১২. রাসিযসুত্তং

৩৬৪. অথ খো রাসিযো গামণি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো রাসিযো গামণি ভগৰন্তং এতদৰোচ – ‘‘সুতং মেতং, ভন্তে, ‘সমণো গোতমো সব্বং তপং গরহতি, সব্বং তপস্সিং লূখজীৰিং একংসেন উপৰদতি উপক্কোসতী’তি [উপক্কোসতি উপৰদতীতি (দী. নি. ১.৩৮১)]. যে তে, ভন্তে, এৰমাহংসু – ‘সমণো গোতমো সব্বং তপং গরহতি, সব্বং তপস্সিং লূখজীৰিং একংসেন উপৰদতি উপক্কোসতী’তি, কচ্চি তে, ভন্তে, ভগৰতো ৰুত্তৰাদিনো, ন চ ভগৰন্তং অভূতেন অব্ভাচিক্খন্তি, ধম্মস্স চানুধম্মং ব্যাকরোন্তি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’তি? ‘‘যে তে, গামণি, এৰমাহংসু – ‘সমণো গোতমো সব্বং তপং গরহতি, সব্বং তপস্সিং লূখজীৰিং একংসেন উপৰদতি উপক্কোসতী’তি, ন মে তে ৰুত্তৰাদিনো, অব্ভাচিক্খন্তি চ পন মং তে অসতা তুচ্ছা অভূতেন’’.

‘‘দ্ৰেমে, গামণি, অন্তা পব্বজিতেন ন সেৰিতব্বা – যো চাযং কামেসু কামসুখল্লিকানুযোগো হীনো গম্মো পোথুজ্জনিকো অনরিযো অনত্থসংহিতো, যো চাযং অত্তকিলমথানুযোগো দুক্খো অনরিযো অনত্থসংহিতো. এতে তে, গামণি, উভো অন্তে অনুপগম্ম মজ্ঝিমা পটিপদা তথাগতেন অভিসম্বুদ্ধা – চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততি. কতমা চ সা, গামণি, মজ্ঝিমা পটিপদা তথাগতেন অভিসম্বুদ্ধা – চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততি? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং খো সা, গামণি, মজ্ঝিমা পটিপদা তথাগতেন অভিসম্বুদ্ধা – চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততি.

‘‘তযো খো মে, গামণি, কামভোগিনো সন্তো সংৰিজ্জমানা লোকস্মিং. কতমে তযো? ইধ, গামণি, একচ্চো কামভোগী অধম্মেন ভোগে পরিযেসতি, সাহসেন অধম্মেন ভোগে পরিযেসিত্ৰা সাহসেন ন অত্তানং সুখেতি ন পীণেতি ন সংৰিভজতি ন পুঞ্ঞানি করোতি. ইধ পন, গামণি, একচ্চো কামভোগী অধম্মেন ভোগে পরিযেসতি সাহসেন. অধম্মেন ভোগে পরিযেসিত্ৰা সাহসেন অত্তানং সুখেতি পীণেতি, ন সংৰিভজতি ন পুঞ্ঞানি করোতি. ইধ পন, গামণি, একচ্চো কামভোগী অধম্মেন ভোগে পরিযেসতি সাহসেন. অধম্মেন ভোগে পরিযেসিত্ৰা সাহসেন অত্তানং সুখেতি পীণেতি সংৰিভজতি পুঞ্ঞানি করোতি.

‘‘ইধ পন, গামণি, একচ্চো কামভোগী ধম্মাধম্মেন ভোগে পরিযেসতি সাহসেনপি অসাহসেনপি. ধম্মাধম্মেন ভোগে পরিযেসিত্ৰা সাহসেনপি অসাহসেনপি ন অত্তানং সুখেতি, ন পীণেতি, ন সংৰিভজতি, ন পুঞ্ঞানি করোতি. ইধ পন, গামণি, একচ্চো কামভোগী ধম্মাধম্মেন ভোগে পরিযেসতি সাহসেনপি অসাহসেনপি. ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি, ন সংৰিভজতি, ন পুঞ্ঞানি করোতি. ইধ পন, গামণি, একচ্চো কামভোগী ধম্মাধম্মেন ভোগে পরিযেসতি, সাহসেনপি অসাহসেনপি. ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি সংৰিভজতি পুঞ্ঞানি করোতি.

