সুত্তন্তিকদুকমাতিকত্থৰণ্ণনা

সুত্তন্তিকদুকেসু ৰেদেতি, ৰিৰিধেন ৰা আকারেন জানাতীতি ৰিজ্জা, ৰিপস্সনাঞাণমনোমযিদ্ধিছঅভিঞ্ঞাৰসপ্পৰত্তা পঞ্ঞা, তস্মিং ৰিজ্জাভাগে ৰিজ্জাকোট্ঠাসে ৰিজ্জাসভাৰে ৰত্তন্তীতি ৰিজ্জাভাগিনো. তা এৰ ৰিজ্জা, তং ৰা ৰিজ্জং সম্পযোগৰসেন ভজন্তীতিপি ৰিজ্জাভাগিনো, অট্ঠৰিধৰিজ্জাসম্পযুত্তধম্মা. তাসু যা কাচি একা ৰিজ্জা ৰিজ্জা, সেসা ৰিজ্জাভাগিনোতি এৰং ৰিজ্জাপি ৰিজ্জাসম্পযুত্তধম্মাপি ৰিজ্জাভাগিনোত্ৰেৰ ৰেদিতব্বা, ইধ পন ৰিজ্জাসম্পযুত্তা ধম্মাৰ অধিপ্পেতা. ন ৰিজানাতীতি অৰিজ্জা, চতুসচ্চচ্ছাদকৰসেন চতুব্বিধো মোহো, তস্মিং অৰিজ্জাভাগে অৰিজ্জাকোট্ঠাসে অৰিজ্জাসভাৰে ৰত্তন্তীতি অৰিজ্জাভাগিনো. তা এৰ অৰিজ্জা, তং ৰা অৰিজ্জং সম্পযোগৰসেন ভজন্তীতিপি অৰিজ্জাভাগিনো, অৰিজ্জাসম্পযুত্তধম্মা. এৰং অৰিজ্জাপি অৰিজ্জাসম্পযুত্তধম্মাপি অৰিজ্জাভাগিনোত্ৰেৰ ৰেদিতব্বা, ইধ পন অৰিজ্জাসম্পযুত্তধম্মাৰ অধিপ্পেতা.

তত্থ অরহত্তমগ্গচিত্তং, পঞ্ঞাৰিরহিততংসম্পযুত্তা চ ৰিজ্জাভাগিনো চ ঞাণসম্পযুত্তকামাৰচরজৰনানি, ঞাণৰিরহিততংসম্পযুত্তা চ ৰিপস্সনাভাৰেন পৰত্তিযং ৰিজ্জাভাগিনো, অঞ্ঞদা ন ৰত্তব্বা. রূপাৰচরচতুত্থজ্ঝানিকজৰনচিত্তানি, পঞ্ঞাৰিরহিততংসম্পযুত্তা চ মনোমযিদ্ধিভাৰেন চ পঞ্চাভিঞ্ঞাভাৰেন চ পৰত্তিযং ৰিজ্জাভাগিনো, অঞ্ঞদা ন ৰত্তব্বা. তত্থ দ্ৰাদসাকুসলচিত্তানি, অৰিজ্জাৰিরহিততংসম্পযুত্তা চ অৰিজ্জাভাগিনোৰ, ইধ পন অৰিজ্জা, সেসচিত্তরূপনিব্বানানি চ ন ৰত্তব্বাৰ. চেতসিকেসু পন মোহঅপ্পমঞ্ঞা ন ৰত্তব্বাৰ, সেসা কুসলাব্যাকতা সিযা ৰিজ্জাভাগিনো, সিযা ন ৰত্তব্বা, তিজাতিকা দ্ৰিধাপি ন ৰত্তব্বা চ. সেসং সুৰিঞ্ঞেয্যমেৰ. পঠমং.

