৬. ঘোসিতসুত্তং

১২৯. একং সমযং আযস্মা আনন্দো কোসম্বিযং ৰিহরতি ঘোসিতারামে. অথ খো ঘোসিতো গহপতি যেনাযস্মা আনন্দো তেনুপসঙ্কমি…পে… একমন্তং নিসিন্নো খো ঘোসিতো গহপতি আযস্মন্তং আনন্দং এতদৰোচ – ‘‘‘ধাতুনানত্তং, ধাতুনানত্ত’ন্তি, ভন্তে আনন্দ, ৰুচ্চতি. কিত্তাৰতা নু খো, ভন্তে, ধাতুনানত্তং ৰুত্তং ভগৰতা’’তি? ‘‘সংৰিজ্জতি খো, গহপতি, চক্খুধাতু, রূপা চ মনাপা, চক্খুৰিঞ্ঞাণঞ্চ সুখৰেদনিযং. ফস্সং পটিচ্চ উপ্পজ্জতি সুখা ৰেদনা. সংৰিজ্জতি খো, গহপতি, চক্খুধাতু, রূপা চ অমনাপা, চক্খুৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, চক্খুধাতু, রূপা চ মনাপা উপেক্খাৰেদনিযা, চক্খুৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ৰেদনা…পে… সংৰিজ্জতি খো, গহপতি, জিৰ্হাধাতু, রসা চ মনাপা, জিৰ্হাৰিঞ্ঞাণঞ্চ সুখৰেদনিযং. ফস্সং পটিচ্চ উপ্পজ্জতি সুখা ৰেদনা. সংৰিজ্জতি খো, গহপতি, জিৰ্হাধাতু, রসা চ অমনাপা, জিৰ্হাৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, জিৰ্হাধাতু, রসা চ উপেক্খাৰেদনিযা, জিৰ্হাৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ৰেদনা…পে… সংৰিজ্জতি খো, গহপতি, মনোধাতু, ধম্মা চ মনাপা, মনোৰিঞ্ঞাণঞ্চ সুখৰেদনিযং. ফস্সং পটিচ্চ উপ্পজ্জতি সুখা ৰেদনা. সংৰিজ্জতি খো, গহপতি, মনোধাতু, ধম্মা চ অমনাপা, মনোৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, মনোধাতু, ধম্মা চ উপেক্খাৰেদনিযা, মনোৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ৰেদনা. এত্তাৰতা খো, গহপতি, ধাতুনানত্তং ৰুত্তং ভগৰতা’’তি. ছট্ঠং.