‘‘ইধ পন, গামণি, একচ্চো কামভোগী ধম্মেন ভোগে পরিযেসতি অসাহসেন. ধম্মেন ভোগে পরিযেসিত্ৰা অসাহসেন ন অত্তানং সুখেতি, ন পীণেতি, ন সংৰিভজতি, ন পুঞ্ঞানি করোতি. ইধ পন, গামণি, একচ্চো কামভোগী ধম্মেন ভোগে পরিযেসতি অসাহসেন. ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি, ন সংৰিভজতি, ন পুঞ্ঞানি করোতি. ইধ পন, গামণি, একচ্চো কামভোগী ধম্মেন ভোগে পরিযেসতি অসাহসেন. ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি. তে চ ভোগে গধিতো [গথিতো (সী.)] মুচ্ছিতো অজ্ঝোপন্নো অনাদীনৰদস্সাৰী অনিস্সরণপঞ্ঞো পরিভুঞ্জতি. ইধ পন, গামণি, একচ্চো কামভোগী ধম্মেন ভোগে পরিযেসতি অসাহসেন. ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি. তে চ ভোগে অগধিতো অমুচ্ছিতো অনজ্ঝোপন্নো আদীনৰদস্সাৰী নিস্সরণপঞ্ঞো পরিভুঞ্জতি.

‘‘তত্র, গামণি, য্ৰাযং কামভোগী অধম্মেন ভোগে পরিযেসতি সাহসেন, অধম্মেন ভোগে পরিযেসিত্ৰা সাহসেন ন অত্তানং সুখেতি, ন পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী তীহি ঠানেহি গারয্হো. কতমেহি তীহি ঠানেহি গারয্হো? অধম্মেন ভোগে পরিযেসতি সাহসেনাতি, ইমিনা পঠমেন ঠানেন গারয্হো. ন অত্তানং সুখেতি ন পীণেতীতি, ইমিনা দুতিযেন ঠানেন গারয্হো. ন সংৰিভজতি, ন পুঞ্ঞানি করোতীতি, ইমিনা ততিযেন ঠানেন গারয্হো. অযং, গামণি, কামভোগী ইমেহি তীহি ঠানেহি গারয্হো.

‘‘তত্র, গামণি, য্ৰাযং কামভোগী অধম্মেন ভোগে পরিযেসতি সাহসেন, অধম্মেন ভোগে পরিযেসিত্ৰা সাহসেন অত্তানং সুখেতি পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী দ্ৰীহি ঠানেহি গারয্হো, একেন ঠানেন পাসংসো. কতমেহি দ্ৰীহি ঠানেহি গারয্হো? অধম্মেন ভোগে পরিযেসতি সাহসেনাতি, ইমিনা পঠমেন ঠানেন গারয্হো. ন সংৰিভজতি, ন পুঞ্ঞানি করোতীতি, ইমিনা দুতিযেন ঠানেন গারয্হো. কতমেন একেন ঠানেন পাসংসো? অত্তানং সুখেতি পীণেতীতি, ইমিনা একেন ঠানেন পাসংসো. অযং, গামণি, কামভোগী ইমেহি দ্ৰীহি ঠানেহি গারয্হো, ইমিনা একেন ঠানেন পাসংসো.