পুন অনজ্ঝোত্থরণৰসেন কিলেসন্ধকারং ৰিদ্ধংসেতুং অসমত্থতায ৰিজ্জু উপমা এতেসন্তি ৰিজ্জূপমা, আদিতো তীসু মগ্গেসু ঞাণংৰ. নিস্সেসং ৰিদ্ধংসনসমত্থতায ৰজিরং উপমা এতেসন্তি ৰজিরূপমা, অরহত্তমগ্গে ঞাণং. যথা হি মেঘন্ধকারে মগ্গপটিপন্নস্স পটিচ্ছাদনঅন্ধকারং ৰিধমিত্ৰা ৰিজ্জুযা উপ্পন্নক্খণে চাতুদিসা মগ্গা পাকটা হোন্তি, ৰিজ্জুযা নিরুদ্ধায পুন অন্ধকারো ওত্থরিত্ৰা মগ্গং পটিচ্ছাদেতি, এৰং ৰিপস্সনাযানিকস্স যথাসকং সচ্চচ্ছাদককিলেসন্ধকারং ৰিধমিত্ৰা তীসু মগ্গেসু যথাক্কমং উপ্পন্নেসু চত্তারি সচ্চানি পাকটানি হোন্তি, তেসু নিরুদ্ধেসু পুন অৰসিট্ঠকিলেসন্ধকারো চতুসচ্চং পটিচ্ছাদেতি, তস্মা তীসু মগ্গেসু পঞ্ঞা ৰিজ্জূপমা ৰুত্তা. যথা পন ৰজিরস্স অভেজ্জো পাসাণো নাম নত্থি, তঞ্চ নিস্সেসতো ৰজিরং খেপেতি, ৰজিরেন চ গতমগ্গে পাসাণস্স পুন পাকতিকভাৰো নত্থি, এৰং অরহত্তমগ্গঞাণস্স অৰজ্ঝকিলেসো নাম নত্থি, তঞ্চ নিস্সেসতো অরহত্তমগ্গঞাণং খেপেতি, তেন চ খেপিতে কিলেসে অৰসিট্ঠকিলেসাভাৰতো তস্স পুন পচ্চুদাৰত্তনং নাম নত্থি, তস্মা চতুত্থমগ্গে পঞ্ঞা ৰজিরূপমা ৰুত্তা. পঞ্ঞা এৰ হেত্থ সিযা ৰিজ্জূপমা, সিযা ন ৰত্তব্বা চ হোতি. সেসচেতসিকচিত্তরূপনিব্বানানি পন সব্বানি ন ৰত্তব্বানেৰ. দুতিযং.

বালেসু ঠিতত্তা, যত্থ ঠিতা তদুপচারেন বালা, বালকরত্তা ৰা বালা, দ্ৰাদসাকুসলচিত্তানি. ইধ পন অহিরিকঞ্চ অনোত্তপ্পঞ্চ বালা নাম. পণ্ডিতেসু ঠিতত্তা পণ্ডিতা, পণ্ডিতকরত্তা ৰা পণ্ডিতা, একৰীসতি কুসলচিত্তানি. ইধ পন হিরী চ ওত্তপ্পঞ্চ পণ্ডিতা নাম. সেসচিত্তরূপনিব্বানানি ন ৰত্তব্বানি. সেসং সুৰিঞ্ঞেয্যমেৰ. ততিযং.

কণ্হাতি কাল়কা, চিত্তস্স অপভস্সরভাৰকরণা. সুক্কাতি ওদাতা, পভস্সরভাৰকরণা. সেসং সব্বং বালদুকসদিসমেৰ. চতুত্থং.

ইধ চেৰ সম্পরাযে চ তপেন্তীতি তপনীযা. ন তপনীযা অতপনীযা. সেসং বালদুকসদিসমেৰ. পঞ্চমং.

