৬. ছট্ঠো পরিচ্ছেদো

আরম্মণৰিভাগনিদ্দেসৰণ্ণনা

২৯১-৩. এতেসন্তি যথাৰুত্তপ্পভেদানং. ননু চ ‘‘চিত্তং চেতসিক’’ন্তিআদিনা চিত্তাদীনিযেৰ উদ্দিট্ঠানীতি তানেৰ নিদ্দিসিতব্বানি, আরম্মণং পন অপ্পকতং, তং কস্মা ইধ ৰুচ্চতীতি চোদনং মনসি করিত্ৰা আহ ‘‘তেন ৰিনা নত্থি হি সম্ভৰো’’তি. যস্মা আরম্মণেন ৰিনা চিত্তসম্ভৰো নত্থি, ন হি অনারম্মণং চিত্তং নাম অত্থি, তস্মা ‘‘তযিদং চিত্তং কং আরব্ভ উপ্পজ্জতী’’তি আসঙ্কানিৰারণত্থং ইতো পরং আরম্মণং দস্সযিস্সামীতি অত্থো. কতিৰিধং পন তং আরম্মণং, কিং সরূপঞ্চাতি আহ ‘‘রূপং সদ্দ’’ন্তিআদি. ৰচনত্থং পন নেসং সযমেৰ ৰক্খতি. ছল়ারম্মণকোৰিদাতি ছন্নং আরম্মণানং ব্যাকরণকুসলা বুদ্ধাদযো.

ভূতেতি চত্তারো মহাভূতে. উপাদাযাতি নিস্সায. চতুসমুট্ঠিতোতি কম্মাদীহি চতূহি পচ্চযেহি সমুট্ঠিতো. নিদস্সিতব্বং নিদস্সনং. কিং তং? দট্ঠব্বভাৰো চক্খুৰিঞ্ঞাণস্স গোচরভাৰো, সহ নিদস্সনেনাতি সনিদস্সনো. পটিহঞ্ঞতি, পটিহননন্তি ৰা পটিঘো, যেন ব্যাপারাদিৰিকারপচ্চযন্তরসহিতেসু চক্খাদীনং নিস্সযেসু ৰিকারুপ্পত্তি, সো সযং নিস্সযৰসেন চ সম্পত্তানং, অসম্পত্তানঞ্চ পটিমুখভাৰো অঞ্ঞমঞ্ঞপতনং পটিঘোতি অত্থো. তত্থ সযং সম্পত্তিং ফোট্ঠব্বস্স নিস্সযৰসেন সম্পত্তি গন্ধরসঘানজিৰ্হাকাযানং. ইতরেসং উভযথাপি অসম্পত্তি, তস্মা ইধ অসম্পত্তানং পটিমুখভাৰো ‘‘পটিঘো’’তি ৰুচ্চতি. সহ পটিঘেনাতি সপ্পটিঘো, সনিদস্সনো চ সো সপ্পটিঘো চাতি সনিদস্সনসপ্পটিঘো. এত্থাহ – যস্স দট্ঠব্বভাৰো অত্থি, সো সনিদস্সনো, চক্খুৰিঞ্ঞাণগোচরভাৰোৰ দট্ঠব্বভাৰো. তস্স চ রূপাযতনতো অনঞ্ঞত্তা কথং সহ নিদস্সনেন সনিদস্সনোতি যুজ্জতীতি? ৰুচ্চতে – অনঞ্ঞত্তেপি তস্স অঞ্ঞেহি ধম্মেহি রূপাযতনং ৰিসেসেতুং অঞ্ঞং ৰিয কত্ৰা ৰুত্তং ‘‘সহ নিদস্সনেন সনিদস্সন’’ন্তি. ধম্মসভাৰসামঞ্ঞেন হি একীভূতেসু ধম্মেসু যো নানত্তকরো ৰিসেসো, সো অঞ্ঞং ৰিয কত্ৰা উপচারিতুং যুত্তো. এৰঞ্হি অত্থৰিসেসাৰবোধো হোতি. রূপারম্মণসঞ্ঞিতোতি অযং এৰরূপো ৰণ্ণো রূপারম্মণন্তি সঞ্ঞিতো. ইদং ৰুত্তং হোতি – চত্তারো মহাভূতে উপাদায তে অমুঞ্চিত্ৰা পৰত্তমানো কম্মসমুট্ঠানো চিত্তসমুট্ঠানো উতুসমুট্ঠানো আহারসমুট্ঠানো চ নীলাদিৰসেন দিস্সমানো ইন্দ্রিযেহি ঘট্টেন্তো চ ৰণ্ণো রূপারম্মণং নামাতি.

২৯৪-৭. চিত্তঞ্চ উতু চ চিত্তোতু, তেহি সম্ভৰতি, তে ৰা সম্ভৰা পচ্চযা ইমস্সাতি চিত্তোতুসম্ভৰো. সহ ৰিঞ্ঞত্তিসমুট্ঠাপকৰিঞ্ঞাণেন পৰত্তো সদ্দো সৰিঞ্ঞাণকসদ্দো, সৰিঞ্ঞাণকসদ্দো পন ন কেৰলং সৰিঞ্ঞাণকসন্তানপ্পৰত্তোৰ কুচ্ছিসদ্দাদিৰসেন তস্স উতুসমুট্ঠিতস্সাপি সম্ভৰতো.

ধরীযতীতি কলাপপরম্পরায সন্ধারীযতি. সূচনতোতি অত্তনো ৰত্থুস্স সুপাকটকরণতো. গন্ধো হি ‘‘ইদং সুগন্ধং, ইদং দুগ্গন্ধ’’ন্তি পকাসেতি, পটিচ্ছন্নপুপ্ফফলাদীনি ‘‘ইদমেত্থ অত্থী’’তি পেসুঞ্ঞং করোন্তং ৰিয হোতীতি.

রসমানাতি অস্সাদৰসেন তুস্সমানা. রসন্তীতি অসন্তি, অনুভৰন্তীতি অত্থো. এত্থ র-কারো পদসন্ধিকরো. এৰঞ্হি ‘‘রসমানা নং অসন্তীতি রসো’’তি নিরুত্তিনযো সুন্দরো হোতি. ইতরথা ‘‘রসন্তি অস্সাদেন্তী’’তি ৰুচ্চমানে ‘‘রসমানা’’তি ইদং নিরত্থকমেৰ সিযা. অথ ৰা ‘‘রসমানা’’তি ইতো র-কারং, ‘‘রসন্তী’’তি ইতো স-কারঞ্চ গহেত্ৰা ‘‘রসো’’তি নিরুত্তিনযো দট্ঠব্বো.

২৯৮. ফুসীযতীতি ঘট্টীযতি. কিং তং ফোট্ঠব্বং নামাতি আহ ‘‘পথৰীতেজৰাযৰো’’তি. ইমিনা ধাতুত্তযমেৰ কাযৰিঞ্ঞাণৰিঞ্ঞেয্যভাৰসঙ্খাতফোট্ঠব্বং নাম, ন অঞ্ঞন্তি দস্সেতি. কস্মা পনেত্থ আপোধাতু ন গহিতা, ননু সীততা ফুসিত্ৰা গয্হতি, সা চ আপোধাতু এৰাতি? সচ্চং গয্হতি, ন পন আপোধাতু, কিঞ্চরহি তেজোধাতু এৰ. মন্দে হি উণ্হভাৰে সীতৰুদ্ধি, ন সীততা নাম কোচি গুণো অত্থি. কেৰলং পন উণ্হভাৰস্স মন্দতায সীততাভিমানো. কথং পনেতং ৰিঞ্ঞাতব্বন্তি চে? সীতৰুদ্ধিযা অনৰট্ঠিতভাৰতো পারাপারে ৰিয. তথা হি ঘম্মকালে আতপে ঠত্ৰা ছাযং পৰিট্ঠানং সীতৰুদ্ধি হোতি, তত্থেৰ পথৰীগব্ভতো উট্ঠিতানং উণ্হৰুদ্ধি চ. কিঞ্চরহি হিমপাতসমযাদীসু সীতস্স পরিপাচকত্তদস্সনতো চ তেজোধাতু এৰ সীততাতি দট্ঠব্বং. যদি চ সীততা আপোধাতু সিযা, একস্মিং কলাপে উণ্হভাৰেন সদ্ধিং উপলব্ভেয্য দ্ৰিন্নং ধাতূনং অৰিনিব্ভোগপ্পৰত্তিতো, ন চ পনেৰং উপলব্ভতি, তস্মা ঞাযতি ‘‘ন আপোধাতু সীততা’’তি. ইদং চতুমহাভূতানং অৰিনিব্ভোগৰুত্তিতং ইচ্ছন্তানং উত্তরং, অনিচ্ছন্তানম্পি পন চতুন্নং মহাভূতানং একস্মিং কলাপে কিচ্চদস্সনেন সভাগৰুত্তিতায সাধিতায ইদমেৰ উত্তরং. কেচি পন ‘‘ৰাযোধাতু সীততা’’তি ৰদন্তি, তেসম্পি ইদমেৰ উত্তরং. যদি ৰাযোধাতু সীততা সিযা, একস্মিং কলাপে উণ্হভাৰেন সদ্ধিং উপলব্ভেয্য, ন চ পনেৰং উপলব্ভতি, তস্মা ৰিঞ্ঞাযতি ‘‘ন ৰাযোধাতু সীততা’’তি. যে পন ৰদন্তি ‘‘দ্রৰতা আপোধাতু, সা চ ফুসিত্ৰা গয্হতী’’তি, তে ৰত্তব্বা ‘‘দ্রৰভাৰোপি নাম ফুসীযতীতি ইদং আযস্মন্তানং অধিমানমত্তং সণ্ঠানে ৰিযা’’তি. ৰুত্তঞ্হেতং পোরাণেহি –

‘‘দ্রৰভাসহৰুত্তীনি, তীণি ভূতানি সম্ফুসং;

দ্রৰতং সম্ফুসামীতি, লোকোযমভিমঞ্ঞতি.