‘‘তত্র, গামণি, য্ৰাযং কামভোগী অধম্মেন ভোগে পরিযেসতি সাহসেন, অধম্মেন ভোগে পরিযেসিত্ৰা সাহসেন অত্তানং সুখেতি পীণেতি সংৰিভজতি পুঞ্ঞানি করোতি. অযং, গামণি, কামভোগী একেন ঠানেন গারয্হো, দ্ৰীহি ঠানেহি পাসংসো. কতমেন একেন ঠানেন গারয্হো? অধম্মেন ভোগে পরিযেসতি সাহসেনাতি, ইমিনা একেন ঠানেন গারয্হো. কতমেহি দ্ৰীহি ঠানেহি পাসংসো? অত্তানং সুখেতি পীণেতীতি, ইমিনা পঠমেন ঠানেন পাসংসো. সংৰিভজতি পুঞ্ঞানি করোতীতি, ইমিনা দুতিযেন ঠানেন পাসংসো. অযং, গামণি, কামভোগী, ইমিনা একেন ঠানেন গারয্হো, ইমেহি দ্ৰীহি ঠানেহি পাসংসো.

‘‘তত্র, গামণি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি ন অত্তানং সুখেতি, ন পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী একেন ঠানেন পাসংসো, তীহি ঠানেহি গারয্হো. কতমেন একেন ঠানেন পাসংসো? ধম্মেন ভোগে পরিযেসতি অসাহসেনাতি, ইমিনা একেন ঠানেন পাসংসো. কতমেহি তীহি ঠানেহি গারয্হো? অধম্মেন ভোগে পরিযেসতি সাহসেনাতি, ইমিনা পঠমেন ঠানেন গারয্হো. ন অত্তানং সুখেতি, ন পীণেতীতি, ইমিনা দুতিযেন ঠানেন গারয্হো. ন সংৰিভজতি, ন পুঞ্ঞানি করোতীতি, ইমিনা ততিযেন ঠানেন গারয্হো. অযং, গামণি, কামভোগী ইমিনা একেন ঠানেন পাসংসো, ইমেহি তীহি ঠানেহি গারয্হো.

‘‘তত্র, গামণি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী দ্ৰীহি ঠানেহি পাসংসো, দ্ৰীহি ঠানেহি গারয্হো. কতমেহি দ্ৰীহি ঠানেহি পাসংসো? ধম্মেন ভোগে পরিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. কতমেহি দ্ৰীহি ঠানেহি গারয্হো? অধম্মেন ভোগে পরিযেসতি সাহসেনাতি, ইমিনা পঠমেন ঠানেন গারয্হো. ন সংৰিভজতি, ন পুঞ্ঞানি করোতীতি, ইমিনা দুতিযেন ঠানেন গারয্হো. অযং, গামণি, কামভোগী ইমেহি দ্ৰীহি ঠানেহি পাসংসো, ইমেহি দ্ৰীহি ঠানেহি গারয্হো.

‘‘তত্র, গামণি, য্ৰাযং কামভোগী ধম্মাধম্মেন ভোগে পরিযেসতি সাহসেনপি অসাহসেনপি, ধম্মাধম্মেন ভোগে পরিযেসিত্ৰা সাহসেনপি অসাহসেনপি অত্তানং সুখেতি পীণেতি সংৰিভজতি পুঞ্ঞানি করোতি. অযং, গামণি, কামভোগী তীহি ঠানেহি পাসংসো, একেন ঠানেন গারয্হো. কতমেহি তীহি ঠানেহি পাসংসো? ধম্মেন ভোগে পরিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৰিভজতি পুঞ্ঞানি করোতীতি, ইমিনা ততিযেন ঠানেন পাসংসো. কতমেন একেন ঠানেন গারয্হো? অধম্মেন ভোগে পরিযেসতি সাহসেনাতি, ইমিনা একেন ঠানেন গারয্হো. অযং, গামণি, কামভোগী ইমেহি তীহি ঠানেহি পাসংসো, ইমিনা একেন ঠানেন গারয্হো.