‘‘সিরিৰড্ঢকো ধনৰড্ঢকো’’তিআদযো ৰিয ৰচনমত্তমেৰ অধিকারং কত্ৰা পৰত্তা অধিৰচনা নাম. নামধেয্যন্তি তেসং তেসং ধম্মানং নামানি. তানি চতুব্বিধানি সামঞ্ঞনামং গুণনামং কিত্তিমনামং ওপপাতিকনামন্তি. তত্থ পঠমকপ্পিকেসু মহাজনেন সম্মন্নিত্ৰা ঠপিতত্তা ‘‘মহাসম্মতো’’তি রঞ্ঞো নামন্তি এৰরূপং সামঞ্ঞনামং নাম. ‘‘ধম্মকথিকো পংসুকূলিকো কাল়ো রস্সো’’তি এৰরূপং গুণতো আগতং, ‘‘ভগৰা অরহং সম্মাসম্বুদ্ধো’’তিআদীনিপি তথাগতস্স অনেকানি নামসতানি গুণনামং নাম. যং পন জাতস্স কুমারস্স ঞাতকা কপ্পেত্ৰা পকপ্পেত্ৰা ‘‘অযং অসুকো নামা’’তি নামং করোন্তি, ইদং কিত্তিমনামং নাম. যা পন পুরিমপঞ্ঞত্তি অপরপঞ্ঞত্তিযং নিপততি, সেয্যথিদং – পুরিমকপ্পেপি চন্দো চন্দো এৰ, এতরহিপি অনাগতেপি চন্দো এৰ. তথা ‘‘সূরিযো সমুদ্দো পথৰী রূপং ৰেদনা সঞ্ঞা সঙ্খারা ৰিঞ্ঞাণং নিব্বান’’ন্তিএৰমাদি ওপপাতিকনামং নাম. তানি পুন ৰিজ্জমানপঞ্ঞত্তি অৰিজ্জমানপঞ্ঞত্তি ৰিজ্জমানেনঅৰিজ্জমানপঞ্ঞত্তি অৰিজ্জমানেনৰিজ্জমানপঞ্ঞত্তি ৰিজ্জমানেনৰিজ্জমানপঞ্ঞত্তি অৰিজ্জমানেনঅৰিজ্জমানপঞ্ঞত্তীতি এৰং নামপঞ্ঞত্তিৰসেন ছব্বিধানি হোন্তি.

তত্থ পরমত্থতো উপলব্ভমানা যথাৰুত্তদ্ৰাসত্ততিৰিধা নামরূপধম্মা ৰিজ্জমানা নাম, তেসং পকারেহি ঞাপনতো পঞ্ঞত্তি ৰিজ্জমানপঞ্ঞত্তি নাম, ‘‘চিত্তং ফস্সো পথৰী রূপং নিব্বান’’ন্তিআদযো পরমত্থৰাচকা সদ্দা. উপাদিন্ননামরূপধম্মে পন উপাদায পঞ্ঞত্তা সত্তপুগ্গলইত্থিপুরিসদেৰমনুস্সতিরচ্ছানাদিভেদা, অনুপাদিন্নরূপধম্মে উপাদায পঞ্ঞত্তা ভূমিপব্বতরুক্খসকটচন্দসূরিযনক্খত্তদিসাকালকসিণাদিভেদা চ পরমত্থতো অনুপলব্ভমানা অৰিজ্জমানা নাম, তেসং পঞ্ঞত্তি অৰিজ্জমানপঞ্ঞত্তি নাম. তথা ‘‘অত্তা ভূমী’’তিআদযো অত্থপঞ্ঞত্তিৰাচকা সদ্দা চ চিত্তসন্ততিৰণ্ণুপগন্তিআদি ৰিজ্জমানত্থৰাচকা সদ্দা ৰিজ্জমানেনঅৰিজ্জমানপঞ্ঞত্তি নাম. ‘‘পুরিসস্স চিত্তং, মেঘৰণ্ণো’’তিআদীসু অৰিজ্জমানেনৰিজ্জমানপঞ্ঞত্তি নাম. ‘‘চিত্তলহুতা পথৰীগন্ধো’’তিআদি ৰিজ্জমানেনৰিজ্জমানপঞ্ঞত্তি নাম. ‘‘মনুস্সসরীরং রুক্খসাখা’’তিআদি অৰিজ্জমানেনঅৰিজ্জমানপঞ্ঞত্তি নাম. এৰং ছব্বিধাপি চেতা অধিপ্পাযং ৰিঞ্ঞাপেতুকামতাচিত্তসমুট্ঠাপিতসৰিঞ্ঞত্তিসদ্দানুসারেন ঞাতসঙ্কেতস্স সোতৰিঞ্ঞাণৰীথিঅনন্তরং উপ্পন্নেহি মনোদ্ৰারিকৰিঞ্ঞাণেহি ‘‘ইমস্সেদং নাম’’ন্তি অনেকসদ্দেসু একত্তমারোপেত্ৰা ৰৰত্থাপিতা অত্থাভিমুখং নমনতো পকারেহি অত্থস্স ঞাপনতো ‘‘নামপঞ্ঞত্তী’’তি ৰুচ্চন্তি, তেসং অধিৰচনানং পথা অত্থা অধিৰচনপথা, সম্মুতিপরমত্থভেদা সব্বে ধম্মা সদ্দৰচনীযসভাৰা. ছট্ঠং.