‘‘ভূতে ফুসিত্ৰা সণ্ঠানং, মনসা গয্হতে যথা;

পচ্চক্খতো ফুসামীতি, ঞাতব্বা দ্রৰতা তথা’’তি.

২৯৯. সব্বং নামন্তি সব্বং চিত্তচেতসিকনিব্বানসম্মতং নামং. চিত্তচেতসিকঞ্হি আরম্মণং পতি নমনতো নামং. নিব্বানং পন চিত্তচেতসিকস্স অত্তানং পতি নামনতো নামং. রূপন্তি নিপ্ফন্নরূপং. কিং অৰিসেসেনাতি চে, নোতি আহ ‘‘হিত্ৰা রূপাদিপঞ্চক’’ন্তি. লক্খণানীতি অনিচ্চাদিলক্খণানি. পঞ্ঞত্তীতি নামুপাদাযৰসেন দুৰিধা পঞ্ঞত্তি.

৩০০. ইমানি পন ছব্বিধানি আরম্মণানি সব্বানি সব্বত্থ লব্ভন্তি, উদাহু কত্থচি কানিচীতি আহ ‘‘ছল়ারম্মণানী’’তিআদি. তীণি রূপেতি রূপাৰচরভূমিযং রূপসদ্দধম্মৰসেন তীণি আরম্মণানি লব্ভন্তি. ঘানাদিত্তযস্স পন তত্থ অভাৰতো গন্ধারম্মণাদীনি ধম্মারম্মণতো ৰিসুং ন লব্ভন্তি. অরূপভৰে পন সব্বসো রূপানং অভাৰতো একং ধম্মারম্মণমেৰ লব্ভতি, ন অঞ্ঞন্তি আহ ‘‘অরূপে ধম্মারম্মণমেকক’’ন্তি. ননু চ অরূপভৰতো চৰিত্ৰা কামভৰে নিব্বত্তন্তানং অরূপভৰেযেৰ গতিনিমিত্তৰসেন রূপারম্মণং উপট্ঠাতীতি? সচ্চং উপট্ঠাতি, তং পন কামভৰেযেৰ আরম্মণং. উপপজ্জিতব্বভৰস্মিঞ্হি ৰণ্ণো গতিনিমিত্তৰসেন উপট্ঠাতি.

৩০১-২. এৰং ছ আরম্মণানি সরূপতো, পৰত্তিপ্পভেদতো চ দস্সেত্ৰা ইদানি তেসু অভযগিরিৰাসীনং কিঞ্চি ৰিপ্পটিপত্তিং দস্সেত্ৰা তং পটিক্খিপিতুং ‘‘খণৰত্থুপরিত্তত্তা’’তিআদি ৰুত্তং. তত্থ খণৰত্থুপরিত্তত্তাতি খণস্স চেৰ ৰত্থুনো চ পরিত্তত্তা. যে রূপাদযোতি সম্বন্ধো. যেসন্তি যেসং আচরিযানং লদ্ধি. যেসন্তি ৰা ধম্মারম্মণেন সহ সম্বন্ধীভাৰতো, ৰুত্তং ৰৰত্থাপকত্তা চ. তে হি ধম্মারম্মণং ৰৰত্থাপেন্তো অত্তনা সহ তং সম্বন্ধেন্তি, তস্মা ধম্মারম্মণেন সহ সম্বন্ধীভাৰাপেক্খায ‘‘যেস’’ন্তি সামিৰচনন্তি. ইমিনা পন ইদং ৰুত্তং হোতি – যে রূপাদযো পঞ্চ আরম্মণা সন্তত্তঅযোগুল়ে পতিতজলবিন্দু ৰিয পরিত্তক্খণিকা, দিব্বচক্খুনা অসক্কুণেয্যগ্গহণা পরমাণু ৰিয পরিত্তৰত্থুকা, ততো চ সকসকৰিঞ্ঞাণানং আপাথং ন গচ্ছন্তি, কেৰলং পন মনোৰিঞ্ঞাণস্সেৰ গোচরা, তে ধম্মারম্মণং নামাতি যেসং লদ্ধি, তে যেসং ৰা ধম্মারম্মণং নামাতি. এতেনেৰ চ অতীতানাগতভাৰেন অতিদূরঅচ্চাসন্নভাৰেন, কুট্টাদিঅন্তরিতাভাৰেন চ আপাথং অনাগচ্ছন্তানম্পি রূপাদীনং সঙ্গহো কতো হোতীতি. এৰংলদ্ধিকা পন তে –

‘‘ইমেসং খো, আৰুসো, পঞ্চন্নং ইন্দ্রিযানং নানাৰিসযানং নানাগোচরানং ন অঞ্ঞমঞ্ঞস্স গোচরৰিসযং পচ্চনুভোন্তানং মনো পটিস্সরণং, মনো চ নেসং গোচরৰিসযং পচ্চনুভোতী’’তি (ম. নি. ১.৪৫৫) –

ইদং সুত্তং আহরিত্ৰা পটিক্খিপিতব্বাতি দস্সেন্তো আহ ‘‘তে পটিক্খিপিতব্বাৰা’’তিআদি. তত্থ পটিক্খিপিতব্বাৰাতি ন অনুৰত্তিতব্বা. অঞ্ঞমঞ্ঞ…পে… ভোন্তানন্তি চক্খুন্দ্রিযং সোতিন্দ্রিযস্স গোচরং ন পচ্চনুভোতি, তথা ‘‘সোতিন্দ্রিযং চক্খুন্দ্রিযস্সা’’তিআদিনা অঞ্ঞমঞ্ঞস্স আরম্মণং নেৰ পচ্চনুভোন্তানং নানুভৰন্তানং ন গণ্হন্তানং. তেসন্তি তেসং পঞ্চন্নং ইন্দ্রিযানং.

৩০৩. তঞ্চ গোচরং মনো পচ্চনুভোতীতি সম্বন্ধো. তং রূপাদিপঞ্চৰিধং আরম্মণং চ-সদ্দেন ধম্মারম্মণঞ্চ মনো পচ্চনুভোতি, চিত্তং আরম্মণং করোতীতি অত্থো. অযং পনেত্থ অধিপ্পাযো – যদি চক্খাদীনমাপাথগতানি ৰিনা অৰসেসা ধম্মারম্মণা হোন্তি, তদা তংৰিসযং চিত্তং পঞ্চিন্দ্রিযানং ৰিসযং পচ্চনুভোন্তং নাম ন হোতি, অত্তনোযেৰ পন ৰিসযং পচ্চনুভোন্তং নাম হোতি. এৰঞ্চ সতি মনোৰ তেসং গোচরৰিসযং পচ্চনুভোতীতি দুপ্পরিহারিযং ভৰেয্য, ন চ তং সুত্তৰচনং সক্কা অতিক্কমেতুং, তস্মা ৰুত্তনযেন চক্খাদীনং অনাপাথগতাপি মনোগোচরা রূপাদযো রূপাদিআরম্মণানেৰ হোন্তি, ন ধম্মারম্মণাতি. যদি রূপারম্মণং চিত্তং অত্তনো ৰিসযং নানুভোতি, পরৰিসযমেৰ অনুভোতি, কথং দস্সনাদিকিচ্চং ন করোতি? তংতংকিচ্চানং নিস্সযভূতস্স ৰত্থুনো অনিস্সিতত্তা. কথঞ্চরহি পঞ্চিন্দ্রিযানং ৰিসযং পচ্চনুভোতি নাম? দস্সনাদিকিচ্চস্স অকরণেপি চক্খুৰিঞ্ঞাণাদীহি দিট্ঠাদিআকারস্সেৰ গহণতো পঞ্চিন্দ্রিযানং ৰিসযং পচ্চনুভোতি নাম. যদি হি চক্খুৰিঞ্ঞাণাদীহি দিট্ঠাদিআকারং ন গণ্হাতি, রূপাদীনং নীলত্তাদিৰসেন জাননং মনোৰিঞ্ঞাণমেৰ করোতি, ন পঞ্চৰিঞ্ঞাণানীতি তথা জাননমেৰ ন হোতি. তস্স পন অত্থিতাযেৰেতং ৰিঞ্ঞাতব্বং – অনাপাথগতরূপাদারম্মণং চিত্তং অত্তনো ৰিসযং ন পচ্চনুভোতি নাম. অথ খো পঞ্চিন্দ্রিযানং ৰিসযমেৰ পচ্চনুভোতীতি. অথ সিযা, ন মযং চিত্তস্স পঞ্চিন্দ্রিযৰিসযানুভৰনং পটিক্খিপাম, তস্স পন অনুভৰনং দস্সনাদিকিচ্চৰিরহেন ধম্মারম্মণৰসেনেৰাতি চে? তম্পি ন, সুত্তে তথা আগতট্ঠানস্স অভাৰতো. যদি হি চিত্তং দস্সনাদিকিচ্চৰিরহেন পঞ্চিন্দ্রিযৰিসযং ধম্মারম্মণৰসেনেৰ পচ্চনুভোতি, পঞ্চিন্দ্রিযানং ৰিসযং পচ্চনুভৰমানা মনোধাতুমনোৰিঞ্ঞাণধাতুপি ধম্মারম্মণাযেৰ সিযা, এৰঞ্চ সতি ‘‘ধম্মাযতনং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং আরম্মণপচ্চযেন পচ্চযো’’তি পট্ঠানে ৰত্তব্বং সিযা, তথা পন অৰত্ৰা –

‘‘রূপাযতনং সদ্দাযতনং গন্ধাযতনং রসাযতনং ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং আরম্মণপচ্চযেন পচ্চযো’’তি (পট্ঠা. ১.১.২),

‘‘রূপাযতনং…পে… ধম্মাযতনং মনোৰিঞ্ঞাণধাতুযা তংসম্পযুত্তকানঞ্চ ধম্মানং আরম্মণপচ্চযেন পচ্চযো’’তি চ (পট্ঠা. ১.১.২) –

ৰুত্তত্তা পঞ্চিন্দ্রিযানং ৰিসযং পচ্চনুভোন্তী মনোধাতুমনোৰিঞ্ঞাণধাতু তংপঞ্চিন্দ্রিযানং ৰিসযৰসেন পচ্চনুভোতি, ন ধম্মাযতনৰসেনাতি নিট্ঠমেত্থ গন্তব্বং.

