২. দুতিযৰগ্গো

১. অসঙ্খতসুত্তং

৩৭৭. ‘‘অসঙ্খতঞ্চ ৰো, ভিক্খৰে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৰে, অসঙ্খতং? যো, ভিক্খৰে, রাগক্খযো দোসক্খযো মোহক্খযো – ইদং ৰুচ্চতি, ভিক্খৰে, অসঙ্খতং. কতমো চ, ভিক্খৰে, অসঙ্খতগামিমগ্গো? সমথো. অযং ৰুচ্চতি, ভিক্খৰে, অসঙ্খতগামিমগ্গো. ইতি খো, ভিক্খৰে, দেসিতং ৰো মযা অসঙ্খতং, দেসিতো অসঙ্খতগামিমগ্গো. যং, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ, ভিক্খৰে, মা পমাদত্থ; মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনীতি.

‘‘অসঙ্খতঞ্চ ৰো, ভিক্খৰে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৰে, অসঙ্খতং? যো, ভিক্খৰে, রাগক্খযো দোসক্খযো মোহক্খযো – ইদং ৰুচ্চতি, ভিক্খৰে, অসঙ্খতং. কতমো চ, ভিক্খৰে, অসঙ্খতগামিমগ্গো? ৰিপস্সনা. অযং ৰুচ্চতি, ভিক্খৰে, অসঙ্খতগামিমগ্গো. ইতি খো, ভিক্খৰে, দেসিতং ৰো মযা অসঙ্খতং…পে… অযং ৰো অম্হাকং অনুসাসনীতি.

‘‘কতমো চ, ভিক্খৰে, অসঙ্খতগামিমগ্গো? সৰিতক্কো সৰিচারো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? অৰিতক্কো ৰিচারমত্তো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? অৰিতক্কো অৰিচারো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? সুঞ্ঞতো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? অনিমিত্তো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? অপ্পণিহিতো সমাধি. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ৰেদনাসু ৰেদনানুপস্সী ৰিহরতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু চিত্তে চিত্তানুপস্সী…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ধম্মেসু ধম্মানুপস্সী ৰিহরতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু উপ্পন্নানং পাপকানং অকুসলানং ধম্মানং পহানা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু অনুপ্পন্নানং কুসলানং ধম্মানং উপ্পাদা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি. অযং ৰুচ্চতি, ভিক্খৰে, অসঙ্খতগামিমগ্গো …পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ৰীরিযসমাধিপধানসঙ্খারসমন্নাগতং ইদ্ধিপাদং ভাৰেতি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু চিত্তসমাধিপধানসঙ্খারসমন্নাগতং ইদ্ধিপাদং ভাৰেতি. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ৰীমংসসমাধিপধানসঙ্খারসমন্নাগতং ইদ্ধিপাদং ভাৰেতি. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সদ্ধিন্দ্রিযং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ৰীরিযিন্দ্রিযং ভাৰেতি ৰিৰেকনিস্সিতং…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সতিন্দ্রিযং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সমাধিন্দ্রিযং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু পঞ্ঞিন্দ্রিযং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সদ্ধাবলং ভাৰেতি ৰিৰেকনিস্সিতং…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ৰীরিযবলং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সতিবলং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সমাধিবলং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু পঞ্ঞাবলং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সতিসম্বোজ্ঝঙ্গং ভাৰেতি…পে… অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু ধম্মৰিচযসম্বোজ্ঝঙ্গং ভাৰেতি…পে… ৰীরিযসম্বোজ্ঝঙ্গং ভাৰেতি…পে… পীতিসম্বোজ্ঝঙ্গং ভাৰেতি…পে… পস্সদ্ধিসম্বোজ্ঝঙ্গং ভাৰেতি…পে… সমাধিসম্বোজ্ঝঙ্গং ভাৰেতি…পে… উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো…পে….

‘‘কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সম্মাদিট্ঠিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো…পে… কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সম্মাসঙ্কপ্পং ভাৰেতি …পে… সম্মাৰাচং ভাৰেতি…পে… সম্মাকম্মন্তং ভাৰেতি…পে… সম্মাআজীৰং ভাৰেতি…পে… সম্মাৰাযামং ভাৰেতি…পে… সম্মাসতিং ভাৰেতি…পে… অসঙ্খতঞ্চ ৰো ভিক্খৰে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৰে, অসঙ্খতং…পে…? কতমো চ, ভিক্খৰে, অসঙ্খতগামিমগ্গো? ইধ, ভিক্খৰে, ভিক্খু সম্মাসমাধিং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং. অযং ৰুচ্চতি, ভিক্খৰে, অসঙ্খতগামিমগ্গো. ইতি খো, ভিক্খৰে, দেসিতং ৰো মযা অসঙ্খতং, দেসিতো অসঙ্খতগামিমগ্গো. যং, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ, ভিক্খৰে, মা পমাদত্থ; মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. পঠমং.