ইতো পরং দ্ৰে দুকা অধিৰচনদুকসদিসাৰ, কেৰলং পদত্থমত্তমেৰ ৰিসেসো. তত্থ অভিসঙ্খরোন্তীতি সঙ্খারাতি এৰং নিদ্ধারেত্ৰা সহেতুকং কত্ৰা ৰুচ্চমানা নিরুত্তি নাম, ‘‘তক্কো ৰিতক্কো সঙ্কপ্পো’’তি এৰং তেন তেন পকারেন ঞাপনতো পঞ্ঞত্তি নাম, যথাৰুত্তনামপঞ্ঞত্তিযোৰ. ন হি অধিৰচননিরুত্তিপঞ্ঞত্তীসু অত্থতো কোচিপি ভেদো অত্থি, নিব্বত্তিনিমিত্তভেদদস্সনত্থং পন নেসং ৰিভাগেন পদত্থো দস্সিতো. ইমেসু চ তীসু দুকেসু পঞ্ঞত্তিসহিতা সব্বে ধম্মা লব্ভন্তি, অনন্তরে নামরূপদুকে পঞ্ঞত্তিরহিতাতি ইমে চত্তারো দুকা ইমেসু সুত্তন্তিকদুকেসু নিপ্পদেসা, সেসা পন অট্ঠতিংসাপি সপ্পদেসাতি ৰেদিতব্বা. সত্তমট্ঠমানি.

নামকরণট্ঠেন, নমনট্ঠেন, নামনট্ঠেন চ নামং, অরূপক্খন্ধনিব্বানানি. তানি হি সব্বদাপি ৰেদনা সঞ্ঞা সঙ্খারা ৰিঞ্ঞাণং নিব্বানন্তি ওপপাতিকনামৰসেন অত্তনো নামং করোন্তাৰ পৰত্তন্তি চন্দসূরিযাদযো ৰিয. ন হি তেসং সামঞ্ঞগুণকিত্তিমৰসেন নামকরণকিচ্চং অত্থীতি. এৰং নামকরণট্ঠেন নামং ৰেদিতব্বং. আরম্মণাভিমুখং পন নমনট্ঠেন, অঞ্ঞমঞ্ঞং তত্থ নামনট্ঠেন চ চত্তারো অরূপক্খন্ধাৰ নামং. নিব্বানং পন আরম্মণাধিপতিপচ্চযতায অত্তনি অনৰজ্জধম্মানং নামনট্ঠেনেৰ নামং ৰেদিতব্বং. রুপ্পনট্ঠেন রূপং, রূপক্খন্ধো. নৰমং.

অৰিজ্জাতি দুক্খাদিপটিচ্ছাদকো সব্বো মোহো. ভৰতণ্হাতি ভৰপত্থনাৰসেন পৰত্তো লোভো. তথা অপ্পৰত্তো পনেত্থ লোভো, সেসচেতসিকচিত্তরূপনিব্বানানি চ ন ৰত্তব্বানি. ইতো পরং পন এৰং নৰত্তব্বৰিভাগং অদস্সেত্ৰা পদত্থসরূপমত্তমেৰ দস্সযিস্সাম, দস্সিতাৰসেসা ন ৰত্তব্বাতি গহেতব্বা. দসমং.

ভৰো ৰুচ্চতি সস্সতং. ‘‘ভৰিস্সতি অত্তা চ লোকো চা’’তি সস্সতৰসেন উপ্পজ্জনকদিট্ঠি ভৰদিট্ঠি নাম. ৰিভৰো ৰুচ্চতি উচ্ছেদো. ‘‘ন ভৰিস্সতি অত্তা চ লোকো চা’’তি উচ্ছেদৰসেন উপ্পজ্জনকদিট্ঠি ৰিভৰদিট্ঠি নাম. উভযেনাপি মিচ্ছাদিট্ঠি গহিতা. তথা অনন্তরেসুপি তীসু দুকেসু. একাদসমং.

