৬. চতুত্থসারিপুত্তকোট্ঠিকসুত্তং

৪১৫. একং সমযং আযস্মা চ সারিপুত্তো, আযস্মা চ মহাকোট্ঠিকো বারাণসিযং ৰিহরন্তি ইসিপতনে মিগদাযে. অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেনাযস্মা মহাকোট্ঠিকো তেনুপসঙ্কমি; উপসঙ্কমিত্ৰা আযস্মতা মহাকোট্ঠিকেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘কিং নু খো, আৰুসো কোট্ঠিক, হোতি তথাগতো পরং মরণা’তি…পে… ‘কিং পনাৰুসো, নেৰ হোতি ন ন হোতি তথাগতো পরং মরণা’তি ইতি পুট্ঠো সমানো – ‘এতম্পি খো, আৰুসো, অব্যাকতং ভগৰতা – নেৰ হোতি ন ন হোতি তথাগতো পরং মরণা’তি ৰদেসি’’. ‘‘কো নু খো, আৰুসো, হেতু, কো পচ্চযো, যেনেতং অব্যাকতং ভগৰতা’’তি?

‘‘রূপারামস্স খো, আৰুসো, রূপরতস্স রূপসম্মুদিতস্স রূপনিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি; ‘ন হোতি তথাগতো পরং মরণা’তিপিস্স হোতি; ‘হোতি চ ন চ হোতি তথাগতো পরং মরণা’তিপিস্স হোতি; ‘নেৰ হোতি ন ন হোতি তথাগতো পরং মরণা’তিপিস্স হোতি. ৰেদনারামস্স খো, আৰুসো, ৰেদনারতস্স ৰেদনাসম্মুদিতস্স, ৰেদনানিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি…পে… সঞ্ঞারামস্স খো, আৰুসো…পে… সঙ্খারারামস্স খো আৰুসো…পে… ৰিঞ্ঞাণারামস্স খো, আৰুসো, ৰিঞ্ঞাণরতস্স ৰিঞ্ঞাণসম্মুদিতস্স ৰিঞ্ঞাণনিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি…পে… ‘নেৰ হোতি ন ন হোতি তথাগতো পরং মরণা’তিপিস্স হোতি’’.

‘‘ন রূপারামস্স খো, আৰুসো, ন রূপরতস্স ন রূপসম্মুদিতস্স, রূপনিরোধং জানতো পস্সতো যথাভূতং, ‘হোতি তথাগতো পরং মরণা’তিপিস্স ন হোতি…পে… ‘নেৰ হোতি ন ন হোতি তথাগতো পরং মরণা’তিপিস্স ন হোতি. ন ৰেদনারামস্স খো, আৰুসো…পে… ন সঞ্ঞারামস্স খো, আৰুসো…পে… ন সঙ্খারারামস্স খো, আৰুসো…পে… ন ৰিঞ্ঞাণারামস্স খো, আৰুসো, ন ৰিঞ্ঞাণরতস্স ন ৰিঞ্ঞাণসম্মুদিতস্স, ৰিঞ্ঞাণনিরোধং জানতো পস্সতো যথাভূতং, ‘হোতি তথাগতো পরং মরণা’তিপিস্স ন হোতি…পে… ‘নেৰ হোতি ন ন হোতি তথাগতো পরং মরণা’তিপিস্স ন হোতি. অযং খো, আৰুসো, হেতু, অযং পচ্চযো, যেনেতং অব্যাকতং ভগৰতা’’তি.

‘‘সিযা পনাৰুসো, অঞ্ঞোপি পরিযাযো, যেনেতং অব্যাকতং ভগৰতা’’তি? ‘‘সিযা, আৰুসো. ভৰারামস্স খো, আৰুসো, ভৰরতস্স ভৰসম্মুদিতস্স, ভৰনিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি…পে… ‘নেৰ হোতি ন ন হোতি তথাগতো পরং মরণা’তিপিস্স হোতি. ন ভৰারামস্স খো, আৰুসো, ন ভৰরতস্স ন ভৰসম্মুদিতস্স, ভৰনিরোধং জানতো পস্সতো যথাভূতং, ‘হোতি তথাগতো পরং মরণা’তিপিস্স ন হোতি…পে… ‘নেৰ হোতি ন ন হোতি তথাগতো পরং মরণা’তিপিস্স ন হোতি. অযম্পি খো, আৰুসো, পরিযাযো, যেনেতং অব্যাকতং ভগৰতা’’তি.

‘‘সিযা পনাৰুসো, অঞ্ঞোপি পরিযাযো, যেনেতং অব্যাকতং ভগৰতা’’তি? ‘‘সিযা, আৰুসো. উপাদানারামস্স খো, আৰুসো, উপাদানরতস্স উপাদানসম্মুদিতস্স, উপাদাননিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি…পে… ‘নেৰ হোতি ন ন হোতি তথাগতো পরং মরণা’তিপিস্স হোতি. ন উপাদানারামস্স খো, আৰুসো, ন উপাদানরতস্স ন উপাদানসম্মুদিতস্স, উপাদাননিরোধং জানতো পস্সতো যথাভূতং, ‘হোতি তথাগতো পরং মরণা’তিপিস্স ন হোতি…পে… ‘নেৰ, হোতি ন ন হোতি তথাগতো পরং মরণা’তিপিস্স ন হোতি. অযম্পি খো আৰুসো, পরিযাযো, যেনেতং অব্যাকতং ভগৰতা’’তি.

‘‘সিযা পনাৰুসো, অঞ্ঞোপি পরিযাযো, যেনেতং অব্যাকতং ভগৰতা’’তি? ‘‘সিযা, আৰুসো. তণ্হারামস্স খো, আৰুসো, তণ্হারতস্স তণ্হাসম্মুদিতস্স, তণ্হানিরোধং অজানতো অপস্সতো যথাভূতং, ‘হোতি তথাগতো পরং মরণা’তিপিস্স হোতি…পে… ‘নেৰ হোতি ন ন হোতি তথাগতো পরং মরণা’তিপিস্স হোতি. ন তণ্হারামস্স খো, আৰুসো, ন তণ্হারতস্স ন তণ্হাসম্মুদিতস্স, তণ্হানিরোধং জানতো পস্সতো যথাভূতং, ‘হোতি তথাগতো পরং মরণা’তিপিস্স ন হোতি…পে. … ‘নেৰ হোতি ন ন হোতি তথাগতো পরং মরণা’তিপিস্স ন হোতি. অযম্পি খো, আৰুসো, পরিযাযো, যেনেতং অব্যাকতং ভগৰতা’’তি.

‘‘সিযা পনাৰুসো, অঞ্ঞোপি পরিযাযো, যেনেতং অব্যাকতং ভগৰতা’’তি? ‘‘এত্থ দানি, আৰুসো সারিপুত্ত, ইতো উত্তরি কিং ইচ্ছসি? তণ্হাসঙ্খযৰিমুত্তস্স, আৰুসো সারিপুত্ত, ভিক্খুনো ৰট্টং [ৰত্তং (স্যা. কং. ক.) ৰদ্ধং (পী.)] নত্থি পঞ্ঞাপনাযা’’তি. ছট্ঠং.