৩. পঠমসারিপুত্তকোট্ঠিকসুত্তং

৪১২. একং সমযং আযস্মা চ সারিপুত্তো, আযস্মা চ মহাকোট্ঠিকো বারাণসিযং ৰিহরন্তি ইসিপতনে মিগদাযে. অথ খো আযস্মা মহাকোট্ঠিকো সাযন্হসমযং পটিসল্লানা ৰুট্ঠিতো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা মহাকোট্ঠিকো আযস্মন্তং সারিপুত্তং এতদৰোচ –

‘‘কিং নু খো, আৰুসো সারিপুত্ত, হোতি তথাগতো পরং মরণা’’তি? ‘‘অব্যাকতং খো এতং, আৰুসো, ভগৰতা – ‘হোতি তথাগতো পরং মরণা’’’তি. ‘‘কিং পনাৰুসো, ন হোতি তথাগতো পরং মরণা’’তি? ‘‘এতম্পি খো, আৰুসো, অব্যাকতং ভগৰতা – ‘ন হোতি তথাগতো পরং মরণা’’’তি. ‘‘কিং নু খো, আৰুসো, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, আৰুসো, ভগৰতা – ‘হোতি চ ন চ হোতি তথাগতো পরং মরণা’’’তি. ‘‘কিং পনাৰুসো, নেৰ হোতি ন ন হোতি তথাগতো পরং মরণা’’তি? ‘‘এতম্পি খো, আৰুসো, অব্যাকতং ভগৰতা – ‘নেৰ হোতি ন ন হোতি তথাগতো পরং মরণা’’’তি.

‘‘‘কিং নু খো, আৰুসো, হোতি তথাগতো পরং মরণা’তি ইতি পুট্ঠো সমানো, ‘অব্যাকতং খো এতং, আৰুসো, ভগৰতা – হোতি তথাগতো পরং মরণা’তি ৰদেসি…পে… ‘কিং পনাৰুসো, নেৰ হোতি ন ন হোতি তথাগতো পরং মরণা’তি ইতি পুট্ঠো সমানো – ‘এতম্পি খো, আৰুসো, অব্যাকতং ভগৰতা – নেৰ হোতি ন ন হোতি তথাগতো পরং মরণা’তি ৰদেসি. কো নু খো, আৰুসো, হেতু, কো পচ্চযো যেনেতং অব্যাকতং ভগৰতা’’তি?

‘‘হোতি তথাগতো পরং মরণাতি খো, আৰুসো, রূপগতমেতং. ন হোতি তথাগতো পরং মরণাতি, রূপগতমেতং. হোতি চ ন চ হোতি তথাগতো পরং মরণাতি, রূপগতমেতং. নেৰ হোতি ন ন হোতি তথাগতো পরং মরণাতি, রূপগতমেতং. হোতি তথাগতো পরং মরণাতি খো, আৰুসো, ৰেদনাগতমেতং. ন হোতি তথাগতো পরং মরণাতি, ৰেদনাগতমেতং. হোতি চ ন চ হোতি তথাগতো পরং মরণাতি, ৰেদনাগতমেতং. নেৰ হোতি ন ন হোতি তথাগতো পরং মরণাতি, ৰেদনাগতমেতং. হোতি তথাগতো পরং মরণাতি খো, আৰুসো, সঞ্ঞাগতমেতং. ন হোতি তথাগতো পরং মরণাতি, সঞ্ঞাগতমেতং. হোতি চ ন চ হোতি তথাগতো পরং মরণাতি, সঞ্ঞাগতমেতং. নেৰ হোতি ন ন হোতি তথাগতো পরং মরণাতি, সঞ্ঞাগতমেতং. হোতি তথাগতো পরং মরণাতি খো, আৰুসো, সঙ্খারগতমেতং. ন হোতি তথাগতো পরং মরণাতি, সঙ্খারগতমেতং. হোতি চ ন চ হোতি তথাগতো পরং মরণাতি, সঙ্খারগতমেতং. নেৰ হোতি ন ন হোতি তথাগতো পরং মরণাতি, সঙ্খারগতমেতং. হোতি তথাগতো পরং মরণাতি খো, আৰুসো, ৰিঞ্ঞাণগতমেতং. ন হোতি তথাগতো পরং মরণাতি, ৰিঞ্ঞাণগতমেতং. হোতি চ ন চ হোতি তথাগতো পরং মরণাতি, ৰিঞ্ঞাণগতমেতং. নেৰ হোতি ন ন হোতি তথাগতো পরং মরণাতি, ৰিঞ্ঞাণগতমেতং. অযং খো, আৰুসো, হেতু অযং পচ্চযো, যেনেতং অব্যাকতং ভগৰতা’’তি. ততিযং.