‘‘তত্র, গামণি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন, ন অত্তানং সুখেতি, ন পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী একেন ঠানেন পাসংসো, দ্ৰীহি ঠানেহি গারয্হো. কতমেন একেন ঠানেন পাসংসো? ধম্মেন ভোগে পরিযেসতি অসাহসেনাতি, ইমিনা একেন ঠানেন পাসংসো. কতমেহি দ্ৰীহি ঠানেহি গারয্হো? ন অত্তানং সুখেতি, ন পীণেতীতি, ইমিনা পঠমেন ঠানেন গারয্হো. ন সংৰিভজতি, ন পুঞ্ঞানি করোতীতি, ইমিনা দুতিযেন ঠানেন গারয্হো. অযং, গামণি, কামভোগী ইমিনা একেন ঠানেন পাসংসো, ইমেহি দ্ৰীহি ঠানেহি গারয্হো.

‘‘তত্র, গামণি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি, ন সংৰিভজতি, ন পুঞ্ঞানি করোতি. অযং, গামণি, কামভোগী দ্ৰীহি ঠানেহি পাসংসো, একেন ঠানেন গারয্হো. কতমেহি দ্ৰীহি ঠানেহি পাসংসো? ধম্মেন ভোগে পরিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. কতমেন একেন ঠানেন গারয্হো? ন সংৰিভজতি, ন পুঞ্ঞানি করোতীতি, ইমিনা একেন ঠানেন গারয্হো. অযং, গামণি, কামভোগী ইমেহি দ্ৰীহি ঠানেহি পাসংসো, ইমিনা একেন ঠানেন গারয্হো.

‘‘তত্র, গামণি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি, তে চ ভোগে গধিতো মুচ্ছিতো অজ্ঝোপন্নো অনাদীনৰদস্সাৰী অনিস্সরণপঞ্ঞো পরিভুঞ্জতি. অযং, গামণি, কামভোগী তীহি ঠানেহি পাসংসো, একেন ঠানেন গারয্হো. কতমেহি তীহি ঠানেহি পাসংসো? ধম্মেন ভোগে পরিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৰিভজতি পুঞ্ঞানি করোতীতি, ইমিনা ততিযেন ঠানেন পাসংসো. কতমেন একেন ঠানেন গারয্হো? তে চ ভোগে গধিতো মুচ্ছিতো অজ্ঝোপন্নো অনাদীনৰদস্সাৰী অনিস্সরণপঞ্ঞো পরিভুঞ্জতীতি, ইমিনা একেন ঠানেন গারয্হো. অযং, গামণি, কামভোগী ইমেহি তীহি ঠানেহি পাসংসো, ইমিনা একেন ঠানেন গারয্হো.

‘‘তত্র, গামণি, য্ৰাযং কামভোগী ধম্মেন ভোগে পরিযেসতি অসাহসেন, ধম্মেন ভোগে পরিযেসিত্ৰা অসাহসেন অত্তানং সুখেতি পীণেতি সংৰিভজতি পুঞ্ঞানি করোতি. তে চ ভোগে অগধিতো অমুচ্ছিতো অনজ্ঝোপন্নো আদীনৰদস্সাৰী নিস্সরণপঞ্ঞো পরিভুঞ্জতি. অযং, গামণি, কামভোগী চতূহি ঠানেহি পাসংসো. কতমেহি চতূহি ঠানেহি পাসংসো? ধম্মেন ভোগে পরিযেসতি অসাহসেনাতি, ইমিনা পঠমেন ঠানেন পাসংসো. অত্তানং সুখেতি পীণেতীতি, ইমিনা দুতিযেন ঠানেন পাসংসো. সংৰিভজতি পুঞ্ঞানি করোতীতি, ইমিনা ততিযেন ঠানেন পাসংসো. তে চ ভোগে অগধিতো অমুচ্ছিতো অনজ্ঝোপন্নো আদীনৰদস্সাৰী নিস্সরণপঞ্ঞো পরিভুঞ্জতীতি, ইমিনা চতুত্থেন ঠানেন পাসংসো. অযং, গামণি, কামভোগী ইমেহি চতূহি ঠানেহি পাসংসো.

