৭. ৰেদনাপঞ্হাসুত্তং

৩২০. ‘‘‘ৰেদনা, ৰেদনা’তি, আৰুসো সারিপুত্ত, ৰুচ্চতি. কতমা নু খো, আৰুসো, ৰেদনা’’তি? ‘‘তিস্সো ইমাৰুসো, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, আৰুসো, তিস্সো ৰেদনা’’তি. ‘‘অত্থি পনাৰুসো, মগ্গো অত্থি পটিপদা, এতাসং তিস্সন্নং ৰেদনানং পরিঞ্ঞাযা’’তি? ‘‘অত্থি খো, আৰুসো, মগ্গো অত্থি পটিপদা, এতাসং তিস্সন্নং ৰেদনানং পরিঞ্ঞাযা’’তি. ‘‘কতমো পনাৰুসো, মগ্গো কতমা পটিপদা, এতাসং তিস্সন্নং ৰেদনানং পরিঞ্ঞাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতাসং তিস্সন্নং ৰেদনানং পরিঞ্ঞায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি. অযং খো, আৰুসো, মগ্গো অযং পটিপদা, এতাসং তিস্সন্নং ৰেদনানং পরিঞ্ঞাযা’’তি. ‘‘ভদ্দকো, আৰুসো, মগ্গো ভদ্দিকা পটিপদা, এতাসং তিস্সন্নং ৰেদনানং পরিঞ্ঞায. অলঞ্চ পনাৰুসো সারিপুত্ত, অপ্পমাদাযা’’তি. সত্তমং.