খন্ধপঞ্চকং ‘‘অত্তা চ লোকো চা’’তি গহেত্ৰা ‘‘সস্সতো অত্তা চ লোকো চা’’তি পৰত্তা দিট্ঠি সস্সতদিট্ঠি নাম. তথা ‘‘উচ্ছিজ্জিস্সতী’’তি পৰত্তা দিট্ঠি উচ্ছেদদিট্ঠি নাম. ‘‘অন্তৰা’’তি পৰত্তা অন্তৰাদিট্ঠি নাম. ‘‘অনন্তৰা’’তি পৰত্তা অনন্তৰাদিট্ঠি নাম. পুব্বন্তং অনুগতা ব্রহ্মজালে ৰুত্তনযেন অতীতকোট্ঠাসং আরম্মণং কত্ৰা পৰত্তা অট্ঠারসৰিধা পুব্বন্তানুদিট্ঠি নাম. অপরন্তং অনুগতা তত্থেৰ আগতনযেন অনাগতকোট্ঠাসং আরম্মণং কত্ৰা পৰত্তা চতুচত্তালীসৰিধা অপরন্তানুদিট্ঠি নাম. অযমেত্থ সঙ্খেপো, ৰিত্থারো পন ব্রহ্মজালে (দী. নি. ১.২৮), তদট্ঠকথায (দী. নি. অট্ঠ. ১.২৮) চ ৰেদিতব্বো. দ্ৰাদসমতেরসমচুদ্দসমানি.

অহিরিকদুকং, হিরিদুকঞ্চ সুৰিঞ্ঞেয্যমেৰ. পঞ্চদসমসোল়সমানি.

দুক্খং ৰচো এতস্মিং ৰিপ্পটিকূলগাহিম্হি ৰিপচ্চনীকসাতে অনাদরে পুগ্গলেতি দুব্বচো, সহধম্মিকং দস্সেত্ৰা ওৰদিযমানে অনাদরকারকো পুগ্গলো, তস্স কম্মং দোৰচস্সং, তস্স ভাৰো দোৰচস্সতা, অনাদরৰসেন পৰত্তা দ্ৰে পটিঘচিত্তা, তংসম্পযুত্তা চ. পাপা অস্সদ্ধাদযো পুগ্গলা এতস্স মিত্তাতি পাপমিত্তো, তস্স ভাৰো পাপমিত্ততা, পাপপুগ্গলেসু দল়্হভত্তিৰসেন, কাযচিত্তেহি তংসেৰনাতন্নিন্নতাৰসেন চ পৰত্তানি অট্ঠ লোভচিত্তানি. সত্তরসমং.

সোৰচস্সতা, কল্যাণমিত্ততা চ ৰুত্তপটিপক্খৰসেন ৰেদিতব্বা. অত্থতো পন তথাপৰত্তানি সহেতুককামাৰচরকুসলকিরিযচিত্তানি. অট্ঠারসমং.

পঞ্চসু, সত্তসু ৰা আপত্তীসু কুসলভাৰো আপত্তিকুসলতা, সহ ৰত্থুনা তাসং আপত্তীনং আপজ্জনপরিচ্ছেদজাননৰসেন পৰত্তা কামাৰচরজৰনপঞ্ঞা. আপত্তীহি ৰুট্ঠানে কুসলভাৰো আপত্তিৰুট্ঠানকুসলতা, ৰুট্ঠানৰিধানেন সদ্ধিং আপত্তিৰুট্ঠানপরিচ্ছেদজাননৰসেন পৰত্তা যথাৰুত্তচিত্তসম্পযুত্তপঞ্ঞাৰ. একূনৰীসতিমং.

সমাপজ্জিতব্বতো সমাপত্তি, তাসু লোকিযলোকুত্তরাসু সৰিতক্কসৰিচারাদীসু সমাপত্তীসু কুসলতা সমাপত্তিকুসলতা, সহ পরিকম্মেন অপ্পনাপরিচ্ছেদজাননৰসেন পৰত্তা পঞ্ঞা. সমাপত্তীহি ৰুট্ঠানে কুসলভাৰো সমাপত্তিৰুট্ঠানকুসলতা, যথাপরিচ্ছিন্নকালেযেৰ তাহি ৰুট্ঠানকপঞ্ঞা কামাৰচরজৰনপঞ্ঞাৰ. ৰীসতিমং.

