৮. আসৰপঞ্হাসুত্তং

৩২১. ‘‘‘আসৰো, আসৰো’তি, আৰুসো সারিপুত্ত, ৰুচ্চতি. কতমো নু খো, আৰুসো, আসৰো’’তি? ‘‘তযো মে, আৰুসো, আসৰা. কামাসৰো, ভৰাসৰো, অৰিজ্জাসৰো – ইমে খো, আৰুসো, তযো আসৰা’’তি. ‘‘অত্থি পনাৰুসো, মগ্গো অত্থি পটিপদা এতেসং আসৰানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা এতেসং আসৰানং পহানাযা’’তি. ‘‘কতমো পনাৰুসো, মগ্গো কতমা পটিপদা এতেসং আসৰানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো এতেসং আসৰানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি. অযং খো, আৰুসো, মগ্গো অযং পটিপদা, এতেসং আসৰানং পহানাযা’’তি. ‘‘ভদ্দকো, আৰুসো, মগ্গো ভদ্দিকা পটিপদা, এতেসং আসৰানং পহানায. অলঞ্চ পনাৰুসো সারিপুত্ত, অপ্পমাদাযা’’তি. অট্ঠমং.