‘‘তযোমে, গামণি, তপস্সিনো লূখজীৰিনো সন্তো সংৰিজ্জমানা লোকস্মিং. কতমে তযো? ইধ, গামণি, একচ্চো তপস্সী লূখজীৰী সদ্ধা অগারস্মা অনগারিযং পব্বজিতো হোতি – ‘অপ্পেৰ নাম কুসলং ধম্মং অধিগচ্ছেয্যং, অপ্পেৰ নাম উত্তরিমনুস্সধম্মা অলমরিযঞাণদস্সনৰিসেসং সচ্ছিকরেয্য’ন্তি. সো অত্তানং আতাপেতি পরিতাপেতি, কুসলঞ্চ ধম্মং নাধিগচ্ছতি, উত্তরি চ মনুস্সধম্মা অলমরিযঞাণদস্সনৰিসেসং ন সচ্ছিকরোতি.

‘‘ইধ পন, গামণি, একচ্চো তপস্সী লূখজীৰী সদ্ধা অগারস্মা অনগারিযং পব্বজিতো হোতি – ‘অপ্পেৰ নাম কুসলং ধম্মং অধিগচ্ছেয্যং, অপ্পেৰ নাম উত্তরিমনুস্সধম্মা অলমরিযঞাণদস্সনৰিসেসং সচ্ছিকরেয্য’ন্তি. সো অত্তানং আতাপেতি পরিতাপেতি, কুসলঞ্হি খো ধম্মং অধিগচ্ছতি, উত্তরিমনুস্সধম্মা অলমরিযঞাণদস্সনৰিসেসং ন সচ্ছিকরোতি.

‘‘ইধ পন, গামণি, একচ্চো তপস্সী লূখজীৰী সদ্ধা অগারস্মা অনগারিযং পব্বজিতো হোতি – ‘অপ্পেৰ নাম কুসলং ধম্মং অধিগচ্ছেয্যং, অপ্পেৰ নাম উত্তরিমনুস্সধম্মা অলমরিযঞাণদস্সনৰিসেসং সচ্ছিকরেয্য’ন্তি. সো অত্তানং আতাপেতি পরিতাপেতি, কুসলঞ্চ ধম্মং অধিগচ্ছতি, উত্তরি চ মনুস্সধম্মা অলমরিযঞাণদস্সনৰিসেসং সচ্ছিকরোতি.

‘‘তত্র, গামণি, য্ৰাযং তপস্সী লূখজীৰী অত্তানং আতাপেতি পরিতাপেতি, কুসলঞ্চ ধম্মং নাধিগচ্ছতি, উত্তরি চ মনুস্সধম্মা অলমরিযঞাণদস্সনৰিসেসং ন সচ্ছিকরোতি. অযং, গামণি, তপস্সী লূখজীৰী তীহি ঠানেহি গারয্হো. কতমেহি তীহি ঠানেহি গারয্হো? অত্তানং আতাপেতি পরিতাপেতীতি, ইমিনা পঠমেন ঠানেন গারয্হো. কুসলঞ্চ ধম্মং নাধিগচ্ছতীতি, ইমিনা দুতিযেন ঠানেন গারয্হো. উত্তরি চ মনুস্সধম্মা অলমরিযঞাণদস্সনৰিসেসং ন সচ্ছিকরোতীতি, ইমিনা ততিযেন ঠানেন গারয্হো. অযং, গামণি, তপস্সী লূখজীৰী, ইমেহি তীহি ঠানেহি গারয্হো.

