৪. উপেক্খাসুত্তং

৩৩৫. সাৰত্থিনিদানং. অদ্দসা খো আযস্মা আনন্দো…পে… ‘‘ৰিপ্পসন্নানি খো তে, আৰুসো সারিপুত্ত, ইন্দ্রিযানি; পরিসুদ্ধো মুখৰণ্ণো পরিযোদাতো. কতমেনাযস্মা সারিপুত্তো অজ্জ ৰিহারেন ৰিহাসী’’তি?

‘‘ইধাহং, আৰুসো, সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামি. তস্স ময্হং, আৰুসো, ন এৰং হোতি – ‘অহং চতুত্থং ঝানং সমাপজ্জামী’তি ৰা ‘অহং চতুত্থং ঝানং সমাপন্নো’তি ৰা ‘অহং চতুত্থা ঝানা ৰুট্ঠিতো’তি ৰা’’তি. ‘‘তথা হি পনাযস্মতো সারিপুত্তস্স দীঘরত্তং অহঙ্কারমমঙ্কারমানানুসযা সুসমূহতা. তস্মা আযস্মতো সারিপুত্তস্স ন এৰং হোতি – ‘অহং চতুত্থং ঝানং সমাপজ্জামী’তি ৰা ‘অহং চতুত্থং ঝানং সমাপন্নো’তি ৰা ‘অহং চতুত্থা ঝানা ৰুট্ঠিতো’তি ৰা’’তি. চতুত্থং.