অট্ঠারসসু ধাতূসু কুসলভাৰো ধাতুকুসলতা, সৰনধারণপটিৰেধপচ্চৰেক্খণপঞ্ঞা. তাসঞ্ঞেৰ ধাতূনং মনসিকারে কুসলভাৰো মনসিকারকুসলতা, তাসং সম্মসনপটিৰেধপচ্চৰেক্খণপঞ্ঞা. এস নযো আযতনকুসলতাযপি. তত্থ হি সৰনধারণপচ্চৰেক্খণা কামাৰচরাৰ, পটিৰেধো লোকুত্তরোৰ, সম্মসনং কামাৰচরলোকুত্তরং. অঞ্ঞমঞ্ঞং পটিচ্চ সহিতং ফলং উপ্পাদেতীতি পটিচ্চসমুপ্পাদো, অৰিজ্জাদীহি নিদ্দিট্ঠো পচ্চযসমূহো, তস্মিং দ্ৰাদসঙ্গে অনুলোমপটিচ্চসমুপ্পাদে কুসলভাৰো পটিচ্চসমুপ্পাদকুসলতা, ‘‘ইমিনা পচ্চযেন ইদং হোতী’’তি জাননৰসেন পৰত্তা লোকিযজৰনপঞ্ঞাৰ. একৰীসতিমদ্ৰাৰীসতিমানি.

তিট্ঠতি এত্থ ফলং তদাযত্তৰুত্তিতাযাতি ঠানং, কারণং, তস্মিং ঠানে কুসলতা ঠানকুসলতা. ন ঠানে কুসলতা অট্ঠানকুসলতা. তেৰীসতিমং.

উজুভাৰো অজ্জৰো. মুদুভাৰো মদ্দৰো. কাযচিত্তুজুকতামুদুকতাদ্ৰযং. চতুৰীসতিমং.

অধিৰাসনসঙ্খাতা খমনং খন্তি, তথাপৰত্তকামাৰচরজৰনানি. পাপতো সুট্ঠু ওরতো ৰিরতোতি সোরতো, তস্স ভাৰো সোরচ্চং. কাযৰচীমনোসংৰরসীলসঙ্খাতানি লোকিযলোকুত্তরজৰনানি. পঞ্চৰীসতিমং.

সম্মোদকপিযৰাদিতাসঙ্খাতো সখিলভাৰো সাখল্যং, যথা পরেহি সদ্ধিং অত্তনো ছিদ্দং ৰিৰরং ন হোতি, এৰং ধম্মামিসেহি পটিসন্থরণং পটিচ্ছাদনং পটিসন্থারো. আগন্তুকস্স হি পচ্চুগ্গমনপত্তচীৰরপটিগ্গহণআসনদানবীজনপাদধোৰনমক্খনাদিনা, পানীযেন আপুচ্ছনেন, কালে আগতস্স যাগুআদীনং, ৰিকালে পানকাদীনঞ্চ দানেন, পুনদিৰসে পিণ্ডায চরণট্ঠানদস্সনপৰেসননিক্খমনকালারোচনাদিনা চ পব্বজিতা, গহট্ঠানঞ্চ ৰিনযে আগতনযেন যথানুরূপং আমিসপটিসন্থারো কাতব্বো. আগন্তুকং পন উপসঙ্কমিত্ৰা ‘‘তুম্হে কতরভাণকা’’তি অপুচ্ছিত্ৰা ‘‘আচরিযুপজ্ঝাযা ৰো কতরং গন্থং ৰল়ঞ্জেন্তী’’তি পুচ্ছিত্ৰা তস্স ৰিসযে পঞ্হপুচ্ছনেন সচে ন সক্কোতি, সযং কথেত্ৰা দানেন, ধম্মকথনপঞ্হৰিস্সজ্জনকম্মট্ঠানকথনকুক্কুচ্চদিট্ঠিৰিনোদনাদিনা, পরিৰাসাদিৰিনযকম্মকরণেন, পব্বাজনউপসম্পদাদিনা চ ধম্মপটিসন্থারো কাতব্বো. অযমেত্থ সঙ্খেপো, ৰিত্থারতো পনাযং সদ্ধিং আনিসংসদীপকৰত্থূহি অট্ঠসালিনিযং (ধ. স. অট্ঠ. ১৩৫১) ঞাতব্বো. এতস্মিং দুৰিধে পটিসন্থারে কুসলভাৰো পটিসন্থারকুসলতা, তথাপৰত্তকামাৰচরজৰনানি এৰ. ছব্বীসতিমং.

