ছট্ঠো পরিচ্ছেদো

৬. ভূমিপুগ্গলচিত্তপ্পৰত্তিকথা

২৩২. কামসুগতিযং হোন্তি, মহাপাকা যথারহং;

মহগ্গতৰিপাকা চ, যথাসন্ধিৰৰত্থিতা.

২৩৩. ৰোট্ঠব্বকামপুঞ্ঞানি, ৰিযুত্তানি চ দিট্ঠিযা;

উদ্ধচ্চসহিতঞ্চেতি, হোন্তি সব্বত্থ চুদ্দস.

২৩৪. সন্তীরণমনোধাতু-চক্খুসোতমনা পন;

দস চিত্তানি জাযন্তি, সব্বত্থারূপৰজ্জিতে.

২৩৫. দিট্ঠিগতসম্পযুত্তা, ৰিচিকিচ্ছাযুতা তথা;

পঞ্চ সব্বত্থ জাযন্তি, সুদ্ধাৰাসৰিৰজ্জিতে.

২৩৬. দোসমূলদ্ৰযঞ্চেৰ, ঘানাদিত্তযমানসা;

অট্ঠ সব্বত্থ জাযন্তি, মহগ্গতৰিৰজ্জিতে.

২৩৭. চতুত্থারুপ্পজৰনং, অনাগামিফলাদযো;

মহাক্রিযা চ জাযন্তি, তেরসাপাযৰজ্জিতে.

২৩৮. হেট্ঠারুপ্পজৰা দ্ৰে দ্ৰে, ছাপাযুপরিৰজ্জিতে;

সিতরূপজৰা হোন্তি, অরূপাপাযৰজ্জিতে.

২৩৯. সোতাপত্তিফলাদীনি, সুদ্ধাপাযৰিৰজ্জিতে;

পঠমানুত্তরং সুদ্ধা-পাযারূপৰিৰজ্জিতে.

২৪০. অৰত্থাভূমিভূতত্তা, ন গয্হন্তি অনুত্তরা;

একৰোকারভূমি চ, রূপমত্তা ন গয্হতি.

২৪১. সভুম্মা সব্বভুম্মা চ, একদ্ৰিত্তযৰজ্জিতা;

তথারূপসুদ্ধাৰাস-ব্রহ্মাপাযৰসাতি চ.

২৪২. মানসা পঞ্চ কোট্ঠাসা, সত্তরস চতুদ্দস;

ছত্তিংসতেকৰীসা চ, একঞ্চেৰ যথাক্কমং.

২৪৩. অট্ঠারসাপি হোন্তেতে, নৰধাপি পুনেকধা;

চতুধা তিৰিধা চেৰ, একধাতি চ ভেদতো.

২৪৪. তেরসাপি চ কোট্ঠাসা, ভৰন্তেকতিভূমকা;

ছসত্তেকাদসসত্ত-রসভূমকমানসা.

২৪৫. একদ্ৰযতিচতুক্কপঞ্চকাধিকৰীসজা;

ছব্বীসতিংসজা চেতি, যথানুক্কমতো ভৰে.

২৪৬. চত্তারি পুন চত্তারি, একমট্ঠট্ঠ চেককং;

চত্তারেকাদস দ্ৰে দ্ৰে, সত্ত তেৰীস চুদ্দস.

২৪৭. ক্রিযাজৰমহাপাকা, লোকুত্তরমহগ্গতা;

দ্ৰেপঞ্ঞাস ন লব্ভন্তি, চতুরাপাযভূমিযং.

২৪৮. কামাৰচরদেৰেসু, ছসু ভুম্মে চ মানৰে;

কামসুগতিযং নত্থি, নৰ পাকা মহগ্গতা.

২৪৯. দোসমূলমহাপাকা, ঘানাদিত্তযমানসা;

নত্থারূপৰিপাকা চ, ৰীসতী রূপভূমিযং.

২৫০. কঙ্খাদিট্ঠিযুতা পঞ্চারূপপাকা চতুব্বিধা;

পঞ্চাদোনুত্তরা চেৰ, সুদ্ধাৰাসে ন লব্ভরে.

