২১. উপ্পত্তিকথা

৭৯৭. অট্ঠৰীসতি রূপানি, কলাপা চেকৰীসতি;

ৰুত্তা চেত্তাৰতা তেসং, উপ্পাদো দানি নিয্যতে.

৭৯৮. অণ্ডজা জলাবুজা চ, সংসেদজোপপাতিকা;

ইচ্চুপ্পত্তিপভেদেন, চতস্সো যোনিযো মতা.

৭৯৯. ভুম্মৰজ্জেসু দেৰেসু,

পেতে নিজ্ঝামতণ্হিকে;

নিরযেসু চ সম্ভোতি,

যোনেকাৰোপপাতিকা.

৮০০. ভুম্মদেৰে মনুস্সেসু,

তিরচ্ছানাসুরে তথা;

পেতেসু চাৰসেসেসু,

চতস্সোপি চ যোনিযো.

৮০১. তত্থণ্ডজা জলাবুজা, গব্ভসেয্যসমুগ্গমো;

সংসেদজোপপাতিকা, ওপপাতিকনামকা.

৮০২. তত্থ সম্পুণ্ণাযতনো, গব্ভসেয্যসমুগ্গমো;

অভাৰো দ্ৰে সভাৰা চ, ইত্থিপুম্ভাৰমিস্সিতা.

৮০৩. পরিপুণ্ণাপরিপুণ্ণো, ওপপাতিকনামকো;

অভাৰো দ্ৰে সভাৰা চ, চতুরাপাযভূমিযং.

৮০৪. সম্পুণ্ণাযতনোৰেসো,

কামে সুগতিযং পন;

আদিকপ্পে অভাৰো চ,

দ্ৰে সভাৰা ততো পরং.

৮০৫. অপরিপুণ্ণাযতনো, অভাৰো চ মহগ্গতে;

ইচ্চেৰং দসধা হোন্তি, সব্বা সন্ধিসমুগ্গমা.

৮০৬. তত্থেৰ দসধা ভিন্নে, অত্তভাৰসমুগ্গমে;

সন্ধিযঞ্চ পৰত্তে চ, রূপুপ্পত্তিং ৰিভাৰযে.

৮০৭. তত্থাভাৰকসত্তানং, গব্ভসেয্যসমুগ্গমে;

কাযৰত্থুৰসা দ্ৰেৰ, দসকা হোন্তি কম্মজা.

৮০৮. রূপসন্ততিসীসানি, দ্ৰে চ রূপানি ৰীসতি;

অগহীতগ্গহণেন, তত্থেকাদস নিদ্দিসে.

৮০৯. ততো পরং পৰত্তিম্হি, ৰড্ঢমানস্স জন্তুনো;

চক্খুদসকাদযো চ, চত্তারো হোন্তি সম্ভৰা.

৮১০. ইচ্চাভাৰকসত্তানং, ছল়েৰুত্তমকোটিযা;

হেট্ঠিমকোটিযা দ্ৰেৰ, গব্ভসেয্যসমুগ্গমে.

৮১১. চক্খুসোতঘানৰসা, তত্থ তিদ্ৰেকহীনকা;

একো তযো তযো চেৰ, সিযুংতিচতুপঞ্চকা.

৮১২. ওপপাতিকসঙ্খাতে, অভাৰকসমুগ্গমে;

জিৰ্হাকাযৰত্থুৰসা, তযো হেট্ঠিমকোটিযা.

৮১৩. উত্তমকোটিযা হোন্তি, ছল়েৰোভিন্নমন্তরে;

চতুক্কপঞ্চকা তত্থ, দ্ৰেকহীনা তযো তযো.

৮১৪. ছক্কাদযো অভাৰানং,

ইচ্চেৰং পঞ্চসঙ্গহা;

একো তযো তযো চেকো,

একোতি চ যথাক্কমং.

৮১৫. সভাৰকানং দ্ৰিন্নম্পি, দুৰিধা সত্তকাদযো;

ভাৰাদিকা যথাৰুত্তা, নৰধা নৰধা সিযুং.

৮১৬. সত্তেৰুত্তমতো হেট্ঠা, তিচতুক্কা তদন্তরে;

চতুক্কপঞ্চকচ্ছক্কা, পঞ্চছক্কাপি চ দ্ৰিধা.

৮১৭. তিণ্ণন্নম্পি ৰসেনেৰ, সত্তকচ্ছক্কপঞ্চকা;

চতুক্কতিকদুক্কা চ, ছ কোট্ঠাসা যথারহং.

৮১৮. দ্ৰে সত্ত চ নৰ পঞ্চ, তযো চেকো যথাক্কমং;

রূপসন্ততিসীসানং, রাসযো সত্তৰীসতি.

৮১৯. কম্মজাতা যথাযোগং, পৰত্তন্তি খণে খণে;

কামাৰচরসত্তানং, পটিসন্ধিপৰত্তিযং.

৮২০. তত্থ সন্ততিসীসানি, রূপানি চ যথারহং;

পুব্বে ৰুত্তনযেনেৰ, সব্বত্থাপি ৰিনিদ্দিসে.

