১৭. দিট্ঠিসঙ্গহকথা

৫৯৩. যেৰাপনকনামেন, ধম্মা ছন্দাদযো তথা;

খন্ধাদযো চ কোট্ঠাসা, উদ্দিট্ঠা হি যথারহং.

৫৯৪. তত্থ ছন্দাদযো ধম্মা, ৰিভত্তাৰ যথারহং;

খন্ধাদিরাসযো ৰাপি, ৰিঞ্ঞেয্যা দানি সম্ভৰা.

৫৯৫. ৰেদনা ৰেদনাক্খন্ধো, চক্খুসম্ফস্সজাদিকা;

সঞ্ঞা চ সঞ্ঞাক্খন্ধোতি, ছব্বিধাপি পকাসিতা.

৫৯৬. সঙ্খারক্খন্ধনামেন, সেসা চেতসিকা মতা;

ৰুত্তা ৰিঞ্ঞাণকাযা ছ, ৰিঞ্ঞাণক্খন্ধনামতো.

৫৯৭. রূপক্খন্ধো পুনেকোৰ, সম্পযুত্তাৰিযোগিনো;

অরূপিনো চ চত্তারো, পঞ্চক্খন্ধা পৰুচ্চরে.

৫৯৮. মনাযতননামং তু, চিত্তমেৰ তথাপরা;

চক্খুৰিঞ্ঞাণধাতাদিসত্তৰিঞ্ঞাণধাতুযো.

৫৯৯. সব্বে চেতসিকা ধম্মা, ধম্মাযতনসঙ্গহা;

ধম্মধাতূতি চ ৰুত্তা, দ্ৰিপঞ্ঞাসাপি সব্বথা.

৬০০. সুখুমানি চ রূপানি, নিব্বানঞ্চেত্থ গয্হরে;

ওল়ারিকানি রূপানি, দসাযতনধাতুযো.

৬০১. চক্খুসোতঘানজিৰ্হা-কাযাযতননামকা;

রূপসদ্দগন্ধরস-ফোট্ঠব্বাযতনানি চ.

৬০২. দ্ৰাদসাযতনা সব্বে, হোন্তট্ঠারসধাতুযো;

খন্ধা ঠপেত্ৰা নিব্বানং, নত্থি পণ্ণত্তি তীসুপি.

৬০৩. আহারাদি চ কোট্ঠাসা, পুব্বে ৰুত্তনযাৰ তে;

ইতি মিস্সকসঙ্খেপো, ৰিঞ্ঞাতব্বো ৰিভাৰিনা.

৬০৪. দ্ৰাদসাকুসলেস্ৰেৰ, চুদ্দসাপি ৰৰত্থিতা;

যে সাৰজ্জাৰ তেসম্পি, সঙ্গহো দানি নিয্যতে.

৬০৫. কামাসৰো ভৰাসৰো, দিট্ঠাৰিজ্জাসৰাতি চ;

চত্তারো আসৰা ৰুত্তা, তযো ধম্মা সরূপতো.

৬০৬. আসৰা আসৰট্ঠেন,

ওঘা ৰুয্হনতো তথা;

যোজেন্তীতি চ যোগাতি,

তে চত্তারো চ দেসিতা.

৬০৭. কামব্ভৰো চ পটিঘো, মানো দিট্ঠি চ সংসযো;

সীলব্বতপরামাসো, ভৰরাগো তথাপরো.

৬০৮. ইস্সা মচ্ছরিযাৰিজ্জা, ইতি সংযোজনা দস;

অট্ঠ ধম্মা সরূপেন, অভিধম্মে পকাসিতা.

৬০৯. ইস্সামচ্ছরিযং হিত্ৰা, কত্ৰা মানুদ্ধৰং তহিং;

ভিন্দিত্ৰা ভৰরাগঞ্চ, রূপারূপৰসা দ্ৰিধা.

৬১০. পঞ্চোরম্ভাগিযা চেৰ, পঞ্চুদ্ধম্ভাগিযাতি চ;

দস সংযোজনা ৰুত্তা, সুত্তে সত্ত সরূপতো.

৬১১. গন্থা ধম্মা চ চত্তারো, তযো ধম্মা সরূপতো;

অভিজ্ঝাকাযগন্থো চ, ব্যাপাদো চ পৰুচ্চতি.

৬১২. সীলব্বতপরামাসো, কাযগন্থো তথাপরো;

ইদংসচ্চাভিনিৰেসো, ইতি দিট্ঠি ৰিভেদিতো.