৩০৪-৫. এৰং একেনাকারেন পটিক্খেপৰিধিং দস্সেত্ৰা পুন অপরেনপি কারণেন দস্সেন্তো আহ ‘‘দিব্বচক্খাদী’’তিআদি. আদি-গ্গহণেন দিব্বসোতঞাণগ্গহণং. ইতিপি ন যুজ্জতীতি ন কেৰলং পুব্বে ৰুত্তেনেৰ কারণেন, অথ খো ইমিনাপি কারণেন ন যুজ্জতীতি ৰুত্তং হোতি. যদিপি চক্খাদীনং অনাপাথগতরূপাদীনি ধম্মারম্মণা নাম হোন্তি, তদা দিব্বচক্খাদীনি রূপাদিআরম্মণানি ন সিযুং তেসং পসাদৰিসযানং রূপসদ্দানং পরিগ্গণ্হনতো, এৰঞ্চ সতি সুত্তেসু দিব্বচক্খুদিব্বসোতানং ধম্মারম্মণতাৰ ৰত্তব্বা, ন রূপাদিআরম্মণতা, ৰুত্তা চ সা, তস্মা চক্খাদীনং অৰিসযা রূপাদযো রূপাদারম্মণানেৰ, ন ধম্মারম্মণাতি. তেনেৰ চ ধম্মসঙ্গহেপি –

‘‘যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং রূপারম্মণং ৰা সদ্দারম্মণং ৰা গন্ধারম্মণং ৰা রসারম্মণং ৰা ফোট্ঠব্বারম্মণং ৰা ধম্মারম্মণং ৰা, যং যং ৰা পনারব্ভ, তস্মিং সমযে ফস্সো হোতি…পে… অৰিক্খেপো হোতী’’তি (ধ. স. ১) –

ৰুত্তং. কিঞ্চ অনাপাথগতানং ধম্মারম্মণত্তে সব্বঞ্ঞুতঞ্ঞাণং রূপাদিআরম্মণং ন হোতীতি আপজ্জতীতি. এৰং সতীতি যদি কদাচি রূপাদিআরম্মণং হুত্ৰা কদাচি ধম্মারম্মণং হোতি, কদাচি ধম্মারম্মণং হুত্ৰা কদাচি রূপাদিআরম্মণং হোতি, তদা তেসং রূপাদিআরম্মণানং নিযমোপি কথং ভৰে ‘‘ইদং রূপাদিআরম্মণং, ইদং ধম্মারম্মণ’’ন্তি নিযমো ন ভৰেয্য, আরম্মণসঙ্করো ভৰেয্যাতি অত্থো.

৩০৬. এৰং ছব্বিধং আরম্মণং দস্সেত্ৰা ইদানিস্স অনন্তরভেদং পরিত্তারম্মণাদিত্তিকৰসেন দস্সেন্তো আহ ‘‘সব্বং আরম্মণ’’ন্তিআদি. ছব্বিধং পরিত্তত্তিকাদিকং তং এতং সব্বং আরম্মণন্তি সম্বন্ধো. পরিত্তত্তিকাদীনন্তি পরিত্তারম্মণত্তিকাদীনং. পরিত্তারম্মণত্তিকো হি ইধ ‘‘পরিত্তত্তিকো’’তি ৰুত্তো মজ্ঝপদলোপৰসেন. আদি-গ্গহণেন মগ্গারম্মণত্তিকো অতীতারম্মণত্তিকো অজ্ঝত্তারম্মণত্তিকোতি ইমেসং তিণ্ণং তিকানং সঙ্গহো. তত্থ ‘‘পরিত্তারম্মণা ধম্মা, মহগ্গতারম্মণা ধম্মা, অপ্পমাণারম্মণা ধম্মা’’তি এৰমাগতো পরিত্তারম্মণত্তিকো. আদিপদৰসেন ‘‘মগ্গারম্মণা ধম্মা, মগ্গহেতুকা ধম্মা, মগ্গাধিপতিনো ধম্মা’’তি এৰমাগতো মগ্গারম্মণত্তিকো. ‘‘অতীতারম্মণা ধম্মা, অনাগতারম্মণা ধম্মা, পচ্চুপ্পন্নারম্মণা ধম্মা’’তি এৰমাগতো অতীতারম্মণত্তিকো. ‘‘অজ্ঝত্তারম্মণা ধম্মা, বহিদ্ধারম্মণা ধম্মা, অজ্ঝত্তবহিদ্ধারম্মণা ধম্মা’’তি এৰমাগতো অজ্ঝত্তারম্মণত্তিকোতি ৰেদিতব্বং.

৩০৭-৯. ক্রিযাহেতুদ্ৰযন্তি অহেতুককিরিযদ্ৰযং হসিতুপ্পাদমনোধাতু ইতরস্স মহগ্গতাদিআরম্মণতাৰসেনাপি ৰক্খমানত্তা. ‘‘ইট্ঠাদিভেদা’’তিআদি পরিত্তারম্মণভাৰৰিভাৰনং. ইট্ঠাদিভেদাতি ইট্ঠইট্ঠমজ্ঝত্তঅনিট্ঠঅনিট্ঠমজ্ঝত্তভেদা. পটিপাটিযাতি ‘‘রূপং চক্খুৰিঞ্ঞাণস্স, সদ্দো সোতৰিঞ্ঞাণস্সা’’তিআদিনা অনুক্কমতো. রূপাদি…পে… ত্তযস্স তূতি কিরিযামনোধাতুযা চেৰ কুসলাকুসলৰিপাকৰিভাগৰসেন দ্ৰিন্নং মনোধাতূনঞ্চ সব্বং রূপাদিপঞ্চকগোচরং. তা হি হদযৰত্থুং নিস্সায চক্খুৰিঞ্ঞাণাদীনং পুরিমপচ্ছিমা হুত্ৰা নিযতা রূপাদীনেৰ আরব্ভ পৰত্তন্তি.

৩১১. কামধাতুযন্তি কামভৰে. তত্থ হি নেসং সব্বেসং ৰত্থারম্মণানি উপলব্ভন্তি. চত্তারীতি তেস্ৰেৰ কিরিযামনোধাতু, কুসলৰিপাকচক্খুসোতৰিঞ্ঞাণানি, তথা সম্পটিচ্ছনন্তি ইমানি চত্তারি চিত্তানি. সেসানি পন ৰত্থারম্মণাভাৰেন তত্থ নুপ্পজ্জন্তি. নেৰ কিঞ্চীতি ৰত্থারম্মণানং সব্বসো অভাৰতো এতেসু কিঞ্চি ন জাযতি.

৩১২-৩. ‘‘মহাপাকান’’ন্তিআদি পঠমপরিচ্ছেদে ৰুত্তত্থমেৰ. পটুপ্পন্নাতি পচ্চুপ্পন্না.

৩১৪. এৰং পরিত্তারম্মণে দস্সেত্ৰা ইদানি মহগ্গতারম্মণে অপ্পমাণারম্মণে চ দস্সেতুং ‘‘দুতিযারুপ্পচিত্তঞ্চা’’তিআদি ৰুত্তং. তত্থ দুতিযারুপ্পচিত্তং পঠমারুপ্পারম্মণতো, চতুত্থারুপ্পং ততিযারুপ্পারম্মণতো মহগ্গতারম্মণং. ছব্বিধন্তি কুসলৰিপাককিরিযাৰসেন পচ্চেকং তিৰিধতায ছপ্পকারং.