২৫১. আদাৰজ্জনমগ্গা চ, পটিঘারূপমানসা;

কামপাকা সিতারূপে, তেচত্তালীস নত্থি তে.

২৫২. সত্ততিংস পরিত্তা চ, লব্ভন্তাপাযভূমিযং;

মানসাসীতি লব্ভন্তি, কামসুগতিযং পন.

২৫৩. একূনসত্ততি রূপে, সুদ্ধে পঞ্ঞাস পঞ্চ চ;

ছচত্তালীস আরুপ্পে, নত্থাসঞ্ঞীসু কিঞ্চিপি.

২৫৪. ইত্থমেকদ্ৰিতিচতুপঞ্চভুম্মানি সোল়স;

দস পঞ্চদসেৰাথ, চতুত্তিংস চতুদ্দস.

২৫৫. অপাযাহেতুকানং তু, মহাপাকক্রিযাজৰে;

হিত্ৰা সেসপরিত্তানি, চিত্তানি পন লব্ভরে.

২৫৬. দ্ৰিহেতুকাহেতুকানং, সেসানং কামমানসা;

লব্ভন্তি পন হিত্ৰান, ঞাণপাকক্রিযাজৰে.

২৫৭. তিহেতুকানং সত্তানং, তত্থ তত্থূপপত্তিযং;

তত্থ তত্থূপপন্নানং, লব্ভমানানি লব্ভরে.

২৫৮. তিহেতুকানং সব্বেপি, মানসাপাযপাণিনং;

সত্ততিংসাৰসেসানং, একতালীস নিদ্দিসে.

২৫৯. পুথুজ্জনান সেক্খানং, ন সন্তি জৰনক্রিযা;

ন সন্তি ৰীতরাগানং, পুঞ্ঞাপুঞ্ঞানি সব্বথা.

২৬০. কঙ্খাদিট্ঠিযুতা পঞ্চ, সেক্খানং নত্থি মানসা;

দোসমূলদ্ৰযঞ্চাপি, নত্থানাগামিনো পন.

২৬১. ৰৰত্থিতারিযেস্ৰেৰ, যথাসকমনুত্তরা;

মগ্গট্ঠানং সকো মগ্গো, নত্থঞ্ঞং কিঞ্চি সব্বথা.

২৬২. পুথুজ্জনানং দ্ৰিন্নম্পি, ফলট্ঠানং যথাক্কমং;

ততিযস্স ফলট্ঠস্স, চতুত্থস্স চ সম্ভৰা.

২৬৩. তেসট্ঠি চেৰ চিত্তানি, লব্ভন্তেকূনসট্ঠি চ;

সত্তপঞ্ঞাস চিত্তানি, তেপঞ্ঞাস চ সব্বথা.

২৬৪. চতুপঞ্ঞাস পঞ্ঞাস, পঞ্ঞাসদ্ৰযহীনকা;

কামেসু তেসং সম্ভোন্তি, চতুতালীস চক্কমা.

২৬৫. তেচত্তালীস চেকূনচত্তালীস যথাক্কমং;

ভৰন্তেকূনতালীস, পঞ্চত্তিংস চ রূপিসু.

২৬৬. সত্তৰীস চ তেৰীস, তেৰীস চ যথাক্কমং;

আরুপ্পেসুপি লব্ভন্তি, তেসমট্ঠারসেৰ চ.

২৬৭. পুথুজ্জনা চ চত্তারো, অপাযাহেতুকাদযো;

অরিযা চেৰ অট্ঠাতি, দ্ৰাদসন্নং ৰসা সিযুং.

২৬৮. ছব্বিধা চিত্তকোট্ঠাসা, একপুগ্গলিকা তথা;

চতুপঞ্চছসত্তট্ঠ-পুগ্গলট্ঠাতি চক্কমা.

২৬৯. ছব্বীস চুদ্দসেৰাথ, তেরস দ্ৰে চ মানসা;

দস সত্তাধিকা চেৰ, পুন সত্তাধিকা দসাতি.

ইতি চিত্তৰিভাগে ভূমিপুগ্গলচিত্তপ্পৰত্তিকথা নিট্ঠিতা.

ছট্ঠো পরিচ্ছেদো.