, কোট্ঠাসাসুভভাৰনা.

৯২০. সুখিতজ্ঝানিকা তিস্সো, অপ্পমঞ্ঞা চ হেট্ঠিমা;

উপেক্খারুপ্পকা পঞ্চ, উপেক্খাঝানিকাতি চ.

৯২১. একা দসেকা দস চ, তযো পঞ্চেতি সব্বথা;

পরিকম্মৰসা তিংস, ছ কোট্ঠাসা যথাক্কমং.

৯২২. পঞ্চকাদিসুখোপেক্খা, ঝানভেদা চতুব্বিধা;

একচ্চতুপঞ্চঝান-ৰসেন তিৰিধা সিযুং.

৯২৩. রূপারূপৰসা দ্ৰে চ, অপ্পনাতো পুনেকধা;

ইচ্চেৰমপ্পনা কম্ম-ট্ঠানভেদা সমিস্সিতা.

৯২৪. দ্ৰে চ সঞ্ঞাৰৰত্থানা, অট্ঠানুস্সতিযোতি চ;

সেসা দস পৰুচ্চন্তি, উপচারসমাধিকা.

৯২৫. পরিকম্মোপচারানুলোমগোত্রভুতো পরং;

পঞ্চমং ৰা চতুত্থং ৰা, জৰনং হোতি অপ্পনা.

৯২৬. অপ্পনাজৰনং সব্বং, লোকুত্তরমহগ্গতং;

তিহেতুকপরিত্তানি, পুরিমানি যথারহং.

৯২৭. আৰজ্জনা চ ৰসিতা, তংসমাপজ্জনা তথা;

অধিট্ঠানা চ ৰুট্ঠানা, পচ্চৰেক্খণ পঞ্চমা.

৯২৮. ৰসিতাহি ৰসীভূতা, ইতি কত্ৰান পঞ্চহি;

ভাৰেন্তস্স পনপ্পেন্তি, উপরূপরি অপ্পনা.

৯২৯. যুঞ্জন্তস্স তু ৰুট্ঠায, কসিণজ্ঝানপঞ্চমা;

পঞ্চাভিঞ্ঞা হি অপ্পেন্তি, রূপসদ্দাদিগোচরে.

৯৩০. লোকুত্তরা পনপ্পেন্তি, সব্বে নিব্বানগোচরে;

অনিচ্চদুক্খানত্তাতি, ভূমিধম্মে ৰিপস্সতো.

৯৩১. তত্থ চ পাদকজ্ঝানং, সম্মট্ঠজ্ঝানমেৰ ৰা;

অজ্ঝাসযো চ ৰুট্ঠান-গামিনী চ ৰিপস্সনা.

৯৩২. মগ্গানং ঝানভেদায, যথাযোগং নিযামতা;

যথাসকং ফলানং তু, মগ্গা হোন্তি নিযামতা.

৯৩৩. মগ্গানন্তরমেৰাথ, ভূমিধম্মে ৰিপস্সতো;

ফলসমাপত্তিযম্পি, অপ্পেতি ফলমানসং.

৯৩৪. অনুপুব্বসমাপত্তিং, সমাপজ্জিস্স ৰুট্ঠিতো;

ঝানধম্মে ৰিপস্সিত্ৰা, তত্থ তত্থেৰ পণ্ডিতো.

৯৩৫. চতুত্থারুপ্পমপ্পেত্ৰা, একদ্ৰিজৰনাপরং;

নিরোধং নাম ফুসতি, সমাপত্তিমচিত্তকং.

৯৩৬. অরহা ৰা অনাগামী, পঞ্চৰোকারভূমিযং;

যথাসকং ফলুপ্পাদো, ৰুট্ঠানন্তি ততো মতো.

৯৩৭. অপ্পনাপরিযোসানে, সিযা সব্বত্থ সম্ভৰা;

ভৰঙ্গপাতো তং ছেত্ৰা, জাযতে পচ্চৰেক্খণা.

৯৩৮. ইতি ৰুত্তানুসারেন, অপ্পনানযসঙ্গহং;

যথাযোগং ৰিভাৰেয্য, তত্থ তত্থ ৰিচক্খণো.

৯৩৯. চিত্তৰিসুদ্ধি নামাযং, চিত্তসংক্লেসসোধনো;

উপচারপ্পনাভেদো, সমথো পুব্বভাগিযোতি.

ইতি নিব্বানৰিভাগে মূলৰিসুদ্ধিকথা নিট্ঠিতা.

তেৰীসতিমো পরিচ্ছেদো.