লোকুত্তরৰিপাকৰণ্ণনা

মগ্গচিত্তস্স ৰিয ফলচিত্তস্স মগ্গযোগতো ভেদাভাৰেন ‘‘চতুমগ্গযোগতো’’তি অৰত্ৰা ‘‘চতুমগ্গসম্পযুত্তচিত্তফলত্তা’’তি ৰুত্তং, চতূহি অরিযমগ্গেহি সম্পযুত্তকুসলচিত্তস্স ফলত্তা চতুব্বিধসামঞ্ঞফলসম্পযুত্তচিত্তভাৰতোতি অত্থো. সোতাপত্তিমগ্গস্স ফলং চিত্তং সোতাপত্তিমগ্গফলচিত্তং. এৰং সেসেসু. মগ্গৰীথিযং দ্ৰিক্খত্তুং, তিক্খত্তুং ৰা ফলসমাপত্তিযা অপরিচ্ছিন্নপরিমাণং পৰত্তমানম্পি দ্ৰীস্ৰেৰ ঠানেসু পৰত্তিযা দুৰিধমেৰ হোতীতি আহ ‘‘মগ্গৰীথিফলসমাপত্তিৰসেন পৰত্তিতো দুৰিধ’’ন্তি.

৫০-১. মগ্গস্সানন্তরে ফলে লব্ভন্তি মগ্গাগমনতোতি অধিপ্পাযো. মগ্গো হি আগমনতো ‘‘সুঞ্ঞতো’’তি লদ্ধনামো সগুণালম্বণৰসেন অনিমিত্তঅপ্পণিহিতনামম্পি লভতীতি ফলস্স নামত্তযম্পি দেতি, তথা আগমনতো অপ্পণিহিতো মগ্গো সগুণারম্মণৰসেন অনিমিত্তসুঞ্ঞতঅপ্পণিহিতনামকোতি ফলস্স নামত্তযম্পি দেতি. এৰঞ্চ কত্ৰা অভিধম্মে একেকস্স ফলস্স তীণি তীণি নামানি ৰুত্তানি. ননু চ অভিধম্মে ‘‘সগুণারম্মণতো নামং অনধিপ্পেত’’ন্তি ৰুত্তং? সচ্চং ৰুত্তং, তং পন নামলাভং সন্ধায, ন নামদানং. তত্থ হি ৰৰত্থানকরত্তাভাৰতো তথা অনধিপ্পেতং, ন অলব্ভনতো. ইধ পন একেকস্স ফলং নামত্তযম্পি লভতীতি ৰৰত্থানপ্পযোজনাভাৰতো সগুণারম্মণেহি লদ্ধনামদানস্স অধিপ্পেতত্তা তিৰিধম্পি নামং দেতি. একন্তেন চেতং এৰং সম্পটিচ্ছিতব্বং, ইতরথা ৰিপস্সনাপি ৰিপস্সতো লদ্ধনামমগ্গস্স তং ন দদেয্যাতি. পরভাগস্মিন্তি অপরভাগে. ৰল়ঞ্জনফলেসূতি সমাপজ্জনৰসেন অনুভৰিতব্বফলেসু. ‘‘ৰল়ঞ্জনফলেসু না’’তি মগ্গাগমনং সন্ধায পটিক্খিত্তন্তি আহ ‘‘ৰিপস্সনাৰসেনেৰা’’তিআদি. ৰল়ঞ্জনফলঞ্হি ৰিসুং ৰিপস্সনাৰসেনেৰ নিব্বত্ততীতি তস্স তংৰসেন নামলাভো. যদি এৰং মগ্গস্স ৰিয অনিমিত্তনামলাভো ন সিযা? তং ন, যথা মগ্গানন্তরস্স ফলস্স ৰিয ৰল়ঞ্জনকফলসমাপত্তিযাপি মগ্গাগমনতো চ ঝানপটিপদাভেদো হোতি, এৰং অনিমিত্তনামম্পি লব্ভতীতি.

৫২-৩. হোন্তি সাধিপতীনেৰাতি এত্থ কারণং ৰুত্তমেৰ. মগ্গভাৰেনাতি সোল়সহি আকারেহি চতুসচ্চপটিৰেধকমগ্গভাৰেন, কিলেসমারণৰসেন গমনসঙ্খাতেন, নিব্বানত্থিকেহি মগ্গিতব্বভাৰসঙ্খাতেন ৰা মগ্গভাৰেন. ফলং…পে… ৰুচ্চতীতি সযং ফলভাৰম্পি মগ্গস্স ফলত্তা, তংসদিসতায ৰা তমুপাদায মগ্গোতি ৰুচ্চতি ‘‘মগ্গঙ্গং মগ্গপরিযাপন্ন’’ন্তিআদীসূতি অধিপ্পাযো.

লোকুত্তরৰিপাকৰণ্ণনা নিট্ঠিতা.