৩১৬-২০. ঞাণং পরিহীনং এতেসং, ঞাণতো পরিহীনাতি ৰা ঞাণহীনা. পরিত্তারম্মণা…পে… হোন্তি তেতি অট্ঠ ঞাণৰিপ্পযুত্তচিত্তুপ্পাদা সেখপুথুজ্জনখীণাসৰানং কদাচি নিরুস্সুক্কভাৰেন আদরাকরণৰসেন অকম্মঞ্ঞসরীরতাঅঞ্ঞৰিহিততাহি ৰা অসক্কচ্চদানপচ্চৰেক্খণধম্মস্সৰনাদীসু অতিপগুণৰিপস্সনায চ কামাৰচরধম্মে আরব্ভ পৰত্তিকালে পরিত্তারম্মণা. অতিপগুণানং পঠমজ্ঝানাদীনং পচ্চৰেক্খণকালে মহগ্গতারম্মণা. কসিণনিমিত্তাদিপঞ্ঞত্তিপচ্চৰেক্খণকালে পরিত্তারম্মণাদিৰসেন নৰত্তব্বা. অকুসলেসু চত্তারো দিট্ঠিসম্পযুত্তচিত্তুপ্পাদা চতুপঞ্ঞাসকামাৰচরধম্মানং, রূপস্স চ ‘‘অত্তা সত্তো’’তি পরামসনঅস্সাদনাভিনন্দনকালে পরিত্তারম্মণা. তেনেৰাকারেন সত্তৰীসতিমহগ্গতধম্মে আরব্ভ পৰত্তকালে মহগ্গতারম্মণা. পণ্ণত্তিধম্মে আরব্ভ পৰত্তনকালে সিযা নৰত্তব্বা পরিত্তারম্মণাদিৰসেন. দিট্ঠিৰিপ্পযুত্তানি তেযেৰ ধম্মে আরব্ভ ৰিনা পরামাসেন অস্সাদনাভিনন্দনৰসেন পৰত্তিযং, পটিঘসম্পযুত্তানি দোমনস্সৰসেন পৰত্তিযং, ৰিচিকিচ্ছাসম্পযুত্তং দ্ৰেল়্হকভাৰেন, উদ্ধচ্চসহগতং ৰিক্খিপনৰসেন, অৰূপসমৰসেন চ পৰত্তিযং পরিত্তমহগ্গতনৰত্তব্বারম্মণাতি ৰেদিতব্বা. ক্রিযতোপি চ তথাতি কিরিযচিত্ততোপি ঞাণসম্পযুত্তা চত্তারোতি অত্থো. ক্রিযাৰোট্ঠব্বনন্তি সরূপকথনমেতং, ন পন কুসলাকুসলৰিপাকৰোট্ঠব্বনস্স ৰিজ্জমানত্তা.

তিৰিধো হোতি গোচরোতি পরিত্তমহগ্গতঅপ্পমাণৰসেন তিৰিধোপি গোচরো হোতি. কথং? কুসলকিরিযাৰসেন অট্ঠ ঞাণসম্পযুত্তচিত্তুপ্পাদা সেখপুথুজ্জনখীণাসৰানং সক্কচ্চদানপচ্চৰেক্খণধম্মস্সৰনৰিপস্সনাদীসু কামাৰচরধম্মে আরব্ভ পৰত্তকালে কামাৰচরারম্মণিকঅভিঞ্ঞায পরিকম্মানুলোমকালে চ পরিত্তারম্মণা. পঠমজ্ঝানাদিপচ্চৰেক্খণকালে মহগ্গতারম্মণঝানাদীনং পরিকম্মকালে মহগ্গতধম্মে আরব্ভ সম্মসনকালে চ মহগ্গতারম্মণা হোন্তি. যথালাভং গোত্রভুৰোদানকালে পন লোকুত্তরং ধম্মং পচ্চৰেক্খণকালে চ নিব্বানারম্মণাভিঞ্ঞায পরিকম্মকালে চ অপ্পমাণারম্মণা. পণ্ণত্তিপচ্চৰেক্খণকালে পণ্ণত্তারম্মণিকঝানাভিঞ্ঞানং পরিকম্মকালে চ নৰত্তব্বা. অভিঞ্ঞাদ্ৰযস্স পরিত্তাদিআরম্মণতং সত্তরসমপরিচ্ছেদে ৰক্খতি. কিরিযাৰোট্ঠব্বনম্পি যথাৰুত্তধম্মানং তংতংআরম্মণে পৰত্তমানানং পুরেচরং হুত্ৰা তং তদেৰ আৰজ্জন্তং পৰত্ততীতি পরিত্তাদিআরম্মণং. পঞ্চদ্ৰারে ৰোট্ঠব্বনৰসেন পৰত্তিযং পরিত্তারম্মণমেৰ.

ৰুত্তাৰসেসানীতি যথাৰুত্তেহি অৰসিট্ঠানি পন্নরস রূপাৰচরানি পঠমততিযানি, ছ অরূপাৰচরকুসলৰিপাককিরিযচিত্তানীতি একৰীসতি চিত্তানি. নৰত্তব্বারম্মণানীতি পরিত্তাদিৰসেন নৰত্তব্বস্স কসিণাদিনিমিত্তসত্তপঞ্ঞত্তিআকাসৰিঞ্ঞাণাভাৰস্স আরম্মণকরণতো নৰত্তব্বারম্মণানি.

পরিত্তারম্মণত্তিকং সমত্তং.

৩২১-২. এৰং পরিত্তারম্মণত্তিকৰসেন ৰিসযীৰিভাগং দস্সেত্ৰা ইদানি যস্মা অপ্পমাণারম্মণনিদ্দেসেনেৰ মগ্গারম্মণত্তিকসঙ্গহিতোপি ৰিসযীৰিভাগো নিদ্দিট্ঠো হোতি, তস্মা তং পহায অতীতারম্মণত্তিকৰসেন দস্সেতুং ‘‘দুতিযারুপ্পচিত্তঞ্চা’’তিআদি ৰুত্তং. তত্থ দুতিযারুপ্পচিত্তং অতীতস্স পঠমারুপ্পৰিঞ্ঞাণস্স আরম্মণকরণতো, চতুত্থারুপ্পং ততিযারুপ্পস্স আরম্মণকরণতো একন্তঅতীতারম্মণং. পচ্চুপ্পন্নাৰ গোচরাতি রূপাদিম্হি ধরমানেযেৰ পঞ্চদ্ৰারিকচিত্তানং উপ্পজ্জনতো. অনাগতারম্মণং পন নিযতং কিঞ্চি নত্থি অনাগতংসঞাণস্সপি পঞ্চমজ্ঝানতো অভিন্নত্তা.

৩২৪-৬. সিযা…পে… নাগতগোচরাতি অট্ঠ তাৰ মহাৰিপাকা দেৰমনুস্সানং পটিসন্ধিগ্গহণকালে কম্মং ৰা কম্মনিমিত্তং ৰা আরব্ভ পৰত্তিযং অতীতারম্মণা. ভৰঙ্গচুতিকালেপি এসেৰ নযো. গতিনিমিত্তং পন কদাচি কম্মনিমিত্তঞ্চ আরব্ভ পটিসন্ধিগ্গহণকালে, তদনন্তরং ভৰঙ্গকালে চ পচ্চুপ্পন্নারম্মণা, তথা পঞ্চদ্ৰারে তদারম্মণৰসেন পৰত্তিযং. মনোদ্ৰারে পন অতীতানাগতপচ্চুপ্পন্নারম্মণানং জৰনানং আরম্মণং গহেত্ৰা পৰত্তিযং অতীতানাগতপচ্চুপ্পন্নারম্মণা. কুসলাকুসলৰিপাকাহেতুকউপেক্খাসহগতমনোৰিঞ্ঞাণধাতুদ্ৰযেপি এসেৰ নযো. কেৰলঞ্হি তা যথাক্কমং মনুস্সেসু জচ্চন্ধাদীনং, অপাযেসু চ সব্বেসং পটিসন্ধি হোন্তি. পঞ্চদ্ৰারে চ সন্তীরণকালে পচ্চুপ্পন্নারম্মণাৰ হোন্তীতি অযমেতেসং ৰিসেসো. সোমনস্সসহগতা পন পঞ্চদ্ৰারে সন্তীরণৰসেন, তদারম্মণৰসেন চ পৰত্তিকালে পচ্চুপ্পন্নারম্মণা, মনোদ্ৰারে চ তদারম্মণকালে অতীতানাগতপচ্চুপ্পন্নারম্মণাতি ৰেদিতব্বা. হসিতুপ্পাদচিত্তং পন খীণাসৰানং পঞ্চদ্ৰারে হট্ঠপহট্ঠাকারং কুরুমানানং পচ্চুপ্পন্নারম্মণং হোতি, মনোদ্ৰারে অতীতাদিভেদে ধম্মে আরব্ভ হসিতুপ্পাদৰসেন পৰত্তিযং অতীতানাগতপচ্চুপ্পন্নারম্মণং. ‘‘কুসলাকুসলা’’তিআদীসু কুসলেসু তাৰ চত্তারো ঞাণসম্পযুত্তচিত্তুপ্পাদা সেখপুথুজ্জনানং, অতীতাদিভেদানি খন্ধধাতুআযতনানি সম্মসনকালে, পচ্চৰেক্খণকালে, অতীতাদিআরম্মণিকঅভিঞ্ঞানং পরিকম্মকালে চ অতীতানাগতপচ্চুপ্পন্নারম্মণা. পঞ্ঞত্তিনিব্বানপচ্চৰেক্খণকালে, গোত্রভুৰোদানকালে, পঞ্ঞত্তিনিব্বানারম্মণিকঅভিঞ্ঞানং পরিকম্মাদিকালে চ নৰত্তব্বারম্মণা. পঞ্ঞত্তিনিব্বানানি হি ইধ অতীতাদিকালৰসেন নৰত্তব্বানীতি তদারম্মণানি অতীতারম্মণাদিৰসেন নৰত্তব্বানি. তেনাহ ‘‘সন্তপঞ্ঞত্তিকালেপী’’তি, যথাসম্ভৰং সন্তস্স নিব্বানস্স, পঞ্ঞত্তিযা চ আরম্মণকরণকালেতি অত্থো. পোত্থকেসু পন ‘‘সন্তে পঞ্ঞত্তিকালেসূ’’তি লিখন্তি, সো অপাঠো. তস্স পন অপাঠভাৰং অজানন্তা অত্থহানিম্পি অসল্লক্খেত্ৰা ৰচনৰিপল্লাসৰসেন পঞ্ঞত্তিকালস্মিং সতীতি অত্থং লিখন্তি. ঞাণৰিপ্পযুত্তানিপি ৰুত্তনযেনেৰ ৰেদিতব্বানি. কেৰলঞ্হি তেসং মগ্গফলনিব্বানপচ্চৰেক্খণানি নত্থি. ঞাণৰিরহেন লোকুত্তরধম্মারম্মণে অসমত্থভাৰতোতি অযমেৰ ৰিসেসো.