২. অনতসুত্তং

৩৭৮. ‘‘অনতঞ্চ ৰো, ভিক্খৰে, দেসেস্সামি, অনতগামিঞ্চ মগ্গং. তং সুণাথ. কতমঞ্চ, ভিক্খৰে, অনতং…পে…’’. (যথা অসঙ্খতং তথা ৰিত্থারেতব্বং). দুতিযং.

৩-৩২. অনাসৰাদিসুত্তং

৩৭৯-৪০৮. ‘‘অনাসৰঞ্চ ৰো, ভিক্খৰে, দেসেস্সামি অনাসৰগামিঞ্চ মগ্গং. তং সুণাথ. কতমঞ্চ, ভিক্খৰে, অনাসৰং…পে… সচ্চঞ্চ ৰো, ভিক্খৰে, দেসেস্সামি সচ্চগামিঞ্চ মগ্গং. তং সুণাথ. কতমঞ্চ, ভিক্খৰে, সচ্চং…পে… পারঞ্চ ৰো, ভিক্খৰে, দেসেস্সামি পারগামিঞ্চ মগ্গং. তং সুণাথ. কতমঞ্চ, ভিক্খৰে, পারং…পে… নিপুণঞ্চ ৰো, ভিক্খৰে, দেসেস্সামি নিপুণগামিঞ্চ মগ্গং. তং সুণাথ. কতমঞ্চ, ভিক্খৰে, নিপুণং…পে… সুদুদ্দসঞ্চ ৰো, ভিক্খৰে, দেসেস্সামি সুদুদ্দসগামিঞ্চ মগ্গং. তং সুণাথ. কতমঞ্চ, ভিক্খৰে, সুদুদ্দসং…পে… অজজ্জরঞ্চ ৰো, ভিক্খৰে, দেসেস্সামি অজজ্জরগামিঞ্চ মগ্গং. তং সুণাথ. কতমঞ্চ, ভিক্খৰে, অজজ্জরং…পে… ধুৰঞ্চ ৰো, ভিক্খৰে, দেসেস্সামি ধুৰগামিঞ্চ মগ্গং. তং সুণাথ. কতমঞ্চ, ভিক্খৰে, ধুৰং…পে… অপলোকিতঞ্চ ৰো, ভিক্খৰে, দেসেস্সামি অপলোকিতগামিঞ্চ মগ্গং. তং সুণাথ. কতমঞ্চ, ভিক্খৰে, অপলোকিতং…পে… অনিদস্সনঞ্চ ৰো, ভিক্খৰে, দেসেস্সামি অনিদস্সনগামিঞ্চ মগ্গং. তং সুণাথ. কতমঞ্চ, ভিক্খৰে, অনিদস্সনং…পে… নিপ্পপঞ্চঞ্চ ৰো, ভিক্খৰে, দেসেস্সামি নিপ্পপঞ্চগামিঞ্চ মগ্গং. তং সুণাথ. কতমঞ্চ, ভিক্খৰে, নিপ্পপঞ্চং…পে…?

‘‘সন্তঞ্চ ৰো, ভিক্খৰে, দেসেস্সামি সন্তগামিঞ্চ মগ্গং. তং সুণাথ. কতমঞ্চ, ভিক্খৰে, সন্তং…পে… অমতঞ্চ ৰো, ভিক্খৰে, দেসেস্সামি অমতগামিঞ্চ মগ্গং. তং সুণাথ. কতমঞ্চ, ভিক্খৰে, অমতং…পে… পণীতঞ্চ ৰো, ভিক্খৰে, দেসেস্সামি পণীতগামিঞ্চ মগ্গং. তং সুণাথ. কতমঞ্চ, ভিক্খৰে, পণীতং…পে… সিৰঞ্চ ৰো, ভিক্খৰে, দেসেস্সামি সিৰগামিঞ্চ মগ্গং. তং সুণাথ. কতমঞ্চ, ভিক্খৰে, সিৰং…পে… খেমঞ্চ ৰো, ভিক্খৰে, দেসেস্সামি খেমগামিঞ্চ মগ্গং. তং সুণাথ. কতমঞ্চ, ভিক্খৰে, খেমং…পে… তণ্হাক্খযঞ্চ ৰো, ভিক্খৰে, দেসেস্সামি তণ্হাক্খযগামিঞ্চ মগ্গং. তং সুণাথ. কতমঞ্চ, ভিক্খৰে, তণ্হাক্খযং…পে…?