ইন্দ্রিযেসু মনচ্ছট্ঠেসু আপাথগতরূপাদীসু আরম্মণেসু নিমিত্তগহণাদিনা ইন্দ্রিযসংৰরভেদসঙ্খাতো অগুত্তদ্ৰারভাৰো ইন্দ্রিযেসু অগুত্তদ্ৰারতা. পটিগ্গহণপরিভোগৰসেন ভোজনে মত্তং অজাননভাৰো ভোজনে অমত্তঞ্ঞুতা, তথাপৰত্তঅকুসলচিত্তানি. সত্তৰীসতিমং.

অনন্তরদুকেপি ৰুত্তপটিপক্খৰসেন কামাৰচরসহেতুককুসলকিরিযচিত্তানি ৰেদিতব্বানি. অট্ঠৰীসতিমং.

সতিৰিপ্পৰাসসঙ্খাতো মুট্ঠসতিভাৰো মুট্ঠস্সচ্চং, সব্বে অকুসলা ধম্মা, অসম্পজাননভাৰো অসম্পজঞ্ঞং, মোহো. একূনতিংসতিমং.

অনন্তরদুকে চতুভূমিকা সতিপঞ্ঞাৰ ৰুত্তা. তিংসতিমং.

অপ্পটিসঙ্খানে অপ্পটিৰানসঙ্খাতে অকম্পিযট্ঠেন যোনিসোদস্সনসঙ্খাতং পটিসঙ্খানমেৰ বলন্তি পটিসঙ্খানবলং, কামাৰচরপঞ্ঞাৰ. সত্তবোজ্ঝঙ্গাদিভাৰনাৰসেন পৰত্তা চতুভূমকধম্মা ভাৰনাবলং. একতিংসতিমং.

পচ্চনীকধম্মে সমেতীতি সমথো, সো তিৰিধো চিত্তসমথো অধিকরণসমথো সব্বসঙ্খারসমথোতি. তত্থ চ পুব্বভাগাসু অট্ঠসমাপত্তীসু একগ্গতা চিত্তসমথো নাম, সম্মুখাৰিনযাদি সত্তৰিধো অধিকরণসমথো নাম, নিব্বানং সব্বসঙ্খারসমথো নাম. ইধ পন চতুভূমকো সমাধি অধিপ্পেতো. অনিচ্চাদিৰসেন ৰিৰিধেনাকারেন পস্সতীতি ৰিপস্সনা, লোকিযলোকুত্তরা ৰিপস্সনাপঞ্ঞাৰ. বাত্তিংসতিমং.

সমথোৰ তং আকারং গহেত্ৰা পুন পৰত্তেতব্বস্স সমথস্স নিমিত্তন্তি সমথনিমিত্তং. পগ্গাহনিমিত্তেপি এসেৰ নযো. চতুভূমকসমাধিৰীরিযানি এৰ. তেত্তিংসতিমং.

অনন্তরদুকেপি ৰীরিযসমাধী এৰ ৰুত্তা. চতুত্তিংসতিমং.

সীলৰিনাসিকা অসংৰরসঙ্খাতা সীলস্স ৰিপত্তীতি সীলৰিপত্তি, তথাপৰত্তা অকুসলধম্মা. সম্মাদিট্ঠিযা ৰিপত্তি দিট্ঠিৰিপত্তি, মিচ্ছাদিট্ঠি এৰ. পঞ্চতিংসতিমং.

সোরচ্চমেৰ সীলস্স সম্পাদনতো সীলপরিপূরণতো সীলস্স সম্পদাতি সীলসম্পদা. দিট্ঠিপারিপূরিভূতং ঞাণমেৰ দিট্ঠিযা সম্পদাতি দিট্ঠিসম্পদা. চতুভূমকা সীলপঞ্ঞাৰ. তথা অনন্তরদুকেপি. ছত্তিংসতিমং.

