৪. মহকপাটিহারিযসুত্তং

৩৪৬. একং সমযং সম্বহুলা থেরা ভিক্খূ মচ্ছিকাসণ্ডে ৰিহরন্তি অম্বাটকৰনে. অথ খো চিত্তো গহপতি যেন থেরা ভিক্খূ তেনুপসঙ্কমি; উপসঙ্কমিত্ৰা থেরে ভিক্খূ অভিৰাদেত্ৰা একমন্তং নিসীদি. একমন্তং নিসিন্নো খো চিত্তো গহপতি থেরে ভিক্খূ এতদৰোচ – ‘‘অধিৰাসেন্তু মে, ভন্তে থেরা, স্ৰাতনায গোকুলে ভত্ত’’ন্তি. অধিৰাসেসুং খো থেরা ভিক্খূ তুণ্হীভাৰেন. অথ খো চিত্তো গহপতি থেরানং ভিক্খূনং অধিৰাসনং ৰিদিত্ৰা উট্ঠাযাসনা থেরে ভিক্খূ অভিৰাদেত্ৰা পদক্খিণং কত্ৰা পক্কামি. অথ খো থেরা ভিক্খূ তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন চিত্তস্স গহপতিনো গোকুলং তেনুপসঙ্কমিংসু; উপসঙ্কমিত্ৰা পঞ্ঞত্তে আসনে নিসীদিংসু.

অথ খো চিত্তো গহপতি থেরে ভিক্খূ পণীতেন সপ্পিপাযাসেন সহত্থা সন্তপ্পেসি সম্পৰারেসি. অথ খো থেরা ভিক্খূ ভুত্তাৰিনো ওনীতপত্তপাণিনো উট্ঠাযাসনা পক্কমিংসু. চিত্তোপি খো গহপতি ‘সেসকং ৰিস্সজ্জেথা’তি ৰত্ৰা থেরে ভিক্খূ পিট্ঠিতো পিট্ঠিতো অনুবন্ধি. তেন খো পন সমযেন উণ্হং হোতি কুথিতং [কুট্ঠিতং (সী. স্যা. কং. পী.)]; তে চ থেরা ভিক্খূ পৰেলিযমানেন মঞ্ঞে কাযেন গচ্ছন্তি, যথা তং ভোজনং ভুত্তাৰিনো.

তেন খো পন সমযেন আযস্মা মহকো তস্মিং ভিক্খুসঙ্ঘে সব্বনৰকো হোতি. অথ খো আযস্মা মহকো আযস্মন্তং থেরং এতদৰোচ – ‘‘সাধু খ্ৰস্স, ভন্তে থের, সীতকো চ ৰাতো ৰাযেয্য, অব্ভসম্পিলাপো [অব্ভসংবিলাপো (সী.), অব্ভসংৰিলাপো (পী.)] চ অস্স, দেৰো চ একমেকং ফুসাযেয্যা’’তি.

‘‘সাধু খ্ৰস্স, আৰুসো মহক, যং সীতকো চ ৰাতো ৰাযেয্য, অব্ভসম্পিলাপো চ অস্স, দেৰো চ একমেকং ফুসাযেয্যা’’তি. অথ খো আযস্মা মহকো তথারূপং ইদ্ধাভিসঙ্খারং অভিসঙ্খরি [অভিসঙ্খাসি (সী.)] যথা সীতকো চ ৰাতো ৰাযি, অব্ভসম্পিলাপো চ অস্স [আসি (?)], দেৰো চ একমেকং ফুসি. অথ খো চিত্তস্স গহপতিনো এতদহোসি – ‘‘যো খো ইমস্মিং ভিক্খুসঙ্ঘে সব্বনৰকো ভিক্খু তস্সাযং এৰরূপো ইদ্ধানুভাৰো’’তি. অথ খো আযস্মা মহকো আরামং সম্পাপুণিত্ৰা আযস্মন্তং থেরং এতদৰোচ – ‘‘অলমেত্তাৰতা, ভন্তে থেরা’’তি? ‘‘অলমেত্তাৰতা, আৰুসো মহক! কতমেত্তাৰতা, আৰুসো মহক! পূজিতমেত্তাৰতা, আৰুসো মহকা’’তি. অথ খো থেরা ভিক্খূ যথাৰিহারং অগমংসু. আযস্মাপি মহকো সকং ৰিহারং অগমাসি.

অথ খো চিত্তো গহপতি যেনাযস্মা মহকো তেনুপসঙ্কমি; উপসঙ্কমিত্ৰা আযস্মন্তং মহকং অভিৰাদেত্ৰা একমন্তং নিসীদি. একমন্তং নিসিন্নো খো চিত্তো গহপতি আযস্মন্তং মহকং এতদৰোচ – ‘‘সাধু মে, ভন্তে, অয্যো মহকো উত্তরিমনুস্সধম্মং ইদ্ধিপাটিহারিযং দস্সেতূ’’তি. ‘‘তেন হি ত্ৰং, গহপতি, আলিন্দে উত্তরাসঙ্গং পঞ্ঞপেত্ৰা তিণকলাপং ওকাসেহী’’তি. ‘‘এৰং, ভন্তে’’তি খো চিত্তো গহপতি আযস্মতো মহকস্স পটিস্সুত্ৰা আলিন্দে উত্তরাসঙ্গং পঞ্ঞপেত্ৰা তিণকলাপং ওকাসেসি. অথ খো আযস্মা মহকো ৰিহারং পৰিসিত্ৰা সূচিঘটিকং দত্ৰা তথারূপং ইদ্ধাভিসঙ্খারং অভিসঙ্খরি যথা তালচ্ছিগ্গল়েন চ অগ্গল়ন্তরিকায চ অচ্চি নিক্খমিত্ৰা তিণানি ঝাপেসি, উত্তরাসঙ্গং ন ঝাপেসি. অথ খো চিত্তো গহপতি উত্তরাসঙ্গং পপ্ফোটেত্ৰা সংৰিগ্গো লোমহট্ঠজাতো একমন্তং অট্ঠাসি. অথ খো আযস্মা মহকো ৰিহারা নিক্খমিত্ৰা চিত্তং গহপতিং এতদৰোচ – ‘‘অলমেত্তাৰতা, গহপতী’’তি?

‘‘অলমেত্তাৰতা, ভন্তে মহক! কতমেত্তাৰতা, ভন্তে, মহক! পূজিতমেত্তাৰতা, ভন্তে মহক! অভিরমতু, ভন্তে, অয্যো মহকো মচ্ছিকাসণ্ডে. রমণীযং অম্বাটকৰনং. অহং অয্যস্স মহকস্স উস্সুক্কং করিস্সামি চীৰরপিণ্ডপাতসেনাসনগিলানপ্পচ্চযভেসজ্জপরিক্খারান’’ন্তি. ‘‘কল্যাণং ৰুচ্চতি, গহপতী’’তি. অথ খো আযস্মা মহকো সেনাসনং সংসামেত্ৰা পত্তচীৰরমাদায মচ্ছিকাসণ্ডম্হা পক্কামি. যং মচ্ছিকাসণ্ডম্হা পক্কামি, তথা পক্কন্তোৰ অহোসি; ন পুন পচ্চাগচ্ছীতি. চতুত্থং.