অকুসলেসু চত্তারো দিট্ঠিসম্পযুত্তচিত্তুপ্পাদা অতীতাদিভেদানং তেভূমকধম্মানং অস্সাদনাভিনন্দনপরামসনকালে অতীতাদিআরম্মণা. তথেৰ পঞ্ঞত্তিং আরব্ভ পৰত্তিকালে নৰত্তব্বারম্মণা. দিট্ঠিৰিপ্পযুত্তেসুপি এসেৰ নযো. কেৰলঞ্হি তত্থ পরামাসগ্গহণং নত্থি. দ্ৰে পটিঘসম্পযুত্তচিত্তুপ্পাদা অতীতাদিভেদে ধম্মে আরব্ভ দুস্সনকালে অতীতাদিআরম্মণা, পণ্ণত্তিং আরব্ভ দুস্সনকালে নৰত্তব্বারম্মণা. ৰিচিকিচ্ছুদ্ধচ্চসম্পযুত্তা তেসু ধম্মেসু অনিট্ঠঙ্গতভাৰেন চ অৰূপসমৰিক্খেপৰসেন চ পৰত্তিযং অতীতানাগতপচ্চুপ্পন্ননৰত্তব্বারম্মণা. কিরিযাসু অট্ঠ সহেতুকচিত্তুপ্পাদা কুসলচিত্তুপ্পাদগতিকা এৰ. তত্থ হি ঞাণসম্পযুত্তা কুসলেসু ঞাণসম্পযুত্তেহি, ঞাণৰিপ্পযুত্তা ঞাণৰিপ্পযুত্তেহি সমানা. কেৰলং পন তে সেখপুথুজ্জনানং উপ্পজ্জন্তি, ইমে খীণাসৰানন্তি অযমেৰেত্থ ৰিসেসো. কিরিযাহেতুকমনোৰিঞ্ঞাণধাতু পন উপেক্খাসহগতা পঞ্চদ্ৰারে ৰোট্ঠব্বনৰসেন পৰত্তিযং পচ্চুপ্পন্নারম্মণা, মনোদ্ৰারে অতীতানাগতপচ্চুপ্পন্নারম্মণানঞ্চেৰ পঞ্ঞত্তিনিব্বানারম্মণানঞ্চ জৰনানং পুরেচারিককালে অতীতানাগতপচ্চুপ্পন্ননৰত্তব্বারম্মণা. অভিঞ্ঞাদ্ৰযস্স অতীতাদিআরম্মণতং ৰক্খতি. নৰত্তব্বা…পে… আদিনাতি কসিণনিমিত্তাদিপঞ্ঞত্তারম্মণত্তা অতীতারম্মণাদিনা নৰত্তব্বা.

৩২৭. ক্রিযা পঞ্চাতি ঞাণসম্পযুত্তা চতস্সো, অহেতুকমনোৰিঞ্ঞাণধাতু উপেক্খাসহগতাতি ইমা পঞ্চ কিরিযা. রূপতো পঞ্চমী ক্রিযাতি রূপাৰচরপঞ্চমজ্ঝানসঙ্খাতা কিরিযাভিঞ্ঞা চ. নত্থি কিঞ্চি অগোচরন্তি অতীতাদিভেদেসু, কালৰিমুত্তেসু চ অগোচরং নাম কিঞ্চি নত্থি, সব্বমেৰ নেসং গোচরং হোতীতি অত্থো.

অতীতারম্মণত্তিকং.

ৰুত্তনযানুসারেনেৰ অজ্ঝত্তারম্মণত্তিকসঙ্গহিতোপি ৰিসযীৰিভাগো সক্কা ৰিঞ্ঞাতুন্তি সো ৰিসুং ন উদ্ধটো. সরূপতো পনেস এৰং ৰেদিতব্বো – ৰিঞ্ঞাণঞ্চাযতনং নেৰসঞ্ঞানাসঞ্ঞাযতনন্তি ইমে তাৰ কুসলৰিপাককিরিযাৰসেন ছ চিত্তুপ্পাদা অত্তনো সন্তানসম্বন্ধং হেট্ঠিমং সমাপত্তিং আরব্ভ পৰত্তনতো অজ্ঝত্তারম্মণা. রূপাৰচরচতুক্কজ্ঝানানি, পঠমততিযারূপ্পানি, লোকুত্তরকুসলৰিপাকানি চ নিযকজ্ঝত্ততো বহিভাৰেন বহিদ্ধাভূতানি পথৰীকসিণাদীনি আরব্ভ পৰত্তিতো বহিদ্ধারম্মণানি. সব্বেৰ কামাৰচরকুসলাকুসলাব্যাকতা ধম্মা রূপাৰচরপঞ্চমজ্ঝানঞ্চ অজ্ঝত্তবহিদ্ধারম্মণানি. তত্থ কামাৰচরকুসলতো চত্তারো ঞাণসম্পযুত্তচিত্তুপ্পাদা অত্তনো খন্ধাদীনি পচ্চৰেক্খন্তস্স অজ্ঝত্তারম্মণা, পরেসং খন্ধাদিপচ্চৰেক্খণে, পণ্ণত্তিনিব্বানপচ্চৰেক্খণে চ বহিদ্ধারম্মণা, তদুভযৰসেন অজ্ঝত্তবহিদ্ধারম্মণা. ঞাণৰিপ্পযুত্তেসুপি এসেৰ নযো. কেৰলঞ্হি তেসং নিব্বানপচ্চৰেক্খণা নত্থি. অকুসলাপি অত্তনো খন্ধাদীনং অস্সাদনাভিনন্দনপরামাসাদিকালে অজ্ঝত্তারম্মণা, পরস্স খন্ধাদীসু চেৰ অনিন্দ্রিযবদ্ধরূপকসিণাদীসু চ তথেৰ পৰত্তিকালে বহিদ্ধারম্মণা, তদুভযৰসেন অজ্ঝত্তবহিদ্ধারম্মণা. দ্ৰেপঞ্চৰিঞ্ঞাণানি, তিস্সো চ মনোধাতুযোতি ইমে তেরস চিত্তুপ্পাদা অত্তনো রূপাদীনি আরব্ভ পৰত্তিযং অজ্ঝত্তারম্মণা, পরস্স রূপাদীসু পৰত্তা বহিদ্ধারম্মণা, তদুভযৰসেন অজ্ঝত্তবহিদ্ধারম্মণা, সোমনস্সসহগতং সন্তীরণং পঞ্চদ্ৰারে সন্তীরণতদারম্মণৰসেন অত্তনো পঞ্চরূপাদিধম্মে মনোদ্ৰারে তদারম্মণৰসেন অঞ্ঞেপি অজ্ঝত্তিকে কামাৰচরধম্মে আরব্ভ পৰত্তিযং অজ্ঝত্তারম্মণা, পরেসং ধম্মেসু পৰত্তমানা বহিদ্ধারম্মণা, তদুভযৰসেন অজ্ঝত্তবহিদ্ধারম্মণা. উপেক্খাসহগতসন্তীরণদ্ৰযেপি এসেৰ নযো.

কেৰলং পন তং সুগতিদুগ্গতীসু পটিসন্ধিভৰঙ্গচুতিৰসেনাপি অজ্ঝত্তাদিভেদেসু কম্মাদীসু পৰত্ততি. অট্ঠ মহাৰিপাকানি পটিসন্ধিভৰঙ্গচুতিতদারম্মণৰসেন অজ্ঝত্তাদিভেদেসু ধম্মেসু পৰত্তনতো অজ্ঝত্তাদিআলম্বণানি. হসিতুপ্পাদম্পি অত্তনো রূপাদীনি আরব্ভ পহট্ঠাকারকরণৰসেন পৰত্তিযং অজ্ঝত্তারম্মণং, পরস্স রূপাদীসু পৰত্তং বহিদ্ধারম্মণং. মনোদ্ৰারেপি অত্তনো কতকিরিযপচ্চৰেক্খণেন হসিতুপ্পাদনে অজ্ঝত্তারম্মণং, পরেসং কতকিরিযপচ্চৰেক্খণেন বহিদ্ধারম্মণং, তদুভযৰসেন অজ্ঝত্তবহিদ্ধারম্মণং. মনোদ্ৰারাৰজ্জনং পন মনোদ্ৰারে আৰজ্জনৰসেন, পঞ্চদ্ৰারে চ ৰোট্ঠব্বনৰসেন পৰত্তিযং অজ্ঝত্তাদিআরম্মণং. অট্ঠ মহাকিরিযা কুসলগতিকাযেৰ. কেৰলঞ্হি তা খীণাসৰানং উপ্পজ্জন্তি, কুসলানি সেখপুথুজ্জনানন্তি এত্তকমেৰ নানত্তং. রূপাৰচরপঞ্চমজ্ঝানস্স অজ্ঝত্তাদিআরম্মণতং ৰক্খতি.