‘‘অচ্ছরিযঞ্চ ৰো, ভিক্খৰে, দেসেস্সামি অচ্ছরিযগামিঞ্চ মগ্গং. তং সুণাথ. কতমঞ্চ, ভিক্খৰে, অচ্ছরিযং…পে… অব্ভুতঞ্চ ৰো, ভিক্খৰে, দেসেস্সামি অব্ভুতগামিঞ্চ মগ্গং. তং সুণাথ. কতমঞ্চ, ভিক্খৰে, অব্ভুতং…পে… অনীতিকঞ্চ ৰো, ভিক্খৰে, দেসেস্সামি অনীতিকগামিঞ্চ মগ্গং. তং সুণাথ. কতমঞ্চ, ভিক্খৰে, অনীতিকং…পে… অনীতিকধম্মঞ্চ ৰো, ভিক্খৰে, দেসেস্সামি অনীতিকধম্মগামিঞ্চ মগ্গং. তং সুণাথ. কতমঞ্চ, ভিক্খৰে, অনীতিকধম্মং…পে… নিব্বানঞ্চ ৰো, ভিক্খৰে, দেসেস্সামি নিব্বানগামিঞ্চ মগ্গং. তং সুণাথ. কতমঞ্চ, ভিক্খৰে, নিব্বানং…পে… অব্যাপজ্ঝঞ্চ [অব্যাপজ্ঝঞ্চ (সী. স্যা. কং. পী.)] ৰো, ভিক্খৰে, দেসেস্সামি অব্যাপজ্ঝগামিঞ্চ মগ্গং. তং সুণাথ. কতমঞ্চ, ভিক্খৰে, অব্যাপজ্ঝং…পে… ৰিরাগঞ্চ ৰো, ভিক্খৰে, দেসেস্সামি ৰিরাগগামিঞ্চ মগ্গং. তং সুণাথ. কতমো চ, ভিক্খৰে, ৰিরাগো…পে…?

‘‘সুদ্ধিঞ্চ ৰো, ভিক্খৰে, দেসেস্সামি সুদ্ধিগামিঞ্চ মগ্গং. তং সুণাথ. কতমা চ, ভিক্খৰে, সুদ্ধি…পে… মুত্তিঞ্চ ৰো, ভিক্খৰে, দেসেস্সামি মুত্তিগামিঞ্চ মগ্গং. তং সুণাথ. কতমা চ, ভিক্খৰে, মুত্তি…পে… অনালযঞ্চ ৰো, ভিক্খৰে, দেসেস্সামি অনালযগামিঞ্চ মগ্গং. তং সুণাথ. কতমো চ, ভিক্খৰে, অনালযো…পে… দীপঞ্চ ৰো, ভিক্খৰে, দেসেস্সামি দীপগামিঞ্চ মগ্গং. তং সুণাথ. কতমঞ্চ, ভিক্খৰে, দীপং…পে… লেণঞ্চ ৰো, ভিক্খৰে, দেসেস্সামি লেণগামিঞ্চ মগ্গং. তং সুণাথ. কতমঞ্চ, ভিক্খৰে, লেণং…পে… তাণঞ্চ ৰো, ভিক্খৰে, দেসেস্সামি তাণগামিঞ্চ মগ্গং. তং সুণাথ. কতমঞ্চ, ভিক্খৰে, তাণং…পে… সরণঞ্চ ৰো, ভিক্খৰে, দেসেস্সামি সরণগামিঞ্চ মগ্গং. তং সুণাথ. কতমঞ্চ, ভিক্খৰে, সরণং…পে…অনুসাসনী’’তি? বাত্তিংসতিমং.

৩৩. পরাযনসুত্তং

৪০৯. ‘‘পরাযনঞ্চ [পরাযণঞ্চ (পী. সী. অট্ঠ.)] ৰো, ভিক্খৰে, দেসেস্সামি পরাযনগামিঞ্চ মগ্গং. তং সুণাথ. কতমঞ্চ, ভিক্খৰে, পরাযনং? যো, ভিক্খৰে, রাগক্খযো দোসক্খযো মোহক্খযো – ইদং ৰুচ্চতি, ভিক্খৰে, পরাযনং. কতমো চ, ভিক্খৰে, পরাযনগামী মগ্গো? কাযগতাসতি. অযং ৰুচ্চতি, ভিক্খৰে, পরাযনগামিমগ্গো. ইতি খো, ভিক্খৰে, দেসিতং ৰো মযা পরাযনং, দেসিতো পরাযনগামিমগ্গো. যং, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ, ভিক্খৰে, মা পমাদত্থ; মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. (যথা অসঙ্খতং তথা ৰিত্থারেতব্বং). তেত্তিংসতিমং.

দুতিযো ৰগ্গো.

তস্সুদ্দানং –

অসঙ্খতং অনতং অনাসৰং, সচ্চঞ্চ পারং নিপুণং সুদুদ্দসং;

অজজ্জরং ধুৰং অপলোকিতং, অনিদস্সনং নিপ্পপঞ্চ সন্তং.

অমতং পণীতঞ্চ সিৰঞ্চ খেমং, তণ্হাক্খযো অচ্ছরিযঞ্চ অব্ভুতং;

অনীতিকং অনীতিকধম্মং, নিব্বানমেতং সুগতেন দেসিতং.

অব্যাপজ্ঝো ৰিরাগো চ, সুদ্ধি মুত্তি অনালযো;

দীপো লেণঞ্চ তাণঞ্চ, সরণঞ্চ পরাযনন্তি.

অসঙ্খতসংযুত্তং সমত্তং.