১. রাগৰিরাগসুত্তং

৪১. সাৰত্থিনিদানং. ‘‘সচে ৰো, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘কিমত্থিযং, আৰুসো, সমণে গোতমে ব্রহ্মচরিযং ৰুস্সতী’তি, এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘রাগৰিরাগত্থং খো, আৰুসো, ভগৰতি ব্রহ্মচরিযং ৰুস্সতী’তি. সচে পন ৰো, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘অত্থি পনাৰুসো, মগ্গো, অত্থি পটিপদা রাগৰিরাগাযা’তি, এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘অত্থি খো, আৰুসো, মগ্গো, অত্থি পটিপদা রাগৰিরাগাযা’তি. কতমো চ, ভিক্খৰে, মগ্গো, কতমা চ পটিপদা রাগৰিরাগায? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং, ভিক্খৰে, মগ্গো, অযং পটিপদা রাগৰিরাগাযাতি. এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথা’’তি. পঠমং.