৩২৯. ‘‘ফলং, মগ্গ’’ন্তি চ সামঞ্ঞেন পুচ্ছিতত্তা আহ ‘‘চত্তারো…পে… পুঞ্ঞতো’’তি.

৩৩২-৪. অরহত্তমগ্গফলানি পন তে জানিতুং ন সক্কোন্তি, তথা কুসলাভিঞ্ঞা চ. তেনাহ ‘‘সব্বেসু পনা’’তিআদি. ৰোট্ঠব্বনস্স আৰজ্জনকিচ্চসমযং সন্ধায গাথাবন্ধসুখত্থং ‘‘ৰোট্ঠব্বনম্পি চা’’তি ৰুত্তং. ‘‘চত্তারো…পে… পুঞ্ঞতো’’তি ইদং ঞাণসম্পযুত্তস্সাপি সেখপুথুজ্জনসন্তানপ্পৰত্তস্স অগ্গমগ্গফলজাননে অসমত্থতায নিদস্সনমত্তং. কুসলাভিঞ্ঞাচিত্তম্পি পন তং গোচরং কাতুমসমত্থমেৰ. এৰঞ্চ কত্ৰা হেট্ঠা ‘‘ক্রিযাভিঞ্ঞা মনোধাতূ’’তি ৰুত্তং.

৩৩৫-৮. কস্মাতি কারণপুচ্ছা. ‘‘অরহতো’’তিআদি ৰিস্সজ্জনং. হি-সদ্দো ‘‘যস্মা’’তি ইমস্স অত্থে. যস্মা পুথুজ্জনা ৰা সেখা ৰা অরহতো মগ্গচিত্তং, ফলমানসঞ্চ জানিতুং ন সক্কোন্তি, তস্মাতি অত্থো. অযঞ্চ নেসং অসমত্থতা অনধিগতত্তা অনধিগতে চ ৰিসযে সব্বেসম্পি মোহো অত্থেৰাতি দস্সেতুং ‘‘পুথুজ্জনো ন জানাতী’’তিআদি ৰুত্তং. সোতাপন্নস্স মানসন্তি সোতাপন্নস্স পাটিপুগ্গলিকং মগ্গফলসঙ্খাতলোকুত্তরমানসং. এৰং ‘‘সকদাগামিস্স মানস’’ন্তিআদীসুপি. লোকিযমানসং পন অরহন্তস্সাপি জানাতি. তথা হি ৰুত্তং ‘‘অথ খো মারো পাপিমা ভগৰতো চেতসা চেতোপরিৰিতক্কমঞ্ঞাযা’’তি. ৰুত্তমেৰত্থং সঙ্খিপিত্ৰা দস্সেন্তো আহ ‘‘হেট্ঠিমো হেট্ঠিমো’’তিআদি. যথেৰ হেট্ঠিমো হেট্ঠিমো পুগ্গলো উপরূপরি চিত্তং ন জানাতি, এৰং উপরিমো উপরিমোপি হেট্ঠিমস্স হেট্ঠিমস্স চিত্তং ন জানাতীতি চে? নো ন জানাতি, সো পন অত্তনা অধিগতৰিসযত্তা জানাতিযেৰাতি দস্সেন্তো আহ ‘‘উপরূপরী’’তিআদি. যথা ‘‘উপরূপরী’’তি ৰুত্তং, এৰং ‘‘হেট্ঠিমস্স হেট্ঠিমস্সা’’তি ৰত্তব্বে একং হেট্ঠিম-সদ্দং চ-সদ্দেন সঙ্গহেত্ৰা ‘‘হেট্ঠিমস্স চ মানস’’ন্তি ৰুত্তং.

৩৩৯-৪১. এৰম্পি ৰিসযীপধানৰসেন ৰিভাগং দস্সেত্ৰা ইদানি ৰিসযপ্পধানৰসেন দস্সেতুং ‘‘যো ধম্মো’’তিআদি ৰুত্তং. কুসলমেৰ আরম্মণন্তি কুসলারম্মণং. কামেতি পদং উভযত্থ সম্বন্ধিতব্বং ‘‘কামে কুসলারম্মণং কামে কুসলাকুসলস্সা’’তি. কিঞ্চাপি হি অকুসলস্স একন্তকামাৰচরত্তা ন এতস্স ৰিসেসিতব্বতা অত্থি, কুসলং পন ৰিসেসিতব্বমেৰাতি তং অপেক্খায ‘‘কামে’’তি উপরিপদেন সম্বন্ধিতব্বমেৰ. অথ ৰা অকুসলসহচরিযতো কুসলম্পি কামাৰচরমেৰ গয্হতীতি ‘‘কামে’’তি ইদং পুরিমপদস্সেৰ ৰিসেসনং দট্ঠব্বং.

কামাৰচরপাকস্সাতি পঞ্চৰিঞ্ঞাণসম্পটিচ্ছনানং একন্তেন রূপক্খন্ধারম্মণত্তা তদৰসেসস্স একাদসৰিধস্স কামাৰচরৰিপাকস্স. কামক্রিযস্সাতি ৰুত্তনযেনেৰ মনোধাতুৰজ্জিতস্স দসৰিধকামাৰচরকিরিযচিত্তস্স. এতেসং…পে… আরম্মণং সিযাতি এত্থ কুসলস্স তাৰ অত্তনা কতস্স দানাদিকামাৰচরকুসলস্স পসন্নচিত্তেন অনুস্সরণকালে, তথেৰ পরেহি কতস্স অনুমোদনকালে, তস্সেৰ দুৰিধস্সাপি অনিচ্চতাদিৰসেন পচ্চৰেক্খণকালে, চেতোপরিযঞাণাদীনং পরিত্তকুসলারম্মণিকঅভিঞ্ঞানং পরিকম্মাদিকালে চ আরম্মণং হোতি. অকুসলেসু চ চতুন্নং দিট্ঠিগতসম্পযুত্তানং কামাৰচরকুসলং আরব্ভ অস্সাদনাভিনন্দনপরামসনকালে, দিট্ঠিৰিপ্পযুত্তানং কেৰলং অস্সাদনাদিকালে চ দ্ৰিন্নং পটিঘসম্পযুত্তানং অত্তনা, পরেহি চ কতকুসলমারব্ভ ৰিপ্পটিসারদুস্সনকালে, ৰিচিকিচ্ছাচিত্তস্স অসন্নিট্ঠানকালে, উদ্ধচ্চসহগতস্স অৰূপসমৰিক্খেপকালে চ আরম্মণং হোতি. অভিঞ্ঞাচিত্তদ্ৰযে কুসলস্স সেখপুথুজ্জনানং অত্তনা, পরেহি ৰা কতকুসলস্স অনুস্সরণকালে, পরচিত্তৰিজাননকালে, ‘‘ইমিনা পুঞ্ঞকম্মেন মনুস্সেসু, কামাৰচরদেৰেসু চ নিব্বত্ততী’’তি জাননকালে, ‘‘অনাগতে দানাদীনি পুঞ্ঞানি করোমি, করিস্সতী’’তি জাননকালে চ কিরিযচিত্তস্সাপি খীণাসৰানং অত্তনা, পরেহি ৰা কতকম্মানুস্সরণকালাদীসু আরম্মণং হোতি. কামাৰচরৰিপাকেসু নৰন্নং সুগতিপটিসন্ধীনং কম্মকম্মনিমিত্তারম্মণিকপটিসন্ধিকালে, সব্বেসম্পি তদারম্মণানং কামাৰচরকুসলারম্মণিকজৰনানন্তরং তদারম্মণকালে চ আরম্মণং হোতীতি. দসৰিধকামাৰচরকিরিযাসু চ অট্ঠন্নং মহাকিরিযচিত্তানং খীণাসৰানং কামাৰচরকুসলপচ্চৰেক্খণসম্মসনকালে, পরিত্তারম্মণিককিরিযাভিঞ্ঞানং পরিকম্মাদিকালে, হসিতুপ্পাদস্স দানাদিং পচ্চৰেক্খিত্ৰা তুস্সনকালে, মনোদ্ৰারাৰজ্জনস্স পন কামাৰচরকুসলারম্মণিকজৰনানং পুরেচারিককালে চ আরম্মণং হোতীতি এৰং কামাৰচরকুসলং ছন্নং রাসীনং আরম্মণং হোতি.

৩৪২. ততোতি যথাৰুত্তরাসিতো. তেনাহ ‘‘পঞ্চন্নং পন রাসীন’’ন্তি. এত্থ চ কিরিযচিত্তেসু হসিতুপ্পাদো ন সম্ভৰতি একন্তপরিত্তারম্মণত্তা. তত্থ কামাৰচরকুসলস্স তাৰ সেখপুথুজ্জনানং ঝানপচ্চৰেক্খণসম্মসনকালে, রূপাৰচরকুসলারম্মণিকঅভিঞ্ঞানং পরিকম্মাদিকালে, অকুসলস্স ৰুত্তনযেন পরামসনাদিকালে, অভিঞ্ঞাসু কুসলাভিঞ্ঞায সেখপুথুজ্জনানং অত্তনা, পরেহি ৰা অতীতভৰে উপ্পাদিতঝানানুস্সরণকালে, পরেসং রূপাৰচরচিত্তপরিচ্ছিন্দনকালে, ‘‘ইমিনা কম্মেন ইমস্মিং ব্রহ্মলোকে নিব্বত্তিস্সতী’’তি জাননকালে চ ‘‘অনাগতে ঝানং ভাৰেস্সতী’’তি ৰা জাননকালে, কিরিযাভিঞ্ঞায চ খীণাসৰানং যথাৰুত্তৰসেন পৰত্তিকালে চ নৰৰিধস্স পন কিরিযচিত্তস্স খীণাসৰানং হেট্ঠা ৰুত্তনযেন রূপাৰচরকুসলপচ্চৰেক্খণকালেতি এৰং রূপাৰচরকুসলং পঞ্চন্নং রাসীনং আরম্মণং হোতি.