৮২১. সীতুণ্হোতুসমঞ্ঞাতা,

তেজোধাতু ঠিতিক্খণে;

ভূতা সন্ধিক্খণে রূপং,

জনেতি উতুজট্ঠকং.

৮২২. পটিসন্ধিমতিক্কম্ম, চিত্তং চিত্তজমট্ঠকং;

ভৰঙ্গাদিমুপাদায, জনেতুপ্পত্তিযং পন.

৮২৩. ভুত্তাহারো ঠিতিপ্পত্তো, মাতরা চ সযম্পি চ;

সরীরানুগতো হুত্ৰা, জনেতাহারজট্ঠকং.

৮২৪. ইতি সুদ্ধট্ঠকানি চ, তেসমুট্ঠানিকাপরে;

সদ্দৰিঞ্ঞত্তিলহুতা, সম্ভৰে সম্ভৰন্তি চ.

৮২৫. ইত্থং চতুসমুট্ঠানা, কলাপা কামভূমিযং;

যাৰজীৰং পৰত্তন্তি, দীপজালাৰ সন্ততি.

৮২৬. চক্খুসোতৰত্থুৰসা, দসকা চ তযো পরং;

জীৰিতনৰকঞ্চেৰ, রূপাৰচরভূমিযং.

৮২৭. হোন্তি সন্ধিপৰত্তীসু, চত্তারো কম্মজা সদা;

পুব্বে ৰুত্তনযেনেৰ, পৰত্তে উতুচিত্তজা.

৮২৮. জীৰিতনৰকঞ্চেকং, পটিসন্ধিপৰত্তিযং;

পৰত্তে উতুজঞ্চেতি, দ্ৰেধাসঞ্ঞীনমুদ্দিসে.

৮২৯. ইচ্চুপ্পত্তিকমং ঞত্ৰা, ৰিভাৰেয্য ততো পরং;

কলাপানঞ্চ রূপানং, সম্ভৰাসম্ভৰম্পি চ.

৮৩০. ইন্দ্রিযবদ্ধসন্তানে, সব্বে সম্ভোন্তি সম্ভৰা;

কলাপা চেৰ রূপানি, তথা সন্ততিরাসযো.

৮৩১. বহিদ্ধা মতকাযে চ, নোপলব্ভন্তি কম্মজা;

চিত্তোজজা কলাপা চ, উতুজা লহুতাদযো.

৮৩২. তথা সুদ্ধট্ঠকসদ্দ-নৰকঞ্চোতু সব্বথা;

কলাপা তত্থ লব্ভন্তি, দ্ৰে চ রূপানি উদ্দিসে.

৮৩৩. তেসমুট্ঠানিকা সব্বে, কলাপা নত্থি সন্ধিযং;

উপ্পাদকালে সব্বত্থ, জরতানিচ্চতাপি চ.

৮৩৪. কলাপা কম্মজা সন্তি, জাতিরূপঞ্চ সন্ধিযং;

রূপানি চ কলাপা চ, সব্বেপি চ পৰত্তিযং.

৮৩৫. সন্তি সব্বানি রূপানি, কামেসু চতুসম্ভৰা;

জীৰিতনৰকং হিত্ৰা, কলাপা হোন্তি ৰীসতি.

৮৩৬. দসকেস্ৰেৰ গহিতং, ৰিসুং কামে ন লব্ভতি;

জীৰিতনৰকং নাম, রূপলোকে ৰিসুং সিযা.

৮৩৭. আহারজকলাপা চ, ভাৰা দ্ৰে চাদিকপ্পিকে;

আদিকালে ন লব্ভন্তি, পচ্ছা লব্ভন্তি কেচিপি.

৮৩৮. ঘানজিৰ্হাকাযভাৰ-দসকা রূপভূমিযং;

আহারজকলাপা চ, ন লব্ভন্তেৰ সব্বথা.

৮৩৯. চক্খুসোতৰত্থুসদ্দা, কলাপা চিত্তজাপি চ;

অসঞ্ঞিভূমিযং পুব্বে, ৰুত্তাপি চ ন লব্ভরে.

৮৪০. কলাপা সত্ত রূপানি, পঞ্চ রূপেস্ৰসঞ্ঞিসু;

নত্থেকাদস রূপানি, কলাপেকূনৰীসতি.

৮৪১. তস্মা তেৰীস রূপানি, কলাপা পন চুদ্দস;

তেসমুট্ঠানিকা সন্তি, রূপাৰচরভূমিযং.

৮৪২. সত্তরসেৰ রূপানি, কলাপা দ্ৰে দ্ৰিসম্ভৰা;

অসঞ্ঞীনং তু সম্ভোন্তি, নত্থারূপেসু কিঞ্চিপি.

৮৪৩. উপ্পত্তিক্কমমিচ্চেৰং, সম্ভৰাসম্ভৰম্পি চ;

কলাপানঞ্চ রূপানং, যথাযোগং ৰিভাৰযেতি.

ইতি রূপৰিভাগে উপ্পত্তিকথা নিট্ঠিতা.

একৰীসতিমো পরিচ্ছেদো.