‘‘তত্র, গামণি, য্ৰাযং তপস্সী লূখজীৰী অত্তানং আতাপেতি পরিতাপেতি, কুসলঞ্হি খো ধম্মং অধিগচ্ছতি, উত্তরি চ মনুস্সধম্মা অলমরিযঞাণদস্সনৰিসেসং ন সচ্ছিকরোতি. অযং, গামণি, তপস্সী লূখজীৰী দ্ৰীহি ঠানেহি গারয্হো, একেন ঠানেন পাসংসো. কতমেহি দ্ৰীহি ঠানেহি গারয্হো? অত্তানং আতাপেতি পরিতাপেতীতি, ইমিনা পঠমেন ঠানেন গারয্হো. উত্তরি চ মনুস্সধম্মা অলমরিযঞাণদস্সনৰিসেসং ন সচ্ছিকরোতীতি, ইমিনা দুতিযেন ঠানেন গারয্হো. কতমেন একেন ঠানেন পাসংসো? কুসলঞ্হি খো ধম্মং অধিগচ্ছতীতি, ইমিনা একেন ঠানেন পাসংসো. অযং, গামণি, তপস্সী লূখজীৰী ইমেহি দ্ৰীহি ঠানেহি গারয্হো, ইমিনা একেন ঠানেন পাসংসো.

‘‘তত্র, গামণি, য্ৰাযং তপস্সী লূখজীৰী অত্তানং আতাপেতি পরিতাপেতি, কুসলঞ্চ ধম্মং অধিগচ্ছতি, উত্তরি চ মনুস্সধম্মা অলমরিযঞাণদস্সনৰিসেসং সচ্ছিকরোতি. অযং, গামণি, তপস্সী লূখজীৰী একেন ঠানেন গারয্হো, দ্ৰীহি ঠানেহি পাসংসো. কতমেন একেন ঠানেন গারয্হো? অত্তানং আতাপেতি পরিতাপেতীতি, ইমিনা একেন ঠানেন গারয্হো. কতমেহি দ্ৰীহি ঠানেহি পাসংসো? কুসলঞ্চ ধম্মং অধিগচ্ছতীতি, ইমিনা পঠমেন ঠানেন পাসংসো. উত্তরি চ মনুস্সধম্মা অলমরিযঞাণদস্সনৰিসেসং সচ্ছিকরোতীতি, ইমিনা দুতিযেন ঠানেন পাসংসো. অযং, গামণি, তপস্সী লূখজীৰী ইমিনা একেন ঠানেন গারয্হো, ইমেহি দ্ৰীহি ঠানেহি পাসংসো.

‘‘তিস্সো ইমা, গামণি, সন্দিট্ঠিকা নিজ্জরা অকালিকা এহিপস্সিকা ওপনেয্যিকা পচ্চত্তং ৰেদিতব্বা ৰিঞ্ঞূহি. কতমা তিস্সো? যং রত্তো রাগাধিকরণং অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি. রাগে পহীনে নেৰত্তব্যাবাধায চেতেতি, ন পরব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জরা অকালিকা এহিপস্সিকা ওপনেয্যিকা পচ্চত্তং ৰেদিতব্বা ৰিঞ্ঞূহি. যং দুট্ঠো দোসাধিকরণং অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি. দোসে পহীনে নেৰত্তব্যাবাধায চেতেতি, ন পরব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জরা অকালিকা এহিপস্সিকা ওপনেয্যিকা পচ্চত্তং ৰেদিতব্বা ৰিঞ্ঞূহি. যং মূল়্হো মোহাধিকরণং অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি. মোহে পহীনে নেৰত্তব্যাবাধায চেতেতি, ন পরব্যাবাধায চেতেতি, ন উভযব্যাবাধায চেতেতি. সন্দিট্ঠিকা নিজ্জরা অকালিকা এহিপস্সিকা ওপনেয্যিকা পচ্চত্তং ৰেদিতব্বা ৰিঞ্ঞূহি. ইমা খো, গামণি, তিস্সো সন্দিট্ঠিকা নিজ্জরা অকালিকা এহিপস্সিকা ওপনেয্যিকা পচ্চত্তং ৰেদিতব্বা ৰিঞ্ঞূহী’’তি.

এৰং ৰুত্তে, রাসিযো গামণি ভগৰন্তং এতদৰোচ – ‘‘অভিক্কন্তং, ভন্তে…পে… উপাসকং মং ভগৰা ধারেতু অজ্জতগ্গে পাণুপেতং সরণং গত’’ন্তি. দ্ৰাদসমং.