৩৪৩-৭. আরুপ্পকুসলঞ্চাপি আরম্মণপচ্চযো হোতীতি সম্বন্ধো. তেভূমককুসলস্সাতি সব্বস্স কামাৰচরকুসলস্স, রূপাৰচরকুসলেসু কুসলাভিঞ্ঞায, অরূপাৰচরকুসলেসু দুতিযচতুত্থকুসলস্স চাতি ইমস্স তেভূমককুসলস্স. এস নযো ‘‘তেভূমকক্রিযস্সা’’তি এত্থাপি. ‘‘চতুত্থদূন’’ন্তি ৰা ‘‘চতুত্থদুতিযান’’ন্তি ৰা ৰত্তব্বে গাথাবন্ধৰসেন ৰিভত্তিযা, সৰিভত্তিস্স ৰা তিয-সদ্দস্স লোপং কত্ৰা ‘‘চতুত্থদূ’’তি ৰুত্তং. ইমেসং…পে… পচ্চযোতি কামাৰচরকুসলস্স, তাৰ অভিঞ্ঞাকুসলস্স চ রূপাৰচরারম্মণেসু ৰুত্তনযেন দুতিযচতুত্থারুপ্পস্স পঠমততিযৰসেনাতি এৰং তেভূমককুসলস্স তথা সেখপুথুজ্জনকালে অত্তনো সন্তানগতস্স, পরসন্তানগতস্স ৰা আরুপ্পকুসলস্স পজাননকালে কামাৰচররূপাৰচরকিরিযচিত্তস্স সেখপুথুজ্জনকালেযেৰ অত্তনা নিব্বত্তিতং পঠমততিযারুপ্পং আরব্ভ খীণাসৰকালে দুতিযচতুত্থারুপ্পনিব্বত্তনে অরূপকিরিযচিত্তস্সাতি এৰং তেভূমককিরিযস্স হেট্ঠা ৰুত্তনযেনেৰ অকুসলস্স, চতুত্থদুতিযানঞ্চ অরূপাৰচরৰিপাকানন্তি এৰমেতেসং অট্ঠন্নং রাসীনং অরূপকুসলমারম্মণং হোতি.

পরিচ্ছিজ্জ গাহিকায তণ্হায আপন্নন্তি পরিযাপন্নং, তেভূমকধম্মজাতং, ন পরিযাপন্নন্তি অপরিযাপন্নং, তদেৰ পুঞ্ঞঞ্চাতি অপরিযাপন্নপুঞ্ঞং. কামাৰচরতোপি কুসলস্স কিরিযস্সাতি সম্বন্ধো. রূপতোতি রূপাৰচরতো. চতুন্নং…পে… সদাতি সেখানং মগ্গপচ্চৰেক্খণকালে মগ্গারম্মণিককুসলাভিঞ্ঞায পরিকম্মাদিকালে ঞাণসম্পযুত্তকুসলস্স, খীণাসৰানং মগ্গপচ্চৰেক্খণকালে মগ্গারম্মণিককিরিযাভিঞ্ঞায চ পরিকম্মকালে ঞাণসম্পযুত্তকিরিযচিত্তস্স, তেসং তেসং জৰনানং পুরেচরৰসেন পৰত্তিকালে মনোদ্ৰারাৰজ্জনস্স, সেখানং অত্তনো, পরেসং ৰা মগ্গজাননকালে অভিঞ্ঞাদ্ৰযস্সাতি এৰমেতেসং চতুন্নং রাসীনং অপরিযাপন্নকুসলমারম্মণং হোতি.

তথেৰাকুসলং…পে… ঈরিতন্তি সেখানং পহীনাৰসিট্ঠকিলেসপচ্চৰেক্খণকালে, সেখপুথুজ্জনানং অত্তনো, পরেসং ৰা সন্তানপ্পৰত্তাকুসলসম্মসনকালে, অকুসলারম্মণিককুসলাভিঞ্ঞায পরিকম্মাদিকালে কামাৰচরকুসলস্স, অত্তনো, পরেসং ৰা পৰত্তঅকুসলানুস্সরণাদীসু রূপাৰচরকুসলস্স, খীণাসৰানং পহীনকিলেসপচ্চৰেক্খণঅঞ্ঞসন্তানগতঅকুসলসম্মসনাদিকালে, পহীনকিলেসপচ্চৰেক্খণেন তুস্সনকালে, সব্বেসম্পি তংতংজৰনানং পুরেচরকালে চ কামাৰচরকিরিযচিত্তস্স, কুসলাভিঞ্ঞায ৰুত্তনযেন রূপাৰচরকিরিযচিত্তস্স, পরামাসঅস্সাদনাভিনন্দনাদিৰসেন পৰত্তিযং অকুসলস্স, উদ্ধচ্চরহিতকম্মারম্মণৰসেন অকুসলৰিপাকসন্তীরণস্স, কামাৰচরজৰনানং অনুস্সরণকালে সব্বম্পি একাদসতদারম্মণৰিপাকস্সাতি এৰং কামাৰচরৰিপাকানন্তি এৰমেতেসং ছন্নং রাসীনং অকুসলমারম্মণং হোতি.

৩৪৮-৫৬. ৰিপাকারম্মণং…পে… পচ্চযোতি সেখপুথুজ্জনানং ৰিপাকসম্মসনাদিকালে কামাৰচরকুসলস্স, ৰিপাকক্খন্ধানুস্সরণাদীসু রূপাৰচরকুসলস্স, ৰুত্তনযেনেৰ খীণাসৰানং ৰিপাকসম্মসনাদিকালে, পুথুজ্জনকালে অনিট্ঠৰিপাকাভাৰং আরব্ভ তুস্সনকালে, যথাৰুত্তজৰনানং পুরেচরকালে কামাৰচরকিরিযচিত্তস্স, কুসলেসু ৰুত্তনযেনেৰ রূপাৰচরকিরিযচিত্তস্স, ৰিপাকং আরব্ভ তদারম্মণপ্পৰত্তিযং ৰিপাকারম্মণিককম্মুনা পটিসন্ধিং গণ্হন্তস্স কম্মনিমিত্তৰসেন পৰত্তিযঞ্চ কামাৰচরৰিপাকস্স, অস্সাদনাভিনন্দনপরামাসাদিৰসেন পৰত্তিযং অকুসলস্সাতি এৰমেতেসং ছন্নং রাসীনং কামাৰচরৰিপাকমারম্মণপচ্চযো হোতীতি. রূপাৰচরৰিপাকারম্মণেপি ইমিনাৰ নযেন যোজনা কাতব্বা. কেৰলঞ্হি তং কামাৰচরৰিপাকানং কিরিযচিত্তেসু চ হসিতুপ্পাদস্সারম্মণং ন হোতীতি অযমেত্থ ৰিসেসো. লোকুত্তরৰিপাকস্স কামাৰচরকুসলকিরিযানমারম্মণক্কমো অপ্পমাণারম্মণনিদ্দেসে ৰুত্তনযেন ৰেদিতব্বো.

কামাৰচরকিরিযচিত্তস্স কামাৰচরকুসলাদীনং ছন্নং রাসীনমারম্মণক্কমো কুসলারম্মণে ৰুত্তসদিসোৰ. কেৰলঞ্হি এত্থ যদেতং খীণাসৰসন্তানস্সেৰ নিযতং নৰৰিধং কিরিযচিত্তং, তং পরসন্তানপ্পৰত্তকুসলাকুসলস্স, সসন্তানেৰ সেখপুথুজ্জনকালে অনাগতারম্মণিকঅভিঞ্ঞায পরিকম্মাদিৰসপ্পৰত্তকুসলস্স আরম্মণং হোতি. ৰিপাকেসু চ পটিসন্ধিভৰঙ্গচুতিসঙ্খাতানং ৰিপাকানং কম্মারম্মণৰসেন আরম্মণং ন হোতীতি অযমেৰ ৰিসেসো.

রূপাৰচরকিরিযচিত্তস্স পঞ্চন্নং রাসীনং আরম্মণক্কমো কুসলারম্মণে ৰুত্তসদিসোৰ. ৰিসেসোপি কামাৰচরকিরিযারম্মণে ৰুত্তনযেনেৰ ৰেদিতব্বো. আরুপ্পকিরিযচিত্তস্সাপি তেসং পঞ্চন্নং রাসীনং গোচরভাৰো ৰুত্তসদিসোৰ. আরুপ্পকিরিযস্স পন পঠমততিযং দুতিযচতুত্থস্সেৰ গোচরো হোতি.