ৰিসুদ্ধিভাৰং সম্পত্তা সীলসঙ্খাতা সীলস্স ৰিসুদ্ধি সীলৰিসুদ্ধি. নিব্বানসঙ্খাতং ৰিসুদ্ধিং পাপেতুং সমত্থা দস্সনসঙ্খাতা দিট্ঠিযা ৰিসুদ্ধি দিট্ঠিৰিসুদ্ধি. সত্তত্তিংসতিমং.

কম্মস্সকতাসচ্চানুলোমিকমগ্গফলসম্পযুত্তপঞ্ঞা দিট্ঠি ৰিসুদ্ধি নাম. যথাদিট্ঠিস্স তদনুরূপং পধানং যথাদিট্ঠিস্স চ পধানং নাম. অট্ঠতিংসতিমং.

সংৰেগজনকানি জাতিজরাব্যাধিমরণসঙ্খাতানি কারণানি সংৰেজনীযট্ঠানানি নাম, তেসু জাতিআদিপটিচ্চসমুপ্পন্নভযসঙ্খাতং সংৰিজনং সংৰেগো নাম, তথাপৰত্তকুসলাদি এৰ. এৰং সংৰেগজাতস্স যোনিসো উপাযেন পধানং সংৰিগ্গস্স যোনিসো পধানং, লোকিযলোকুত্তরৰীরিযমেৰ. একূনচত্তালীসতিমং.

কুসলধম্মপূরণে অসন্তুট্ঠিভাৰো অসন্তুট্ঠিতা. যো পন দানং দত্ৰা ততো তেন অসন্তুট্ঠো হুত্ৰা সরণগমনং আকঙ্খতি, ততো পঞ্চসীলাদিং, পব্বজ্জং, বুদ্ধৰচনানং উগ্গণ্হনং, সমথৰিপস্সনং, ততো তেনাপি অসন্তুট্ঠো অনুক্কমেন অরহত্তং গণ্হাতি, অযং অসন্তুট্ঠিতা কুসলেসু ধম্মেসু. অধিকুসলধম্মানং ভাৰনায উক্কণ্ঠমানো পধানং পটিৰাপেতি নিৰত্তাপেতীতি পটিৰানি, ন পটিৰানি অপ্পটিৰানি, তস্স ভৰো অপ্পটিৰানিতা. অরহত্তং অপ্পত্ৰা পধানস্মিং অনিৰত্তনতা অনোসক্কনতা, তথাপৰত্তলোকিযলোকুত্তরকুসলা ধম্মা. চত্তালীসতিমং.

ৰিজাননতো ৰিজ্জা, পুব্বেনিৰাসচুতূপপাতআসৰক্খযঞাণানি. ৰিমুচ্চনতো ৰিমুত্তি, অট্ঠ সমাপত্তিযো, নিব্বানঞ্চ. অট্ঠ সমাপত্তিযো হি আরম্মণে অধিমুচ্চনতো, সযং ৰিক্খম্ভিতকিলেসেহি ৰিমুচ্চনট্ঠেন চ ৰিমুত্তীতি ৰুত্তা, নিব্বানং পন সব্বকিলেসেহি অচ্চন্তৰিমুচ্চনট্ঠেন. একচত্তালীসতিমং.

কিলেসক্খযকরেসু চতূসু অরিযমগ্গেসু ঞাণং খযে ঞাণং নাম. পটিসন্ধিৰসেন অনুপ্পাদভূতে তংতংমগ্গৰজ্ঝকিলেসানং অনুপ্পাদপরিযোসানে উপ্পন্নঅরিযফলে ঞাণং অনুপ্পাদে ঞাণং নাম. সেসং সব্বত্থ সুৰিঞ্ঞেয্যমেৰ. দ্ৰাচত্তালীসতিমং.

সুত্তন্তিকদুকমাতিকত্থৰণ্ণনা নিট্ঠিতা.

মোহৰিচ্ছেদনিযা অভিধম্মমাতিকত্থৰণ্ণনায

ধম্মসঙ্গণীমাতিকত্থৰণ্ণনা নিট্ঠিতা.