৫. পঠমকামভূসুত্তং

৩৪৭. একং সমযং আযস্মা কামভূ মচ্ছিকাসণ্ডে ৰিহরতি অম্বাটকৰনে. অথ খো চিত্তো গহপতি যেনাযস্মা কামভূ তেনুপসঙ্কমি; উপসঙ্কমিত্ৰা আযস্মন্তং কামভুং অভিৰাদেত্ৰা একমন্তং নিসীদি. একমন্তং নিসিন্নং খো চিত্তং গহপতিং আযস্মা কামভূ এতদৰোচ –

‘‘ৰুত্তমিদং, গহপতি –

‘‘নেলঙ্গো সেতপচ্ছাদো, একারো ৰত্ততী রথো;

অনীঘং পস্স আযন্তং [অপ্পত্তং (স্যা. কং. ক.)], ছিন্নসোতং অবন্ধন’’ন্তি.

‘‘ইমস্স নু খো, গহপতি, সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি? ‘‘কিং নু খো এতং, ভন্তে, ভগৰতা ভাসিত’’ন্তি? ‘‘এৰং, গহপতী’’তি. ‘‘তেন হি, ভন্তে, মুহুত্তং আগমেহি যাৰস্স অত্থং পেক্খামী’’তি. অথ খো চিত্তো গহপতি মুহুত্তং তুণ্হী হুত্ৰা আযস্মন্তং কামভুং এতদৰোচ –

‘‘‘নেলঙ্গ’ন্তি খো, ভন্তে, সীলানমেতং অধিৰচনং. ‘সেতপচ্ছাদো’তি খো, ভন্তে, ৰিমুত্তিযা এতং অধিৰচনং. ‘একারো’তি খো, ভন্তে, সতিযা এতং অধিৰচনং. ‘ৰত্ততী’তি খো, ভন্তে, অভিক্কমপটিক্কমস্সেতং অধিৰচনং. ‘রথো’তি খো, ভন্তে, ইমস্সেতং চাতুমহাভূতিকস্স কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স. রাগো খো, ভন্তে, নীঘো, দোসো নীঘো, মোহো নীঘো. তে খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. তস্মা খীণাসৰো ভিক্খু ‘অনীঘো’তি ৰুচ্চতি. ‘আযন্ত’ন্তি খো, ভন্তে, অরহতো এতং অধিৰচনং. ‘সোতো’তি খো, ভন্তে, তণ্হাযেতং অধিৰচনং. সা খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. তস্মা খীণাসৰো ভিক্খু ‘ছিন্নসোতো’তি ৰুচ্চতি. রাগো খো, ভন্তে, বন্ধনং, দোসো বন্ধনং, মোহো বন্ধনং. তে খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. তস্মা খীণাসৰো ভিক্খু ‘অবন্ধনো’তি ৰুচ্চতি. ইতি খো, ভন্তে, যং তং ভগৰতা ৰুত্তং –

‘‘নেলঙ্গো সেতপচ্ছাদো, একারো ৰত্ততী রথো;

অনীঘং পস্স আযন্তং, ছিন্নসোতং অবন্ধন’’ন্তি.

‘‘ইমস্স খো, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি. ‘‘লাভা তে, গহপতি, সুলদ্ধং তে, গহপতি! যস্স তে গম্ভীরে বুদ্ধৰচনে পঞ্ঞাচক্খু কমতী’’তি. পঞ্চমং.