১. পঠমৰগ্গো

১. কাযগতাসতিসুত্তং

৩৬৬. সাৰত্থিনিদানং. ‘‘অসঙ্খতঞ্চ ৰো, ভিক্খৰে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৰে, অসঙ্খতং? যো, ভিক্খৰে, রাগক্খযো দোসক্খযো মোহক্খযো – ইদং ৰুচ্চতি, ভিক্খৰে, অসঙ্খতং. কতমো চ, ভিক্খৰে, অসঙ্খতগামিমগ্গো? কাযগতাসতি. অযং ৰুচ্চতি, ভিক্খৰে, অসঙ্খতগামিমগ্গো’’.

‘‘ইতি খো, ভিক্খৰে, দেসিতং ৰো মযা অসঙ্খতং, দেসিতো অসঙ্খতগামিমগ্গো. যং, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ [নিজ্ঝাযথ (ক.)], ভিক্খৰে, মা পমাদত্থ; মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. পঠমং.

২. সমথৰিপস্সনাসুত্তং

৩৬৭. ‘‘অসঙ্খতঞ্চ ৰো, ভিক্খৰে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৰে, অসঙ্খতং? যো, ভিক্খৰে, রাগক্খযো দোসক্খযো মোহক্খযো – ইদং ৰুচ্চতি, ভিক্খৰে, অসঙ্খতং. কতমো চ, ভিক্খৰে, অসঙ্খতগামিমগ্গো? সমথো চ ৰিপস্সনা চ. অযং ৰুচ্চতি, ভিক্খৰে, অসঙ্খতগামিমগ্গো…পে…. দুতিযং.

৩. সৰিতক্কসৰিচারসুত্তং

৩৬৮. ‘‘কতমো চ, ভিক্খৰে, অসঙ্খতগামিমগ্গো? সৰিতক্কসৰিচারো সমাধি, অৰিতক্কৰিচারমত্তো সমাধি, অৰিতক্কঅৰিচারো সমাধি – অযং ৰুচ্চতি, ভিক্খৰে, অসঙ্খতগামিমগ্গো…পে…. ততিযং.

৪. সুঞ্ঞতসমাধিসুত্তং

৩৬৯. ‘‘কতমো চ, ভিক্খৰে, অসঙ্খতগামিমগ্গো? সুঞ্ঞতো সমাধি, অনিমিত্তো সমাধি, অপ্পণিহিতো সমাধি – অযং ৰুচ্চতি, ভিক্খৰে, অসঙ্খতগামিমগ্গো…পে…. চতুত্থং.

৫. সতিপট্ঠানসুত্তং

৩৭০. ‘‘কতমো চ, ভিক্খৰে, অসঙ্খতগামিমগ্গো? চত্তারো সতিপট্ঠানা. অযং ৰুচ্চতি, ভিক্খৰে, অসঙ্খতগামিমগ্গো…পে…. পঞ্চমং.

৬. সম্মপ্পধানসুত্তং

৩৭১. ‘‘কতমো চ, ভিক্খৰে, অসঙ্খতগামিমগ্গো? চত্তারো সম্মপ্পধানা. অযং ৰুচ্চতি, ভিক্খৰে, অসঙ্খতগামিমগ্গো…পে…. ছট্ঠং.

৭. ইদ্ধিপাদসুত্তং

৩৭২. ‘‘কতমো চ, ভিক্খৰে, অসঙ্খতগামিমগ্গো? চত্তারো ইদ্ধিপাদা. অযং ৰুচ্চতি, ভিক্খৰে, অসঙ্খতগামিমগ্গো…পে…. সত্তমং.

৮. ইন্দ্রিযসুত্তং

৩৭৩. ‘‘কতমো চ, ভিক্খৰে, অসঙ্খতগামিমগ্গো? পঞ্চিন্দ্রিযানি. অযং ৰুচ্চতি, ভিক্খৰে, অসঙ্খতগামিমগ্গো…পে…. অট্ঠমং.

৯. বলসুত্তং

৩৭৪. ‘‘কতমো চ, ভিক্খৰে, অসঙ্খতগামিমগ্গো? পঞ্চ বলানি. অযং ৰুচ্চতি, ভিক্খৰে, অসঙ্খতগামিমগ্গো…পে…. নৰমং.

১০. বোজ্ঝঙ্গসুত্তং

৩৭৫. ‘‘কতমো চ, ভিক্খৰে, অসঙ্খতগামিমগ্গো? সত্ত বোজ্ঝঙ্গা. অযং ৰুচ্চতি, ভিক্খৰে, অসঙ্খতগামিমগ্গো…পে…. দসমং.

১১. মগ্গঙ্গসুত্তং

৩৭৬. ‘‘কতমো চ, ভিক্খৰে, অসঙ্খতগামিমগ্গো? অরিযো অট্ঠঙ্গিকো মগ্গো. অযং ৰুচ্চতি, ভিক্খৰে, অসঙ্খতগামিমগ্গো. ইতি খো, ভিক্খৰে, দেসিতং ৰো মযা অসঙ্খতং, দেসিতো অসঙ্খতগামিমগ্গো. যং, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ, ভিক্খৰে, মা পমাদত্থ; মা পচ্ছা ৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. একাদসমং.

পঠমো ৰগ্গো.

তস্সুদ্দানং –

কাযো সমথো সৰিতক্কো, সুঞ্ঞতো সতিপট্ঠানা;

সম্মপ্পধানা ইদ্ধিপাদা, ইন্দ্রিযবলবোজ্ঝঙ্গা;

মগ্গেন একাদসমং, তস্সুদ্দানং পৰুচ্চতি.