৩৫৭-৮. এৰং রূপনিব্বানৰজ্জিতমারম্মণং দস্সেত্ৰা ইদানি রূপারম্মণং, নিব্বানারম্মণঞ্চ দস্সেতুং ‘‘রূপং চতুসমুট্ঠান’’ন্তিআদি আরদ্ধং. রূপন্তি অট্ঠৰীসতিৰিধো ভূতোপাদাযভেদভিন্নো রূপক্খন্ধো. কিঞ্চাপি ন সব্বমেৰ রূপং পচ্চেকং চতুসমুট্ঠানং, সমুদিতো পন রূপক্খন্ধো চতূহি এৰ সমুট্ঠানেহি সমুট্ঠাতীতি কত্ৰা ৰুত্তং ‘‘চতুসমুট্ঠান’’ন্তি. কামপাককিরিযস্সাতি কামাৰচরৰিপাকস্স, কামাৰচরকিরিযচিত্তস্স চ, তত্থ চ কামাৰচরকুসলস্স তাৰ ৰণ্ণদানাদিপুঞ্ঞকিরিযকালে, ৰণ্ণাদীনং অনিচ্চাদিৰসেন সম্মসনকালে, অভিঞ্ঞায পরিকম্মাদিকালে, অকুসলস্স অস্সাদনাভিনন্দনপরামাসাদিকালে, অভিঞ্ঞাদ্ৰযস্স ইদ্ধিৰিধভূতস্স সুৰণ্ণদুব্বণ্ণাদিরূপনিম্মানকালে, পুব্বেনিৰাসানুস্সতিভূতস্স ‘‘পুরিমভৰে এৰংৰণ্ণো অহোসি’’ন্তিআদিনা অনুস্সরণকালে, দিব্বচক্খুভূতস্স চৰমানউপপজ্জমানসত্তানং ৰণ্ণদস্সনকালে, দিব্বসোতভূতস্স সদ্দসৰনকালে, অনাগতংসঞাণভূতস্স ‘‘অনাগতে এৰংৰণ্ণো ভৰিস্সামী’’তিআদিনা জাননকালে, কামাৰচরৰিপাকেসু দ্ৰিপঞ্চৰিঞ্ঞাণসম্পটিচ্ছনদ্ৰযস্স যথাযোগং রূপাদিৰিজাননকালে, সুখসন্তীরণস্স সন্তীরণতদারম্মণকালে, উপেক্খাসন্তীরণদ্ৰযস্স সন্তীরণতদারম্মণকম্মনিমিত্তগতিনিমিত্তারম্মণকালে, সহেতুকৰিপাকস্স কম্মনিমিত্তগতিনিমিত্তারম্মণকালে, তদারম্মণকালে চ, কামাৰচরকিরিযাসু পন কুসলে ৰুত্তনযানুসারেন অট্ঠমহাকিরিযচিত্তস্স, ‘‘এৰরূপং ৰণ্ণাদিমদাসি’’ন্তি তুস্সনকালে হসিতুপ্পাদস্স, পঞ্চদ্ৰারমনোদ্ৰারেসু ৰোট্ঠব্বনাৰজ্জনকালে মনোদ্ৰারাৰজ্জনস্স, পঞ্চদ্ৰারে আৰজ্জনকালে পঞ্চদ্ৰারাৰজ্জনস্স চ আরম্মণং হোতীতি এৰং চতুসমুট্ঠানিকং রূপং ছন্নং রাসীনমারম্মণং হোতি.

৩৫৯-৬০. নিব্বানং পন গোত্রভুৰোদানকালে, নিব্বানারম্মণিকঅভিঞ্ঞায পরিকম্মাদিকালে চ কামাৰচরতিহেতুককুসলস্স, অতীতভৰে সচ্ছিকতনিরোধানুস্সরণকআলাদীসু রূপাৰচরকুসলস্স, ৰুত্তনযেনেৰ কামরূপাৰচরকিরিযচিত্তস্স, মগ্গট্ঠানং তদনন্তরফলৰল়ঞ্জনফলকালেসু অপরিযাপন্নকুসলৰিপাকস্স চাতি এৰং ছন্নং রাসীনং আরম্মণং হোতীতি দস্সেতুং ‘‘নিব্বানারম্মণ’’ন্তিআদি ৰুত্তং. উভযস্সাতি কামাৰচররূপাৰচরৰসেন দুৰিধস্স.

৩৬১-২. নানপ্পকারকন্তি দ্ৰাদসমপরিচ্ছেদে ৰক্খমাননযেন নানাৰিধপ্পকারং. নৰন্নং…পে… পচ্চযোতি কামাৰচরকুসলস্স, অকুসলস্স, হসিতুপ্পাদমনোধাতুৰজ্জিতকামাৰচরকিরিযচিত্তানঞ্চেৰ দ্ৰিন্নং অভিঞ্ঞাচিত্তানঞ্চ সব্বাপি পঞ্ঞত্তি, রূপাৰচরকুসলৰিপাককিরিযানং কসিণনিমিত্তাদিকা, পঠমারুপ্পকুসলৰিপাককিরিযানং আকাসপঞ্ঞত্তি, ততিযারুপ্পকুসলাদীনং তিণ্ণং অভাৰপঞ্ঞত্তীতি এৰং পঞ্ঞত্তি নৰন্নং রাসীনং আরম্মণপচ্চযো হোতীতি.

৩৬৩-৫. এৰং যো ধম্মো যস্স ধম্মস্স আরম্মণং হোতি, তং একেকুদ্ধারৰসেন দস্সেত্ৰা ইদানি সব্বে চতুভূমকচিত্তুপ্পাদে ছহি আরম্মণেহি যোজেত্ৰা দস্সেতুং ‘‘রূপারম্মণিকা দ্ৰে’’তিআদি গাথাত্তযং ৰুত্তং. তং হেট্ঠা ৰুত্তত্থমেৰ.

৩৬৬-৯. ‘‘পঠমারুপ্পকুসল’’ন্তিআদি পন হেট্ঠা ৰুত্তনযম্পি অরূপাৰচরারম্মণেসু অরূপাৰচরধম্মানং সেখাসেখৰসেন নানপ্পকারতো পৰত্তিআকারং পকাসেতুং ৰুত্তং. কুসলস্সাতি সেখপুথুজ্জনানং দুতিযারুপ্পকুসলস্স. ৰিপাকস্স পন খীণাসৰানং পৰত্তমানস্সাপি আরম্মণং হোতি তস্স পুরিমভৰে কম্মনিমিত্তারম্মণত্তা. অরূপভৰে অতিসন্তভাৰেন পৰত্তমানং ভৰঙ্গচিত্তং ন ভাৰনায পরিসুদ্ধং উপট্ঠাতীতি আহ ‘‘পঠমারুপ্পপাকো’’তিআদি. পঠমং তু কিরিযচিত্তং পুঞ্ঞস্স দুতিযারুপ্পচেতসো আরম্মণং ন হোতি, ৰিপাকস্স দুতিযারুপ্পচেতসো আরম্মণং ন হোতীতি সম্বন্ধো. তত্থ খীণাসৰকালে কস্সচি কুসলস্স অভাৰতো ‘‘ন পুঞ্ঞস্সা’’তি ৰুত্তং. আকাসানঞ্চাযতনকিরিযাসমঙ্গিস্স ৰিঞ্ঞাণঞ্চাযতনৰিপাকচিত্তং ন পৰত্ততীতি ‘‘ন পাকস্সা’’তি ৰুত্তং. খীণাসৰস্স দিট্ঠধম্মসুখৰিহারত্থং, নিরোধসমাপজ্জনত্থঞ্চ সমাপত্তিযো সমাপজ্জন্তস্স পঠমারুপ্পকিরিযচিত্তং দুতিযস্স আরম্মণং হোতীতি আহ ‘‘পঠমং তু ক্রিযাচিত্ত’’ন্তিআদি.

৩৭০-৩. ‘‘দ্ৰিধা’’তি চ ৰত্ৰা তমেৰ দুৰিধতং, তিৰিধতঞ্চ দস্সেতুং ‘‘কুসলং কুসলস্সা’’তি, ‘‘ক্রিযস্সাপি ক্রিযা হোতী’’তি চ আদি ৰুত্তং. তং ৰুত্তনযমেৰ. এৰমেৰ …পে… সিযাতি পঠমারুপ্পচিত্তে ৰুত্তনযেন সেখপুথুজ্জনানং দ্ৰিধা, খীণাসৰানঞ্চ তিধা আরম্মণং ভৰতীতি অত্থো.

৩৭৪-৫. যং যং গোচরং আরব্ভাতি রূপারূপনিব্বানপঞ্ঞত্তীসু যং যং গোচরং আরব্ভ. যে যেতি অরূপধম্মা. যো নরোতি যো গহট্ঠো, পব্বজিতো ৰা মাণৰো. কিরাতি অনুমতিযং. তস্স ‘‘উত্তরতেৰা’’তি ইমিনা সম্বন্ধো. পারন্তি অৰসানং. তং ইমস্স পরমনিপুণগম্ভীরনযসমঙ্গিতায যাথাৰতো ওতরন্তেহি অকসিরেন তরিতুং অসক্কুণেয্যত্তা দুপ্পাপুণেয্যন্তি কত্ৰা আহ ‘‘দুত্তর’’ন্তি. উত্তরন্তি উত্তমং. অভিধম্মাৰতারস্স হি উত্তমতায তদেকদেসভূতপারম্পি উত্তমমেৰ হোতি. সোতি সো সমুত্তিণ্ণাভিধম্মাৰতারপারো নরো. উত্তরতেৰ, ন পন ন সক্কোতি তং উত্তরিতুন্তি অত্থো.

ইতি অভিধম্মত্থৰিকাসিনিযা নাম

অভিধম্মাৰতারসংৰণ্ণনায

আরম্মণৰিভাগনিদ্দেসৰণ্ণনা নিট্ঠিতা.