৬১৩. কামচ্ছন্দো চ ব্যাপাদো, থিনমিদ্ধমথাপরং;

তথা উদ্ধচ্চকুক্কুচ্চং, কঙ্খাৰিজ্জাতি অট্ঠিমে.

৬১৪. ধম্মা নিৰরণা নাম, ছধা চ পন দেসিতা;

মিচ্ছাদিট্ঠি পনেকাৰ, পরামাসোতি ৰুচ্চতি.

৬১৫. উপাদানানি চত্তারি, কামুপাদাদিনামকা;

দিট্ঠিসীলব্বতং অত্ত-ৰাদুপাদানমেৰ চ.

৬১৬. লোভদিট্ঠিৰসা দ্ৰেৰ, তিৰিধা দিট্ঠি দেসিতা;

দিট্ঠি সীলব্বতমত্ত-ৰাদো চেতি মহেসিনা.

৬১৭. লোভো দোসো চ মোহো চ,

মানো দিট্ঠি চ সংসযো;

থিনমুদ্ধচ্চমেৰাথ,

লোকনাসযুগং তথা.

৬১৮. ইত্থং কিলেসৰত্থূনি, কিলেসাতি পকাসিতা;

দসেতে তু সমানাৰ, পরতো চ সরূপতো.

৬১৯. কামরাগো চ পটিঘো, মানো দিট্ঠি চ সংসযো;

ভৰরাগো অৰিজ্জাতি, ছ সত্তানুসযা মতা.

৬২০. গাহা চ পলিবোধা চ, পপঞ্চা চেৰ মঞ্ঞনা.

তণ্হা মানো চ দিট্ঠি চ, দিট্ঠি তণ্হা চ নিস্সযা.

৬২১. পরামাসেককো দ্ৰেৰ, নিস্সযা মঞ্ঞনা তযো;

আসৰোঘযোগগন্থা, উপাদানা চ দুব্বিধা.

৬২২. অট্ঠ নীৰরণা ৰুত্তা, সত্তধানুসযা কথা;

সংযোজনা কিলেসা চ, দসেৰ পরতো ঠিতা.

৬২৩. একদ্ৰিতিছসত্তট্ঠদসকা তু যথারহং;

ধম্মা সরূপতো হোন্তি, যথাৰুত্তেসু রাসিসু.

৬২৪. কামরাগভৰরাগা, কামাসৰভৰাসৰা;

রূপরাগারূপরাগ, ইতি লোভো ৰিভেদিতো.

৬২৫. ইদংসচ্চাভিনিৰেসো, দিট্ঠি সীলব্বতং তথা;

অত্তৰাদো পরামাসো, ইতি দিট্ঠি পৰুচ্চতি.

৬২৬. দিট্ঠি পঞ্চদসৰিধা, লোভট্ঠারসধা তহিং;

সেসা সপররাসীহি, সমানা দ্ৰাদসট্ঠিতা.

৬২৭. একাদসসমুট্ঠানে, দিট্ঠিলোভা ৰৰত্থিতা;

অৰিজ্জা সত্তসু ৰুত্তা, পটিঘো পন পঞ্চসু.

৬২৮. মানো চ ৰিচিকিচ্ছা চ, চতুট্ঠানেসু উদ্ধটো;

তীসু দ্ৰীসু চ থীনন্তি, অট্ঠেতে সৰিভত্তিকা.

৬২৯. ইস্সামচ্ছেরকুক্কুচ্চমিদ্ধলোকৰিনাসকা;

ছাৰিভত্তিকধম্মাতি, অসম্ভিন্না চতুদ্দস.

৬৩০. রূপরাগারূপরাগ-কামাসৰভৰাসৰা;

হোন্তি দিট্ঠিৰিযুত্তেসু, পুব্বে ৰুত্তনযা পন.

৬৩১. ইতি সাৰজ্জসঙ্খেপং, ঞত্ৰা পুন ৰিচক্খণো;

বোধিপক্খিযধম্মানং, সঙ্গহম্পি ৰিভাৰযে.

৬৩২. যেসু সঞ্ঞাচিত্তদিট্ঠি-ৰিপল্লাসা যথাক্কমং;

সুভং সুখং নিচ্চমত্তা, ইতি দ্ৰাদসধা ঠিতা.

৬৩৩. তত্থ কাযে ৰেদনাসু, চিত্তে ধম্মেসু চক্কমা;

অসুভং দুক্খমনিচ্চমনত্তাতি উপট্ঠিতা.

৬৩৪. যথাৰুত্তৰিপল্লাসপহানায যথারহং;

ভিন্না ৰিসযকিচ্চানং, ৰসেন পন সম্ভৰা.

৬৩৫. চত্তারো সতিপট্ঠানা, কাযানুপস্সনাদযো;

ইতি ৰুত্তা পনেকাৰ, সম্মাসতি মহেসিনা.

৬৩৬. উপ্পন্নানুপ্পন্নপাপপহানানুপ্পন্নায চ;

অনুপ্পন্নুপ্পন্নেহি ৰা, নিব্বত্তি অভিৰুদ্ধিযা.

৬৩৭. পদহন্তস্স ৰাযামো, কিচ্চাভোগৰিভাগতো;

সম্মপ্পধানা চত্তারো, ইতি ৰুত্তা মহেসিনা.

৬৩৮. ছন্দো চ ৰীরিযং চিত্তং, ৰীমংসাতি চ তাদিনা;

চত্তারো ইদ্ধিপাদাতি, ৰিভত্তা চতুরাধিপা.

৬৩৯. সদ্ধিন্দ্রিযঞ্চ ৰীরিযং, সতি চেৰ সমাধি চ;

পঞ্ঞিন্দ্রিযঞ্চ পঞ্চেৰ, বোধিপক্খিযসঙ্গহে.

৬৪০. ইন্দ্রিযানিন্দ্রিযট্ঠেন, বলট্ঠেন বলানি চ;

ইতি ভিন্না ৰিভত্তা চ, দুৰিধাপি মহেসিনা.

৬৪১. সতী চ ধম্মৰিচযো, তথা ৰীরিযপীতিযো;

পস্সদ্ধি চ সমাধি চ, উপেক্খাতি চ তাদিনা.

৬৪২. দেসিতা সত্ত বোজ্ঝঙ্গা, বুজ্ঝন্তস্স সভাৰতো;

কাযচিত্তৰসা ভিন্নং, কত্ৰা পস্সদ্ধিমেককং.

৬৪৩. সম্মাদিট্ঠি চ সঙ্কপ্পো, ৰাযামো ৰিরতিত্তযং;

সম্মাসতি সমাধী চ, মগ্গো অট্ঠঙ্গিকো মতো.

৬৪৪. ইতি সত্তেৰ সঙ্খেপা, সত্ততিংস পভেদতো;

একং কত্ৰান পস্সদ্ধিং, অসম্ভিন্না চতুদ্দস.

৬৪৫. নৰধা ৰীরিযং ৰুত্তং, ছসু রাসীসু পঞ্চসু;

অট্ঠধা সতি সেসা তু, সমানপদরাসিকা.

৬৪৬. পঞ্চস্ৰেৰ তু পঞ্ঞা চ, সমাধি চতুরাসিকো;

সদ্ধা দ্ৰীসু ৰিভত্তাতি, পঞ্চেতে সৰিভত্তিকা.

৬৪৭. নৰা ৰিভত্তিকা সেসা, ছন্দো চিত্তমথাপরং;

পীতি পস্সদ্ধিপেক্খা চ, সঙ্কপ্পো ৰিরতিত্তযং.

৬৪৮. ইতি ৰুত্তনযা সব্বে, বোধিপক্খিযসঙ্গহা;

লোকুত্তরেসু সম্ভোন্তি, সব্বথাপি যথারহং.

৬৪৯. পুব্বভাগে যথাযোগং, লোকিযেসু চ লব্ভরে;

নিব্বেদভাৰনাকালে, ছব্বিসুদ্ধিপৰত্তিযং.

৬৫০. ইতি মিস্সকসাৰজ্জা, বোধিপক্খিযসঙ্গহা;

যেৰাপনকরাসিম্হি, যথাসম্ভৰতো ঠিতা.

৬৫১. কম্মপথা তু সম্ভোন্তি, পুঞ্ঞাপুঞ্ঞেসু সব্বথা;

অপথা চ সুচরিতা, তথা দুচ্চরিতাপি চ.

৬৫২. তত্থ কম্মপথট্ঠানে, অনভিজ্ঝাদযো পন;

উপচারেন ৰুচ্চন্তি, ৰিপাকেসু ক্রিযেসু ৰাতি.

ইতি চেতসিকৰিভাগে দিট্ঠিসঙ্গহকথা নিট্ঠিতা.

সত্তরসমো পরিচ্ছেদো.

নিট্ঠিতো চ সব্বথাপি চেতসিকৰিভাগো.